Tlannain Min Chhandam Dân
Tlannain Min Chhandam Dân
“Tupawh Fa ring apiangin chatuana nunna an nei tawh; nimahsela tupawh Fa thu âwih lo apiangin nunna an nei lo vang a, Pathian thinur an chungah a awm reng zâwk a ni.”—JOH. 3:36.
1, 2. Zion Watch Tower tihchhuah a nih chhan pakhat chu eng nge ni?
“TIH tak zeta Bible zirtu apiang chuan Krista thihna pawimawhzia chu an hmuh hmaih hauh lo vang,” tiin he magazine chhuah tirh aṭanga a palina, October 1879 chhuak chuan a sawi a. “Krista thihna chu sual thawina leh thupha chawina a ni lo tih ngaih dân min pe thei tawh phawt chu kan hnâwl tûr a ni,” tih thu pawimawh tak hmanga thuziak chu tlip a ni.—1 Johana 2:1, 2 chhiar rawh.
2 Kum 1879, July thla aṭanga Zion Watch Tower tihchhuah a nih chhan pakhat chu tlanna chungchânga Bible zirtîrna humhim nân a ni a. Kum 1900 tlin hma lawka kum sâwmbi-ahte chuan Kristiana inchhâl mite zînga tam tak chuan Isua thihnain kan sual ata min tlan theih dân chu an ringhlel ṭan a; chuvângin, chu magazine-a thu chuangte chu ‘a hun taka pêk thlarau lam chaw’ a ni. (Mt. 24:45) Chutih lai chuan, mi tam tak chuan mihringte hi ṭhat famkimna ata an tlachhia a ni tih ngaih dân kalhtu chanchhâwnna thurin chu an pawm a. Chanchhâwnna pawmtute chuan mihringte dinhmun hi amahin a ṭha chho tial tial a, tlanna an mamawh lo tih an zirtîr a ni. Chuvângin, Timothea hnêna tirhkoh Paula fuihna thu: “Timothe, i hnêna kawltîra awm chu vawng ṭha rawh. Pathian zah lo lam thu sawi mai mai leh, dik lo taka ‘Finna’ an vuah hnialna hi hawisan rawh. Chu chu ṭhenkhatten nei emaw intiin rinna kawng chu an kal kawisan ta a,” tih hi kan tân pawh a dik a ni.—1 Tim. 6:20, 21.
3. Eng zawhnate nge tûnah kan ngaihtuah ang?
3 ‘Rinna kawng kal kawisan’ loh chu i thil tum a nih ngei a rinawm a. Chutiang ni tûr chuan hêng zawhna: Engvângin nge tlanna ka mamawh? Tlanna man chu eng nge ni? Pathian thinurna lak ata min chhandam thei he ruahmanna hlu tak hi engtin nge ka hlâwkpui theih? tihte hi ngaihtuah a ṭha a ni.
Pathian Thinurna Lak Ata Chhanhim Kan Ni Thei
4, 5. Tûn lai khawvêl suaksual chungah hian Pathian thinurna a awm reng tih engin nge târ lang?
4 Adama’n thil a tihsual aṭang khân Pathian thinurna chu mihringte “chungah a awm reng” tih Bible leh mihring chanchin chuan a târ lang a. (Joh. 3:36) Chu chu mi tumahin thihna an pumpelh theih loh dân aṭang hian a hriat theih a ni. Pathian Lalchungnunna dotu Setana lalram chuan chhiatna thleng rengte lak aṭangin mihringte chu a humhim thei lo va, eng sawrkâr mahin a khua leh tui zawng zawngte mamawh zualpui takngial pawh a phuhru thei hek lo. (1 Joh. 5:19) Chuvângin, mihringte chuan indona te, dân bawhchhiatna te, leh retheihna te an tawrh chhunzawm ta zêl a ni.
