‘Thlarau Chuan Pathian Thu Rilte A Chhui Chhuak’
‘Thlarau Chuan Pathian Thu Rilte A Chhui Chhuak’
“Thlarau chuan engkim a chhui chhuak si ṭhîn; a ni, Pathian thu ril pawh.”—1 KOR. 2:10.
1. Tirhkoh Paula chuan 1 Korinth 2:10-ah thlarau thianghlim hnathawh dân pawimawh tak eng nge a târ lan a, eng zawhnate nge lo chhuak?
PATHIAN Jehova thlarau thianghlim hnathawh avângin lâwm chhan tûr kan va nei tak êm! Bible chuan thlarau chu ṭanpuitu, thilpêk, thu min hriattîrtu, leh kan tâna ṭawngṭaitu angin a sawi a ni. (Joh. 14:16, Baptist Mid-Missions’ Tanslation; Tirh. 2:38; Rom 8:16, 26, 27) Tirhkoh Paula chuan: “Thlarau chuan engkim a chhui chhuak si ṭhîn; a ni, Pathian thu ril pawh,” tia sawiin thlarau thianghlim hnathawh dân kawng pawimawh tak dang pawh a târ lang a. (1 Kor. 2:10) Pathian Jehova chuan thlarau lam thu rilte târ lan nân a thlarau thianghlim a hmang ngei a ni. Chu mi ṭanpuina tel lo chuan, Pathian Jehova thiltumte eng zât tak hria ang i maw? (1 Korinth 2:9-12 chhiar rawh.) Amaherawhchu, hêng zawhnate hi a lo chhuak a ni: Engtin nge ‘thlarau chuan Pathian thu rilte’ a chhui chhuah? Tute kal tlangin nge Pathian Jehova chuan C.E. kum zabi khatnaah a târ lan? Thlarau chuan kan hun laiin hêng thu rilte hi engtin nge a chhui chhuah a, tute kal tlangin nge a chhui chhuah?, tihte hi.
2. Eng kawng chi hnihin nge thlarau chuan hna a thawh?
2 Isua chuan thlarauvin kawng chi hnihin hna a thawk ang tih a târ lang a. A thih hma lawk khân a tirhkohte hnênah: “Ṭanpuitu, thlarau thianghlim, Pain ka hminga a rawn tirh tûr chuan thil engkim a zirtîr ang che u a, in hnêna ka thil sawi zawng zawng a hriatchhuahtîr leh vek ang che u,” tiin a sawi. (Joh. 14:26, BMT) Chutiang chuan, thlarau thianghlim chu zirtîrtu leh hriat chhuahtîrtu-ah a ṭang dâwn a ni. Zirtîrtu angin Kristiante chu tûn hmaa an thil hriat lohte hre thiam tûrin a ṭanpui ang a. Hriat chhuahtîrtu angin an thil lo hriat tawhte hre chhuak leh a, dik taka nunpui tûrin a ṭanpui bawk ang.
Kum Zabi Khatnaah
3. Isua thusawi engin nge ‘Pathian thu rilte’ chu zawi zawia hriat chhoh a ni dâwn tih târ lang?
3 Isua ngei chuan a zirtîrte chu an la hriat ngai loh thutak tam tak a zirtîr a. Mahse, tam tak an zir belh a la ngai a ni. Isua chuan tirhkohte hnênah: “In hnênah thusawi tûr tam tak ka la nei cheu va, nimahsela tûnah zawng in tlin rih lo vang. Nimahsela amah, thlarau dik tak chu, a lo thlen hun chuan thutak zawng zawngah chuan a hruai lût ang che u,” tiin a sawi. (Joh. 16:12, 13) Chutiang chuan, Isua chuan thlarau thianghlim azârah thlarau lam thu rilte chu zawi zawia hriat chhoh a nih tûr thu a târ lang a ni.
