“Mi Eng Ang Nge In Nih Tûr Le?”
“Mi Eng Ang Nge In Nih Tûr Le?”
“Chûng thilte chu chutianga boral vek tûr a ni tih in hriat avângin . . . awm dân thianghlim leh Pathian ngaihsak kawngah chuan mi eng ang nge in nih tûr le?”—2 PET. 3:11, 12.
1. Engvângin nge Petera lehkha thawn pahnihna chu chutih hun laia Kristiante tân a hun taka fuihna a nih?
TIRHKOH Petera’n thlarauva thâwk khum a lehkha thawn pahnihna a ziak lai chuan, Kristian kohhran chuan tihduhdahna nasa tak a lo tuar tawh a; mahse, chu chuan ṭhahnemngai lo tûr emaw, pung lo tûr emawin a dang chuang lo. Chuvângin, Diabola chuan tûn hmaa a lo hman tawh ṭhin tih dân dang chu an chungah a hmang ta a. Petera târ lan angin, Setana chuan Pathian mite chu “mit uirêa khat” leh “awh hmang thinlung” nei zirtîrtu derte hmang chuan tihchhiat a tum a ni. (2 Pet. 2:1-3, 14; Jud. 4) Chutiang a nih avângin, Petera lehkha thawn pahnihna chu rinawmna vawng tûra tih tak zeta infuihna a ni.
2. Petera thawn hnih bung 3-ah hian eng thute nge chuang a, eng zawhnate nge kan inzawh ang?
2 Petera chuan: “He bâwktêa ka awm chhûng zawng hian nangmahni hriatpuiin chawh harh fo che u hi ṭha ka ti a ni . . . ka bâwktê dah bo hun chu a thleng thuai ang tih ka hre si a. A ni, ka kal chhuah hnuin chûng thil chu in hriat reng fo theih nân ka bei ang,” tiin a ziak a. (2 Pet. 1:13-15) Ni e, Petera chuan a thi dâwn tawh tih a hria a, mahse a hun taka a pêk hriattîrna chu hriat reng ni tûrin a duh a ni. A duh ang ngeiin, a hriattîrna thute chu Bible-ah a chuang a, tûn thlengin kan la chhiar reng thei a ni. Petera lehkha thawn pahnihna bung 3-ah chuan he kal hmang tâna ‘ni hnuhnûng’ chungchâng leh entîr nei lei leh vânte tihchhiatna a chuan avângin, chu chu kan ngaihven bîk hle. (2 Pet. 3:3, 7, 10) Petera chuan kan tân eng fuihna thu nge a sawi? Chu fuihna thu nunpuina chuan Pathian Jehova pawm hlawh tûrin engtin nge min ṭanpui ang?
3, 4. (a) Petera chuan eng thu nge a sawi a, eng vaukhânna nge a pêk? (b) Eng thu pathumte nge kan ngaihtuah dâwn?
3 Setana khawvêl emral a nih dân tûr a sawi hnuah, Petera chuan: “Awm dân thianghlim leh Pathian ngaihsak kawngah chuan mi eng ang nge in nih tûr le?” tiin a sawi a. (2 Pet. 3:11, 12) Hêng thute a sawi hian, Petera chuan mi eng ang nge nih ngai tih chungchângah zawhna a siam tihna a ni lo. Chutih ahnêkin, mahni inenfiah tûrin min chawk tho zâwk a ni. Ani chuan Pathian Jehova duhzâwng titute leh amah tilâwmtu miziate lantîrtute chauh chu “phuba lâk nî” a thlen hunah an dam khawchhuak ang tih a hria a. (Is. 61:2) Chuvângin, heti hian a sawi zawm a ni: “Chutichuan duh takte u, nangnin chûng thu chu in lo hriat lâwk avângin fîmkhur rawh u, chutilochuan [zirtîrtu suak] mi sualte dik lohnaa hruai bova awmin in nghet ṭha lai in tlu dah ang e,” tiin.—2 Pet. 3:17.
