Pathian Jehova Malsâwmna Tih Tak Zetin Zawng Rawh
Pathian Jehova Malsâwmna Tih Tak Zetin Zawng Rawh
“[Pathian] chu tih tak zeta zawngtute hnêna lâwmman petu a ni.” —HEB. 11:6, Baptist Mid-Missions’ Translation.
1, 2. (a) Engtin nge mi tam takin Pathian malsâwmna an zawn? (b) Engvângin nge Pathian Jehova malsâwmna dawn chu kan duh hle ang?
MI TAM tak chuan hausakna te, in leh lo te, motor te, leh hmuingîlna te hi Pathian malsâwmnaah an ngai a. Sakhaw hrang hrang hruaitute chuan mite, rante, leh nunna nei lo thilte mal an sâwm lai hmuh tûr a awm fo a ni. Zin mite chuan malsâwmna dawn inbeiseiin, sakhaw hmun ṭhenkhat chu an tlawh a. Politician-te chuan an ram malsâwm tûrin Pathian an ngên châmchî ṭhîn bawk a ni. Chûng malsâwm dîlnate chu inâwm i ti em? Chûng chu a sâwt tak zet em? Tute’n nge Pathian malsâwmna dawng tak zet a, engvângin nge?
2 Pathian Jehova chuan ni hnuhnûngahte chuan huat leh dodâl an ni chung pawha kâwlkil thlenga ram chanchin ṭha hriltu tûr hnam tin aṭanga lo kal thianghlimna leh remna duh mite a neih tûr thu a sawi lâwk a. (Is. 2:2-4; Mt. 24:14; Thup. 7:9, 14) Chûng zînga mi ni tûra mawhphurhna pawmtute chuan Pathian malsâwmna tel lo chuan hlawhtlin an inbeisei theih loh avângin a malsâwmna chu kan duhin, kan mamawh bawk a ni. (Sâm 127:1) Mahse, engtin nge Pathian malsâwmna chu kan dawn theih ang?
Thu Awihte Chu Malsâwmnain A Zui Zêl
3. Israelte khân thu lo âwih sela chuan, chu chuan eng nge a rah chhuah ang?
3 Thufingte 10:6, 7 chhiar rawh. Israelte Ram Tiama an luh hma chiah khân, Pathian Jehova chuan a thu an ngaihthlâk phawt chuan hmuingîlna leh vênhimna mak tak an dawng dâwn tih a sawi a ni. (Deut. 28:1, 2) Pathian Jehova mite chuan a malsâwmna an dawng mai ni lovin, chu chuan anmahni a “zui zêl ang.” Thu âwihte chuan malsâwmna an dawng ngei ngei dâwn a ni.
4. Thu âwihna dik takah eng nge tel?
4 Israelte khân eng rilru puin nge thu an âwih ang? Pathian chu a mite’n “rilru lâwm tak leh hlim taka” a rawng an bâwl loh chuan a lâwm dâwn lo tih Pathian Dân pêk chuan a târ lang. (Deuteronomy 28:45-47 chhiar rawh.) Pathian Jehova chuan rante emaw, ramhuaite emawin an lantîr ang chi, rilru tel lo thu âwihna aia tam a phu a ni. (Mk. 1:27; Jak. 3:3) Rilru tak zeta Pathian thu âwihna chu hmangaihna târ lanna a ni a. Chu thu âwihna chu Pathian thupêkte a khirh lo va, “amah chu tih tak zeta zawngtute hnêna lâwmman petu a ni” tih rinna aṭanga lo awm hlimna hmanga chhinchhiah a ni.—Heb. 11:6, BMT; 1 Joh. 5:3.