4. C.E. 33 Pentikost nî chuan engtin nge thlarau thianghlim chu zirtîrtu leh hriat chhuahtîrtu anga a ṭan?
4 C.E. 33 Pentikost nî chuan, “thlarau dik tak” chu a lo thleng a, Jerusalem-a pung khâwm Kristian 120 vêl chungah chuan leih a ni ta. Chu chu hmuh theih leh hriat theihin a lang a. (Tirh. 1:4, 5, 15; 2:1-4) Zirtîrte chuan ṭawng chi hrang hranga ṭawngin, “Pathian thiltih ropuite” chu an puang chhuak a ni. (Tirh. 2:5-11) Tûnah chuan thil thar engemaw laih lan hun a lo thleng ta. Zâwlnei Joela chuan chu thlarau thianghlim leih buak chungchâng chu a lo hrilh lâwk tawh a ni. (Joel. 2:28-32) Chu hrilh lâwkna chu a thlîrtute beisei loh zâwng takin a thleng famkim a, tirhkoh Paula’n hma hruaiin thil awm dân a hrilhfiah a ni. (Tirhkohte 2:14-18 chhiar rawh.) Chutiang chuan thlarau thianghlim chuan zirtîrte thiltawn chu hmân lai hrilh lâwkna thlen famkimna a nihzia Petera hriattîrin, zirtîrtuah a ṭang a. Tin, Petera chuan Joela hrilh lâwk thu mai bâkah, Davida fakna hla pahnih pawh a lâk chhâwn bawk avângin, thlarau thianghlim chu hriat chhuahtîrtuah a ṭang bawk a ni. (Sâm 16:8-11; 110:1; Tirh. 2:25-28, 34, 35) Chuta kal khâwmte thil hmuh leh hriatte chu Pathian thu rilte a ni tak zet a ni.
5, 6. (a) C.E. 33 Pentikost hnu chuan, thuthlung thar chungchângah eng ang zawhna pawimawh takte nge chhân ngai? (b) Chûng chu tute’n nge zâwt a, thu tlûkna chu eng anga siam nge a nih?
5 Kum zabi khatnaa Kristiante chuan thil hriat fiah loh tam tak an la nei a. Entîr nân, chu Pentikost nîa hman ṭan thuthlung thar chungchângah zawhna tam tak a chhuak a ni. Chu thuthlung thar chu Judate leh Juda saphunte tân chauh a ni em? Jentailte pawh chu thuthlung thara pawm leh thlarau thianghlima hriak thih theih an ni em? (Tirh. 10:45) Jentail mipate tân serh tan hmasak leh Mosia Dân zawm a ngai em? (Tirh. 15:1, 5) Hêng hi zawhna pawimawh tak an ni hlawm a. Hêng thu rilte chhui chhuak tûr hian Pathian Jehova thlarau thianghlim a ngai a ni. Mahse, tute kal tlangin nge hna a thawh ang?
6 Chûng chhân ngai thu pawimawhte chu mawhphurhna nei unaupate’n ngaihtuah atân a mal malin an zâwt a. Petera te, Paula te, leh Barnaba te chu governing body inkhâwmnaah telin, Pathian Jehova’n serh tan loh Jentailte a dâwr dân chu an sawi a. (Tirh. 15:7-12) Hebrai Pathian Lehkha Thu leh thlarau thianghlim ṭanpuinaa chûng finfiahnate an ngaihtuah hnu chuan, governing body chuan thu tlûkna a siam a. Tichuan, an thu tlûkna siam chu kohhrante hnênah lehkha thawnin an hriattîr ta a ni.—Tirhkohte 15:25-30; 16:4, 5 chhiar rawh; Eph. 3:5, 6.
