Thlarau Lam Buh Sengna Ropui Takah Theihtâwp Chhuahin Tel Rawh
Thlarau Lam Buh Sengna Ropui Takah Theihtâwp Chhuahin Tel Rawh
“Lalpa hna ṭhahnemngai taka thawk fovin awm rawh u.”—1 KOR. 15:58.
1. Isua’n a zirtîrte hnênah eng sâwmna nge a tihchhuah?
ISUA chu C.E. 30 tâwp lama Samari ram pal tlanga a zin laiin, Sukar khaw kianga tuichhunchhuahah a châwl a. Chutah chuan a zirtîrte hnênah: “Dâk ulang lote en rawh u, tûn apangin seng tûrin a êng a ni,” a ti a. (Joh. 4:35) Isua sawi chu buh tak tak seng khâwmna a ni lo, a hnungzuitu lo la ni tûr mi rilru ṭhate thlarau lama seng khâwmna a ni zâwk. A nihna takah chuan, chu buh sengnaa tel tûra a zirtîrte a sâwmna a ni. Hnathawh tûr tam tak a awm a, thawh zawh nân hun a tlêm bawk si!
2, 3. (a) Engin nge buh seng hunah kan awm tawh tih târ lang? (b) He thuziakah hian eng nge kan ngaihtuah dâwn?
2 Buh seng chungchânga Isua thusawi chuan kan tân awmze pawimawh tak a nei a. Khawvêl mihringte ‘buh seng tûr anga an ênna’ hunah kan awm tawh a ni. Kum tinin mi maktaduai têlte chuan nunna petu thutak dawng tûra sâwmna an dawng a, zirtîr thar sâng tam takte chuan baptisma an chang a ni. Buh Neitupa, Pathian Jehova enkawlna hnuaia buh sengna ropui bera tel theihna chanvo hlu tak kan nei a. Chu buh sengnaah chuan ‘ṭhahnemngai takin’ i thawk em?—1 Kor. 15:58.
3 Isua chuan leia kum thum leh a chanve rawng a bâwl chhûng khân a zirtîrte chu buh sengtu ni tûrin a zirtîr a. He thuziak hian Isua’n a zirtîrte hnêna a thu zirtîr pawimawh tam takte zînga pathum a rawn sawi ang. Chûng chuan tûn laia zirtîrte lâk khâwm kan tum tlatna kawnga ṭangkai tak mize pakhat ṭheuh a târ lang a ni. Chûng miziate chu a mal tê têin lo ngaihtuah ta ila.
Inngaihtlâwmna A Pawimawh
4. Engtin nge Isua’n inngaihtlâwmna pawimawhzia a târ lan?
4 He thilthleng hi han mitthla teh: Zirtîrte chu an zînga ropui ber nih inchuhin an inhnial zo chiah a. Mi dang rin lohna leh an inhuatna chu an hmêlah a la lang a ni. Chuvângin Isua chuan naupang pakhat chu kovin an zîngah a dintîr a. Chu naupang chu enin, ani chuan: “Tupawh he naupang tê anga inngaitlâwm apiang, chu mi chu vân ramah chuan a ropui ber ang,” a ti a ni. (Matthaia 18:1-4 chhiar rawh.) Khawvêl mite ngaih dân anga mite ropuina chu an thiltihtheihna te, hausakna te, leh dinhmun te azira teh lovin, zirtîrte chuan an ropuina chu mi dangte hmuha an ‘inngaihtlâwm dân’ azir a ni zâwk tih an hriat thiam a ngai a ni. Inngaihtlâwmna dik tak an lantîr chauhvin Pathian Jehova chuan anmahni chu a hmangin mal a sâwm ang.
5, 6. Engvângin nge buh sengnaa thawk tûr chuan i inngaihtlâwm a ngaih? Hrilhfiah rawh.