5. Engtin nge Pathian Jehova thutiam rinna chuan mi chu Deuteronomy 15:7, 8-a chuang dân chu zâwm tûrin a ṭanpui?
5 Chutianga thu âwihna dik lâwmman pêk a ni ang tih rinna chu Deuteronomy 15:7, 8-a târ lan dân zawmna hmanga târ lan a nih theih dân chu han ngaihtuah teh. (Chhiar rawh.) Hreh tak chunga chu dân zawmna chuan retheite chu engemaw chen a chhâwkzângkhai mai thei; mahse, chu chuan Pathian mite zîngah inlaichînna ṭha a hring chhuak ang em? A aia pawimawh zâwkah chuan, chu chuan Pathian Jehova’n a mite a ṭanpui theihzia rinna leh a thilphalna entawn theihna hun remchâng avânga lâwmna chu a lantîr ang em? A lantîr lo vang! Pathian chuan mi thilphal tak thinlung chu a hria a, a thiltihte leh a kutkawihte chu mal a sâwm ang tih a tiam a ni. (Deut. 15:10) Chu thutiama rinna chuan thil ti tûrin a chêttîr ang a, chu chuan malsâwmna tam tak a rah chhuak ang.—Thuf. 28:20.
6. Hebrai 11:6-na hian eng thu nge min tiam?
6 Pathian Jehova chu Lâwmman Petu anga rinna neih bâkah, Hebrai 11:6-na chuan Pathian malsâwmna dawng tûra mamawh mize dang a târ lang bawk a. Pathian Jehova chuan ‘amah . . . tih tak zeta zawngtute hnênah’ lâwmman a pe ṭhîn tih lo chhinchhiah rawh. Atîra ziak ṭawngah chuan he thu hian nasa tak leh theih tâwp chhuaha beihna a kâwk a ni. He Bible châng hian tih tak zeta kan beih phawt chuan malsâwmna kan dawng ngei dâwn tih min va tiam tak êm! Chu malsâwmna petu chu Pathian dik awmchhun, “dâwt sawi thei lova” a ni si a. (Tit. 1:1, 2) Ani chuan a thutiamte a rin tlâkzia chu kum sâng têl a lo lantîr tawh a. A thute chu a hlawhchham ngai lo va, engtik lai pawhin a thleng dik a ni. (Is. 55:11) Chuvângin, rinna dik tak kan lantîr phawt chuan, ani chu kan tân Lâwmman Petu a ni ang tih kan ring pumhlûm thei a ni.
7. Engtin nge Abrahama ‘thlah’ hmanga malsâwmna chu kan neih theih?
7 Isua Krista chu hrilh lâwk Abrahama ‘thlah’ bul ber a ni a. Hriak thih Kristiante chu, chu ‘thlah’ zawmpuitute an ni. Anni chu “thim ata chhuaka, a êng mak taka lût tûra [anmahni] kotu . . . ṭhatna” puang chhuak tûra tih an ni. (Gal. 3:7-9, 14, 16, 26-29; 1 Pet. 2:9) Isua’n a thil neihte enkawl tûra a ruatte kan ngaihthah chuan Pathian Jehova nêna inlaichînna ṭha neih chu kan beisei thei lo vang. “Bawi rinawm, fing tak” ṭanpuina tel lo chuan, Pathian Thu kan chhiarte hi kan hre thiam vek lo vang a, a nunpui dân tûr pawh kan hre hek lo vang. (Mt. 24:45-47) Bible aṭanga kan thil zirte a taka nunpuiin, Pathian malsâwmna chu kan nei thei a ni.
Pathian Duhzâwng Ngaihven Reng Rawh
8, 9. Engtin nge thlahtu Jakoba chuan a dîlna nêna inmila thil a tih fan fan?
8 Pathian malsâwmna dawng tûra nasa taka beihna chuan thlahtu Jakoba chu min hriat chhuahtîr ngei ang. Ani chuan a pu, Abrahama hnêna Pathian thutiam hlen chhuah a nih dân tûr chu a hre lo va; mahse, Pathian Jehova’n a thlahte chu tipungin, hnam ropui takah a siam dâwn tih a ring tlat a ni. Chuvângin, B.C.E. 1781 khân, Jakoba chu nupui zawngin Haran khuaah a zin a. Ani chuan a kawppui tûr ṭha tak zawn hmuh a duh mai a ni lo; a fate tâna nu ṭha tak ni tûr, thlarau lam thil ngaihsak mi Pathian Jehova betu chu a zawng zâwk a ni.
