Sual Chungchânga Thu Dik

DAM lo pakhat chuan khawsik tehna tichhiain, a khua a sik lo tih a finfiah thei em? Thei lo ve! Chutiang bawkin, mi tam takin Pathianin sual a thlîr dân an hnâwl avâng maiin, sual a awm lo tihna a ni lo. A Thu, Bible chuan sual chungchâng tam tak a sawi a ni. Sual chungchângah eng nge a zirtîr?

Tling Zo Kan Awm Lo

Kum sânghnih vêl kal ta khân, tirhkoh Paula chuan “ṭhatna tih ka duh hi ka ti lo va; sualna tih ka duh loh hi ka ti zâwk si ṭhîn” tiin a beidawnzia a sawi chhuak a. (Rom 7:19) Inthup mawi kan tum a nih ngawt loh chuan, keini pawh chutiang dinhmunah kan ding ve tih chu kan pawm ngei ang. Thu Sâwm Pêk emaw, nungchang tehna dangte emaw mila nun chu kan châk pawh a ni thei; mahse, kan duh emaw, duh lo emaw tling zo kan awm lo. Dân bawhchhiat luih kan tum pawh a ni lo, kan chak tâwk lo mai a ni. Eng nge a hrilhfiahna chu ni ta ang? Paula ngei chuan a chhânna min pe a ni: “Ka duh lohzâwng chu ka tih si chuan a titu chu kei ka ni tawh lo va, sual keimaha awm chu a ni zâwk e,” tiin.—Rom 7:20.

Paula ang bawkin, mi zawng zawngte hian pianpui chak lohna kan nei ṭheuh va, chu chu kan rochun sual leh ṭhat famkim lohna hriltu a ni. Tirhkoh chuan: “Mi zawng zawngin thil an tisual tawh vek a, Pathian ropuina an chang zo ta lo,” tiin a sawi. Chutiang dinhmun awmtîrtu chu eng nge ni? “Chutichuan mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin a sawi zawm a ni.—Rom 3:23; 5:12.

Kan nu leh pa hmasa berte thil sual tih chuan Pathian lakah min la hrangin, atîra ṭhat famkimna min hlohtîr tih thu hi mi tam takin hnâwl mah se, Bible zirtîrna dik tak a ni. Isua chuan Genesis thuziak chu thuneitu anga hmanga la chhâwngin, Adama leh Evi chanchin ziak a rinzia a târ lang a ni.—Genesis 1:27; 2:24; 5:2; Matthaia 19:1-5.

Bible thuchah pawimawh takte zînga pakhat chu amah ringtute sual dinhmun ata chhandam tûra leia Isua a lo kal thu hi a ni. (Johana 3:16) Kan nakin nun beiseina chu Pathian Jehova’n lâwm nachâng hriate an thunun theih loh dinhmun lungngaihthlâk tak ata chhan chhuah dân a ruahmanna kan pawm leh pawm lohvah a innghat a ni. Mahse, Pathian thlîrna aṭanga sual nihna kan hriat chian loh chuan, chu mi aṭanga chhan chhuak tûra a ruahmanna siam chu kan hre thiam lo vang a, kan hlut hek lo vang.

Isua Inthawina leh Chu Mi Kan Mamawh Chhan

Pathian Jehova chuan mihring hmasa ber, Adama hnênah chatuana nun beiseina a pe a. Pathian laka a hel chauhvin, chu beiseina ropui tak chu a chân ang. Adama chu a hel ta ngei a, mi sual a lo ni ta a ni. (Genesis 2:15-17; 3:6) Ani chuan Pathian duhzâwng kalha thil a tih avângin a ṭha famkim thei ta lo va, chu chuan Pathian nêna an inlaichînna a tichhe ta a ni. Pathian dân pêk bawhchhiaa thil sual a tih tâkah chuan, a tar ṭanin, a tâwpah chuan a thi ta a ni. Lungchhiatthlâk takin, keimahni pawh tiamin Adama thlah zawng zawngte chu suala piang kan ni a, chu mi avânga thi tûr kan lo ni ta a ni. Chu chu engtin nge a nih theih?