5 Vawiin nî thleng hian, he khawvêla mi tam tak chu thiltihtheihna te, hausakna te, leh dinhmun sâng te chelh tumin an inpumpêk a. Chuvângin, Pathian chungchâng zir nân leh a rawngbâwl nân hun an nei mang meuh lo emaw, an nei lo hulhual emaw a ni. (Mt. 13:22) Chu mi nêna inkalh takin, Pathian Jehova mite chuan buh Neitupa malsâwmna leh duhsakna an chan theih nân mite hmuha ‘inngaihtlâwm’ chu nuam an ti a ni.—Mt. 6:24; 2 Kor. 11:7; Phil. 3:8.
6 South America rama upa Francisco-a entîrna hi han ngaihtuah teh. A naupan laiin, pioneer a thawh theih nân university a chawlhsan a. “Innei tûra kan inhual lai chuan, ka nupui nêna nuamsa taka min awmtîr thei tûr hna ṭha tak ka hmu reng a. Mahse, chu mi hna thawh ai chuan kan nun dân tihsamkhai a, hun bikima rawngbâwl zêl chu kan thlang ta zâwk a ni. Chutah, fate kan han neih chuan kan harsa lehzual a. Mahse, Pathian Jehova chuan kan thu tlûkna siam anga awm zêl thei tûrin min ṭanpui a ni,” tiin a sawi a. Francisco-a chuan heti hian a khaikhâwm a ni: “Kum 30 chuang chu rawngbâwlna kawnga chanvo chi hrang hrang ka chan bâkah, upa angin rawng ka lo bâwl ve tawh a. Kan nun kan tihsamkhai avângin vawikhat tê pawh kan inchhîr ngai lo,” tiin.
7. Engtin nge Rom 12:16-a kan hmuh fuihna thu nunpui tûrin hma i lâk?
7 Nang pawhin he khawvêla “thil sângte” ûm lo va, ‘thil tlâwmte ringa i nun’ chuan buh sengna kawngah chanvo leh malsâwmna tam tak dawn chu i beisei thei ang.—Rom 12:16, New World Translation; Mt. 4:19, 20; Lk. 18:28-30.
Taihmâkna Chuan Malsâwmna A Thlen
8, 9. (a) Isua sawi talent tehkhin thu chu sawi rawh. (b) Tu tân nge he tehkhin thu hi a thlamuanthlâk bîk theih ang?
8 Buh sengnaa ṭha taka tel thei tûra kan mamawh dang chu taihmâkna hi a ni a. Taihmâk a ngaihzia chu Isua’n talent tehkhin thu-ah a târ lang a ni. * Chu tehkhin thu chu, ram danga zin tûr mi pakhatin a bâwih pathumte hnêna a thil neihte a kawltîr chungchâng a ni a. Bâwih pakhatna chuan talent nga, bâwih pahnihna chuan talent 2 an dawn laiin, a pathumna erawh chuan talent khat a dawng a ni. An pu berin a kalsan hnu chuan bâwih pakhatna leh pahnihna chu an talent neihte hmang chuan taima takin an “sumdâwng” ta nghâl a. Bâwih pathumna erawh chu a ‘zawmthaw’ a, a talent dawn chu leiah a thukru a ni. Pu ber a lo kîr leh chuan, bâwih pakhatna leh pahnihna chu “tam tak chungah” thu a neihtîr a. Bâwih pathumna hnêna a pêk talent khat chu a lâksak a, a in ata a hnawtchhuak bawk a ni.—Mt. 25:14-30.
9 Isua tehkhin thua bâwih taima tak ang nih leh zirtîr siamna kawnga theih tâwp chhuaha inhman chu i duhzâwng tak a ni ngei ang a. Mahse, tûnah tak chuan i dinhmun avângin inhmang tam thei lo ta la, engtin nge ni ang? Ei leh bâr harsatna avângin chhûngkaw châwm nân dârkâr rei tak tak chhûng hna i thawh a ngai pawh a ni thei. A nih loh leh, tûn hma angin i chak tawh lo emaw, i hrisêl ṭha tawh lo emaw pawh a ni thei bawk. Chutiang a nih chuan, talent tehkhin thu chuan i tân thu thlamuanthlâk tak a pai a ni.
10. Talent chungchâng tehkhin thua pu ber chuan engtin nge a bâwihte dinhmun a hriatthiamzia a lantîr a, chu chu engvângin nge thlamuanthlâk i tih?
