Inpumkhatna Chuan Biakna Dik A Târ Lang
Inpumkhatna Chuan Biakna Dik A Târ Lang
“Berâm angin ka dah khâwm ang.”—MIK. 2:12.
1. Engtin nge thil siam chuan Pathian finna chu a târ lan?
FAKNA hla phuahtu chuan: “Aw LALPA, i thiltihte chu a va tam êm! Finnain i siam vek a ni: leilung hi i hausaknain a khat a nih hi,” tiin a sawi chhuak a. (Sâm 104:24) Pathian finna chu nunna nei leilunga thil chi hrang maktaduai tam tak hnim leh thlai te, rannung leh nungcha te, leh bacteria chi hrang hrangte mak tak maia inrinchhan tawnnaah hian a lang a ni. Chu bâkah, i taksaa pêng liante aṭanga i cell te tak tête thleng hian mi hrisêl ṭha pângngai i nih theih nân kawng chi hrang tam takin hna an thawk tlâng vek a ni.
2. Phêk 17-a târ lan angin, engvângin nge Kristiante zînga inpumkhatna awm chu thil mak tak nia a lan?
2 Pathian Jehova chuan mihringte hi inrinchhan tawn tûrin a siam a. Mihringte hian lan dân, mizia, leh themthiamna chi hrang hrang an nei a ni. Chu bâkah, Pathian chuan mihring hmasa berte chu ama mizia ang a pe a, chu chuan hna a thawhhotîr theiin, a inrinchhan tawntîr thei a ni. (Gen. 1:27; 2:18) Mahse, tûnah chuan khawvêla mihring nâwlpuite chu Pathian lakah an inmihran a, inpumkhatin thil an ti thei ngai lo. (1 Joh. 5:19) Chuvângin, kum zabi khatnaa Kristian kohhran chu Ephesi khuaa salte, Grik hmeichhe challang takte, lehkha zir sâng Juda mipate, leh tûn hmaa milem biate hmanga din a nih avângin inpumkhatna an nei thei chu thil mak tak niin a lang ngei ang.—Tirh. 13:1; 17:4; 1 Thes. 1:9, 10; 1 Tim. 6:1.
3. Engtin nge Bible chuan Kristian inpumkhatna chu a sawi a, he thuziakah hian eng nge kan ngaihtuah ang?
3 Biakna dik chuan mite chu kan taksa pêng tinte’n inrem taka hna an thawk angin a thawh tlântîr thei a. (1 Korinth 12:12, 13 chhiar rawh.) He thuziaka kan bih chian tûr ṭhenkhat chu: Engtin nge biakna dik chuan mite a inpumkhattîr? Engvângin nge Pathian Jehova chauh hi hnam tina mi maktaduai tam takte inpumkhattîr theitu awmchhun a nih? Pathian Jehova chuan inpumkhatna dâltu eng nge hneh tûra min ṭanpui theih? Inpumkhatna chungchângah engtin nge Kristianna dik chu Kristianna ram nên a inan loh?, tihte hi a ni.
Engtin Nge Biakna Dik Chuan Mite A Inpumkhattîr?
4. Engtin nge biakna dik chuan mite a inpumkhattîr?
4 Biakna dik vuantute chuan Pathian Jehova chu thil engkim siamtu a nih avângin, lei leh vâna Chungnungber a ni tih an hre thiamin, an pawm bawk a ni. (Thup. 4:10, 11) Chuvângin, Kristian dikte chuan hmun hrang hrangah leh dinhmun hrang hrang hnuaiah awm mah se, Pathian dân thuhmun chu an zâwm vekin, Bible thu bul inang chu an nunpui vek a ni. Betu dik zawng zawngte chuan Pathian Jehova chu “Pa” tiin an ko a ni. (Is. 64:8; Mt. 6:9) Chutiang chuan, an vaiin thlarau lama unau an ni a, fakna hla puahtuin: “Ngai teh, unaute inngeih dial diala awm khâwm hi a va ṭhain, a va nuam êm!” tia a sawi inpumkhatna duhawm tak chu an chên a ni.—Sâm 133:1.
