‘Zirtîrna Lam Bei Uar Rawh’

“NANGNIN Zirtîrtu leh Lalpa mi ti ṭhîn; in tidik e, ka ni ngei rêng a.” (Joh. 13:13) Hêng thute hmang hian Isua chuan a zirtîrte hnênah zirtîrtu a nihna chu a sawi uar a ni. Chutah, vâna a lâwn hma lawk khân, a hnungzuitute hnênah: “Chutichuan kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” tiin thu a pe bawk. (Mt. 28:19, 20) A hnuah tirhkoh Paula pawhin Pathian Thu zirtîrtu nih a pawimawhzia a sawi uar leh bawk a. Kristian upa Timothea chu: “Chhiar te, thu hrilh te, zirtîr te bei uar rawh. . . . Mi zawng zawng hnêna i sâwtna a lan theih nân chûng thilahte chuan taima la, chûngah chuan inhmang zo rawh,” tiin a fuih a ni.—1 Tim. 4:13-15.

Khâng lai ang bawk khân tûn laiah pawh zirtîrna chu kan thlawhhma rawngbâwlna leh Kristian inkhâwmna hmêlhmang pawimawh tak a ni a. Engtin nge zirtîrna lam chu kan beih uar ang a, chu chuan Pathian Thu zirtîrtute anga kan sâwtna, a nih loh leh hmasâwnna lantîr tûrin eng kawngtein nge min ṭanpui ang?

Zirtîrtu Ropui Entawn Rawh

Isua zirtîr dân chuan a ngaithlatu tam takte rilru a la hle a. Nazaret khuaa inkhâwmna ina a thu ngaithlatute a nghawng dân hi lo chhinchhiah teh. Chanchin ṭha ziaktu Luka chuan heti hian a ziak a ni: “An zain amah an fak a, a kam chhuak khawngaih thute chu mak an ti hle a,” tiin. (Lk. 4:22) Isua zirtîrte chuan an thu hrilhnaah an Pu entawn tûr siam chu an zui a. Dik takin, tirhkoh Paula chuan a Kristian unaute chu: “Mi zirtute ni rawh u, kei pawh Krista zirtu ka ni ang bawk hian,” tiin a fuih a ni. (1 Kor. 11:1) Isua zirtîr dân a entawn tlat avângin, Paula chu ‘vântlâng zîng leh in tina a zirtîrnaah’ a hlawhtling hle a ni.—Tirh. 20:20.

‘Dâwr Hmuna’ Zirtîrna

Paula’n vântlâng hmaa thu zirtîr a thiamzia chu Tirhkohte bung 17-na thu aṭang hian a hmuh theih a. Chutah chuan Grik rama Atheni khua a tlawh chungchâng kan hmu a ni. Chu mi khuaah chuan a hawina lam apiangah—kawtthlêr a ni emaw, vântlâng hmun a ni emaw—pathian lem hlîr a hmu a. Chuvângin, Paula’n a rilrua a helh viau pawh hi a mak lo ve! Mahse, a insûm theihna a hloh phah chuang lo. Hloh ahnêkin, “inkhâwmna inah . . . a hnial ṭhîn a, dâwr hmunah pawh chuta lo awm apiangte chu ni tin a hnial bawk ṭhîn” zâwk a ni. (Tirh. 17:16, 17) A va entawn tlâk tak êm! Mi tinte chu anmahni thiam loh chantîr zâwng ni lo va, zahna lantîr chunga kan biak chuan mi ṭhenkhat chu kan thusawi ngaithla a, a tâwpa sakhaw dik lo phuarna ata chhuak tûrin kan ṭanpui thei a ni.—Tirh. 10:34, 35; Thup. 18:4.

Dâwr hmuna Paula thusawi ngaithlatu tam tak chu an khirh hle a. An zînga ṭhenkhat chu Paula thu hrilh thutak thu nêna inmil lo tak ngaih dân nei mifingte an ni hlawm a. Chûng mite’n an lo hnial kalh chuan an thusawi chu ngun takin a ngaihtuah ṭhîn. Ṭhenkhat chuan Grik ṭawnga “thlai chi chuktu” sawina hmingin an ko nawmnah a, chu chu an ṭawng upaa mi “kamtam” sawina a ni a. Mi dangte chuan: “Ram dang pathiante thu hriltu a ni âwm e,” an ti bawk.—Tirh. 17:18.