10 Tehkhin thua pu ber chuan a bâwih tinte theihna a inan lohzia a hria tih lo chhinchhiah ang che. Chu chu ‘an tih theih tâwk tûr ang zêl ṭheuhva’ talent a pêk khân a lang a ni. (Mt. 25:15) Beisei ang ngeiin, bâwih pakhatna chuan a pahnihna aiin a thawk chhuak tam zâwk a. Nimahsela, pu ber chuan “bawi ṭha leh rinawm” tia kovin, an taihmâkna chu a hlut ve ve a, lâwmman thuhmun a pe bawk a ni. (Mt. 25:21, 23) Chutiang bawkin, buh Neitupa Pathian Jehova chuan i dinhmunin a rawngbâwlnaa i tihtheih tâwk a thunun tih a hria a. A rawngbâwl tûra theih tâwp i chhuah dân chu hmuh hmaih lovin, chutiang tak chuan lâwmman a pe ang che.—Mk. 14:3-9; Luka 21:1-4 chhiar rawh.
11. Hun khirh tak kâra taihmâk chhuahna chuan malsâwmna nasa tak a thlen theih dân entîrna pe rawh.
11 Brazil rama awm kan unaunu Selmira-i thiltawn hian Pathian rawngbâwlnaa taihmâk chhuah chu dinhmun ṭha neih leh neih lohvah a innghat lo tih a târ lang. Kum sawm hnih kal ta khân, Selmira-i pasal chu in rawktute’n an kâp hlum a, enkawl ngai fa pathum a hnutchhiah a. Mi inah dârkâr rei tak tak chhûng in chhûng sekrek thawka inhlawhin, kal lam leh haw lam zin kawng hahthlâk tak chu khawpui chhûng bus tâwt takah a chuang ṭhîn a ni. Chûng harsatnate kârah chuan regular pioneer thawk thei tûrin a dinhmun a siam rem a. A fa pathumte zînga pahnih chuan pioneer an thawhpui ve ta a ni. Ani chuan: “Kum kalta chhûng zawngin, mi 20 chuang Bible ka zirpui tawh a, anni chu ka ‘chhûngkaw’ zînga mi an lo ni ta. Tûnah chuan, an ṭhian ka nih bâkah, an hmangaihna ka dawng a. Chu chu suma lei theih loh ro hlu a ni,” tiin a sawi. Buh Neitupa chuan Selmira-i taihmâk chhuahna chu mal a sâwm tak zet a ni.
12. Engtin nge thu hrilhnaah taihmâkna kan lantîr theih?
12 Tûna i dinhmun chuan rawngbâwlnaah hun a hman tamtîr thei lo che a nih pawhin, rawngbâwlna hlawhtling zâwk neih tumin buh sengnaa thawh tam lehzual chu i tum thei tho a ni. Chawlhkâr tina kan neih Rawngbâwlna Inkhâwma rawtna ṭangkai tak pêkte a taka i hman chuan, thu hrilhna kawngah i thiam lehzual ang a, thu hrilh dân kawng tharte pawh i hmang chhin bawk ang. (2 Tim. 2:15) Tin, a theih phawt chuan kohhran thlawhhma rawngbâwlnaa i tel ziah theih nân, thiltih tûr pawimawh lo zâwkte chu hun danga tih atâna sawn emaw, tih loh mai emaw tum ang che.
13. Taihmâkna neih a, neih chhoh zêl nâna thil pawimawh ber chu eng nge ni?
13 Kan taihmâk chhan chu Pathian kan hmangaih vâng leh a chunga lâwmna kan neih vâng a ni tih hre reng ang che. (Sâm 40:8) Isua tehkhin thua bâwih pathumna chuan a pu chu a hlau va, mi ti kher kher angin a thlîr a ni. Chuvângin, a talent dawn chu a pu thil neih tihpun nâna hmang lovin, leiah a phûm ta zâwk a. Chutiang inthlahdahna rilru put hmang pumpelh tûr chuan, buh Neitupa, Pathian Jehova nêna inlaichînna kan neih a, kan vawn chhoh zêl a ngai a ni. A mize duhawm tak—a hmangaihna te, a dawhtheihna te, leh khawngaihna ang chite zir nân leh chhût ngun nân hun insiam ang che. Chutianga i tihchuan, a rawngbâwlnaa theihtâwp chhuah tûrin i thinlung chu chêttîrin a awm ang.—Lk. 6:45; Phil. 1:9-11.