7. Eng hmangin nge thu rilte chu laih lan a nih?
7 Thu dang tam takte chu Johana te, Petera te, Jakoba te, leh Paula te ziah thlarauva thâwk khum lehkha thawnte hmanga chinfel a ni a. Mahse, Kristian Pathian Lehkha Thu ziak zawh a nih hnuah chuan thu hrilh lâwkna leh mak taka hriat theihnate chu a lo tâwp ta a ni. (1 Kor. 13:8) A nih chuan, thlarau chu zirtîrtu leh hriat chhuahtîrtu angah a la ṭang zêl ang em? Pathian thu rilte chhui chhuak tûra Kristiante ṭanpuituah a la ṭang zêl ang em? A la ṭang zêl ang tih hrilh lâwkna chuan a târ lang.
Tâwpna Hun Chhûngah
8, 9. Tâwpna hunah hian tute nge thlarau lam hriatna neia ‘nî anga êng’ ang?
8 Tâwpna hun chungchâng a sawinaah, vântirhkoh pakhat chuan: “A fingate chu vân êng angin an êng ang a, mi tam tak felnaa hawi kîrtîrtute chu arsi angin kumkhaw tlaitluanin an êng ang. . . . Hriatnate a pung dâwn a ni,” a ti a. (Dan. 12:3, 4) Vân êng anga êng a, fing tûrte chu tute nge ni? Isua buh lem leh buh tak tehkhin thu sawi chuan a chhânna hmu tûrin min ṭanpui thei a ni. Ani chuan “khawvêl tâwpna tûr” chungchâng a sawinaah: “Chu mi hunah chuan mi felte chu an Pa ramah chuan ni angin an êng tawh ang,” a ti. (Mt. 13:39, 43) He tehkhin thu a hrilhfiahnaah Isua chuan “mi felte” chu hriak thih Kristian “ram fate” an nihzia a târ lang a ni.—Mt. 13:38.
9 A nih leh hriak thih Kristian zawng zawngte chu “ni angin an êng” vek ang em? Kristian zawng zawngte chu thu hrilhna, zirtîr siamna, leh inkhâwmnaa intihchak tawnnaah an tel vek dâwn avângin, an êng vek dâwn tih theih a ni. Hêng kawngah hian hriak thihte chuan hma an hruai ang. (Zak. 8:23) Nimahsela, vân êng anga an ên bâkah, tâwpna hunah thu rilte an lai lang tûr a ni bawk: zâwlnei Daniela thuziak ngei pawh chu tâwpna hun thlenga “châr tlat” a ni si a. (Dan. 12:9) Thlarau chuan engtin nge chûng thu rilte chu a chhui chhuah ang a, tute kal tlangin nge a chhui chhuah ang?
10. (a) Ni hnuhnûngah hian tute kal tlangin nge thlarau chuan thu rilte a chhui chhuah? (b) Pathian Jehova thlarau lam biak in chungchâng thu rilte hrilhfiah a nih dân sawi rawh.
10 Kan hun lai hian thlarau lam thu ril hrilhfiah a ngaih hian, thlarau thianghlim chuan headquarter-a awm “bawi rinawm, fing tak” pâwl aiawhtu mawhphurhna nei unaute chu tûn hmaa la hriat loh thu rilte hre thiam tûrin a ṭanpui a ni. (Mt. 24:45; 1 Kor. 2:13) Governing Body zînga tel zawngte chuan hrilhfiah dân thar chu an enfiah vek a. (Tirh. 15:6) Chuta ṭanga an thil hriatte chu mi tinte sâwtpui atân lehkhabu-ah an chhuah a ni. (Mt. 10:27) Hun a liam zêl chuan hrilhfiah belhna dangte pawh a ngai mai thei a, chûngte pawh chu dik taka hrilhfiah a ni ṭhîn.—“ Thlarauvin Thlarau Lam Biak In Awmzia A Hrilhfiah Dân” tih bâwm chu en rawh.
Tûn Laia Thlarau Hnathawh Hlâwkpui Rawh
11. Engtin nge tûn laia Kristian zawng zawngte chuan Pathian thu rilte laih lanna kawnga thlarau thianghlim hnathawh chu an hlâwkpui?
