Jehova Niin A Laih Lan Tûr Chu
Jehova Niin A Laih Lan Tûr Chu
“Lalpa nî chu rûkru angin a lo thleng ngei ang, . . . lei leh a chhûnga hnathawh awmte hi a kângral ang.”—2 PET. 3:10.
1, 2. (a) Engtin nge tûn lai khawvêl suaksual tak hi a tâwp dâwn? (b) Eng zawhnate nge kan ngaihtuah dâwn?
TUN lai khawvêl suaksual tak hian mihringin Pathian Jehova ṭanpuina tel lovin hlawhtling takin ro an inrêlsak thei tih dâwt thu a ṭanchhan a. (Sâm 2:2, 3) Dâwt thu ṭanchhana din thil engpawh chu a ding kumkhua thei em? Thei lo ve! Chuti chung pawhin, Setana khawvêl amaha a tlûkchhiat hun kan nghah kher a ngai lo. Pathianin a hun ruatah a duh dân kawng hmangin a tiboral zâwk ang. He khawvêl suaksual chunga Pathian rorêlna chuan a rorêl dikna leh a hmangaihna chu ṭha famkimin a târ lang dâwn a ni.—Sâm 92:7; Thuf. 2:21, 22.
2 Tirhkoh Petera chuan: “Lalpa nî chu rûkru angin a lo thleng ngei ang, chu mi niah chuan vânte chu nasa taka riin a boral ang a, thil bulte chu meia emralin a awm tawh ang a, lei leh a chhûnga hnathawh awmte hi a kângral ang,” tiin a ziak a ni. (2 Pet. 3:10) Heta târ lan “lei” leh “vânte” hi eng nge a nih? Meia emrala awm tûr “thil bulte” chu eng nge ni? Tin, Petera’n “lei leh a chhûnga hnathawh awmte . . . a kângrâl” a tih hian eng a tihna nge ni? Hêng zawhnate chhânna hriat hian nakin lawka lo thleng tûr thil hlauhawm takte atâna inbuatsaih tûrin min ṭanpui ang.
Boral Tûr Lei leh Vânte
3. Petera thawn hnih 3:10-a târ lan “vânte” hi eng nge a nih a, engtin nge a boral ang?
3 “Vânte” tih ṭawngkam hi Bible-a entîr neia hman a nih hian, an khua leh tuite chunga intilal êm êm rorêltu thiltithei takte sawina a ni fo ṭhîn. (Is. 14:13, 14; Thup. 21:1, 2) ‘Boral tûr vânte’ chuan Pathian ngaihsak lo mipuite chunga rorêlna a entîr a. ‘Nasa taka ria’ a boralna chuan hêng vânte rang taka tihchimihna a entîr ngei ang.
4. “Lei” chu eng nge ni a, engtin nge tihboral a nih ang?
4 “Lei” chuan Pathian laka inmihran khawvêla mite a entîr a. Chutiang khawvêl chu Nova hun laiin a lo awm tawh a, Pathian thupêkin Tuilêt hmanga tihtâwp a ni. “Tûnah vânte leh lei awmte hi chu mi thu avâng vêk chuan Pathian ngaihsak lo mite rorêl leh boral nî atana dahin hâl tûra khêk a ni.” (2 Pet. 3:7) Tuilêt chuan vawi leh khatah mi suaksual zawng zawngte a tihboral laiin, lo thleng tûr tihboralna chu “hrehawm nasa tak” a thlen chhûngin a intahtawlin a thleng chho vang. (Thup. 7:14) Chu hrehawmna thlen ṭantirh lam chuan, Pathianin politics thuneitute chu “Babulon Khaw Ropui” tichhe tûrin a chêttîr ang a, chutiang chuan chu sakhaw lama nawhchizuar a tenzia chu a târ lang ang. (Thup. 17:5, 16; 18:8) Tichuan, hrehawmna tâwpna tûr Armageddon indonaah, Pathian Jehova ngei chuan Setana khawvêl a la bâng zawngte chu a nuai bo vek ang.—Thup. 16:14, 16; 19:19-21.
“Thil Bulte Chu . . . Emralin A Awm Tawh Ang”
5. Entîr nei thil bulte zîngah hian engte nge tel?
5 ‘Emrala’ awm tûr “thil bulte” chu eng nge ni? Petera sawi “thil bulte” chu tûn lai khawvêl miziate, rilru put hmangte, kawngte, leh thiltumte awmtîrtu ber thilte sawina a ni. Chu “thil bulte” zîngah chuan “âwih lo fate chunga thâwk mêktu” “khawvêl thlarau,” a tel a ni. (Ephesi 2:1-3 chhiar rawh; 1 Kor. 2:12) Chu thlarau, a nih loh leh “boruak” chuan Setana khawvêl chu a fan hneh hle a. Chu chuan mite chu “boruaka thuneihna lal” luhlul tak leh chapo tak, Setana rilru ang târ lang thei tûr zâwnga thil ngaihtuah tûr, remruat tûr, ṭawng tûr, leh thilti tûrin a tur tlat a ni.