4 ‘Hriat lâwkna’ neite zînga mi a nih angin, Petera chuan ni hnuhnûnga Kristiante tân an rinawmna vawng tûra an fîmkhur a ngai zual bîk tih a hria a. A hnuah, tirhkoh Johana chuan fîmkhur a ngaih zual chhan chiang takin a hrilhfiah a ni. Ani chuan vân ata Setana paih thlâkna leh “Pathian thupêkte zâwma Isua hriattîrna thu pawmte” chunga “thinur êm êma” a awm lai chu a lo hmu lâwk a ni. (Thup. 12:9, 12, 17) Pathian chhiahhlawh hriak thih rinawmte leh an ṭhian “berâm dang” rinawmte chuan an rinawmna an hloh lo vang. (Joh. 10:16) Mahse, a mi malin eng nge kan an dâwn? Kan rinawmna chu kan vawng reng ang em? Hêng thil pathum, (1) Pathian lawm zâwng miziate neih, (2) nungchang lam leh thlarau lama bawlhhlawh kai lo leh sawisêlbova awm, leh (3) fiahnate thlîr dân dik neih kan tum tlat chuan, rinawmna vawng tûra ṭanpuina kan dawng ang. Hêng hi i lo ngaihtuah ang u.
Pathian Lawm Zâwng Miziate Nei Rawh
5, 6. Eng mizia nge neih kan tum ang a, engvângin nge ‘taihmâk chhuah’ a ngaih?
5 Petera chuan a lehkha thawn pahnihna ṭan tirh lamah: “Taihmâk rêng rêng chhuahin, in rinnaah chuan ṭhatna telh ula, in ṭhatnaah chuan hriatna telh ula, in hriatnaah chuan insûmna telh ula, in insûmnaah chuan chhelna telh ula, in chhelnaah chuan Pathian ngaihsakna telh ula, in Pathian ngaihsaknaah chuan unaute hmangaihna telh ula, in unaute hmangaihnaah chuan hmangaihna telh rawh u. Chûng chu in ta a nih a, a pun zêl si chuan kan Lalpa Isua Krista hriatna kawngah hian thatchhe lo leh rah lo lovin a siam ṭhîn che u a ni,” tiin a ziak a ni.—2 Pet. 1:5-8.
6 Pathian lawm zâwng miziate nei tûra min ṭanpuitu thilte ti tûr chuan ‘taihmâk chhuah’ a ngai ngei mai. Entîr nân, Kristian inkhâwm zawng zawnga tel tûr te, nî tina Bible chhiar tûr te, leh mahnia Pathian thu zirna ṭha tak nei reng tûrte chuan taihmâk chhuah a ngai a. Tin, Chhûngkuaa Pathian Biakna neih zân hlimawm tak, awmze nei tak, leh hunbi neia hmang ziah thei tûr chuan thawhrim leh ṭha taka ruahman lâwk a ngai a ni. Mahse, tihṭhana kan lo neih tawh chuan, a lo awlsamin, a bîk takin a sâwtna kan hmuh hnu hian a awlsam lehzual a ni.
7, 8. (a) Engtin nge ṭhenkhat chuan Chhûngkuaa Pathian Biakna neih zân chungchâng an sawi? (b) Engtin nge in chhûngkuaa Pathian biakna neih chu in sâwtpui?
7 Chhûngkuaa Pathian biakna neih chungchângah unaunu pakhat chuan: “Thil tam tak kan zir theih phah,” tiin a sawi. Unaunu dang chuan: “Dik taka sawi chuan, book study hi kan inkhâwmte zînga ka duh ber a nih avângin kan nei tawh dâwn lo tih ka hriat chuan ka ui hle a. Mahse, tûnah Chhûngkuaa Pathian Biakna neih zân kan hman tâk hnu chuan, Pathian Jehova’n kan thil mamawh leh kan mamawh hun a hria tih ka hre ta,” tiin a sawi bawk. Chhûngkaw lû pakhat chuan: “Chhûngkuaa Pathian biakna hian nasa takin min ṭanpui a ni. Nupa kan nih anga kan thil mamawh mila siamrem theih inkhâwmna kan nei thei chu a ropui ngei mai! Kan pahnih hian thlarau thianghlim rah lan chhuahtîrna kawngah hmasâwnna nei niin kan inhria a, rawngbâwlnaah pawh tûn hma aiin kan hlim lehzual a ni,” tiin a sawi a. Chhûngkaw lû dang chuan: “Naupangte chuan anmahnia zir bingna neiin thil thar tam tak an zir a, nuam an ti thei khawp mai. He ruahmanna hian Pathian Jehova’n kan ngaih pawimawhte hriain, kan ṭawngṭainate a chhâng a ni tih min rintîr lehzual a ni,” tiin a sawi bawk. Pathian min pêk ruahmanna ṭha tak chunga hêng an rilru put hmang sawi chhuahte hi i ṭâwmpui ve em?