“In Thianghlim Tûr A Ni”
14. Buh sengnaa tel duhte chuan eng thil phût pawimawh tak nge an tlin ngai?
14 Hebrai Pathian Lehkhathu aṭanga la chhuakin, tirhkoh Petera chuan Pathianin lei lama a chhiahhlawhte tâna a duhzâwng chu heti hian a sawi a: “A kotu che u a thianghlim angin nangni pawh in chêtzia zawng zawngah lo thianghlim zâwk rawh u; ‘Nangni in thianghlim tûr a ni, kei ka thianghlim si a,’ tih ziak a nih kha,” tiin. (1 Pet. 1:15, 16; Lev. 19:2; Deut. 18:13) He thu hian buh sengnaa thawktute chu nungchang lam leh thlarau lama an thianghlim a ṭûlzia a sawi uar a. He thil phût pawimawh tak hi entîr nei tlenfaia awm tûra hma kan lâk chuan kan tlin thei a ni. Engtin nge tlenfaia kan awm theih? Pathian thu thutak ṭanpuinain tlenfai kan ni thei a ni.
15. Pathian thu thutak chuan kan tân eng nge a tih theih?
15 Pathian thu thutak chu thil tihfaina tui nêna tehkhin a ni a. Entîr nân, tirhkoh Paula chuan hriak thih Kristian kohhran chu Pathian mithmuhah chuan Krista mo thianghlim angin a thianghlim a ni tih a sawi; chu mo chu ‘thu leh tuia sil faia tihthianghlim . . . thianghlim leh hmêlhem lo’ a ni. (Eph. 5:25-27, C.L. Re-edited) Chu mi hma chuan, Isua pawhin a puan chhuah Pathian thu chuan tihthianghlim theihna a nei tih a sawi bawk. A zirtîrte a biaknaah Isua chuan: “In hnêna ka thusawi avâng chuan tûnah pawh in thianghlim tawh pang a ni,” tiin a sawi. (Joh. 15:3) Chuvângin, Pathian thu thutak chuan nungchang leh thlarau lamah thianghlimna a awmtîr thei a ni. Hetiang kawnga Pathian thutak kan intihthianghlimtîr chauhvin amah kan biakna chu pawm tlâk a ni ang.
16. Engtin nge thlarau lam leh nungchang lama thianghlimna kan vawn theih?
16 Chuvângin, Pathian buh sengnaa thawk thei tûr chuan, nungchang lam leh thlarau lama kan thianghlim lohna eng pawh chu kan paih bo hmasa tûr a ni. Ni e, buh sengnaa thawk zêl thei tûr chuan, Pathian Jehova nungchang leh thlarau lam tehna sâng takte mila nunna kawngah entawn tlâk kan ni tûr a ni. (1 Petera 1:14-16 chhiar rawh.) Kan tisa lam thianghlimna kan ngaih pawimawh ang bawkin, Pathian thutak thua intihthianghlimna chu kan dawng ziah tûr a ni a. Chutianga dawng tûr chuan Bible chhiar leh Kristian inkhâwmnaa tel a ngai a ni. Pathian thu hriattîrte nunpui tûra tih tak zeta ṭan lâk pawh a ngai bawk. Chutianga kan tih chuan sual lam kan ngaihtuahna leh khawvêl thununna ṭha lote chu kan do thei ang. (Sâm 119:9; Jak. 1:21-25) Ni e, Pathian thu thutak ṭanpuina zârah kan sual nasa tak ata pawh “tlenfai” theih kan ni tih hriat chu a va thlamuanthlâk tak êm!—1 Kor. 6:9-11.