6. Engtin nge khawvêl thlarau chu a lan chhuah?
6 Chuvângin, khawvêl thlarau hîp apiangte rilru leh thinlung chu an hriat emaw, hriat loh emawin Setana’n a thunun a, a ngaihtuahna leh rilru put hmang chu an lantîr phah ta a. Chuvângin, Pathian duhzâwng pawh ngaihtuah tel miah lovin an duh apiang an ti ta mai ṭhîn a ni. Dinhmun an tawhte chu chapona emaw, mahni hmasialna emawin an hmachhawn a, thu neitute chungah helna rilru put hmang an lantîr bawk a; tin, inkhuahkhirh miah lovin “tisa châkna te, mit châkna te” bâwihah an inpe bawk a ni.—1 Johana 2:15-17 chhiar rawh.
7. Engvângin nge ‘kan thinlung kan vên ṭhat’ ang?
7 Chuti chu, ṭhian kawm te, lehkha chhiar te, intihhlimna te, leh Internet-a Web site kan hawn tûrte chungchânga Pathian leh a tehna mila thu tlûkna fing siama ‘kan thinlung vên ṭhat’ chu a va pawimawh tak êm! (Thuf. 4:23) Tirhkoh Paula chuan: “Fîmkhur rawh u, chutilochuan tupawhin Krista thu ang ni lovin, mihring thurochhiah leh khawvêl A Aw B ang zâwkin an thu fing leh bumna mai maiin râl lâkin an la dah ang che u,” tiin a ziak a ni. (Kol. 2:8) Chu thu pêk zawm chu Pathian Jehova nî kan hnaih telh telh hian a hmanhmawhthlâk lehzual a ni; chu mi nî chuan Setana khawvêla “thil bulte” chu a vaia “emralin,” Pathian thinurna meia kâng thei lo a nih lohzia a pho lang ang. Hei hian Malakia 4:1 thu hi min hriatchhuahtîr a ni: “Nî chu a lo thleng e, rawhtuina mei angin a kâng a ni; mi chapo zawng zawng leh sual titu zawng zawngte chu buhpâwl an ni ang: chu ni lo thleng chuan anmahni a kâng ang; zung leh zâr chenin a zuah lo vang,” tih hi.
“Lei leh A Chhûnga Hnathawh Awmte Hi A Kângral Ang”
8. Engtin nge lei leh a chhûnga hnathawh awmte chu a ‘kanral’?
8 Petera’n “lei leh a chhûnga hnathawh awmte hi a kângral ang” a tih khân, eng a tihna nge ni? Heta “kângral” tia lehlin thu hi meia rorêlna dawng tlâk anga “hmuh chhuah” emaw, “laih lan” emaw tia lehlin theih a ni bawk. Petera chuan hrehawmna nasa tak a thlen chhûngin Pathian Jehova chuan Setana khawvêl chu lai langin, Amah leh A Lalram dotu leh chu mi avânga tihboral phu angin a pho chhuak ang, a tihna a ni. Chu mi hun chungchâng sawi lâwkna thu chu Isaia 26:21-ah heti hian kan chhiar a ni: “LALPA chu, an sualna avânga leia awmte hrem tûrin a awmna ata a lo chhuak dâwn a ni: lei pawh hian a thisente chu a tilang ang a, mi an thahte chu a khuh tawh lo vang,” tiin.
9. (a) Eng nge kan hnâwl ang a, engvângin nge? (b) Eng nge neih kan tum ang a, engvângin nge?
9 Pathian Jehova nî-ah chuan khawvêl leh a thlarau suaksual thununa awmte chuan an nihna dik tak târ langin, an inthat tawn hial ang. A nihna takah chuan, tûn laia tharum thawhna tel intihhlimna tam takte hi miin “a ṭhenawm kut chungah a kut a lek” hun atâna an rilru lo buatsaih lâwk nân a ni thei ngei ang. (Zak. 14:13) Chuti chu, Pathian ten zâwng mizia, chapona leh tharum thawh ngainatna ang chi-te min neihtîr thei thil engkim—cinema te, lehkhabu te, video game te, leh thil dang dangte—kan hnâwl chu a va pawimawh tak êm! (2 Sam. 22:28; Sâm 11:5) Pathian thlarau thianghlim rah neih chu i tum tlat zâwk ang u; chutiang mizia te chu Pathian Jehova nîa entîr nei meiin a kâng thei dâwn si lo va.—Gal. 5:22, 23.
“Vân Tharte leh Lei Thar” Chu
10, 11. “Vân tharte” leh “lei thar” chu eng nge ni?