8 Chhûngkuaa Pathian biakna in neihna tûr chu thil pawimawh vak lote tihsukuktîr suh ang che. Nupa tuak khat chuan heti hian an sawi a ni: “Nilaithawhṭanni kal ta vawi li zet chu, kan chhûngkuaah eng engemaw a thlen avângin chhûng inkhâwm kan ṭhulh phah ṭêp ṭhîn a; mahse, kan tihsukuktîr chuang lo,” tiin. A châng chuan inkhâwm hun thlâk danglam chu a ngai ngei ang. Chuti chung pawhin, Chhûngkuaa Pathian Biakna in neih zân chu chawlhkâr khat tê pawh ṭhulh loh tum tlat ang che u!
9. Engtin nge Pathian Jehova chuan Jeremia chu a ṭanpui a, a hnên aṭangin eng nge kan zir theih?
9 Zâwlnei Jeremia chu kan tân entawn tûr ṭha tak a ni. Ani chuan Pathian Jehova hnên aṭanga a dawn thlarau lam chaw chu a mamawhin, a ngaihlu hle a. Chu chaw ṭha avâng chuan a thusawi ngaithla duh lote hnênah pawh chhel takin thu a hrilh theih phah a ni. Ani chuan: “LALPA thu chu . . . ka ruh chhûnga mei kâng inkhung ta ang mai hian . . . a awm si ṭhîn,” tiin a sawi. (Jer. 20:8, 9) Chu chuan Jerusalem chhiatnaa a vâwrtâwp thleng ta, hun khirh tak chhûnga chhel tûrin a ṭanpui bawk. Tûnah chuan, Pathian lehkha Thu a bu kimin kan nei ta a. Taima taka kan zir a, Pathian thil thlîr dân kan ṭâwmpui chuan keini pawh Jeremia ang bawkin hlim takin rawngbâwlnaah kan chhel ang a, fiahna hnuaiah kan rinawmin, thlarau lam leh nungchang lamah kan thianghlim reng bawk ang.—Jak. 5:10.
“Bawlhhlawh Kai Lo leh Sawisêlbovin” Awm Zêl Rawh
10, 11. Engvângin nge ‘bawlhhlawh kai lo leh sawisêlbova’ awm tûrin taihmâk kan chhuah ang a, chutiang tûr chuan mahni lamah eng nge ngai?
10 Kristian kan nih angin, tâwpna hunah kan awm tawh tih kan hria a. Chuvângin, khawvêl hian Pathian tenzâwng thil chi hrang hrang duhâmna te, mipat hmeichhiatna lama inphalraina te, leh tharum thawhna ang chite a âtchilh pawh hi mak kan ti lo. Setana min beih dân chu heti hian khaikhâwm theih a ni ang: ‘Pathian chhiahhlawhte hi tihhlauh theih an nih loh chuan, tihbawlhhlawh theih tal an ni ang,’ tiin. (Thup. 2:13, 14) Chuvângin, Petera fuihna thu chu rilruah kan vawng reng tûr a ni: “Bawlhhlawh kai lo leh sawisêlbovin, thlamuang taka in awm a hmuh theih nân che u, taihmâk chhuah rawh u,” tih hi.—2 Pet. 3:14.
11 Petera chuan a hmaa a fuih ang bawkin “taihmâk chhuah” tûrin fuihna a pe leh a. Pathian Jehova—chûng thute ziak tûra Petera thâwk khumtu—chuan Setana khawvêl bawlhhlawhna tihbawrhbâna awm lo va, ‘bawlhhlawh kai lo leh sawisêlbova’ awm reng tûr chuan theihtâwp kan chhuah a ngai tih a hre chiang hle. Theihtâwp chhuahnaah chuan châkna ṭha lote’n min lâk bo loh nâna kan thinlung vênhim pawh a tel a. (Thufingte 4:23; Jakoba 1:14, 15 chhiar rawh.) Chu bâkah, kan Kristian nun kawng makti a, ‘min sawichhe ṭhîntute’ kâra dinngheh tlat a tel bawk a ni.—1 Pet. 4:4.
12. Luka 11:13-ah eng thutiam nge kan hmuh?
12 Kan ṭhat famkim lohna avângin, thil dik tih chu a harsa a. (Rom 7:21-25) Tih tak zeta dîltute hnêna thlarau thianghlim phal taka pe ṭhîntu Pathian Jehova hnên lam kan pan chauhvin kan hlawhtling thei ang. (Lk. 11:13) Chu thlarau chuan keimahniah Pathian pawm tlâk min nihtîrtu miziate min neihtîr a; tin, nuna kan tawh thlêmnate do thei tûra min ṭanpui bâkah, Pathian Jehova nî a hnaih ruala a pun chhoh beiseiawm tak fiahnate do thei tûrin min ṭanpui bawk a ni.