5. Eng miziain nge betu dikte zîngah inpumkhatna awmtîr?
5 Kristian dikte chu mi ṭha famkim ni lo mah se, inhmangaih tawn dân an zir avângin, inpumkhatin Pathian an be tlâng a. Pathian Jehova tluka inhmangaih tawn dân zirtîr thei tumah an awm lo. (1 Johana 4:7, 8 chhiar rawh.) A Thu chuan heti hian a sawi: “Lainatna thinlung te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u, tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u. Tin, chûng zawng zawng chungah chuan hmangaihna inbel rawh u, chu chu phuar famkimna a ni,” tiin. (Kol. 3:12-14) He phuar famkimna—hmangaihna—hi Kristian dikte chhinchhiahna ber a ni. Mahni thiltawn aṭangin, chu inpumkhatna chu biakna dik chhinchhiahna a ni tih i hmu a ni lâwm ni?—Joh. 13:35.
6. Engtin nge Lalram beiseina chuan inpumkhatna nei tûra min ṭanpui?
6 Pathian ram hi mihringte tâna beisei tûr awmchhun anga an thlîr avâng pawhin betu dikte chu an inpumkhat a. Anni chuan Pathian Ramin mihring sawrkârte hi a rawn thlâkthleng thuai ang a, thuâwih mihringte chu remna dik tak, chatuan daihin mal a sâwm ang tih an hria a ni. (Is. 11:4-9; Dan. 2:44) Chuvângin, Kristiante chuan Isua’n a hnungzuitute hnêna a sawi hi an zâwm a ni: “Anni chu khawvêla mi an ni lo, kei khawvêla mi ka ni lo ang bawk hian,” tih hi. (Joh. 17:16) Kristian dikte chu khawvêla intihbuaina lakah an tualdâwih reng a; chuvângin, an chhehvêla mite an indo reng lai pawhin anni chu an inpumkhat thei a ni.
Thlarau Lama Kaihhruaina Hnâr Awmchhun
7, 8. Eng kawngin nge Bible kaihhruaina chuan inpumkhatna min neihtîr?
7 Kum zabi khatnaa Kristian zawng zawngte chu kaihhruaina thuhmun an dawn avângin an inpumkhat thei a. Isua’n Jerusalem-a tirhkohte leh upate hmanga din, governing body kal tlangin kohhran chu a zirtîrin, a kaihruai tih an hria a ni. Governing body-a tel mi inpe takte chuan Pathian Thu ṭanchhanin thu tlûkna an siam a, chûng chu bial kantute kal tlangin ram tam taka kohhrante hnênah an hrilh chhâwng a ni. Chûng bial kantute zînga ṭhenkhat chungchângah Bible chuan: “Khaw tinah an kal pahin Jerusalem khuaa tirhkoh leh upa awmte thu rêl kha zawm atân unaute hnênah an pe zêl a,” tiin a sawi.—Tirh. 15:6, 19-22; 16:4.
8 Chutiang bawkin tûn laiah pawh, thlarauva hriak thih Kristiante hmanga din Governing Body chuan khawvêl pum huap kohhranah inpumkhatna a awmtîr a. Governing Body chuan thlarau lama mi tichak thei thu leh hlate chu ṭawng tam takin an tichhuak a ni. Chu thlarau lam chaw chu Pathian Thu ṭanchhana siam a ni a. Chuvângin, a thu zirtîrte chu mihringte hnêna mi ni lovin, Pathian Jehova hnêna mi a ni.—Is. 54:13.
