Pathian Hnaih Rawh

“I Fapa Hi Pawm Rawh”

2 LALTE 4:8-37

FATE sûn chu mihring thiltawna tawrh harsa berte zînga mi a ni. Pathian Jehova chuan chutiang dinhmun chu sût lêt tûrin thiltihtheihna a nei a. A neihzia chu Bible hun laia mi ṭhenkhat hnêna mitthi kaihthawh theihna a pêk aṭangin kan hre thei a ni. Chutiang chanchin pakhat chu zâwlnei Elisa’n mipa naupang pakhat a kaihthawh chungchâng 2 Lalte 4:8-37-a târ lan hi a ni.

Chu chu Sunem khuaa thilthleng a ni a. Fa nei thei lo nupa tuak khat chuan Elisa hnênah ngilneihna lantîrin, ei tûr leh riahna tûr hmun an pe ṭhîn a. Ni khat chu, zâwlnei chuan a lâwm êm avângin, chu nu hnênah chuan: “Tûn ang hun a lo thlen leh tikah chuan fapa i pawm tawh ang,” a ti a. Lo thleng thei ngai lo tûra a ngaih hun chu a lo thleng a, Elisa lo sawi tawh ang ngeiin fapa a pawm ta a. Mahse, a lâwmna chuan rei a daih ta lo chu a pawi hle. Kum tam a vei hmain, chu naupang chu lova a awm laiin a lû a na vak mai a, inah an pawm haw a, “a nu . . . mal chungah” a thi ta a ni. (Châng 16, 19, 20) A nu lungchhe tak chuan a fapa ruang chu pawmin zâwlnei mutna ṭhin khumah chuan a zalh ta a ni.

Chutah, a pasal remtihnain mêl 20 vêla hla Karmel Tlâng-ah chuan Elisa hmu tûrin a kal ta nghâl a. A va hmuh chuan, a lungngaihna nasa tak lantîr nân ṭapin a au vêl lo. Chu chu, Elisa pu, Elija’n hmeithai fapa a kaihthawhsak thu a lo hriat tawh vâng a ni thei ang em? (1 Lalte 17:17-23) Chu Sunem nu chuan Elisa pawhin a fapa a kaihthawhsak thei tih a ring em? A enga pawh ni se, Elisa’n zui rem a tih hma loh chuan kîr leh chu a tum lo a ni.

Sunem khua an va thlen chuan Elisa chu a chênna ṭhin pindanah chuan amah chauhvin a lût a, naupang ruang ‘khuma an mut’ chu a va hmu a. (Châng 32) Zâwlnei chuan Pathian Jehova hnênah ṭawngṭaiin a ngên chiam a. Chutah, naupang chunga Elisa a kaikûn chuan, “naupang taksa chu a lo lum ta tial tial a.” Tichuan, a lung phu tawh lo chu a lo phu leh ṭan ta! Elisa chuan a nu chu kovin, a lungngaih manganna hlimna namên lova thlâktu tûr thu chu a hrilh ta a ni: “I fapa hi pawm rawh,” tiin.—Châng 34, 36.

Sunem nu fapa kaihthawhna chanchin hian beiseina leh thlamuanna min pe a ni. Pathian Jehova chuan fate sûn nu leh pate lungngaihna chu a hre thiam a. Chu chang a ni lo, chutiang lusûnna sût lêt chu a châk ngawih ngawih a ni. (Joba 14:14, 15) Bible hun laia Elisa leh mi dangte’n mitthi an kaihthawhna chuan Pathian Jehova’n a felna khawvêl thar lo thleng tûra ropui zâwka a la tih tûr chu a entîr a ni. *

Bible min tiam thawhlehna chuan kan hmangaih tak tuemaw sûnna avânga tawrhna chu a tibo chuang lo va. A fapa neih chhun chântu Kristian pa rinawm tak chuan: “Ka fapa ka pawm leh theih hma loh chu ka tawrhna hi a reh tak tak thei lo vang,” a ti. I hmangaih tak thi tawhte nêna inhmuhkhâwm leh hun tûr chu han ngaihtuah teh. Anmahni pawm leh theih beiseina chuan i tawrhna chu a tiziaawm thei a ni. He beiseina hlu tak min petu Pathian chanchin zir belh chu i duh em? (w10-E 08/01)

[Footnote]