5 Chutiang a nih avâng chuan, he khawvêl kalhmang suaksual tak hian Pathian Jehova malsâwmna a dawng lo tih a chiang hle a ni. Paula chuan “Pathian ngaihsak lohna . . . zawng zawng chungah chuan vân aṭangin Pathian thinur a lo lang a ni,” tih a sawi a. (Rom 1:18-20) Chuvângin, Pathian duh loh zâwnga nung lui tlatte chuan a sawhkhâwk chu an pumpelh tawp lo vang. Tûn laiah hian Pathian thinurna chu hri lêng ang maia Setana khawvêl chunga leih buak rorêlna thuchah hmanga târ lan a ni a, chûng thute chu Bible ṭanchhan kan thu leh hla tam takah hian a lang a ni.—Thup. 16:1.
6, 7. Eng hnaah nge hriak thih Kristiante’n hma an hruai a, Setana khawvêl mi leh sa ni mêkte tân eng kawng nge hawn la ni reng?
6 A nih chuan, Setana awpna hnuai aṭanga chhuak a, Pathian duhsakna dawng tûrin khua a tlai lutuk tawh tihna a ni em? Ni lo ve, Pathian Jehova nêna inrem leh theihna kawng chu a la inhawng reng a ni. “Krista aia palai,” hriak thih Kristiante chuan: “Pathian nên lo inrem rawh u,” tia hnam tina mite sâwmin, chu vântlâng rawngbâwlnaah chuan hma an hruai a ni.—2 Kor. 5:20, 21.
7 Tirhkoh Paula chuan Isua chu, “thinur lo thleng tûr laka min chhan chhuaktu” a ni tih a sawi a. Pathian Jehova thinurna hnuhnûng ber chuan thil sual titu inlamlêt duh lote chu chatuan atân a tiboral ang. (2 Thes. 1:6-10) A nih leh tute nge him ang? Bible chuan: “Tupawh Fa ring apiangin chatuana nunna an nei tawh; nimahsela tupawh Fa thu âwih lo apiangin nunna an nei lo vang a, Pathian thinur an chungah a awm reng zâwk a ni,” tiin min hrilh. (Joh. 3:36) Ni e, he kalhmang tâwp hun thlenga dam, Isua leh a tlannaa rinna lantîrtute chu Pathian thinurna ni-ah chuan chhanhim an ni ang.
Tlannain Hna A Thawh Dân
8. (a) Adama leh Evi khân eng beiseina ropui tak nge an neih? (b) Engtin nge Pathian Jehova’n rorêl dikna Pathian a nihzia a târ lan?
8 Adama leh Evi chu ṭha famkima siam an ni a. Anni khân Pathian thu lo awih zêl ta se la chuan, tûnah chuan an fa hlim takte nên Paradis-a chêngin, he leilung hi an luahkhat tawh ngei ang. Mahse, lungchhiat thlâk takin, kan nu leh pa hmasa berte chuan Pathian thupêk chu an bawhchhe lui a. Chuvângin, chatuana boral tûra an chungthu rêl a, atîra Paradis aṭang chuan hnawh chhuah an ni ta a ni. A hnua fate an han neih chuan, sualna chuan mihringte chu nghawngin, mipa leh hmeichhe hmasa ber chu an tarin, an thi ta a ni. Hei hian Jehova chu a thusawiah a ding nghet tih a târ lang chiang hle. Chu bâkah, ani chu rorêlna dik Pathian a ni bawk. Ani chuan Adama hnênah thei rah ei phal loh chu an ei chuan an thi ang tih a vaukhân a—an thi ta ngei rêng a ni.
9, 10. (a) Engvângin nge Adama thlahte chu an thih? (b) Engtin nge chatuan thihna chu kan pumpelh theih?
9 Adama thlah kan nih angin, thil sual lam âwn taksa ṭha famkim lo leh a tâwpa thihna chu kan rochung a. Adama a sual khân, a thlahte angin la piang hrih lo mah ila, mi sual kan lo ni ve ta. Chuvângin, thi tûra hremnaah chuan kan lo tel ve ta a ni. Pathian Jehova chuan tlanna man dawng si lovin zawi zawia tar a, thihna chu sûtlêt ta sela chuan, a thusawiah a ding nghet lo tihna a ni ang. A nihna takah chuan Paula’n: “Dân chu thlarau lam thil a ni tih kan hre si a; kei erawh chu tisa lama mi, sual bâwiha hralh tawh ka ni. Mi rethei ka va ni tehlul êm! He thihna taksa lakah hian tuin nge min chhan chhuak ang?” a tih hian kan za atân a sawi a ni.—Rom 7:14, 24.