9. Engtin nge Pathian min pêk hna chuan inpumkhat tûra min ṭanpui?
9 Kristian upate pawhin thu hrilhnaa hmahruaiin inpumkhatna an awmtîr bawk a. Pathian rawngbâwl tlângte inpumkhattîrtu inṭhianna chu khawvêla mi inkâwm mai maite inṭhianna ai chuan a nghet zâwk fê a ni. Kristian kohhran chu inkawmkhâwm nân maia din ni lovin, Pathian Jehova chawimawi tûr leh ram chanchin ṭha hrilhna hna thawk tûr te, zirtîr siam hna thawk tûr te, leh kohhran tichak tûr tea din a ni. (Rom 1:11, 12; 1 Thes. 5:11; Heb. 10:24, 25) Chuvângin, tirhkoh Paula chuan Kristiante chungchângah: “Thlarau hmunkhata ding nghetin, rilru hmunkhata chanchin ṭha rinna thu ṭana bei tlângin . . . in awm,” tiin a sawi thei a ni.—Phil. 1:27, 28.
10. Pathian mite anga kan inpumkhat dân kawng ṭhenkhat chu eng nge ni?
10 Chutiang chuan, Pathian Jehova mite kan nih angin, a lalchungnunna kan pawm a, kan unaute kan hmangaih a, Pathian Ram kan beisei bawk a; tin, Pathianin kan zînga hmahruaitu tûra a hmante kan zah a ni: hêngte avâng hian kan inpumkhat ve bawk. Pathian Jehova chuan kan ṭhat famkim loh avânga kan inpumkhatna tichhe thei tûr rilru put hmang kan neihte hneh tûrin min ṭanpui a ni.—Rom 12:2.
Chapona leh Thîkna Hnehin
11. Engvângin nge chapona chuan mite a ṭhen hran a, engtin nge chu mi hneh thei tûrin Pathian Jehova’n min ṭanpui?
11 Chapona chuan mite a ṭhen hrang a. Mi chapo chu mi dang aia sâng zâwkah a indah a, insawi theih chu nuam a ti a ni. Mahse, chu chuan inpumkhatna a tichhe ṭhîn; mi insawi theihna hretu chuan an lo thîk theih avângin. Zirtîr Jakoba chuan: “Chapo taka awm chu sual a ni,” tiin tlang takin min hrilh a ni. (Jak. 4:16, C.L. Re-edited.) Mi dangte hnuaihnung zâwk anga cheibâwl chu hmangaihna a neih lohthlâk a. Chhinchhiah tlâk takin, Pathian Jehova chuan keini ang mi ṭha famkim lote min dâwrin inngaihtlâwmna kawngah entawn tûr a siam a. Davida chuan Pathian chungchângah: “I inngaihtlâwmnain mi siam lian ta,” tiin a ziak a ni. (2 Sam. 22:36) Pathian Thu chuan dik taka chhût tûra min zirtîrin, chapona hneh tûrin min ṭanpui a. Paula chu: “Nang tuin nge tilêm chuang che; i dawn loh chu engnge i neih ni? I dawn a nih si chuan engati nge dawn ni lo anga i uanpui ni?” tia zawhna zâwt tûrin thlarauvin a thâwk khum a ni.—1 Kor. 4:7.
12, 13. (a) Engvângin nge thîkna neih chu thil awlsam tak a nih? (b) Pathian Jehova’n mi dangte a thlîr dân ang neihna chuan eng nge a rah chhuah?
12 Ṭhîkna pawh hi inpumkhatna dâltu lâr tak dang a ni a. Ṭhat famkim lohna kan rochun avângin, kan vai hian ‘thîk duhna thinlung’ kan nei a, hun rei tak Kristian lo ni tawhte pawhin mi dangte dinhmun te, thil neih te, chanvo te, a nih loh leh theihna te chu a châng chuan an thîk thei a ni. (Jak. 4:5) Entîr nân, chhûngkaw nei unaupa pakhat chuan hunbi kima rawngbâwltu neih chanvo chu a thîk mai thei a; mahse a hriat si lohvin fate neitu chhûngkaw pa chu hunbi kima rawngbâwltu chuan a lo thîk deuh pawh a ni thei bawk. Chutiang thîkna chuan kan inpumkhatna a tihbuai loh nân engtin nge kan dan theih ang?