17. Thianghlim taka awm reng tûr chuan, Bible zilhna thu engte nge kan zawm ang?
17 Pathian thutak thu-in i nun a tihfai chu i duh em? Entîr nân, he khawvêla intihhlimna ṭha lote hlauhawmna chungchâng hriatnawntîr i nih hian engtin nge i chhân lêt? (Sâm 101:3) I rinna ṭâwmpui lotu school kalpuite leh hnathawhpuite nêna ṭul lo taka inkawmna chu i pumpelh em? (1 Kor. 15:33) Pathian Jehova mithmuha thianghlim lo tak nihtîr thei che mi mal chak lohnate chu theih tâwp chhuaha do i tum tak zet em? (Kol. 3:5) Infiamna tam takte chiahpiah hnehtu he khawvêl politics leh hnam hmangaihnate ata i inlahrang em?—Jak. 4:4.
18. Nungchang lam leh thlarau lama thianghlim taka awmna chuan engtin nge buh sengnaa hlawhtling tak ni tûrin min ṭanpui?
18 Hêng thilte rinawm taka zawmna chuan rah ṭha tak a chhuah ang. Isua chuan hriak thih a zirtîr rinawmte chu grêp hrui nêna tehkhinin: “Ka zawmpui pêng rah lo apiang [ka Pa’n] a paih ṭhîn a; a rah apiang a tithianghlim ṭhîn, a rah tam lehzual nân,” tiin a sawi. (Joh. 15:2) Bible thutak tuia tihthianghlim i nih hian i rah tam lehzual ang.
Tûn leh Nakina Dawn Tûr Malsâwmnate
19. Engtin nge Isua zirtîrte chu buh sengnaa an thawh rimnaah malsâwm an nih?
19 Isua zirtîrna nunpuitu a zirtîr rinawmte chu a hnu C.E. 33 Pentikost nî chuan ‘kâwlkil thleng pawha’ a thuhretute ni tûrin thlarau thianghlimin a tichak a. (Tirh. 1:8) Tichuan, governing body member te, missionary te, leh kohhran tlawha zin kual upate an ni chho va, “vân hnuaia thil siam zawng zawngte zînga” chanchin ṭha hrilhnaah chanvo pawimawh tak an chang chho a ni. (Kol. 1:23) Anni chuan malsâwmna an dawngin, mi dangte hnênah hlimna an va thlen tak êm!
20. (a) Thlarau lam buh sengnaa i tel tlatna avângin eng malsâwmnate nge i dawn? (b) Eng nge tih tlat i tum?
20 Ni e, inngaihtlâwmna lantîrin, taihmâk chhuahin leh Pathian Thu tehna sângte nunpui zêlin, tûna thawh mêk thlarau lam buh sengna ropui takah hian theih tâwp leh awmze nei takin kan tel zêl thei ang. He khawvêl hausak âtchilhna leh nawmsip bâwl ûmna avânga mi tam takin hrehawmna leh beidawnna an tawh mêk lai hian, hlimna leh lungawina dik kan nei a ni. (Sâm 126:6) A pawimawh ber chu kan “thawhrimna chu Lalpaah chuan a thlâwn ngai lo” hi a ni. (1 Kor. 15:58) Buh Neitupa, Pathian Jehova chuan ‘kan hnathawh leh a hming chunga hmangaihna kan lantîr’ avângin chatuan malsâwmnain min vûr ang.—Heb. 6:10-12. (w10-E 07/15)
[Footnote]
^ par. 8 He talent tehkhin thu hi Isua leh hriak thih a zirtîrte indâwr dân ni bîk mah se, Kristian zawng zawngte tâna hman tlâk thu bul a keng tel a ni.
Kan Hre Chhuak Em?
Buh sengnaa theihtâwpa tel tûra ṭan i lâk lai hian . . .
• engvângin nge inngaihtlâwmna lantîr chu a pawimawh?
• engtin nge taihmâk i chhuah theih a, i taihmâk reng theih?
• engvângin nge nungchang lam leh thlarau lama thianghlim a pawimawh?
[Zirlai Atâna Zawhnate]
[Phêk 25-naa milem]
Inngaihtlâwmna chuan Lalram dah hmasa reng tûra nun tisamkhai tûrin min ṭanpui thei