Isua’n Pathian Felna A Chawimawi Dân

“Pathianin ama felzia entîr nân Krista Isua chu, a thisena, rinna avânga, sual thuphachawinaah a ruat a.”—ROM 3:25.

1, 2. (a) Mihringte dinhmun chungchângah Bible-in eng nge min zirtîr? (b) He thuziak hian eng zawhnate nge a chhân dâwn?

EDEN huana helna chhuak chanchin Bible-a chuang chuan hriat a hlawh hle a. “Mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tia hrilhfiah angin, Adama sual sawhkhâwk chu kan zain kan tuar ṭheuh a ni. (Rom 5:12) Thil dik tih tumin nasa takin ṭan la mah ila, thil kan tisual ṭhîn a, chu mi atân Pathian ngaihdamna kan mamawh a ni. Tirhkoh Paula meuh pawhin heti hian a sawi: “Ṭhatna tih ka duh hi ka ti lo va; sualna tih ka duh loh hi ka ti zâwk si ṭhîn a. Mi rethei ka va ni tehlul êm!” tiin.—Rom 7:19, 24.

² Mi sual kan nihna chuan hêng zawhna pawimawh takte hi a chawk chhuak a ni: Engtin nge Nazaret mi Isua chu sual tel lova a pian theih a, engvângin nge baptisma a chan? Engtin nge Isua nun kawng chuan Pathian Jehova felna a chawimawi? A pawimawh berah chuan, Krista thihna chuan eng nge a hlenchhuah?, tiin.

Pathian Felna Chu Cho A Ni

3. Engtin nge Setana’n Evi a bum?

³ Kan nu leh pa hmasa ber, Adama leh Evi-te chuan Pathian lalchungnunna chu âtthlâk taka hnâwlin, “rûlpui tar, Diabola leh Setana an tih” rorêlna chu an thlang a. (Thup. 12:9) Chutiang thil a lo thlen dân chu ngaihtuah teh. Setana chuan Pathian Jehova rorêl dân fel tak chu a ringhlel a. Evi hnênah: “Pathianin, ‘Huana thing rah rêng rêng in ei tûr a ni lo,’ a ti elo maw?” tia zâwtin a rinhlelhna chu a lantîr a ni. Evi chuan thing pakhat chu dek pawh an dek hlek tûr a ni lo va, an deh chuan an thi ngei ang tih Pathian thupêk chiang tak chu a sawi chhâwng leh a ni. Chutah Setana chuan Pathian chu dâwt sawiah puhin: “Thi teh suh e,” a ti a. Setana chuan Evi chu Pathianin a lakah thil ṭha engemaw tak a thup tlat tih leh thing rah a ei chuan Pathian ang maiin a chhia leh a ṭha mahnia titlu tûrin zalênna a nei dâwn tih ring tûrin a bum a ni.—Gen. 3:1-5.

4. Engtin nge mihringte hi Setana lalchungnunna hnuaia an lo awm tâk?

⁴ A nihna takah chuan, Setana chuan mihringte hi Pathian laka an inlâk hran chuan an hlim zâwk dâwn tih a sihhmuh a ni. Adama chuan Pathian Jehova lalchungnunna fel ṭan aiin, a nupui thu a zâwm zâwk a, thing rah ei phal loh chu a ei ta a. Chutiang chuan Pathian Jehova laka a dinhmun ṭha famkim chu hlohvin, sual leh thihna nghâwngkawl hrehawm tak chu min bahtîr ta vek a ni. Chutih rualin, mihringte chu Pathian lalchungnunna chotu “he khawvêl pathian” Setana lalchungnunna hnuaiah an lo awm ta bawk a ni.—2 Kor. 4:4; Rom 7:14.

5. (a) Engtin nge Pathian Jehova’n a lo sawi tawh ang ngeiin Adama leh Evi chunga ro a rêl? (b) Pathian chuan Adama leh Evi thlahte hnênah beiseina eng nge a pêk?