Mahse, chutianga a thu ngaithlatute’n an koh nawmnah avâng chuan Paula chu a lunghnual chuang lo. Chutih ahnêkin, a thu zirtîr hrilhfiah tûra tih a nih chuan, Paula chuan chu hun remchâng chu zirtîrtu thiam tak a nihzia  târ langtu thu ṭha tak sawi nân a hmang zâwk ṭhîn. (Tirh. 17:19-22; 1 Pet. 3:15) A thusawite chipchiar taka ennawnin, zirtîrna lama kan thiamna tihmasâwn tûra min ṭanpui thei thute chu i lo zir ang u.

An Ngaihven Tûr Thute Thlang Rawh

Paula chuan: “Nangni Atheni khuaa mite u, engkimah sakhaw ngaihsak tak mi in ni tih ka hria e. . . . In chibai bûkate ka en laiin, maichâm pakhat, a chungah, ‘Hriat Loh Pathian tân,’ tia ziak ka hmu a ni. Chutichuan hre lova chibai in bûk ṭhina kha, chu mia thu chu ka hrilh che u a nih hi,” tiin a sawi a ni.—Tirh. 17:22, 23.

Paula chuan a chheh vêla thil awmte chu a chîk a. Chuta ṭang chuan a thu ngaithlatute chungchâng thil tam tak a hria a ni. Keini pawhin thil kan chîk chuan in neitu chungchâng engemaw kan hre ve thei a. Entîr nân, tual laia naupang inkhelhna awmte emaw, kawngkaa thil ziak leh târte emaw chuan thil tam tak a târ lang thei a ni. In neitu dinhmun tûr âwm kan hriat chuan kan thusawi tûr chauh ni lovin, kan sawi dân tûr thlengin fîmkhur takin kan thlang thei ang.—Kol. 4:6.

Paula chuan mi dangte dem zâwngin thu a sawi lo. Mahse, Atheni khuaa mite ‘chibai bûk dân’ chu hriatna dikah a innghat lo tih a hria a. Paula chuan Pathian dik an biak theih dân tûr chiang takin a kawhhmuh a ni. (1 Kor. 14:8) Chuvângin, Lalram chanchin ṭha kan puan hian, fiah taka puan leh mite demna tel lova puan chu a va pawimawh tak êm!

Remhre Tak Ni La, Thleibîk Nei Suh

Paula chuan heti hian a sawi zawm a: “Pathian, khawvêl leh a chhûnga thil zawng zawng siamtu chu lei leh vân lal a nih avângin kuta sak inahte a awm lo va; thil tlachham angin mihring kuta rawngbâwksakin a awm hek lo, amah ngei chu engkim hnêna nunnate, thâwknate leh thil zawng zawngte petu a ni zâwk e,” tiin.—Tirh. 17:24, 25.

Hetah hian Paula chuan Pathian Jehova chu Nunna-Petu a nihzia a sawi a; mahse, remhre takin “lei leh vân lal” tiin a ko a ni. Sakhaw hrang hrang vuantute leh hnam hrang hranga mi rilru ṭhate hnêna Pathian Jehova chu nunna zawng zawng hnâr a nihzia hre thiam tûra ṭanpui chu a va hlimawm tak êm!—Sâm 36:9.

Paula chuan heti hian a sawi zawm zêl a: “Bul hmun khat vekin hnam tin mi a siam a, an tân hun bite a ruat a, an awmna rîte pawh a khamsak a, Pathian an zawn a, an dap an dap a, an hmuh mial theih nân; nimahsela ani chuan min hlat lo ṭheuh si a,” tiin.—Tirh. 17:26, 27.

Mite kan zirtîr dân aṭangin kan biak Pathian nihna chu kan lantîr thei a. Pathian Jehova chuan thleibîk nei lovin, hnam tina mite’n amah ‘an hmuh mial theih nâna’ an zawn chu a phal a ni. Keini pawhin thleibîk nei lovin kan mi tawh apiangte hnênah thu kan hril a. Siamtu chunga rinna neite chu chatuan malsâwmna neihtîr thei amah nêna inṭhianna nei tûrin ṭanpui kan tum a ni. (Jak. 4:8) Mahse, Pathian awm ring lotute chu engtin nge kan ṭanpui ang? Paula entawn tûr siam zuiin kan ṭanpui thei a ni. A thu sawi zawm hi lo chhin chhiah ta ila.