10 Pathian Jehova chauhvin dik taka kan sualte a ngaihdam theihna tûr leh chatuana thi tûra thiam loh chantîrna ata min chhan chhuah theihna tûr tlanna chu a pe thei a. Chu chu min tlan nâna a nun pe theitu tûr vâna a Fapa duh tak chu mihring ṭha famkim anga rawn piantîrin a ti a ni. Adama ang lo takin, Isua chu a ṭha famkim reng a. “Ani chuan thil rêng a tisual lo.” (1 Pet. 2:22) Chuvângin Isua chuan mihring ṭha famkim thlahtu nih theihna a nei a ni. Amaherawhchu, sual nei Adama thlahte fa anga a pawm theihna tûr leh amah ringtute’n chatuana nun an neih theihna tûrin Pathian hmêlmate kuta thihna chu a tuar ta zâwk a ni. Bible chuan: “Pathian pakhat chauh a awm a, Pathian leh mihring inkâra Palai pakhat chauh a awm bawk a, amah chu mihring a ni, Krista Isua, mi zawng zawng tlan nâna inpea chu,” tiin a hrilhfiah a ni.—1 Tim. 2:5, 6.
11. (a) Tlanna hlâwk dân chu eng nên nge a tehkhin theih? (b) Tlanna chuan tute tân nge hlâwkna a thlen?
11 Tlannain hna a thawh dân chu Bank rin tlak loh takin mite sum khâwl sa zawng zawng a tihchingpensak vek avânga leiba tam tak neite dinhmun nên a tehkhin theih ang. Bank neitupa chungthu chu a phû ang ngeiin kum tam tak lung in tâng tûra rêl thlûk a ni. A nih leh, chu bank-a sum dahtute chungchâng chu engtin nge ni ta ang? Anni chuan an sum zawng zawng an chân tâk avângin, mi ngilnei leh hausa tak tuemawin bank chu lei chhâwng a, sum pe leh veka leiba a rulhsak a nih chauh loh chuan chhuahna kawng rêng an nei tawh lo. Chutiang chiah chuan, Pathian Jehova leh a Fapa duh tak chuan Adama thlahte chu Isua thisena leiin, an sual man bate chu an rulhsak a. Chuvângin, Baptistu Johana chuan Isua chu: “En teh u, Pathian Berâm No, khawvêl sual kalpuitu tûr saw!” tiin a sawi thei a ni. (Joh. 1:29) Sual man ba rûlhsakte zîngah chuan mi nungte chauh ni lovin, mitthite pawh an tel vek a ni.
Tlanna Man Chu
12, 13. Abrahama’n Isaaka hlan a inhuamna aṭangin eng nge kan zir theih?
12 Kan Pa vâna mi leh a Fapa duh tak tâna tlanna man to dân chiah chu kan hriat thiam theih a ni lo. Mahse, Bible chuan chu mi chungchâng kan chhût thiam theih nâna min ṭanpui theitu thil tawnte a târ lang a ni. Entîr nân, Abrahama’n Pathian thupêk: “I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tûr che tlâng pakhatah chuan hâlral thilhlanah hlân rawh,” tih thu zâwma ni thum awh zin kawng a zawh laia a rilru tûr chu han ngaihtuah teh.—Gen. 22:2-4.