10 Petera thawn hnih 3:13 chhiar rawh. “Vân tharte” tih chu “Jentailte nî” a kin hun, kum 1914-a din Pathian vân lam Lalram hi a ni a. (Lk. 21:24) He sawrkâr hi Krista Isua leh a rorêlpui mi 1,44,000-te hmanga din a ni a, chûng a rorêlpui tûr zînga a tam zâwk chuan an vân lam lâwmman chu an dawng tawh a ni. Thu Puan bu-ah chuan, anni chu “khaw thianghlim Jerusalem thar . . . mo a pasal ela a inchei anga peih diamin Pathian hnêna mi vân ata lo chhuk” anga târ lan an ni a. (Thup. 21:1, 2, 22-24) Lei lam Jerusalem chu hmân lai Israel ram sawrkâr laipui awmna a ni ang bawk khân, Jerusalem Thar leh Mo Neitu chuan kal hmang thar sawrkârna chu an din a ni. Lei lam thil rawn thununin, he khawpui hi ‘vân ata a lo chhuk’ ang.
11 “Lei thar” hian Pathian Ram hnuaia intukluh an duhzia lantîr tawh lei lam mihring tharte a kâwk a ni. A tâwp a tâwpah chuan, tûn la laa Pathian mite awmna thlarau lam paradis chu “khawvêl lo la awm tûr” mawi takah a nih tûr ang thlapin a ni tawh ang. (Heb. 2:5) Chu kal hmang tharah chuan engtin nge kan tel ve theih ang?
Pathian Jehova Ni Ropui Atân Inbuatsaih Rawh
12. Engvângin nge Pathian Jehova nî lo thleng chu khawvêl tân mak tak a nih ang?
12 Paula leh Petera chuan Jehova nî lo thlen dân tûr chu “rûkru angin” a ni ang tih an sawi lâwk a; chu chu a rûk a râlin, beisei loh takin tihna a ni. (1 Thessalonika 5:1, 2 chhiar rawh.) Chu mi nî beisei reng Kristian dikte pawhin a lo thlen thut dân chu mak an ti ang. (Mt. 24:44) Amaherawhchu, khawvêl hian mak tih bâka tam a tawng dâwn. Paula chuan heti hian a ziak a ni: “‘Muanna leh himna,’ tia [Pathian Jehova hnên ata inla hrangte’n] an sawi lai takin hmeichhe nau vei angin chawp leh chilha boralna an chungah a thleng ang a, an pumpelh tawp lo vang,” tiin.—1 Thes. 5:3.
13. Engtin nge “Muanna leh himna” tih thu puan chhuah buma kan awm loh vang?
13 “Muanna leh himna” tia puan chhuah chu Diabola tihchhuah dâwt thu dang mai a ni a; chu chuan Pathian Jehova chhiahhlawhte chu a bum tawp lo vang. Paula chuan: “Nangni zawng chu mi Nî chuan rûkru anga a nanna tûr che uin thimah in awm lo ve; êng fate leh ni fate in ni vek si a,” tiin a ziak a ni. (1 Thes. 5:4, 5) Chuvângin, Setana khawvêl thim ata hla tak, êngah chuan i awm ang u. Petera chuan: “Duh takte u, nangnin chûng thu chu in lo hriat lâwk avângin fîmkhur rawh u, chutilochuan [Kristian kohhran chhûnga zirtîrtu suak] mi sualte dik lohnaa hruai bova awmin in nghet ṭha lai in tlu dah ang e,” tiin a ziak a ni.—2 Pet. 3:17.
14, 15. (a) Engtin nge Pathian Jehova chuan min chawimawi? (b) Thlarauva thâwk khum eng thute nge kan ngaih pawimawh ang?
14 Pathian Jehova chuan ‘fîmkhur tûrin’ min hrilh mai lo. Chutih ahnêkin, ani chuan nakina thil lo thleng tûr tlângpui chu min ‘hriat lâwktîrin,’ min chawimawi zâwk mah a ni.
15 Mahse, lungchhiatthlâk takin ṭhenkhat chuan harhvâng taka awm a ngaihzia hriattîrnate chu an ngai pawimawh lo emaw, an deusawh emaw a. ‘Chutiang hriattîrna chu kum sâwmbi têl kan hre châmchî tawh alâwm,’ an ti mai thei. Amaherawhchu, chutiang thu sawitute chuan bâwih rinawm pâwl mai ni lovin, Pathian Jehova leh a Fapa chu an ringhlel a ni tih an hre reng tûr a ni. Pathian Jehova chuan: “Nghâk rawh,” a ti a. (Hab. 2:3) Isua pawhin: “Ngaihven rawh u, eng niah nge in Lalpa a lo kal dâwn in hre si lo,” a ti bawk. (Mt. 24:42) Chu bâkah, Petera chuan: “Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?” tiin a ziak ve bawk a ni. (2 Pet. 3:11, 12) Hêng ṭhahnemngaihna ṭawngkamte hi bâwih rinawm pâwl leh a Governing Body chuan an ngai pawimawh lo ngai lo vang!
