Sual Hriatna Kan Hloh Ta Em Ni?

TUN hma deuh kha chuan, biak ina kal ṭhînte chuan thuhriltuin pulpit aṭanga “thihna thlentu sual hlauhawm pasarihte” tia hriat ṭhin—hurna te, ei leh in duh luatna te, duhâm luatna te, thatchhiatna te, thinurna te, awhna te, leh chapona te—ṭhat lohzia an au chhuahpui dum dum chu an hre ṭhîn a. Thuhriltute chuan sual sawhkhâwk râpthlâk takte chu sawi nawn fovin, an thu ngaithlatute chu inlamlêt tûrin an nawr ṭhîn. “Tûnah erawh chuan ngaithlatute awm tinuam lo thei thute kalsanin, ‘nuam tihtîr thei’ thute chu an sawi tawh zâwk a ni,” tiin ziaktu pakhat chuan a sawi.

Chanchinbu ziak mite thlîr dân pawh chutiang tho chu a ni a. A hnuaia thute hi chanchinbu aṭanga lâk chhuah a ni:

▪ “Sual, inlamlêtna leh chhandamna ang chi thil hluite chu a lâr tawh lo va, mahni inngaihsânna leh inhmangaihna neih theih dân thusawi ngaihnawm takte chu a lo lâr ta.”—Star Beacon, Ashtabula, Ohio.

▪ “Thil sual hriatna leh sual neih hlauhna chu a bo ṭêp tawh.”—Newsweek.

▪ “‘Pathianin eng nge min phût?’ tia inzawh ai chuan ‘Pathian hnên aṭangin eng nge ka neih theih ang?’ tiin kan inzâwt tawh zâwk a ni.”—Chicago Sun-Times.

Tûn laia hnam hrang, sakhaw hrang, leh politics party hrang hrangte awm tlânna hunah hian, mite chuan mi dang thiltih sawisêl chu an hreh a. Chutianga sawisêl chu hawihhâwm lohna niin kan ngai a ni. Thil sual lian ber chu mi dangte thiltih sawisêl hi a ni ta mai niin a lang a. Chuvângin, hetiang ngaih dân hi a lo awm a ni: ‘I ngaih dân chu i tân a ṭha pawh a ni thei, mahse mi dangte pawm luihtîr i tum tûr a ni lo. Tûn lai hian, mite chu an ngaih pawimawh tehna chi hrang hrang milin an nung mai a. Thil dik leh âwm hretu awmchhun i ni lo. Mi dangte ngaih pawimawh tehnate chu nangma ngaih pawimawhte ang bawka pawimawh a ni,’ tih hi.

Hetiang ngaih dân hian mite ṭawngkam hman pawh a thlâk a. “Sual” tih ṭawngkam chu thupui hlapui sawi nân an hmang tawh meuh lo. Mi tam tak chuan fiamthu thawh nân mai an hmang tawh zâwk a ni. Mite chuan innei si lova nupa anga in khata khawsak chu sual lutuka ngai tawh lovin, “awm dûn” an ti ta mai a. Uirête pawh “uirê” ni tawh lovin, “ngaihzâwng nei” ang lek an ni tawh a. Tin, “mawngkawhurte” pawh “nun dân chi dang” thlang zâwk ang lek an ni ta.

Mite’n “dân pângngai” anga an pawm emaw, “sual” anga an dem emaw chu a inthlâkthleng tawh a ni tih a chiang hle. Mahse, engvângin nge rilru put hmang chu a inthlâkthleng? Sual chu engtin nge a awm tâk? Sual i thlîr dân chu a pawimawh tak zet em? (w10-E 06/01)