13 Thîkna pumpelh tûra min ṭanpui tûrin Bible chuan Kristian kohhrana hriak thihte chu mihring taksa pêng chi hrang hrang nên a tehkhin tih hre chhuak ang che. (1 Korinth 12:14-18 chhiar rawh.) Entîr nân, i mit chu i lung ai chuan langsâr zâwk mah se, i tân chuan an hlu ve ve a ni lâwm ni? Chutiang bawkin, kohhrana mi ṭhenkhat chu mi dangte aia lansarh zâwk châng nei mah se, Pathian Jehova chuan an vaiin a hlut vek a ni. Chuvângin, Pathian Jehova’n kan unaute a thlîr dân ang chu i nei ve ang u. Mi dangte thîk ai chuan anmahni ngaihtuahna leh ngaihsakna i lantîr zâwk ang u. Chutianga tiin, Kristian dik leh dik lote danglamna chu kan tilangsâr lehzual a ni.
Kristianna Ram —Inṭhennaa Khat Chu
14, 15. Engtin nge Kristianna kalpêngte chu an inpumkhat tâk loh?
14 Kristian dikte inpumkhatna chu Kristianna ram kohhrana mite zînga awm innghirnghona lakah chuan a danglam fâl nalh a. Kum zabi lina vêlah chuan Kristianna dik ata kal pênna chu a lo hluar ta hle a, milem betu Rom lalber chuan thunun ta hialin, Kristianna ram chuan nasa takin hma a sâwn phah ta a. Tichuan, a hnua inṭhen hranna awmahte chuan ram tam tak chu Rom aṭanga inla hrangin, mahni Sawrkâr kohhran, a nih loh leh sakhua an din ta ṭheuh a ni.
15 Chûng ram tam takte chu kum zabi tam tak chhûng an indo tawn reng a. Kum zabi 17 leh 18 chhûng chuan Britain, France, leh United States-a mite chuan mahni Ram tâna inpumpêkna chu a vawrh lâr avângin, mahni ram hmangaihna chu sakhuanna ang mai a lo ni ta a. Kum zabi 19 leh 20-na chhûng chuan mahni ram hmangaihna chuan mi tin deuhthawte ngaihtuahna chu a thunun ṭan ta a ni. A tâwpah chuan, Kristianna rama kohhrante chu pâwl tam takah an inṭhen darh a, chûng pâwl a tam zâwkte chuan mahni ram hmangaihna chu an pawmzam a. Ram danga an rinpuite do tûrin an kal chhuak ta hial a ni. Tûn lai hian, Kristianna ram chu an sakhaw thurinah leh ram hmangaihna kawngah chuan a inṭhen hrang a ni.
16. Eng thilte hian nge Kristianna rama mite chu ṭhen hrang?
16 Kum zabi 20-naah chuan Kristianna rama pâwl hrâng za têlte zînga ṭhenkhat chuan inpumkhatna awmtîr tumin hma an la a. Mahse, kum sâwmbi tam tak an beih hnuah pawh pâwl tlêm tê chauh chu an infinkhâwm thei a, kohhran inkhâwma kal ṭhînte chu chanchhâwnna te, nau tihtlâkna te, mawngkawhurna te, leh hmeichhiate kohhran rawngbâwltu ni tûra nemnghehna te chungchângah ngaih dân hrang an la nei reng tho a ni. Kristianna ram hmun ṭhenkhatah chuan kohhran hruaitute chuan tûn hmaa thurin hran an lo neih ṭhinte pawimawhna chu sawi nêpin, pâwl hrang hrangte zawm khâwm chu an tum a ni. Mahse, thurin hrante pawimawhna sawi nêpna chuan mite rinna a tichak lo va, Kristian ram kohhrante chu a inpumkhattîr chuang lo.