11 Kristian rinawm zawng zawngte chuan Pathian thu rilte laih lanna kawnga thlarau thianghlim hnathawh chu an hlâwkpui a. Kum zabi khatnaa Kristiante ang bawkin, tûn laiah pawh Pathian thu kan zir a, thlarau thianghlimin hre thiam tûra min ṭanpui thute chu a ṭûl hunah hre chhuak lehin kan nunpui ta ṭhîn a ni. (Lk. 12:11, 12) Lehkhabu-a tihchhuah Pathian thu rilte hre thiam tûr chuan lehkha zir sân hle a ngai chuang lo. (Tirh. 4:13) Engtin nge Pathian thu rilte kan hriatthiamna chu kan tihhmasâwn theih? Rawtna ṭhenkhat lo en ta ila.
12. Eng hunah nge thlarau thianghlim dîla kan ṭawngṭai ang?
12 Thlarau thianghlim dîlin ṭawngṭai rawh. Pathian thu kan zir hmain, min kaihruaitu atân thlarau thianghlim chu ṭawngṭaiin kan dîl hmasa tûr a ni. Mahni chauh kan ni emaw, zirna hun kan nei tlêm hle emaw pawh ni se, chutiang chuan kan dîl tûr a ni. Chutianga inngaitlâwm taka ṭawngṭaina chuan kan Pa vâna mi thinlung a tilâwm ngei ang. Isua’n a lo târ lan tawh angin, tih tak zeta kan dîl chuan Pathian Jehova chuan thlarau thianghlim chu phal takin min pe ang.—Lk. 11:13.
13, 14. Pathian thu rilte hriatna kawngah inkhâwm atâna inbuatsaihna hian eng hmun nge a chan?
13 Inkhâwm atân inbuatsaih rawh. Thlarau lam chaw chu bâwih pâwl hnên aṭangin ‘a hun apiangah’ kan dawng a. Chu “bawi” chuan Bible ṭanchhan thute leh zirna leh inkhâwmnate buatsaihin, a mawhphurhna chu a hlen a ni. Thu engemaw zir tûra “unauhote” an tih hmain, bâwih pâwl chuan ṭha tak leh tih tak zetin a ngaihtuah hmasa phawt ṭhîn. (1 Pet. 2:17; Kol. 4:16; Jud. 3) Chutianga rawtna pêkte theih tâwp chhuaha kan zawm hian thlarau thianghlim thu kan zâwm tihna a ni.—Thup. 2:29.
14 Kristian inkhâwm atâna kan inbuatsaih hian, Bible châng târ lan apiang chu keuvin kan chhiar ang a, kan thu zir lai nêna a inkûngkaih dân hriat kan tum tûr a ni. Chutianga kan tih reng chuan, Bible kan hriatna chu a thûk tial tial ang. (Tirh. 17:11, 12) Bible chângte keuna chuan thlarau thianghlimin min hriat chhuahtîr thei tûrin a thute chu rilruah a nemnghet a. Chu bâkah, Bible aṭang ngeia kan hmuhna hian a awmna lai mithlaa a châmtîr avângin kan mamawh huna zawng hmu nghâl mai tûrin min ṭanpui thei a ni.