16. Eng ang rilru put hmang nge kan pumpelh ang a, engvângin nge?
16 Dik takin, Pu ber lo thleng lawk lo tûra ngaitu chu “bawi sual” a ni. (Mt. 24:48) Chu bâwih sual chu 2 Petera 3:3, 4-a sawi lan mite zîngah a tel a. Petera chuan “ni hnuhnûngahte chuan nuihsantute” an lo awm ang a, anni chu “anmahni châkna anga awmin,” thu âwih taka Pathian Jehova nî rilrua vawng rengte chu an nuihsan ang tih a ziak a ni. Ni e, Pathian rawngbâwl leh a Lalram thlâwp tum aiin, chutianga nuihsantute chuan anmahni leh an duhzâwng lam chu an ngaihsak tlat a ni. Chutiang thu âwih lohna leh rilru put hmang hlauhawm tak chu i nei ve ngai lo vang u! Chutih ahnêkin, Lalram thu hrilhna leh zirtîr siamnaah inhmangin, leh Pathian Jehova hun leh ni ruat lam ngaihtuah buai lutuk lovin, ‘kan Lalpa dawhtheihzia chu chhandamnaah i ruat ang u.’—2 Pet. 3:15; Tirhkohte 1:6, 7 chhiar rawh.
Chhandamna Pathian Chu Rinchhan Rawh
17. Engtin nge Kristian mi rinawmte khân Jerusalem khawpui chhuahsan tûra Isua fuihna chu an chhân lêt a, engvângin nge?
17 C.E. 66-a Rom sipaite’n Judai ram an rûn hnu chuan, Kristian rinawmte chuan hun remchâng hmasa bera Jerusalem khawpui chhuahsan tûra Isua fuihna chu an zâwm a ni. (Lk. 21:20-23) Engvângin nge rang tak leh rilru pêng hauh lova an chhuahsan nghâl? Isua vaukhânna pêk chu rilrua an vawn reng vâng a ni tih a chiang hle. Anni chuan Isua sawi lâwk angin, an thu tlûkna siamin harsatna a thlen ang tih an beisei ngei bawk. Mahse, chutih rual chuan, Pathian Jehova chuan a mi rinawmte chu a thlahthlam ngai lo tih an ring tlat bawk a ni.—Sâm 55:22.
18. Luka 21:25-28-a kan hmuh Isua thusawite chuan hrehawmna nasa tak lo thleng tûr i ngaih dân chu engtin nge a thunun?
18 Keini pawhin Pathian Jehova chu kan rinchhan tlat tûr a ni, ani chu he kal hmangin mihring chanchina hrehawmna nasa ber a tawh huna min chhan chhuak theitu awmchhun a ni si a. Hrehawmna nasa tak a inṭan hnu leh Pathian Jehova’n khawvêl thil dangte chunga a rorêlna a thlentîr hma engtik lai emawah chuan, mite chu “thlabâr avâng leh khawvêla thil lo thleng tûr chu ngaihtuah avângin . . . an thi dang ang.” Amaherawhchu, Pathian Jehova hmêlmate an thlabâr hle laiin, a chhiahhlawh rinawmte erawh chu thlamuang takin an awm ang a. An chhan chhuahna a hnai tawh tih an hriat avângin an hlim zâwk mah ang.—Luka 21:25-28 chhiar rawh.
19. A dawta thuziakah eng nge kan ngaihtuah dâwn?
19 Ni e, khawvêl leh a “thil bulte” laka inla hrangte chan tûr chu a va phûrawm tak êm! Mahse, a dawta thuziakin a hrilhfiah angin, nunna neih kan duh chuan thil ṭha lo pumpelh aia tam kan tih a ngai a. Pathian Jehova tilâwmtu miziate kan neih leh a pawm tlâk hnate kan thawh a ngai a ni.—2 Pet. 3:11, 12. (w10-E 07/15)
Kan Hrilhfiah Thei Em?
• Tûna awm mêk ‘lei leh vânte’ hian eng nge a entîr?
• “Thil bulte” hian eng nge a entîr?
• “Vân tharte leh lei thar” hian eng nge a entîr?
• Engvângin nge Pathian chu kan rinchhan tlat?
[Zirlai Atâna Zawhnate]
[Phêk 13-naa milem]
Engtin nge ‘i thinlung vêng ṭhain,’ khawvêl ata i inlâk hran theih?
[Phêk 14-naa milem]
Engtin nge ‘Lalpa dawhtheihzia chu chhandamnaah kan ruat’ tih kan lantîr?