Hnam Hmangaihnain A Chîmbuai Loh Chu
17. Biakna dikin ‘ni hnuhnûnga’ mite a inpumkhattîr dân tûr chu eng anga sawi lâwk nge ni?
17 Mihringte chu tûn hma zawng aia nasain inṭhen hrang mah se, Pathian betu dikte chu an inpumkhatnain a la ti hrang zêl a ni. Pathian zâwlnei Mika chuan heti hian a sawi lâwk a ni: “Berâm angin ka dah khâwm ang, ,” tiin. (Mik. 2:12) Mika chuan pathian dik lo a ni emaw, pathian anga Sawrkâr biakna a ni emaw, biakna dang zawng zawng aia biakna dik a chungnun zâwkzia a sawi lâwk a ni: “Ni hnuhnûngahte chuan heti hi a ni ang a, LALPA in awmna tlâng chu tlâng lian chungahte chuan tihnghehin a awm ang a, tlâng tête chungah chuan chawisânin a awm bawk ang; chutah chuan chi tinrêngte chu an kal nguah nguah ang. Hnam tinin mahni pathian ṭheuh an bia ang a, keini pawh LALPA kan Pathian chu kum khuain kan bia ang,” tia ziakin.—Mik. 4:1, 5.
18. Biakna dik chuan eng inthlâkthlengna siam tûrin nge min ṭanpui?
18 Mika chuan biakna dikin tûn hmaa lo inhmêlmâk tawhte a inpumkhattîr dân tûr pawh a sawi lang bawk: “Hnam tam takte chu an kal ang a, Lo haw ula, LALPA tlângah, Jakoba Pathian inah chuan i chho vang u; tichuan anin a kawng chanchinte chu min zirtîr ang a, a kalkawngahte chuan kan kal ang, an ti ang. . . . Tin, an khandaihte chu leilehna hmâwr zumahte an chher ang a, an feite chu thei kung ahchhumna chem kawmahte an chher ang: hnam dangin hnam dang chungah khandaih a lek tawh lo vang a, indo dân pawh an zir tawh hek lo vang,” tiin. (Mik. 4:2, 3) Mihring siam chawp pathian emaw, hnam emaw biakna kalsan a, Pathian Jehova biakna pawmtute chuan khawvêl pum huap inpumkhatna an nei a. Anni chu Pathianin hmangaihna kawng chanchin a zirtîr a ni.
19. Biakna dika mi maktaduai tam tak an inpumkhattîrna hian eng nge a târ lan?
19 Tûn laia khawvêl puma Kristian dikte inpumkhatna chu Pathian Jehova’n a thlarau thianghlim hmangin a mite a kaihruai zêl tih târ langtu chiang tak a ni. Hnam tina mite chu tûn hma zawng aiin an inpumkhat a. Chu chu, Thu Puan 7:9, 14-in a sawi thawi thlen famkimna chhinchhiah tlâk tak a ni a, Pathian vântirhkohte’n he khawvêl suaksual tichhetu tûr “thli” an thlah thuai dâwn tih târ langtu a ni bawk. (Thu Puan 7:1-4, 9-11, 14 chhiar rawh.) Khawvêl pum huap inunaunaa inpumkhata kan awm chu chanvo hlu tak a ni lâwm ni? Engtin nge chu inpumkhatna chu kan awm chhunzawmtîr ṭheuh theih? Chu chu a dawta thuziakah sawiho a ni ang. (w10-E 09/15)
Engtin Nge Kan Chhân Ang?
• Engtin nge biakna dik chuan mite a inpumkhattîr?
• Engtin nge thîkna chu kan inpumkhatna kan tihchhiattîr loh theih?
• Engvângin nge ram hmangaihna chuan betu dikte chu a ṭhen hran loh?
[Zirlai Atâna Zawhnate]
[Phêk 17-naa milem]
Kum zabi khatnaa Kristiante chu hnam hrang hrang aṭanga lo kal khâwm an ni
[Phêk 19-naa milemte]
Kingdom Hall sakna i ṭanpuina chuan engtin nge inpumkhatna a awmtîr?