15. Engvângin nge thu leh hla chhuah tharte chu kan hmaih loh vang a, chutianga hmaih lo tûrin eng nge i tih theih?
15 Thu leh hla chhuah tharte chu hmaih suh. Thu leh hla chhuah ṭhenkhat chu kohhran inkhâwmnaa zir tûra tih ni lo mah se, chûng chu kan hlâwkpui atâna buatsaih vek a ni a. Vântlâng hnêna kan sem ṭhin thu leh hlate pawh hi kan tân pawh a ni ve tho a ni. He khawvêl buai takah hian, mi tuemaw, thil engemaw chu kan nghah a ngai fo ṭhîn a. Chuvângin, kan thu leh hla chhuah la chhiar lohte emaw, kan la chhiar chhuah lohte emaw chu kan ken reng chuan, chûng hunte chu kan hmang ṭangkai thei ang. Ṭhenkhat chuan motor an khalh lai emaw, an kal vêl lai emawa thu leh hla chhuahte ngaithlain chûng chu an hmaih lo va. Pathian thu ril a tel chung pawha chhiartu tam takte chhiar nuam tih tûr zâwnga ziah chûng thu chhuahte chuan thlarau lam thil kan ngaihhlutna chu a tizual ṭhîn a ni.—Heb. 2:2.
16. Rilrua lo lang zawhnate chhinchhiah leh zir belh chuan ṭangkaina eng nge a neih?
16 Chhût ngun rawh. Bible leh chu mi ṭanchhan thu leh hla chhuahte chu rilrua chhût ngun nân hun pe rawh rawh. I thu chhiar laia thute indawt dân ngun taka i ngaihtuah chuan i rilruah zawhnate a lo chhuak ang. Chutiang zawhnate chu chhinchhiahin, a hnuah zir belh ang che. Kan ngaihven zâwng thute kan zir belh hian, kan zir bing lehzual tlângpui ṭhîn. Chuta ṭanga kan thil hriatte chu kan mamawh ang zêla kan lâk chhuah theih tûr kan mi mal ro khâwlkhâwmte zînga mi a lo ni ta a ni.—Mt. 13:52.
17. Chhûngkua leh mi mal anga zirnaah hian eng thute nge in zir ṭhin?
17 Chhûngkuaa Pathian biakna neih hun tûr duang rawh. Governing Body chuan chawlhkâr tina zan khat chu mi mal ang emaw, chhûngkua ang emawa zirna neih hun atâna dah hrang tûrin min fuih ṭheuh va. Kan inkhâwm dân siam danglamna chuan chutiang atân hun ṭha tak min pe a ni. Chhûngkuaa Pathian Biakna neih zânah hian eng nge in zir ṭhin? Ṭhenkhat chuan Bible an chhiar a, an rilrua lo lang zawhnate zir bingin, a hrilhfiahna chu an Bible-ah tawi têin an chhinchhiah a. Chhûngkaw tam tak chuan an thu zirte chhûngkua anga an nunpui theih dân tûr chu an ngaihtuah a ni. Chhûngkaw lû ṭhenkhat chuan chhûngkuaa an mamawh nia an hriat thute emaw, chhûngkuaa ngaihtuah atâna an tih thu leh zawhnate nêna inkûngkaih thute emaw chu an thlang ṭhîn. Chutianga in tih zêl chuan, chhûngkaw inkhâwmnaa zir tûr thu dang dangte chu in ngaihtuah chhuak zêl ngei ang. *
18. Engvângin nge Pathian Thu, thu rilte chu kan zir hreh loh vang?
18 Isua chuan thlarau chu ṭanpuitu a ni dâwn tih a sawi a. Chuvângin, Pathian Thu, thu rilte chu kan zir hreh tûr a ni lo. Chutiang thutak chu “Pathian hriatna” hlu tak zînga mi a ni a, chu hriatna chu zawng chhuak tûra sâwm kan ni. (Thufingte 2:1-5 chhiar rawh.) Chûng chuan “Pathianin a hmangaihtute tân a buatsaih apiangte” chungchâng tam tak a lai lang a. Pathian Thu hriat belh tûra taihmâk kan chhuah hian, thlarau thianghlim chuan min ṭanpui ngei ang, ‘thlarau chuan Pathian thu rilte pawh tiamin engkim a chhui chhuak si ṭhîn a.’—1 Kor. 2:9, 10. (w10-E 07/15)
[Footnote]
^ par. 17 October 2008 chhuak Kan Lalram Rawngbâwlna, phêk 8-na en rawh.
