Engvângin Nge Hun Kan Vawn Dik Ang?

HUN vawn dik, a nih loh leh a hun taka thil tih chu a awlsam reng lo. A chhan ṭhenkhat chu zin kawng thui vâng te, lîrthei veivâk tam lutuk vâng te, leh kan hun duan ngah lutuk vâng te a ni thei. Mahse, a hun taka thil tih chu a pawimawh hle. Entîr nân, hna thawhnaah chuan hun vawng dik chu mi rin tlâk leh taimaa ngaih an ni tlângpui ṭhîn. Kawng lehlamah, hun vawng dik lova thleng tlai ṭhîn chuan mi dangte hna a tibuai thei a, thil siam chhuah ṭhat lam leh hna thawh ṭhat lam pawh a nghawng thei a ni. Thlen tlai ṭhinna avângin zirlai chuan class ṭhenkhat a ṭhulh phah thei a, chu chuan a pâwl sawnna tûr pawh a dâl thei bawk. Doctor hmu tûr emaw, ha siam tûr emaw kan nih a, a hun tiama kan thlen loh chuan enkawlna ṭha kan dawn loh phah thei bawk a ni.

Mahse, hmun ṭhenkhatah chuan hun vawn dik chu pawimawh lutuka ngaih a ni lo va. Chutiang hmunah chuan tlai chu awlsamtêin chîn ṭhanah kan nei thei a ni. Chutiang a nih chuan, a hun taka thil tih ṭhin duhna kan insiam chu a pawimawh hle. Hun vawn dik pawimawhzia hriatthiamna chuan hun vawng dik tûrin min ṭanpui ngei ang. Hun kan vawn dik chhan tûr ṭhenkhat chu engte nge ni? Engtin nge chu mi chungchânga harsatna chu kan hmachhawn theih ang? Hun kan vawn dik avângin eng hlâwknate nge kan beisei theih?

 Jehova—Pathian Hun Vawng Dika Chu

Hun vawn dik kan duh chhan bul ber chu kan biak Pathian entawn kan duh vâng a ni. (Eph. 5:1) Pathian Jehova chuan he mi chungchângah hian entawn tûr ṭha tak a siam a. Ani chu a tlai ngai lo. A thutiamte hlen chhuahnaah a hun duan a zâwm tlat ṭhîn a ni. Entîr nân, Tuilêt hmanga khawvêl suaksual tihboral a tum khân Nova hnênah: “I tân fâr thingin lawng siam rawh,” tiin a hrilh a. A hun a thlen dâwn hnaih chuan Nova chu lawng chhûnga lût tûra hrilhin: “Ni sarih a la bâk a, chu mi hnuah chuan lei chungah hian ni sawmli leh zan sawmli chhûng zawng ruah ka sûrtîr ang a; ka thilnung siam tinrêng hi lei chung ata ka tiboral ang,” tiin a hrilh bawk a ni. Chutah, a hun dik tak, “ni sarih hnuah chuan leiah hian tui chu a lo lêt ta” chiah mai a ni. (Gen. 6:14; 7:4, 10) Nova leh a chhûngte chu lawngah chuan a hun takah lût lo ta se an chunga thil thleng tûr chu han ngaihtuah teh. An biak Pathian ang taka hun an vawn dik ve a ngai a ni.

Tuilêt hnu kum 450 vêlah Pathian Jehova chuan thlahtu Abrahama hnênah thutiam Thlah lo chhuahna tûr fapa a neih tûr thu a hrilh a. (Gen. 17:15-17) “Nakkum hetih hun  taka” Isaaka a pian tûr thu a hrilh a ni. Chutiang chuan a thleng ngei em? Bible chuan: “Sari chu a rai a, Pathianin a hnêna a sawi hun ruat takah chuan Abrahama chu a tar hnuin fapa a hrinsak ta a,” tih min hrilh a ni.—Gen. 17:21; 21:2.

Bible-ah hian Pathian hun vawn dikzia târ langtu entîrna tam tak a awm a. (Jer. 25:11-13; Dan. 4:20-25; 9:25) Bible chuan Pathian rorêlna ni lo thleng tûr chu nghâk tûrin min hrilh a. Mihring thlîrna aṭanga “rei deuh” anga a lan pawhin, “a tlai chuang lo vang” tih min tiam a ni.—Hab. 2:3.

Biaknaa Hun Vawn Dik A Pawimawh

Israel mipa zawng zawng chu “LALPA kût hun” atâna ruatah chuan a hun takah an thleng tûr a ni a. (Lev. 23:2, 4) Pathian chuan thil hlan ṭhenkhatte hlan hun tûr pawh a ruat thlap a ni. (Ex. 29: 38, 39; Lev. 23:37, 38) Hei hian Pathianin a chhiahhlawhte chu an biaknaa hun an vawn dik a duhzia a târ lang a ni lâwm ni?

Kum zabi pakhatnaa Paula’n Korinth mite hnêna Kristian inkhâwm kaihhruai a nih dân tûr a zirtîr khân heti hian a fuih a: “Engkim mawi tak leh fel taka tih ni rawh se,” tiin. (1 Kor. 14:40) Chutiang chuan, Kristian inkhâwmna chu a hun takah ṭan a ni tûr a ni. Pathian Jehova’n hun vawn dik chungchâng a thlîr dân chu a danglam ngai lo. (Mal. 3:6) A nih chuan, hêng Kristian inkhâwmahte hian a hun taka kan thlen theih nân eng nge kan tih theih?