13 Abrahama chuan Pathianin a hrilhna hmun chu a thleng ta. Chutah Isaaka kut leh kete phuar a, a maichâm siam ngei maia a han muttîr laia a rilru hrehawm dân tûr chu han ngaihtuah teh. Tin, A fapa that tûra chemtê han lek kân pawh chu a va harsa dâwn tak êm! Kawng lehlamah, chemte hriam takin a rawn chhun a, na tuara a thih hun tûr nghâka maichâma mu Isaaka rilru tûr pawh chu ngaihtuah bawk ang che. Mahse, Pathian Jehova vântirhkoh chuan Abrahama chu a hun takah a rawn dang ta chat mai a. Chu mi ṭuma Abrahama leh Isaaka thil tih chuan Pathian Jehova tâna tlanna man tozia, Setana mi hmante’n A Fapa an thah a remtih laia a rilru hrehawm tûrzia, hre thiam tûrin min ṭanpui a ni. Isaaka’n Abrahama thu inhuam taka a zawmna chuan Isua’n kan tâna hrehawm tawrh leh thih a inhuamna a entîr ṭha hle.—Heb. 11:17-19.
14. Jakoba nuna thil thleng engin nge tlanna man hre thiam tûra min ṭanpui thei?
14 Tlanna man chu Jakoba nuna thil thleng aṭang pawh hian a hrilhfiah theih a. Jakoba chuan a fate zawng zawng zîngah Josefa a hmangaih ber a. A unaute chuan amah chu an thîkin, an haw tlat mai a ni. Chuti chung pawhin, a pain a unaute chanchin en thlithlai tûra a tirh chuan inhuam takin a kal tho va. Chutih lai chuan a unaute chuan an awmna Hebron aṭanga hmâr lam mêl 100 vêla hlaah Jakoba berâm rual an vêng a. Josefa kawrfual thisen kai luai mai a hmuh laia Jakoba rilru nat dân tûr chu han ngaihtuah teh! A ni chuan: “Ka fapaa kawrfual a nih hi; sakawlhin a seh ta zuk nia le; Josefa chu matheilovin pawh sawm vekin a awm a ni ngei ang,” a ti chhuak nghâl a ni. Chu chuan Jakoba chu a nghawng hle a, Josefa chu ni rei tak chhûng a sûn a ni. (Gen. 37:33, 34) Pathian Jehova chuan mihring ṭha famkim lote chhân lêt ang chiah chiahin dinhmun chu a chhâng lêt lo ngei mai. Mahse, Jakoba chunga he thil thleng hian, Pathianin a Fapa duh tak he leia awm laia an tihduhdah lai leh râwng taka an tihhlum laia a tawrh dân tûr engemaw chen chu min hriatthimtîr thei ang.
Tlanna Kan Hlâwkpui Dân
15, 16. (a) Engtin nge Pathian Jehova chuan tlanna a pawmzia a lantîr? (b) Tlanna chu engtin nge i lo hlâwkpui tawh?
15 Pathian Jehova chuan a Fapa rinawm chu thlarau taksa ropui tak puin a kaitho va. (1 Pet. 3:18) Tholeh Isua chu ni 40 chhûng a zirtîrte hnênah inlârin, an la thawh tûr thu hrilhna ropui tak atâna buatsaih a, an rinna a tihchaksak a ni. Chu mi hnu chuan vânah lâwnin, a inthawina ringtu a hnungzuitu dikte tâna hman atân a thisen hlutna chu Pathian hnênah a han hlân a. Isua chu C.E. 33 Pentikost ni-a Jerusalema kal khâwm zirtîrte chunga thlarau thianghlim leih buaktîrin, Pathian Jehova chuan Krista tlanna a pawmzia chu a lantîr a ni.—Tirh. 2:33.
16 Chûng Krista hnungzuitu hriak thihte chuan mite chu an sualte ngaihdam nâna Isua Krista hminga baptisma chang tûr leh chu mi avânga Pathian thinurna pumpelh tûrin an fuih nghâl a. (Tirhkohte 2:38-40 chhiar rawh.) Chu ni pawimawh aṭanga tûn thleng hian hnam tin aṭanga mi maktaduai tam takte chu tlanna atâna Isua inthawina an rinna zârah Pathian nêna inlaichînna nei tûra a lama hîp an ni. (Joh. 6:44) Tûn aṭang chuan, zawhna dang pahnih kan ngaihtuah belh a ngai ta: Kan zîngah hian kan hnathawh ṭhat avânga chatuana nun beiseina dawng kan awm em? Chu beiseina ropui tak kan neih tâk hnu chuan chu chu kan hloh leh thei em?, tihte hi.
