Chhiartute Zawhna Siam . . .

Engtin nge Jehova Thuhretute’n rinpawlhna hi an thlîr?

▪ World Christian Encyclopedia sawi dân chuan khawvêl pumah hian “sakhaw hrang hrang 10,000” vêl a awm a. Chûng sakhaw hrang hrangte inkâra inremlohna chuan chhiatna nasa tak a thlen avângin, rinpawlhna ngaih dân chuan mi tam takte hnênah beiseina a pe a. He khawvêl inṭhen hranna ramah hian remna leh inpumkhatna a awmtîr theih an ring a ni.

Bible chuan inpumkhata awm tûrin min fuih a ni. Tirhkoh Paula chuan Kristian kohhran chu pêng tinte ‘rem taka inchuktuah leh inzawm khâwm’ mihring taksa nên a tehkhin a. (Ephesi 4:16) Chutiang bawkin tirhkoh Petera pawhin a unaute chu: “In zain rilru hmunkhatin awm ula,” tiin a fuih bawk a ni.—1 Petera 3:8.

Kristian hmasate chu hnam hrang hrang leh sakhaw hrang hrang awm pawlhna khawvêlah an chêng a. Chuti chung pawhin, sakhaw dangte nêna inpawlh chungchângah Paula chuan: “Ring lo leh ringtu chuan engnge chan dun an neih?” tiin zawhna a siam a. Tichuan, Kristiante chu “an zîng ata lo chhuak” tûrin a vaukhân zui a ni. (2 Korinth 6:15, 17) Paula chuan rinpawlhna a dem tih a chiang hle. Engvângin nge a dem?

Tirhkoh Paula chuan Kristian dik leh dik lote’n Pathian an biak tlân chu thil inrem lo, nghâwngkawl rual lo taka bah ang a nih thu a sawi a. (2 Korinth 6:14) Chu chuan Kristian dik rinna tihchhiat bâk eng dang mah a thlen lo vang. Paula’n a unaute a ngaihtuahna chu vêng chhûngah naupang awm ṭha duh lo ṭhenkhat an awm tih hretu pa pakhatin a fa a ngaihtuahna ang hi a ni. Fate ngaihtuahtu pa ber a nih angin, a fain a infiampui theih tûrte chungchângah ramri a khamsak a. Chûng a khuahkhirhnate chu mi tam takin an duh lo pawh a ni thei. Amaherawhchu, chu mi dinhmun atân chuan chutianga inlâk hranna chuan a fa chu thil ṭha lo ata a vênghim dâwn a ni. Chutiang bawkin, Paula chuan sakhaw dang laka inlâk hranna chuan Kristiante chu an thil chîn ṭha lote lakah a vênghim dâwn tih a hria a ni.

Chutianga inla hrang tûra tiin, Paula chuan Isua a entawn a ni. Isua chuan remna ûmna kawngah entawn tûr ropui ber siam mah se, ani chu rinpawlhna thiltihah a tel lo. Isua’n leia rawng a bâwl lai chuan, Pharisaite leh Saddukaite ang chi sakhaw pâwl hrang tam tak a awm a. A nihna takah chuan, hêng sakhaw pâwl hrangte hi Isua do tûr leh tihhlum theih nâna phiarru tûrin an ṭang tlâng hial a ni. Kawng lehlamah, Isua chuan a zirtîrte chu “Pharisaite leh Saddukaite zirtîrna laka fîmkhur tûrin” a tîr zâwk a ni.—Matthaia 16:12.

Tûn laiah eng ang nge ni ve? Rinpawlhna laka Bible min vaukhânna hi a la ding reng em? Ding reng e, bêla hriak leh tui kan dah pawlh avâng maia an inpawlh loh ang bawka sakhaw thurin chi hrang hrangte a inpawlh tak tak theih loh avângin. Entîr nân, sakhaw chi hrang hrang vuantute khawvêl remna atâna ṭawngṭai tûra an kal khâwm hian, tu pathian hnênah nge an ṭawngṭai? Kristianna rama Trinity Pathian hnênah nge ni a, Hindu pathian Brahma hnênah zâwk? A nih loh leh, Buddha hnênah nge an ṭawngṭai a, pathian dang hnênah zâwk?

Zâwlnei Mika chuan “ni hnuhnûngahte chuan” hnam tina mite chuan: “Lo haw ula, LALPA tlângah, Jakoba Pathian inah chuan i chho vang u; tichuan anin a kawng chanchinte chu min zirtîr ang a, a kalkawngahte chuan kan kal ang,” an la ti dâwn tih a sawi lâwk a ni. (Mika 4:1-4) Chutianga an kal khâwm avângin, khawvêl pumah remna leh inpumkhatna a awm ang—thurin chi hrang hrangte chawhpawlhtu rinpawlhna vâng ni lovin, mi zawng zawngin rinna dik pakhat an pawm ṭheuh avâng zâwkin. (w10-E 06/01)

[Phêk 20-naa milem]

Khawvêl sakhaw lian zualte rinpawlhna khâwmpui, 2008

[Milem Hawhtîrtu]

REUTERS/Andreas Manolis