⁵ Pathian Jehova chuan a lo sawi tawh ang ngeiin Adama leh Evi chungah thi tûrin ro a rêl ta a. (Gen. 3:16-19) Mahse, Pathian thiltum a hlawhchham ta tihna erawh a ni hauh lo! Adama leh Evi chungthu a rêl khân, Pathian Jehova chuan an thlah lo la awm tûrte tân beiseina ropui tak a pe a ni—Setana’n a ke artui a la tihthitlin tûr “thlah” din a tum thu puang  chhuakin. Amaherawhchu, chu Thlah chu lo dam chhuak lehin Setana “lû a la tithitling ang.” (Gen. 3:15) Bible chuan he mi chungchâng sawi zauvin, Isua chungchângah heti hian a sawi a ni: “Pathian Fapa lo lan chhan ber chu diabola hnathawhte a tihboral theih nân a ni,” tiin. (1 Joh. 3:8) Mahse, engtin nge Isua nungchang leh thihna chuan Pathian felna a chawimawi?

Isua Baptisma Chan Awmzia Chu

6. Isua’n Adama sual a rochung ve lo tih engtin nge kan hriat theih?

⁶ Isua a lo puitlin chuan, Adama ṭhat famkim lai ang chiah lo ni tûr a ni a. (Rom 5:14; 1 Kor. 15:45) A awmzia chu ṭha famkima a pian a ngai tihna a ni. Chu chu engtin nge a nih theih? Vântirhkoh Gabriela chuan Isua nu, Mari hnênah heti hian chiang takin a hrilhfiah a ni: “Thlarau thianghlim i chungah a lo thleng ang a, Chungnungbera thiltihtheihnain a hliah khuh ang che; chuvângin mi thianghlim lo piang tûr pawh chu Pathian Fapa an ti ang,” tiin. (Lk. 1:35) Isua a naupan lai chuan, Mari chuan a lo pian chhuah dân chanchin ṭhenkhat chu a hrilh ngei niin a lang. Chuvângin, Isua chuan a nu leh a pa hrawn Josefa’n Pathian biak ina an va hmuh khân: “Ka Pa ina ka awm tûr in hre lo vem ni?” tiin a lo zâwt a ni. (Lk. 2:49) Isua chuan a naupan lai ata Pathian Fapa a nihzia a inhria tih a chiang hle. Chuvângin Pathian felna chawimawi chu a ngai pawimawh hle a ni.

7. Isua chuan eng thil hlu takte nge a neih?

⁷ Isua chuan thlarau lam thil a ngaihvenzia chu Pathian biakna inkâwma tel ziahin a lantîr a. Rilru ṭha famkim a neih avângin a thu hriat leh Hebrai Pathian Lehkha Thu aṭanga an chhiar chhuah zawng zawng chu a hre thiam ngei ang. (Lk. 4:16) Ani chuan thil hlu tak dang pawh a nei bawk—mihringte tâna hlan theih tûr taksa ṭha famkim chu. Isua chu baptisma a chan laiin a ṭawngṭai a, Sâm 40:6-8-a hrilh lâwk thute chu a ngaihtuah a ni thei ngei ang.—Lk. 3:21; Hebrai 10:5-10 chhiar rawh. *

8. Engvângin nge Baptistu Johana chuan Isua chu baptis loh a tum?

⁸ Baptistu Johana chuan atîrin Isua chu a baptis duh lo. Engvângin nge? Johana baptisma chu Judate tân Dân thupêk laka an sual simna entîrna a nih vâng a ni. Chhûngkhat an nih angin, Johana chuan Isua chu mi fel, sual sim tûr nei lo a ni tih a hre ngei ang. Isua chuan Johana hnênah Atân baptisma chan a mawi  tih a hrilh a ni: “Hetianga felna zawng zawng hlen chhuah hi ka tân a mawi a ni,” tiin.—Mt. 3:15.