Fiahna Chuan Tichak Che Rawh Se
13. Fiahna kan tawhin, engin nge chhel tûrin min ṭanpui ang?
13 He kal hmang hluia kan awm chhûng hian fiahna chi hrang hrang kan tâwk reng dâwn a. Mahse, engvângin nge lunghnual ai chuan, chûng fiahnate chu Pathian i hmangaihna nemngheh nân leh amah leh a Thu i rinna tihngheh sauh nân i hman loh vang? Zirtîr Jakoba chuan heti hian a ziak a ni: “Ka unaute u, inrinna fiahna chuan chhelna a siam tih hriain, thlêmna tinrêng in tawh hunin lâwmna hlîrah ngai rawh u,” tiin. (Jak. 1:2-4) Tin, Pathian Jehova chuan “amah ngaihsaktute chu thlêmna ata chhanchhuah dân” a hria tih hre reng bawk ang che.—2 Pet. 2:9.
14. Engtin nge Josefa entîrna chuan a tihchak che?
14 A pianpui unaute ngeiin sala an hralh Jakoba fapa Josefa entîrna hi ngaihtuah teh. (Gen. 37:23-28; 42:21) Nunrâwnna râpthlâk tak a tawh avângin Josefa chuan a rinna chu a hloh mai em? Thil ṭha lo tak a chunga a thlen phaltu Pathian chungah a thinur em? Bible chuan chutiang a nih loh thu chiang takin a sawi! Chu bâkah, chu chu Josefa fiahna tawh hnuhnûng ber a ni lo. A hnuah pawh mi pâwngsual tum anga puhna tâwkin, lung in-ah a tâng a. Chu mi ṭum pawh chuan a Pathian ngaihsakna chu a hloh chuang lo. (Gen. 39:9-21) Hloh ahnêkin, fiahna chu chak nân a hmang zâwk a, malsâwmnaa vûr a ni ta a ni.
15. Naomi entîrna siam aṭangin eng nge kan zir theih?
15 Fiahnate chuan min tilungngaiin, min tilunghnual thei hial a. Josefa pawhin chutianga awm châng chu a neih ve ngei a rinawm. Pathian chhiahhlawh dangte pawh chutiang chuan an awm tawh ṭhîn a ni. Entîr nân, a pasal leh a fapate pahnih sûntu Naomi hi ngaihtuah teh. Ani chuan: “Naomi min ti tawh suh u, [“Khâ” tihna] Maraii min ti zâwk rawh u. Engkimtitheia chuan lungchhiatthlâk takin min ti ta si a,” tiin a sawi. (Rut. 1:20, 21) Naomi chhân lêt dân chu thil pângngai tak leh hriatthiamawm tak a ni. Mahse, Josefa ang bawkin a rinna a hloh lo va, a rinawmna pawh a hloh hek lo. Tichuan, Pathian Jehova chuan chu hmeichhe ngaihhlutawm tak chu mal a sâwm ta a ni. (Rut. 4:13-17, 22) Chu mai a ni lo, lei Paradis lo awm tûrah chuan Setana leh a khawvêl suaksualin an awmtîr chhiatna zawng zawng chu a sût vek bawk ang. “Tûn hma thilte chu hriat rengin a awm tawh lo vang a, rilruah pawh a lût tawh hek lo vang.”—Is. 65:17.
16. Ṭawngṭaina chungchângah eng rilru put hmang nge kan neih ang a, engvângin nge?
16 Eng ang fiahna pawh tâwk mah ila, Pathianin min hmangaih reng tih kan hriatna chuan chhel tûrin min ṭanpui ang. (Rom 8:35-39 chhiar rawh.) Setana chuan min tihlunghnual tum reng ṭhîn mah se, ‘ṭawngṭai theih nâna rilru fel tak pu leh fîmkhur taka’ kan awm chuan a hlawhtling lo vang. (1 Pet. 4:7) Isua chuan: “Chutichuan chûng thil lo thleng tûr zawng zawng chu pumpelh tlâkah leh Mihring Fapa hmaa ding tlâka ruat in nih theihna tûrin, eng lai pawhin ṭawngṭai chungin ngaihven rawh u,” tiin a sawi. (Lk. 21:36) Atîra ziakah Isua chuan tih tak zeta ṭawngṭai sawina ṭawngkam a hmang a. Chutianga ṭawngṭai tûra min fuihin, Isua chuan amah leh a Pa hmaa ding tlâka ruat nih chungchângah inthlahdah hun a nih lohzia a sawi uar a ni. Pathian Jehova nî-ah chuan a hmaa ding tlâka ruatte chauh an dam khawchhuak thei dâwn si a.
