Tâwpna An Hlau Tawh Lo

KUM 1980 tlin dâwn hnaih lam khân Gary-a leh Karen-i chuan khawvêl tâwp a hnai tih an ring nghet a. Chuvângin, khawpui ata thingtlâng lama pêm chhuakin, mahnia intodelh pumhlûm chu an tum a ni; dam khawchhuah an duh si a.

Chutianga awm nâna an mamawh thiamna an neih theih nân lehkhabute an lei a, class-te kalin seminar-ahte an tel bawk a; tin, mi tam tak an be râwn bawk a ni. Thlai an chîng a, thei kûng tê chi kûng 50 lai an phun bawk a. Thlai chi leh huan siamna hmanruate an chhêk khâwl ṭeuh bawk a. Thlai chîn dân leh ei tûr vawn ṭhat dân an zir bawk a. An ṭhian pakhat chuan ran talh dân leh a sa rêp dân a zirtîr bawk a ni. Karen-i chuan ei tûr an tlâk chham huna an rin theih tûr ram hnuaia thlai leh thingzung ei theihte chanchin chu a zir a. Gary-a chuan fafu ringa ei rawngbâwl dân a zir a, thîr thuk siamin lei chawp thil tel lo in a sa bawk a ni.

Karen-i chuan: “Chutih laia khawvêl dinhmun chhe tak avângin, mihring zawng zawng chu boral mai tûrah ka ngai a,” a ti a. Gary-a chuan: “Ṭhalai dangte ang bawkin, chi inthliarna te, Vietnam Indona te, leh ei rûkna tihbo tumin ka bei ve nasa a. Mahse, ka beidawng leh thuai a. Mihringte hian mahni intihchhiatna kawng an zawh niin ka hre tlat a ni,” tiin a sawi bawk.

Gary-a chuan: “Zan khat chu, hun tlêm azâwng ka neih  avângin Bible lain Matthaia aṭanga Thu Puan thleng ka chhiar ta a. A dawt zan liah chuan vawi khat dang ka chhiar chhuak leh a. A ni ngana zîngah Karen-i hnênah chuan: ‘Ni hnuhnûngah kan awm ta. Pathianin lei a rawn thianfai thuai dâwn. Dam khawchhuak tûrte kan zawn chhuah a ngai a ni,’ ka ti a,” tiin a sawi. Gary-a leh Karen-i te chuan tâwpna lo thleng tûr atâna inbuatsaih duhte zawngin, sakhaw tin mai chu an tlawh chhuak a ni.

Rei lo têah chuan, Jehova Thuhretute zînga pakhat chuan a va tlawh ta hlawl mai a, Bible an zir ṭan ta nghâl a ni. Karen-i chuan: “Bible chângte fiah taka hrilhfiah ka nih tâkah chuan ka phûr ta hle mai a. Tâwpna hun chungchâng ka lo zawn ṭhin chu a tâwp a tâwpah chuan ka hmu ta. Nakin hun beisei tûr rin tlâk tak chu a lo awm ngei mai a. Chu aia ṭha zâwk chu, lei leh vân Siamtu leh Pathian, ka Pa vâna mi nêna inlaichînna ka nei thei ta hi a ni,” tiin a sawi.

Gary-a chuan: “Ka nun chuan awmzia a nei ta hle a. Bible ka zir aṭang chuan duh tâwk ka ngah thei lo. Bible hrilh lâwkna ka chhiar a, a lo thlen famkimzia finfiahnate chu ka bih chiang a, Pathianin hma a rawn la thuai dâwn tih ka ring ta tlat a. Chutah, ‘Mite chu chhiatna lo thleng tûr atân ni lovin, Pathianin min duhsak anga nung tûrin an inbuatsaih tûr a ni asin le,’ tiin ka ngaihtuah ta a ni,” a ti. Gary-a leh Karen-i chuan hma lam hun beisei tûr an nei ta a. Khawvêl tâwpna tûr lo lungkham ai chuan, Pathianin mihringte chîm buaitu harsatnate chu paih bovin, he lei hi paradis-ah a rawn chantîr dâwn tih an ring nghet ta a ni.

Kum 25 lai a liam tawh hnu, tûnah hian Gary-a leh Karen-i chuan eng nge an tih? Karen-i chuan: “Pathian Jehova ka hmangaihna leh ka rinna chu ka thuam nghet sauh reng a, mi dangte pawh chutiang bawka ti ve tûra ṭanpui chu ka tum bawk a ni. Gary-a nên chuan Pathian biakna kawnga kan chhûngkua inpumkhat tûrin kan inṭanpui tawn a. Fel taka inruahman chu kan tum a, mi dangte leh an mamawhte kan ngaihsak theihna tûrin samkhai taka nun kan tum bawk a ni,” tiin a sawi.

Gary-a chuan: “Pathian Ram lo thleng a, mi tam takte harsatna rawn chhâwk tûrin ka ṭawngṭai ziah ṭhîn. Mi dangte hnêna Pathian Ram chanchin ṭha ka hrilh apiangin, tuemaw tal hnêna Bible aṭanga beisei tûr engemaw tak hrilhhre thei tûrin ka ṭawngṭai ṭhîn a ni. Kum 25 chuang chhûng chu, Pathian Jehova chuan ka ṭawngṭaina a ngaithla a. Karen-i nên chuan Pathian Jehova’n he leiah hian inthlâkthlengna nasa tak a rawn thlentîr thuai dâwn tih kan ring a; mahse, tâwpna chu kan hlau tawh lo rêng rêng,” tiin a rawn sawi belh a ni.—Matthaia 6:9, 10; 2 Petera 3:11, 12. (w10-E 08/01)

[Phêk 9-naa milem]

Tûnah chuan Gary-a leh Karen-i chuan mi dangte chu Bible aṭanga beiseina nei tûrin hlim takin an ṭanpui tawh a ni