17. Pathian ṭhian nih theihna malsâwmna ropui tak chu engtin nge kan thlîr ang?
17 Tlanna phu rêng kan awm lo va. Mahse, chu mi rinna aṭangin mi maktaduai tam takte chu lei paradis-a chatuana nun beiseina nei Pathian ṭhiante an lo ni ta a. Amaherawhchu, Pathian Jehova ṭhian nih hi amah nên chutiang inlaichînna kan nei reng ang tih tiamkamna a ni lo. Pathian thinurna nî lo thleng tûra dam khawchhuak tûr chuan, “Krista Isuaa tlanna awm” avânga kan lâwmna nasa tak chu kan lantîr chhunzawm zêl tûr a ni.— Rom 3:24; Philippi 2:12 chhiar rawh.
Tlanna I Rinzia Lantîr Zêl Rawh
18. Tlanna kan rinzia lantîrnaah chuan engte nge tel?
18 He thuziak ṭanchhan Bible châng Johana 3:36 hian Lalpa Isua Krista rinnaah chuan thuâwihna a tel tih a târ lang. Tlanna avânga kan lâwmna chuan nungchang lama a zirtîrnate pawh tiamin, Isua zirtîrna mila nung tûrin min chêttîr tûr a ni. (Mk. 7:21-23) “Pathian thinur chu” inchhîrna nei lova inngaih hmang te, fiamthu bawlhhlawh thawh chîng te, leh “bawlhhlawh zawng zawng” zînga chhiar tel theih tûr saruak lem leh thuziak en leh chhiar ṭhînte chungah a lo thleng ang.—Eph. 5:3-6.
19. Tlanna kan rinzia chu eng kawngin nge kan lantîr theih?
19 Tlanna avânga kan lâwmna chuan “Pathian ngaihsak” thiltihte min tihtîr reng tûr a ni. (2 Pet. 3:11, 12) Chuvângin, a hun tak leh tih tak zeta ṭawngṭai nân te, mahnia Bible zirna neih nân te, inkhâwm nân te, chhûngkuaa Pathian biak nân te, leh Lalram thu hrilhnaa taima taka tel nânte hian hun tam tâwk i insiam ang u. Tin, “thil tihṭhat leh thilphal hi [i] theihnghilh suh [ang] u; chutiang inthawina chungah chuan Pathian a lungni êm êm si a.”—Heb. 13:15, 16.
20. Tlanna ring chhunzawm zêl tute chuan eng malsâwmna nge an beisei theih?
20 He khawvêl suaksual chunga Pathian Jehova thinurna a lo thlen hunah chuan, tlanna kan rinzia leh chu mi avânga kan lâwmzia kan lantîr zêl avângin kan va hlim dâwn êm! Tin, Pathian tiam khawvêl tharah chuan, Pathian thinurna ata min humtu he ruahmanna ropui tak avângin kan lâwm kumkhua tawh ang.—Johana 3:16; Thu Puan 7:9, 10, 13, 14 chhiar rawh. (w10-E 08/15)
Engtin Nge Kan Chhân Ang?
• Engvângin nge tlan kan ngaih?
• Tlanna man chu eng nge ni?
• Tlanna aṭanga eng hlâwknate nge lo awm?
• Engtin nge tlanna atâna Isua inthawina kan rinzia kan lantîr?
[Zirlai Atâna Zawhnate]
[Phêk 17-naa milem]
Pathian Jehova nêna inrem leh theihna kawng chu zau takin a inhawng
[Phêk 19-naa milemte]
Abrahama te, Isaaka te, leh Jakoba te thiltawn ngaihtuahna chuan tlanna man hre thiam tûrin min ṭanpui thei