9 Jakoba chuan a chipui Rakili a hmu tih kan hria a. Rakili chu a hmangaih ta a, nupuia a neih theih nân a pa, Labana hnêna kum sarih hnathawh chu a remti a. Hei hi nula leh tlangvâl inngaihzâwnna thawnthu hriat reng tlâk mai a ni lo. A pu Abrahama hnêna Pathian Engkimtitheia thutiam, a pa Isaaka sawi chhâwn leh chu Jakoba chuan a hre ngei a ni. (Gen. 18:18; 22:17, 18; 26:3-5, 24, 25) Tin, Isaaka chuan a fapa Jakoba hnênah: “Pathian Engkimtitheia chuan mal sâwm chein, hnam hrang hrang tam tak i lo nih theih nân chi tam tak thlahtîr chein, tipung che rawh se; i mikhualna ram, Pathianin Abrahama a pêk hi, i luah nân Abrahama malsâwmna chu dawntîr bawk che rawh se, nang leh i thlahte pawh,” tiin a hrilh chhâwng a ni. (Gen. 28:3, 4) Chuvângin nupui ṭha zawng ṭâng ṭâng a, chhûngkua din a tumna chuan Pathian Jehova thusawi a rinzia a târ lang a ni.
10. Engvângin nge Jakoba chunga malsâwmna vûr chu Pathian Jehova rilrem zâwng a nih?
10 Jakoba chuan a chhûngkaw châwm nân hausakna a zawng lo. A thlahte chan tûr Pathian Jehova thutiam chu a rilru-ah a dah tlat zâwk a. Pathian Jehova duhzâwng hlen chhuahna chu a ngaihven tlat a ni. Jakoba chuan Pathian malsâwmna dawng tûrin harsatna kârah pawh theih tâwp chhuah chu a tum tlat a. A tar thleng pawhin chu rilru put hmang chu a chhawm reng a, chu mi avâng chuan Pathian Jehova’n mal a sâwm a ni.—Genesis 32:24-29 chhiar rawh.
11. Pathian târ lan a duhzâwng nêna inmilin engtin nge ṭan kan lâk ang?
11 Jakoba angin, Pathian Jehova thiltum hlen chhuah dân tûr chu kan hre vek lo va. Mahse, Pathian Thu kan zirna aṭangin, “Lalpa nî” chungchânga beisei tûr âwm tlângpui chu kan hre thei a ni. (2 Pet. 3:10, 17) Entîr nân, chu mi nî a lo thlen hun tûr chiah chu hre lo mah ila, a hnai tawh tih chu kan hria a. Pathian Thuin hun tlêm tê chauh a awm chhûnga kimchang taka thu hrilna aṭangin keimahni leh kan thu ngaithlatute chu kan chhandam dâwn tih a sawi chu kan ring a ni.—1 Tim. 4:16.
12. Eng nge kan hriat chian theih?
12 Tâwpna chu engtik hunah pawh lo thleng thei reng a ni tih kan hria a; Pathian Jehova chuan he leia mi tinte hnêna thu kan hrilh zawh thleng a ngah a ngai lo. (Mt. 10:23) Chu bâkah, kan thu hrilh rawngbâwlna ṭha taka thawh theih dân tûr kaihhruaina ṭha kan dawng bawk a. Chu rawngbâwlnaah chuan kan thil neih ang apiang hmangin, rinna nên theih tâwp chhuahin kan tel a ni. Ngaithla duhte awmna bialah thu kan hril reng ang em? Chu chu engtin nge kan hriat lâwk theih tehrêng ang? (Thuhriltu 11:5, 6 chhiar rawh.) Kan hna chu Pathian Jehova’n mal min sâwm ang tih ring tlat chunga thu hrilh hi a ni a. (1 Kor. 3:6, 7) Ani chuan theih tâwp kan chhuahna chu a hmu a, a thlarau thianghlim hmangin kaihhruaina kan mamawh ang apiang min pe dâwn tih kan hre chiang thei a ni.—Sâm 32:8.