Pathian Jehova Rawngbâwlnaah Inhmang Reng Rawh
17. Thu hrilh harsatna bialah rawng i bâwl a nih chuan, engtin nge hmân lai zâwlneite entawn tûr siam chu i hlâwkpui theih?
17 Petera thusawi: “Awm dân thianghlim leh Pathian ngaihsak kawngah chuan mi eng ang nge in nih tûr le?” tih chuan min tihahdamtu thlarau lam thiltih, a nih loh leh ‘Pathian ngaihsakna thiltih’ lama inhman a pawimawhzia min hriatchhuahtîr tûr a ni. (2 Pet. 3:11, 12) Chûng thiltihte zînga a langsâr ber chu chanchin ṭha hrilh hi a ni a. (Mt. 24:14) Bial ṭhenkhata thu hrilh chu an ngaihsak loh vâng emaw, an dodâl vâng emaw, a nih loh leh mite an nî tin nuna an buai êm vâng emawin a harsa pawh a ni thei ang. Bible hun laia Pathian Jehova chhiahhlawhte pawhin chutiang rilru put hmang neite chu an lo tâwk tawh a. Chuti chung pawhin, bânsan lovin Pathian pêk thuchah chu kengin an kal chhuak “nî tin” ṭhîn. (Jeremia 7:24-26 chhiar rawh; 2 Chro. 36:15, 16) Engin nge anni chu chhel tûra ṭanpui? Thu hril tûra an mawhphurhna chu khawvêl thlîr dân aṭanga thlîr lovin, Pathian Jehova thlîr dân aṭangin an thlîr a. Chu bâkah, Pathian hming put chu chawimawina sâng ber niin an ngai bawk a ni.—Jer. 15:16.
18. Lalram thu hrilhna hian nakina Pathian hming chawimawina chu engtin nge a nghawng dâwn?
18 Keini pawhin Pathian Jehova hming leh a thiltum puan chhuah theihna chanvo hlu kan nei a. Hei hi han ngaihtuah teh: Kan thu hrilhna avângin, Pathian hmêlmate chuan a rorêlna nîah hrilhhriat ni lo angin chhuanlam an siam thei lo vang. Dik takin, anni chuan hmân lai Pharaoa angin anmahni dotu chu Pathian Jehova a ni tih an la hria ang. (Ex. 8:1, 20; 14:25) Chutih rual chuan, Pathian Jehova chuan a chhiahhlawh rinawmte chu a aiawhtu an nihzia chiang taka târ langin a chawimawi bawk ang.—Ezekiela 2:5; 33:33 chhiar rawh.
19. Engtin nge Pathian Jehova dawhtheihna hman ṭangkai kan duhzia kan lantîr theih?
19 Petera chuan a lehkha thawn pahnihna tâwp lamah, a rinpuite hnênah: “Kan Lalpa dawhtheihzia chu chhandamnaah ruat rawh u,” tiin a ziak a. (2 Pet. 3:15) Ni e, Pathian Jehova dawhtheihna chu i hmang ṭangkai zêl ang u. Engtin nge? A lâwm zâwng miziate neiin, ‘bawlhhlawh kai lo leh sawisêlbova’ awmin, fiahnate chunga rilru put hmang dik neiin, leh Lalram rawngbâwlnaa inhmang rengin Pathian dawhtheihna chu kan hmang ṭangkai thei a ni. Chutianga kan tih chuan, “vân tharte leh lei thar” nêna inkûngkaihna nei chatuan malsâwmna chang tûrte zînga mi kan ni ang.—2 Pet. 3:13. (w10-E 07/15)
Kan Hre Chhuak Em?
• Engtin nge Pathian duhzâwng miziate kan neih theih?
• Engtin nge “bawlhhlawh kai lo leh sawisêlbovin” kan awm theih?
• Josefa leh Naomi hnên aṭangin eng nge kan zir theih?
• Engvângin nge thu hrilh rawngbâwlnaa tel chu chanvo ropui tak a nih?
[Zirlai Atâna Zawhnate]
[Phêk 17-naa milem]
Nangni pasalte u, nangmah leh i chhûngkuaa Pathian duhzâwng miziate nei tûrin engin nge ṭanpui ang che u?
[Phêk 18-naa milemte]
Josefa’n fiahna a hmachhawn dân aṭangin eng nge kan zir theih?