“Amah avângin kan nung, kan che, kan awm a ni si a; nangmahni hlaphuahthiam tute emaw pawhin, ‘Keini pawh a thlahte kan ni si,’ tia an sawi ang khân. Chutichuan Pathian thlahte kan nih ahnuin, Pathian pangti chu rangkachak te, tangka te, lung te mihring  themthiam leh remruata chher te ang hi emaw tih, kan rin tûr a ni lo ve.”—Tirh. 17:28, 29.

Paula chuan a thusawi an ngaihthlâk duh nân, Atheni mite hriat leh pawm hlaphuahthiamte hla thu chu a la chhâwng a. Keini pawhin kan thu ngaithlatute pawm zâwng thute kan sawipui thei a ni. Entîr nân, Hebrai mite hnêna a lehkha thawna Paula tehkhin thu hman hi vawiin nî thleng hian a hman tlâk a ni: “Chhûngkaw tin hi tu din emaw an ni vek a; engkim dintu chu Pathian a ni,” tih hi. (Heb. 3:4, C.L. Re-edited) He tehkhin thu tluangtlam tak ṭanchhana chhûttîrna chuan in neitute chu kan thusawi a dik tih pawm tûrin a ṭanpui thei a ni. Paula thusawia lang zirtîrna hlawhtling nihna dang hi lo chhinchhiah teh—mi a chêttîrna chu.

Hun Hmâwr Tawhzia Sawi Uar Rawh

Paula chuan heti hian a sawi a ni: “Chutichuan Pathianin kan hriat loh laite a haider ṭhîn a; nimahsela tûnah hian ram tina mi zawng zawng sim tûr thu a pe ta a ni, nî a tiam avângin; chu mi niah chuan a mi ruata chu, leia mite fel takin a ngaihtuahtîr ang; chu chu Pathianin amah chu mitthi zîng ata kaithovin, mi zawng zawng hnênah a hriattîr tawh a ni,” tiin.—Tirh. 17:30, 31.

Pathianin rei lo te chhûng sualna awm a phalna chuan kan rilru put hmang dik tak lantîr theihna hun remchâng min pe ṭheuh va. Chuvângin, kan hun hmâwr tawhzia kan sawi uar a, Lalram rorêlna lo thleng mai tawh tûrin malsâwmna a rawn thlen tûrte rin tâwkna nêna kan hrilh chu a pawimawh hle a ni.—2 Tim. 3:1-5.

Chhân Lêt Dân Hrang Hrangte

“Mitthi zîng ata thawhlehna thu chu an hriat veleh a ṭhenin an nuihsan a; a ṭhenin, ‘He thu hi i hnênah kan la ngaithla leh ang e,’ an ti a. Chutichuan Paula chu an zîng ata a chhuak ta a. Nimahsela mi tute emaw a hnênah an tel ta tlat a, an ring ta a.”—Tirh. 17:32-34.

Ṭhenkhatin kan zirtîrna an chhân lêt nghâl a; ṭhenkhat erawh chuan hun an duh rei deuh pawh a ni thei. Mahse, thutak kan hrilhfiah dân tluangtlam tak leh fiah tak avânga mi pakhat chauh pawhin Pathian Jehova hriatna dik a lo neih hian, Pathianin a Fapa lama mite hîp nâna min hman avângin kan va lâwm ṭhîn tak êm!—Joh. 6:44.

Kan Zir Theihte Chu

Paula thusawi dân kan ngaihtuahna aṭangin mi dangte hnêna Bible thutak hrilhfiah dân tam tak kan zir thei a ni. Kohhrana vântlâng thusawina nei ṭhîn kan nih chuan, ring lo mite’n Bible thutak an hriatthiam a, an pawm theih nâna ṭanpui thei tûr ṭawngkamte thiam taka hmangin Paula entawn chu kan tum thei a ni. Chutiang thutak chu fiah taka sawi chhuah kan duh a; mahse, ring lo mi lo tel vete rinna sawisêl lo tûrin kan fîmkhur tûr a ni a. Chutih rual chuan, kan thu hrilh rawngbâwlnaah mi hmin theihna leh remhriatna lantîr kan tum tlat tûr a ni. Chutianga kan tih chuan ‘zirtîrna lam bei uar’ tûra Paula fuihna thu chu kan zâwm tak zet a ni ang. (w10-E 07/15)

[Phêk 22-naa milem]

Paula chuan fiah tak, tluangtlam tak, leh remhre takin a zirtîr

[Phêk 23-naa milem]

Kan thu ngaithlatute rilru veizâwng ngaihtuahin Paula kan entawn