Thlarau Thianghlim Dîl Rawh
13, 14. Pathian thlarau thianghlimin a chhiahhlawhte a thuam theihzia engtin nge târ lan a nih?
13 Chanvo pakhat hlen chhuak tûr emaw, thu hril tûr emawa tling lo nia kan inhriat chuan engtin nge ni ang? Pathian Jehova chu a rawngbâwlnaa kan thiamna engpawh tihmasâwn tûrin a thlarau thianghlim kan dîl tûr a ni. (Luka 11:13 chhiar rawh.) Tûn hmaa an dinhmunte leh thiltawnte chu engpawh ni se, Pathian thlarau chuan mite chu hna emaw, rawngbâwlna chanvo emaw atân a tlintîr thei. Entîr nân, Aigupta an chhuahsan hnu lawkah, Pathian thlarau chuan berâm vêngtute leh bâwihte chu indonaa thiltawn an nei lo chung pawhin an hmêlmate a do hnehtîr a. (Ex. 17:8-13) Chu mi hnu lawk chuan, chu thlarau bawk chuan Bezalela leh Oholiaba te chu Pathian thâwk khum biak in sak dân riruang anga sa tûrin a thuam bawk a ni.—Ex. 31:2-6; 35:30-35.
14 Chu thlarau thiltithei tak chuan tûn laia Pathian chhiahhlawhte chu inawpna pâwlin mahnia lehkha chhutna khâwl neih a ṭûl tâkah chuan chu mamawh phuhru tûrin a thuam bawk a ni. Chutih laia factory enkawltu, Unau R. J. Martin-a chuan a lehkha thawnah kum 1927-a thil hlen chhuah chu heti hian a hrilhfiah a. “A hun takah Lalpa’n kawng a hawng a; a hnathawh dân hre miah lo mah ila, lehkha chhutna khâwl lian tak chu kan han nei ta rawih a. Mahse, Lalpa chuan a tâna theih tâwp chhuahtute ngaihtuahna leh theihna te tihhmasâwn dân chu a hria a ni. . . . Chawlhkâr rei lo te chhûngin, chu khâwl chu ṭha takin kan hmang thiam ta a, tûn thleng hian kan la hmang a, a siamtute rin phâk bâkin hna a thawk a ni,” tiin. Pathian Jehova chuan tûn thleng hian chutianga tih tak zeta thawh rimna chu mal a sâwm zêl a ni.
15. Engtin nge Rom 8:11 thu hi thlêmna tâwktute tân chakna a nih theih?
15 Pathian Jehova thlarau chuan kawng hrang hrangin hna a thawk a. Chu thlarau chu Pathian chhiahhlawh zawng zawngte tân hmuh theih a ni a, harsatna hlauhawm tak takte pawh hneh tûrin anni chu a ṭanpui a ni. Thlêmnain min tlâk buak nia kan hriat chuan engtin nge ni ang? Rom 7:21, 25 leh 8:11-a Paula thute aṭangin chakna kan hmu thei a ni. Ni e, “mitthi zîng ata Isua titho lehtua thlarau” chuan kan tân hna a thawk thei a, kan tisa châknate do hneh tûrin min tichak a ni. He thu hi thlarauva hriak thih Kristiante hnêna ziak a ni a; mahse, a thu bul hi Pathian chhiahhlawh zawng zawngte tân a ni ve bawk. Krista ring a, châkna ṭha lote tihlum tûra theih tâwp chhuah bawk a, thlarau kaihhruaina mila kan nun bawk chuan nunna kan nei ṭheuh thei a ni.
16. Pathian thlarau thianghlim dawng tûrin eng nge kan tih ngai?
16 Keimahni lama ṭan lâkna awm miah lovin, Pathian chu a chakna thahrui min pe tûrin kan beisei thei em? Thei lo. Thlarau dîla kan ṭawngṭai bâkah, Pathian thâwk khum Thu chuan taima takin kan inchâwm ṭhîn tûr a ni. (Thuf. 2:1-6) Chu bâkah, Pathian thlarau chu Kristian kohhran chungah a awm a. Kan inkhâwm ziahna chuan “thlarauvin kohhranho hnêna thu a sawi” chu hriat kan duhzia a târ lang a ni. (Thup. 3:6) Chu bâkah, kan thil zirte chu inngaitlâwm takin kan zâwm tûr a ni bawk. Thufingte 1:23 chuan: “Ka zilhna che u lamah hian lo hawi rawh u: ngai teh u, in chungah ka thlarau ka leih ang,” tiin min fuih a. Pathian chuan “a thu zâwm apiangte” hnênah a thlarau thianghlim a pe ṭhîn a ni tih a chiang hle.—Tirh. 5:32.
