Pathian Hming Hriat Chiannaa Thil Telte

I HMING hian awmzia a nei em? Khawvêl hmun ṭhenkhatah chuan nau hming chu awmze nei takin an sa ṭhîn a. An hming sak chuan naute nu leh pa rinna leh thil ngaihhlut zâwng te, a nih loh leh an fa hma lam hun atâna an beisei leh duhsak te a târ lang thei a ni.

Hming awmze nei tak sak chu tûn hnai maia lo chhuak a ni lo. Bible hun laiah pawh, awmze nei takin an lo sa ṭhîn a ni. Hming chuan a putu chanvo la chan tûr nia beiseite chu a târ lang thei. Entîr nân, Pathian Jehova chuan Davida hnêna a fapa Solomona chanvo la chan tûr chungchâng a hrilh khân, heti hian A sawi a ni: “A hming chu Solomona [a awmzia bul chu “Remna”] a ni ang a, ama chhanah chuan Israel-hote chu râlmuang leh thlamuang takin ka awmtîr ang,” tiin.—1 Chronicles 22:9.

A châng chuan Pathian Jehova’n chanvo thar a pêk tûrte hnênah hming thar a pe bawk ṭhîn. Abrahama nupui fa nei thei lo hnênah Sari tih hming thar a pe a, chu chu “Lal fanu” tihna a ni. Engvâng nge? Pathian Jehova chuan: “Ani chu mal ka sâwm ang a, chu lo pawh chu ama lakah chuan fapa ka pe ang che: a ni, amah chu mal ka sâwm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo la chhuak ang,” tiin a chhan a sawifiah a ni. (Genesis 17:16) Sari’n hming thar a neih chhan hriat thiamnaah chuan a chanvo neih thar hriat thiamna pawh a tel ngei ang tih a chiang hle.

A nih leh hming azawnga hming pawimawh ber—Jehova—chungchâng hi engtin nge ni ve? A awmzia chu eng nge ni? Mosia’n Pathian hnêna A hming a zawh khân, Pathian Jehova chuan: “AWMA KA NI,” tiin a chhâng a. (Exodus 3:14) Bible lehlin tam tak chuan Pathian Jehova chhân lêtna chu chutiang chuan a let chhuak a ni. Mahse, Rotherham Bible lehlin chuan: “Ka nih duh ang apiang Ka Ni Ang,” tiin a let chhuak a. Pathian Jehova hming chuan ani chu a ṭûl ang ang innihtîr thei Pathian a nihzia a târ lang. Hetiang hian han tehkhin ta ila: Nu chu a fa enkawlna kawngah nî tin a ṭûl ang angin—damlo enkawltu, ei siamtu, leh zirtîrtu—a innihtîr a ni. A chanvo chelh chu sâng zâwk hle mah se, Pathian Jehova pawh chutiang bawk chu a ni a. Mihringte tâna a thiltum duhawm takte a hlen chhuah theih nân, a ṭûl ang apiang leh a duh ang apiang a innihtîr thei a ni. Chuti a nih chuan, Pathian Jehova hming hriat chiannaah chuan a nihna chi hrang hrangte hriat chian leh chûngte avânga lâwmna lantîr pawh a tel ngei a ni.

Lungchhiatthlâk takin, Pathian mize duhawm tak chu a hming hre chiang lo tute chuan an hre thei lo. Mahse, Bible zirna aṭangin Pathian Jehova nihna chelh chi hrang hrangte zînga tlêm tê chauh han sawi ta ila, Remruattu fing, Chhandamtu thiltithei tak, leh phal taka thil Petu a nihnate chu i hre thiam thei a ni. Awmze thûk tak nei Jehova hming chu a ropui hle.

Mahse, Pathian hming hriat chian chu thil awlsam a ni lo. A nih loh chhan chu a dawta thuziak hian min hrilhfiah ang. (w10-E 07/01)

[Phêk 4-naa milem]

Shrine of the Book, Photo © The Israel Museum, Jerusalem