A nih dân chu hriatthiam awl tak a ni. Nu leh pa ṭha famkim lo chuan fa ṭha famkim an nei thei lo. Adama thlah zawng zawngte chu suala piang vek an ni a; tin, tirhkoh Paula sawi angin, “sual man chu thihna a ni.” (Rom 6:23) Mahse, chu Bible châng tâwp lam chuan beiseina min pe a ni: “Pathian thilthlâwnpêk erawh chu kan  Lalpa Krista Isua zârah chuan chatuana nunna a ni,” tiin. Chu mi awmzia chu Isua inthawina azârah thu âwih leh lâwm nachâng hriate chu Adama bawhchhiatna sual ata tlenfai theih an ni tihna a ni. * (Matthaia 20:28; 1 Petera 1:18, 19) Chu chu eng angin nge i ngaih ang?

Krista Hmangaihna Chuan “Min Tîr Lui”

Pathian thlarau thâwk khuma awm tirhkoh Paula chuan a chunga zawhna khi a chhâng a ni: “Krista hmangaihna chuan min tîr lui a ni; heti hian kan ngaihtuah: mi zawng zawng thih aiin mi pakhat a thi a, . . . tin, a nungte chu anmahni tân an nun tawh loh va, an thih aia thia tholeha tân chuan an nun tawh zâwkna tûrin a ni, mi zawng zawng thih aiin a thih ni,” tia ziakin. (2 Korinth 5:14, 15) Miin Isua inthawinain sual sawhkhâwk ata a chhuah zalên thei tih a hriat a, chu mi avânga a lâwmna lantîr a duh chuan, Pathian duhzâwng mila nun a tum hrâm hrâm tûr a ni. Chutianga nunnaah chuan Pathian thil min phûtte hriatthiamna neih te, Bible tehna mila chhia leh ṭha hriatna sâwizawi te, leh chûngte mila nunte a tel a ni.—Johana 17:3, 17.

Thil sual tihna chuan Pathian Jehova nêna kan inlaichînna a tichhia a. Lal Davida’n Bet-sebi a chêt sualpuina leh a pasal a tihhlumna a pawizia a han hriatthiam chuan a zak hle ngei ang. Mahse, a ngaih pawimawh ber chu a sualnain Pathian a tihlungnih lohna hi a ni a—chutiang tûr chu a ni rêng a ni. Inchhîr takin Pathian Jehova hnênah: “I chungah, i chung chauhvah thil ka tisual a, i mithmuha thil sual chu ka lo ti ta,” tiin a sawi a ni. (Sâm 51:4) Chutiang bawkin, Josefa chu mi nupui ngai tûra thlêm a nih khân, a chhia leh ṭha hriatna chuan: “Engtin nge he sual lian tak hi tiin Pathian chunga thil ka tihsual theih ang?” tia zâwt tûrin a tur a ni.—Genesis 39:9.

Chuti chu, sual hi thil dik lo engemaw kan tih lai phâwk kan nih avânga pawi tihna mai a ni lo. Thil engemawa duhthusâm kan tlin loh avânga mipui emaw, vântlâng emaw ngaih dân hmachhawnna mai lah a ni hek lo. Mipat hmeichhiatna te, rinawmna te, zahthiamna te, Pathian biakna te, leh thil dang danga Pathian dân pêkte bawhchhiatna chuan amah nêna mi  mala kan inlaichînna a tichhia a ni. Duhrêng vânga thil sual kan tih chuan, Pathian hmêlmaah kan insiam tihna a ni a. Hei hi rilru fîm tak pua ngaihtuah phu thu dik a ni.—1 Johana 3:4, 8.

Chuti chu, sual chu engtin nge a awm tâk? Engtin mah a awm lo. Mite chuan a pawi nêp deuh beiseiin hming dang an vuah mai chauh a ni. Mi tam tak chuan an chhia leh ṭha hriatna an tichawlawl, a nih loh leh an ngaihthah a. Pathian duhsakna dawng duh apiangte chuan chutiang rilru put hmang chu an do tûr a ni. Kan lo hriat tawh angin, sual man chu hming chhiatna emaw, zahthlâk taka awmna emaw mai a ni lo; thihna a ni. Sual hi nunna leh thihna thil a ni.