17. Kan thawh rimna chunga Pathian malsâwmnain hna a thawh dân chu eng nên nge tehkhin theih a nih?
17 Pathian malsâwmna dawng tûra theih tâwp chhuah a ṭûl rualin, thawh rimna ringawt avânga Pathianin a mite chunga hnianghnâr taka a pêk thil ṭhate dawng kan ni lo tih hria ang che. Kan thawh rimna chunga Pathian malsâwmnain hna a thawh dân chu kan taksa tâna chaw ṭhain hna a thawh dân nên tehkhin theih a ni. Pathian chuan kan taksa hi thil tui taka ei thei tûr leh chuta ṭanga chakna nei thei tûr zâwngin a siam a. Chu bâkah, ei tûrte pawh min pe bawk a ni. Kan thil eite’n chakna a neih dân chu kan hre kim lo va, kan taksain kan thil eite aṭanga chakna a siam chhuah dân hrilhfiah kim thei lah kan awm hek lo. Chûngte chuan hna a thawk tih kan hriat avângin, kan ei mai ṭhîn a ni. Chaw ṭha kan ei chuan kan hlâwkpui lehzual ṭhîn. Chutiang bawk chuan, Pathian Jehova pawhin chatuan nunna neih nâna thil tlin ngai a nei a, chûngte tlin thei tûra kan mamawh ṭanpuina min pe bawk a ni. Ani chuan min ṭanpui nasain, kan chawimawi a phu tih a chiang hle. Chuti chung pawhin, malsâwmna dawng tûr chuan Pathian duhzâwng nêna inmila kan nun a, amah kan thlâwp a ngai a ni.—Hag. 2:18:19.
18. Eng nge tih i tum tlat a, engvângin nge?
18 Chuvângin chanvo i dawn rêng rêngte hlen chhuak tûrin theih tâwp chhuah rawh. Hlawhtlin nân engtik lai pawhin Pathian Jehova rinchhan tlat rawh. (Mk. 11:23, 24) Chutianga i tih rual chuan, “tupawh a zawng chuan an hmu ṭhîn” tih chu ring tlat ang che. (Mt. 7:8) Thlarauva hriak thihte chu vâna “nunna lallukhum” pêk an ni ang a. (Jak. 1:12) Abrahama thlah kal tlanga malsâwmna dawn tuma beitu, Krista “berâm dang” te chuan: “Ka pa voh bîkte u, lo kal ula khawvêl siam ṭantirh ata in tâna ram buatsaih chu chang rawh u,” tia Isua sawi hriat chu nuam an ti hle ang. (Joh. 10:16; Mt. 25:34) Ni e, “[Pathian] malsâwmna dawngtute chuan ram hi an luah dâwn a, . . . a chhûngah hian kumkhuain an awm ang.”—Sâm 37:22, 29. (w10-E 09/15)
Kan Hrilhfiah Thei Em?
• Thu âwihna dikah hian eng nge tel?
• Pathian malsâwmna dawng tûrin eng nge ngai?
• Engtin nge Pathian thlarau thianghlim chu kan dawn theih a, chu chuan kan tân eng angin nge hna a thawh theih?
[Zirlai Atâna Zawhnate]
[Phêk 13-naa milemte]
Jakoba chuan Pathian Jehova malsâwmna dawng tûrin vântirhkoh a buan.
Chutiang bawk chuan tih tak zetin i bei ve em?
[Phêk 14-naa milem]
Bezalela leh Oholiaba te chu Pathian thlarauvin a thuam