9. Isua baptisma channa chuan eng nge a entîr?

⁹ Mi ṭha famkim a nih angin, Isua chuan Adama angin thlah ṭha famkim a nei thei tih a hre ngei ang. Amaherawhchu, Pathian Jehova duhzâwng a nih loh avângin chutianga awm chu a châk ngai eih lo. Pathian chuan Isua chu thutiam Thlah, a nih loh leh Messia tih tûrte tizo tûrin leiah a rawn tîr a ni a. Chutah chuan inthawi nâna a mihring nun ṭha famkim hlan a tel a ni. (Isaia 53:5, 6, 12 chhiar rawh.) Isua baptisma chan awmzia chu kan chan awmzia nên a inang lo ngei mai. Isua chu Pathian hnêna inpumpêk tawh Israel hnam zînga mi a nih sa tawh avângin, a baptisma channaah chuan Pathian Jehova hnêna inpumpêkna a tel lo va. Isua baptisma channa chuan Messia tih atâna Bible sawi lâwkte ang mila Pathian duhzâwng ti tûra mahni inhlanna a entîr zâwk a ni.

10. Messia anga Pathian duhzâwng tihnaah chuan eng nge tel a, chu chu Isua’n engtin nge a ngaih?

¹⁰ Isua tâna Pathian Jehova duhzâwngah chuan Pathian Ram chanchin ṭha puan chhuah te, zirtîr siam te, leh zirtîrte chu zirtîr siam lehchhâwng tûra buatsaihte a tel a ni. Isua inhlannaah chuan Pathian Jehova lalchungnunna fel thlâwp nâna tihduhdahna leh râwng taka thihna tawrh a inhuamna pawh a tel a ni. Isua chuan a Pa vâna mi a hmangaih tak zet avângin, a duhzâwng tih chu nuam a ti a, inthawi nâna a taksa a hlanna aṭangin lungawina nasa tak a hmu a ni. (Joh. 14:31) Tin, a nun ṭha famkim hlutna chu sual leh thihna bâwih ata min tlan nâna Pathian hnêna a hlan theih avângin a lâwm hle bawk. Pathian chuan he mawhphurhna rit tak phur tûra Isua inpêkna chu a pawm em? Pawm tehrêng e!

11. Engtin nge Pathian Jehova chuan Isua chu thutiam Messia, a nih loh leh Krista anga a pawmzia a târ lan?

¹¹ Jordan Lui aṭanga Isua a lo chhuah laia Pathian Jehova’n Isua a pawmzia chiang taka a sawi chhuah chu Chanchin Ṭha ziaktu mi palite chuan an târ lang ṭheuh va. Johana chuan: “Thlarau chu ṭhuro angin vân aṭanga chhuk ka hmu a, [Isua] chungah a fu reng a. . . . Chu chu ka hmu tawh a, he mi hi Pathian Fapa a ni tih ka hriattîr tawh,” tiin a sawi. (Joh. 1:32-34) Chu bâkah, chu mi ṭum chuan Pathian Jehova chuan: “Hei hi ka Fapa duh tak, ka lawm êm êma chu a ni,” tiin a puang chhuak bawk a ni.—Mt. 3:17; Mk. 1:11; Lk. 3:22.

Thih Thlengin A Rinawm

12. Isua’n baptisma a chan hnu kum thum leh a chanve chhûngin eng nge a tih?

¹² Isua chuan baptisma a chan hnu kum thum leh a chanve chhûng chu a Pa chanchin leh Pathian lalchungnunna felzia mite hrilhhriat nân a hmang ṭhak a ni. Ram Tiam dung leh vâng hrût chhuaka a kalna lamah chau hle ṭhîn mah se, chipchiar taka thutak a hriattîrna tûr chu eng mahin a dang thei chuang lo. (Joh. 4:6, 34; 18:37) Isua chuan mi dangte hnênah Pathian Ram chanchin a zirtîr a. Dam lote mak tak maia tidamin, mipui rilṭâmte hrai puarin, leh mitthite hial pawh kaithovin, Lalramin mihringte tâna a tih tûrte chu a lo entîr a ni.—Mt. 11:4, 5.