Kan thil sual tihte ata inlamlêt tak zet a, kan hawisan chuan Isua inthawinain sual ngaihdamna a thlen thei hi chanchin lâwmawm tak a ni. Paula chuan heti hian a ziak a ni: “An bawhchhiatnate ngaihdama awm leh, an sualte khuha awm chu an eng a thâwl e, Lalpan khaw lohna neia a ruat loh chu an eng a thâwl e,” tiin.—Rom 4:7, 8. (w10-E 06/01)

[Footnote]

[Phêk 10-naa bâwm/ milem]

Kohhran Zirtîrna Inthlâkthleng Thawkna

Catholic-a inkhâwm ṭhîn tam tak chuan Limbo zirtîrna chu an hre chiang mang meuh lo va. Kum sâwmbi liam ta maiahte khân, zawi zawiin a bo tial tial a, a tâwpah chuan an thurin inchhâng aṭanga paih chhuah a ni ta hial a ni. Kum 2007 khân, Catholic Kohhran chuan “Pathian thu lam leh kohhran thiltih dân lam aṭanga thlîr chuan, baptisma chang lova thi nausênte chu chatuan hlimna ramah chhan chhuah theih niin a lang” tih thu chuanna lehkha pawimawhah Limbo zirtîrna chu dân ang thlapin an “titâwp” a ni.

Engvângin nge kohhran zirtîrna chu hetianga a inthlâkthleng thawk? A bul berah chuan, French chanchinbu ziakmi Henri Tincq-a’n, “Middle Age hun lai aṭanga kum zabi 20-na thlenga thil veiherh chîng Kohhranin an fate a rang thei ang bera baptisma chantîr tûra nu leh pate nawr nâna phûr taka hmanga a lo humhim ṭhin rochun phurrit” tia a koh aṭanga intihzalên nân a ni. Mahse Limbo zirtîrna inthlâkna chuan buaina dang a chawk chhuak bawk a ni.

Mihring Zirtîrna Nge Pathian Thu Zâwk? Limbo rinna chu kum zabi 12-naa Pathian thu zirtute’n sual tênau kan faina purgatory chungchâng an sawihona aṭanga lo chhuak a ni a. Catholic Kohhran chuan mi a thih hian a thlarau la nung zêl niin a zirtîr a, chuvângin baptisma chan loh avânga vâna kal thei lo, hremhmun meidîl-a nghaisak phu si lo naupangte thlarau kalna tûr a zawn hmuhsak chu a ngai a. Chuvângin, Limbo zirtîrna chu a lo piang ta a ni.

Mahse, Bible chuan mi a thih hian a thlarau la nung zêl angin a zirtîr lo. Thlarau chu thi thei lo anga sawi ahnêkin, mitthite hian “engmah an hre lo va,” mi a thih hian “ani chu a leilungah a kîr leh a; chu mi nî ngei chuan a ngaihtuahnate chu a bo nghâl a ni.” (Thuhriltu 9:5, 10; Sâm 146:4) Mihring taksaa a enga mah hi thih huna dam khawchhuak a awm loh avângin, Limbo kan tih ang chi hmun chu a awm thei lo. Chu bâkah, Bible chuan thihna chu muthilhna nên a tehkhin a ni.—Johana 11:11-14.

Pathian tân chuan Kristian nu leh pa kâra piang naupangte chu an thianghlim tih Bible-in a sawi a. (1 Korinth 7:14) Chhandam an nih nâna nausênte’n baptisma an chan a ngaih si chuan, he Bible châng hian awmzia a nei lo vang.

Limbo zirtîrna chu Pathian tân huatthlala tak a ni a, Pathian chu a nihna ang ngeia hmangaihna nei Pa ber anga târ lan ahnêkin, sual nei lote hrem ṭhîn mi nunrâwng takah a chantîr zâwk a ni. (Deuteronomy 32:4; Matthaia 5:45; 1 Johana 4:8) Chuvângin, he Pathian thu mil lo zirtîrna hi rilru ṭha pu Kristiante’n an pawm thei lo pawh hi a mak lo ve!

[Phêk 9-naa milemte]

Pathian Thu mila nun chuan Pathian leh mi dangte nêna inlaichînna ṭha a awmtîr