Hun Vawng Dik Tûra Harsatnate Hmachhawnin

Ṭhenkhat chuan ruahman lâwkna siam chu an ṭangkaipui hle a. (Thuf. 21:5) Entîr nân, a hun ruata thleng tûrin zin kawng thui tak kal a ngaih chuan, a hun chiah chiaha thleng tûr tâwk chauhva chhuah chu a fin thlâk ang em? Kal kawngah “hriat lâwk loh thil thleng” kan tawng a nih pawha kan tlai lohna tûrin chhuah hma deuh chu a finthlâk lo vang maw? (Thur. 9:11, NW) Hun vawng dik tak tleirâwl pakhat José-a * chuan, “a hun taka thleng thei tûra tupawh ṭanpui theitu chu zin nâna hun mamawh zât hriat hi a ni,” tih a sawi.

Ṭhenkhat tân chuan, Kristian inkhâwmnaa thleng hma thei tûrin an hna thawhna hmun chhuahsan hma deuh theih nân ruahmanna an siam a ṭûl thei a ni. Ethiopia rama Thuhretu pakhat chuan a hna thawh hun inthlâk thleng avânga kohhran inkhâwm minute 45-a a tlai dâwn tih a hriatin chutiang chiah ruahmanna chu a siam a. Inkhâwm zân chuan a hna aṭanga a chhuah hma theih nân amah rawn thlâk hma tûrin a hna thawhpui pakhat chu ruahmanna a siampui a. Chutah, a rulh nân a chuanga dârkâr sarih thawh lêtsak a remti a ni.

Naupang nei kan nih chuan, a hun taka inkhâwmnaa thlen chu a harsa hle thei a. Naupangte siam peih vek chu nu mawhphurhna ni deuh ber mah se, chhûngkuaa mi dangte pawhin an ṭanpui theiin, an ṭanpui tûr a ni bawk. Mexican nu pakhat Esperanza-i chuan amah chauhvin fa pariat lai a enkawl a. Tûnah chuan kum 5 aṭanga kum 23 mi an ni tawh a ni. Ani chuan an chhûngkuaa hun an vawn dik theih chhan chu heti hian a sawi: “Ka fanu upa zâwkte chuan an naute insiam an ṭanpui a. Chuvângin, in lam hna ka zawh hma theih phahin, kan hun duan ang chiaha chhuak thei tûrin ka insiam theih phah a ni,” tiin. An chhûngkua chuan in chhuahsan hun tûr an duang thlap a, chutianga an tih theih nân an ṭangrual ṭheuh a ni.

Pathian Biakna Kawnga Hun Vawn Dik Chu Hlâwkpui Rawh

Kristian inkhâwmnaa a hun taka thlen avânga malsâwmna kan dawnte chhût lêtna chuan hun vawn dik kan duhna leh vawng dik tûra kan tih theih apiang tih kan tumna chu a tinghet thei a. Inkhâwmnaa a hun taka thleng ṭhîn nula pakhat Sandra-i chuan heti hian a sawi: “Thlen hma a nuam ka tih chhan chu unaute chibai a, biak a, anmahni hriat chian lehzualna hun ka nei thei hi a ni,” tiin.  Kingdom Hall-a kan thlen hma chuan rawngbâwlnaa mi dangte chhelna leh rinawmna chanchinte ngaihthlâk chu kan hlâwkpui thei a ni. Kan tel vena leh ṭawngkam mi tichak thei tak chuan kan unaute chu ‘hmangaih leh thil ṭha ti tûra chawk thovin,’ an chungah nghawng ṭha a nei thei bawk.—Heb. 10:24, 25.

Kristian inkhâwm ṭan nâna hla sak leh ṭawngṭainate hi kan biakna pêng pawimawh tak a ni a. (Sâm 149:1) Kan hlate chuan Pathian Jehova a chawimawi a, kan neih tûr miziate min hriat nawntîr a, rawngbâwlnaa hlim taka tel tûrin min fuih bawk. A nih leh ṭanna ṭawngṭai chungchâng hi eng nge ni ve? Hmân laiin, Pathian Jehova chuan biak in chu a “ṭawngṭaina in” tiin a ko va. (Is. 56:7) Tûn laiah pawh, kan inkhâwmnaah Pathian hnêna ṭawngṭaina hlân tûrin kan kalkhâwm a ni. Ṭanna ṭawngṭaina chu Pathian Jehova kaihhruaina leh a thlarau thianghlim dîlna mai ni lovin, kan thu ngaihthlâk tûrte dawng sawng thei tûra kan rilru leh thinlung buatsaihna a ni bawk. Chuvângin, inkhâwm ṭan nâna hla sak leh ṭawngṭai hma ngeia thlen chu kan tum tlat tûr a ni.

Inkhâwmnaa a thlen hma ṭhin chhan sawiin, kum 23 mi Helen-i chuan: “Kal hma chu Pathian Jehova ka hmangaihzia ka lantîrna niin ka hria a, hla leh ṭanna ṭawngṭai pawh tiamin, inkhâwmnaa thusawi zawng zawng chu ama min pêk vek a ni si a,” tiin a sawi. Keini pawhin chutiang chuan kan thlîr ve tûr a ni lâwm ni? Kan thlîr ve ngei tûr a ni. Chuvângin, kan thiltih rêng rêngah, a bîk takin, Pathian dik kan biakna nêna inkûngkaih thilah hun vawn dik ṭhin chu i tum tlat ang u. (w10-E 08/15)

[Footnote]

[Phêk 26-naa milem]

Ruahman lâwkna siam rawh

[Phêk 26-naa milem]

“Hriat lâwk loh thil thleng” awm thut thei tân hun duang tel rawh

[Phêk 26-naa milemte]

Inkhâwmnaa thlen hma avânga hlâwknate chu têl rawh