13. Ṭawngṭaina chungchânga Isua zirtîrna chu eng nge ni?

¹³ Isua chuan a thu zirtîr leh tihdamna hna a thawhte avânga hming ṭhatna chu la mai lovin, inngaitlâwm taka Pathian Jehova hnêna chawimawina zawng zawng hlanna kawngah entawn tûr ṭha tak a siam a. (Joh. 5:19; 11:41-44) Tin, ṭawngṭainaa kan telh tûr thu pawimawh berte pawh min hriattîr bawk. Kan ṭawngṭainaah chuan Pathian hming Jehova “zahawm” tûr, a nih loh leh tihthianghlim ni tûr leh Pathian “duhzâwng vâna an tih anga leia mi’n” an tih  theihna tûra Pathian lalchungnunna fel hmanga Setana rorêlna suaksual thlâk ni tûrtea dîlna chu a tel tûr a ni. (Mt. 6:9, 10) Tin, Isua chuan Pathian ‘ram leh a felna zawng hmasa zâwk a,’ kan ṭawngṭaina nêna inmila thil ti tûrin min fuih bawk a ni.—Mt. 6:33.

14. Isua chu ṭha famkim mah ni se, engvângin nge Pathian thiltuma a chanvo hlen chhuak tûra ṭan a lâk a ngaih?

¹⁴ Inthâwi nâna a nun a hlan hun a hnaih tâkah chuan, Isua chuan a mawhphurhna rit tak chu a hre chiang telh telh a. A Pa thiltum hlawhtlinna leh a hming ṭhatna chu dik lo taka a chunga rorêlna leh râwng taka thihna a tawrh chhuahnaah a innghat tlat a ni. A thih hma ni nga-ah Isua chu hetiang hian a ṭawngṭai a ni: “Tûnah ka rilru a mangang e; engnge ka sawi ang aw? ‘Ka Pa, he mi hun lakah hian mi chhandam rawh,’ ka ti ang em ni? Engpawh ni sela, he mi tûr hi, he mi hun thleng hian ka awm chhan a ni,” tiin. Hetianga mihring rilru pângngai a sawi chhuah hnuah, Isua chuan thil pawimawh zâwk lamah a rilru pe tlatin: “Ka Pa, i hming chawimawi rawh,” tiin a ṭawngṭai a. Pathian Jehova chuan: “Ka chawimawi tawh, ka chawimawi leh bawk ang,” tiin a chhâng nghâl vat a ni. (Joh. 12:27, 28) Ni e, Isua chuan mihringte tawrh tawh zînga rinawmna fiahna nasa ber tawh chu a inhuam a ni. Mahse chûng a Pa thusawite chuan Isua chu Pathian Jehova lalchungnunna chawimawina leh thiam chantîrna kawngah a hlawhtling dâwn tih a rinnghehtîr ngei ang. Chutiang tak chuan a hlawhtling ta ngei bawk!

Isua Thihnain A Hlen Chhuah Chu

15. Engvângin nge Isua chuan a thih dâwnah: “A kin ta,” a tih?

¹⁵ Isua chuan nghaisakna bana hrehawm taka thâwk hnuhnûng ber a lâk pahin: “A kin ta,” a ti a. (Joh. 19:30) Baptisma a chan aṭanga a thih thleng, kum thum leh a chanve chhûnga Pathian ṭanpuinaa Isua hna thawh zawhte chu a va ropui tak êm! Isua a thih chuan, lîr nasa takin a nghîng a; chu chuan Isua tihhlumnaa mawhphurtu ber Rom sipai hotu chu: “He mi hi Pathian Fapa a ni ngei mai,” tia sawi tûrin a chêttîr hial a ni. (Mt. 27:54) Chu sipai hotu chuan Isua chu Pathian Fapaa a inchhâl avânga mite’n an nuihzat lai chu a lo hmu ngei ang. Hrehawm tinrêng a tuar chung pawhin, Isua chuan a rinawmna vawng tlatin, Setana chu dâwtsawitu ṭihbaiawm tak a nihzia a finfiah a ni. Pathian lalchungnunna thlâwptu zawng zawngte chungchângah, Setana chuan he chona hi a tichhuak a ni: “Miin a neih zawng zawng a nunna atân a pe phal ang chu!” tih hi. (Job. 2:4) Isua chuan a rinawmna hmangin, Adama leh Evi-te pawhin fiahna awlsam zâwk an tawhna kawngah rinawmna an lantîr ve thei tih a târ lang a ni. A pawimawh berah chuan, Isua nunna leh thihna chuan Pathian Jehova lalchungnunna felzia a chawisâng a, a chawimawi hi a ni. (Thufingte 27:11 chhiar rawh.) Isua thihna chuan hlen chhuah dang a nei em? Nei tehrêng mai!