Engtin Nge Kan Chhân Ang?
• Eng kawng chi hnihin nge thlarau chuan ‘Pathian thu rilte’ chhui chhuak tûra min ṭanpui?
• Kum zabi khatnaah khân tute kal tlangin nge thlarau thianghlimin thu rilte a phawrh chhuah?
• Engtin nge kan hun lai hian thlarau thianghlim chuan thu rilte hrilhfiah nân hna a thawh?
• Thlarau hlâwkpui tûrin eng nge i tih theih?
[Zirlai Atâna Zawhnate]
[Phêk 30-naa bâwm]
Thlarauvin Thlarau Lam Biak In Awmzia A Hrilhfiah Dân
Kum zabi khatnaa laih lan ‘Pathian thu rilte’ zînga pakhat chu biak bûk leh a hnua biak in-in a entîr thil ropui zâwk, Paula’n ‘biak bûk taktak mihring sak ni lo, Lalpa sak zâwk’ tia a koh chu a ni a. (Heb. 8:1, 2) Chu chu thlarau lam biak in ropui tak a ni a, Isua Krista inthâwina leh puithiam nihna ṭanchhana Pathian kan panna kawng hi a ni.
Chu “biak bûk taktak” chu Isua’n C.E. 29-a baptisma a chan a, inthawina ṭha famkim atâna Pathian Jehova’n a pawm khân a lo awm ṭan a. (Heb. 10:5-10) A thiha a thawhleh hnu chuan, Isua chu thlarau lam biak in Hmun Thianghlim Ber-ah a lût a, “Pathian hmaah” a inthawina man chu a hlân a ni.—Heb. 9:11, 12, 24.
Tirhkoh Paula chuan hmun dangah hriak thih Kristiante chu ‘Pathian Jehova tân biak in thianghlimah an chang zêl ṭhîn’ niin a sawi a. (Eph. 2:20-22) He biak in hi a hnua Hebrai-te hnêna a lehkha thawna “biak bûk taktak” a tih nên a thuhmun em? Thuhmun niin kum tam tak chhûng Pathian Jehova chhiahhlawhte chuan an lo ring tawh ṭhîn a. Hriak thih Kristiante chu vâna Pathian Jehova biak in sakna tûr “lung” ni tûra leia buatsaih nia ngaih a lo ni ṭhîn bawk.—1 Pet. 2:5.
Mahse, kum 1971 a lo inher chhuah chuan, bâwih pâwl zînga mawhphurtute chuan Ephesi mite hnêna Paula biak in sawi chu Pathian Jehova thlarau lam biak in ropui a ni thei lo tih an lo hre ta a. “Biak bûk taktak” chu hriak thih Kristian tho lehte hmanga din ni sela chuan, “Lalpa lo kal,” a nih loh leh a lo awmna hun chhûnga an thawhleh hnuah chauh a awm ṭan thei ang. (1 Thes. 4:15-17) Mahse, chu biak bûk chungchângah Paula chuan: “Chu thil chu tûn lai hun atâna entîrna a ni,” tiin a ziak a ni.—Heb. 9:9, BMT.
Hêng leh Bible châng dangte uluk taka khaikhinna aṭangin thlarau lam biak in chu sak mêk a ni lo va; tin, hriak thih Kristiante chu, chu biak in sak nâna leia buatsaih “lung” lah an ni hek lo tih a lo chiang ta a ni. Chutianga sak mêk nih ahnêkin, hriak thih Kristiante chuan thlarau lam biak in hungchhûng leh Hmun Thianghlimah nî tin “faka inthawina” Pathian hnênah an hlân reng tawh zâwk a ni.—Heb. 13:15.
[Phêk 31-naa milem]
Engtin nge ‘Pathian thu rilte’ kan hriatthiamna chu kan tihhmasâwn theih?