Pathian Hming I Hre Chiang Thei Em?

Mi pawimawh tuemaw a hming lama chibai theih leh biak theih chu chawimawina ropui tak a ni. Mi zahawm takte chu “Hotupa,” “Lalber,” a nih loh leh “Ka Pu,” tih ang chi an nihna hmanga koh an ni fo ṭhîn. Chutianga mi ropui tak tuemaw chuan, “Ka hmingin min ko zâwk rawh,” ti ta che sela chuan, chu chu chawimawinaah i ruat ngei ang.

PATHIAN dik chuan a Thu, Bible-ah: “Kei JEHOVA ka ni,” a ti a. (Exodus 6:2) Ani chuan “Siamtu,” “Engkimtitheia,” leh “Lalpa” tih ang chi nihna tam tak nei mah se, a chhiahhlawh rinawmte chu a hming bila inkohtîrin a chawimawi ṭhîn a ni.

Entîr nân, zâwlnei Mosia chuan ṭumkhat chu: “Aw Jehova,” tiin a ko va. (Exodus 4:10) * Lal Solomona pawhin Jerusalem biak in hlannaa a ṭawngṭainaah: “Aw Jehova, Israelte Pathian,” tiin a hming a lam bawk a. (1 Lalte 8:22-24) Tin, Israelte aiawha Pathian a biak khân, zâwlnei Isaia chuan “Aw Jehova, kan Pa i ni,” tiin a ko ve leh a ni. (Isaia 63:16) Kan Pa vâna mi chuan a hminga ko tûrin min duh a ni tih a chiang hle.

Pathian Jehova chu a hming ngeia koh a pawimawh hle rualin, a hming hriat chian tak zetnaah chuan thil dang a tel a ni. Ani chuan amah hmangaiha rinchhantu chungchângah: “Ka hming a hriat avângin hmun sângah ka hlâng ang,” tih thu a tiam a ni. (Sâm 91:14) Pathian hming hriat chiannaah chuan thil tam tak a tel a ni tih a chiang hle; chu chu Pathian humhimna dawn theihna ber a ni si a. Chuti chu, Pathian Jehova hming i hriat chian theih nân eng nge ngai? (w10-E 07/01)

[Footnote]