16, 17. (a) Engvângin nge Kristian hun hmaa Jehova thuhretute chu Pathian hmaa mi fel an nih theih? (b) Engtin nge Pathian Jehova chuan a Fapa rinawm chu lâwmman a pêk a, Lalpa Isua Krista chuan eng nge a tih chhunzawm zêl?

¹⁶ Pathian Jehova chhiahhlawh tam tak chu Isua leia a lo kal hmain an lo awm tawh a. Anni chuan Pathian hmaah mi fel nihna changin, thawhleh beiseina an nei a ni. (Is. 25:8; Dan. 12:13) Mahse, eng ṭanchhanin nge Pathian thianghlim Jehova chuan sual nei mihringte chu chutiang khawpa ropuia mal a sâwm theih? Bible chuan: “Pathian dawhtheihnaa  hmân lai sualte haiderin a awm avâng khân, Pathianin . . .. Krista Isua chu, a thisena, rinna avânga, sual thuphachawinaah a ruat a; tûn laia a felzia entîr nân a ni, amah ngei chu mi fel a nih theihna tûr leh, Isua ring apiang thiam chantîrtu a nih theihna tûrin,” tiin a hrilhfiah a ni.—Rom 3:25, 26. *

¹⁷ Pathian Jehova chuan Isua chu leia a lo kal hmaa a dinhmun aia sâng zâwk chelh tûra kaithovin lâwmman a pe a. Tûnah chuan thlarau thil siam ropui tak niin thih theih lohna a nei tawh a ni. (Heb. 1:3) Puithiam Lalber leh Lal a nih angin, Lal Isua Krista chuan a hnungzuitute chu Pathian felna chawimawi tûrin a ṭanpui chhunzawm zêl a. Kan Pa vâna mi Jehova chu a felna chawimawitute leh a Fapa entawna rinawm taka a rawngbâwltute tân Lâwmman petu a ni chu kan va lâwm tak êm!—Sâm 34:3; Hebrai 11:6 chhiar rawh.

18. A dawta zir tûr thuziakah eng nge kan sawiho dâwn?

¹⁸ Abela aṭanga inṭanin mi rinawm zawng zawngte chuan thutiam Thlah an rinna leh an rinchhan avângin Pathian Jehova nên inlaichînna ṭha tak an nei a. Pathian Jehova chuan a Fapain rinawmna a vawng ang tih leh a thihna chu “khawvêl sual” khuhna ṭha famkim a ni dâwn tih a hria a ni. (Joh. 1:29) Isua thihna chuan tûn laia mite tân pawh hlâwkna a nei bawk. (Rom 3:26) Chuti chu, Krista tlanna chuan eng malsâwmna nge a thlen che? Chu chu a dawta zir tûr thuziakah sawiho a ni ang. (w10-E 08/15)

[Footnote-te]

Engtin Nge Kan Chhân Ang?

• Engtin nge Pathian felna chu cho a nih?

• Isua baptisma channa chuan eng nge a entîr?

• Isua thihnain eng nge a hlen chhuah?

[Zirlai Atâna Zawhnate]

[Phêk 13-naa milem]

Isua baptisma channain a entîr chu i hria em?