Tâwpna Chungchânga Zawhna Palite Chhânna

ISUA KRISTA chuan nakinah ‘tâwpna a lo thleng dâwn’ tih a sawi lâwk a. Chu mi hun chungchâng chu sawiin, ani chuan: “Chu mi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a awm leh tawh hek lo vang,” a ti a ni.—Matthaia 24:14, 21.

Tâwpna chungchânga Isua thu sawi leh chu mi chungchâng sawina Bible chângte chuan zawhna pawimawh tam tak a chawk chhuak a. Engvângin nge i Bible ngei keuvin, chûng zawhnate chhânna chu i chhiar loh vang?

1 Eng Nge Tâwp Dâwn?

Bible chuan kan chênna leilung tak tak hi a boral dâwn tih a zirtîr lo. Fakna hla phuahtu chuan: “[Pathian chuan] leilung nghah chhante chu a phûm a, kumkhuaa a nghîn loh nân,” tiin a ziak a ni. (Sâm 104:5) Tin, Bible chuan leia nunna zawng zawng hi a kângfai vek dâwn tih lah a zirtîr hek lo. (Isaia 45:18) Isua ngei chuan mi ṭhenkhat chu tâwpnaah an dam khawchhuak dâwn tih a târ lang. (Matthaia 24:21, 22) Chuti a nih chuan, Bible-in tâwp tûra a sawi chu eng nge ni?

Mihring sawrkârna hlawhchhamte chu a tâwp ang. Pathian chuan zâwlnei Daniela chu: “Vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikehsawmin a tiral zâwk ang a, kumkhuain a ding reng ang,” tia ziak tûrin a thâwk khum a ni.—Daniela 2:44.

Indona leh tui leh boruak bawlhhlawhna a tâwp ang. Pathian thiltih tûr chu sawiin, Sâm 46:9 chuan: “Ani chuan indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn a; tawilailîrte chu meiah a rawh ral ṭhîn,” tiin a sawi. Tin, Bible chuan Pathianin ‘lei tichhetute a tichhe’ dâwn tih a zirtîr bawk.—Thu Puan 11:18.

Dân bawhchhiatna leh rorêl dik lohna a tâwp ang. Pathian Thu chuan: “Mi tluangte  chu leilungah hian an chêng ang a, ṭha famkimte chu chutah chuan an awm reng a; mi suaksualte erawh chu leilung ata tihboral an ni ang a vervêk taka titute chu tihboral phiar an ni ang,” tih min tiam a ni.—Thufingte 2:21, 22.

2 Tâwpna Chu Engtikah Nge A Lo Thlen Ang?

Pathian Jehova chuan suahsualna tihtâwp nân leh a Lalram din nân “hun” a ruat a. (Marka 13:33) Mahse, Bible chuan tâwpna a lo thlen hun tûr chiah kan chhût thei lo tih a târ lang. Isua chuan: “Chu mi nî leh a hun thu chu Pa chauh lo chuan tuman, vâna vântirhkohte pawhin, Fapa pawhin an hre lo,” tiin a sawi. (Matthaia 24:36) Amaherawhchu, Isua leh a zirtîrte chuan Pathianin tâwpna a lo thlentîr hma lawka thil awm dân tûr chu an sawi lâwk a ni. A hnuaia thilthleng zawng zawngte hun khat chhûnga khawvêl hmun tina a thlen hunah tâwpna chu a lo thleng thuai ang.

Mihring chanchina la thleng ngai lo khawpa nasain politics lam, chhehvêl boruak lam, leh khawtlâng lamah chhiatna thlentu inthlâkthlengna a thleng. Tâwpna chungchânga zirtîrte zawhna chhângin, Isua chuan: “Hnam hrang leh hnam hrang an indo vang a, ram hrang leh ram hrang an indo vang a; hmun hrang hrangah lîrte a nghîng ang a; ṭâmte a tla ang. Chûng chu nauvei ṭantirhna a ni,” a ti a. (Marka 13:8) Tirhkoh Paula chuan: “Ni hnuhnûngahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thuâwih lo te, lâwm nachâng hre lo te, thianghlim lo te, hmangaihna pianpui nei lo te, huaikawm bâwl te, hektu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si,” tiin a ziak a ni.—2 Timothea 3:1-5.

Khawvêl pumah ṭawng chi hrang hrang hmanga thu hrilhna campaign neih mêk a ni. Isua chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” a ti.—Matthaia 24:14.

3 Tâwpna Hnuah Eng Nge Thleng Dâwn?

Bible chuan mi ṭha zawng zawngte chu chatuana vân nun nuam tak chên tûrin lei ata lâk chhoh an ni dâwn tih a zirtîr lo. Isua chuan mihringte tâna atîra Pathian thiltum chu a thleng famkim dâwn tih a zirtîr zâwk a ni: “Thuhnuairawlhte chu an eng a thâwl e; lei hi an la rochung dâwn si a,” tiin. (Matthaia 5:5; 6:9, 10) Tâwpna lo thlen hmaa thite tân Bible chuan thawhlehna a tiam a ni. (Joba 14:14, 15; Johana 5:28, 29) Tâwpna hnuah chuan eng nge thleng dâwn?

Vân aṭangin Isua chuan Pathian Rama Lalber angin ro a rêl ang. Zâwlnei Daniela chuan: “Zân inlârnaahte chuan, ngai teh, vân chhûmte nêna lo kal, mi pakhat, mihring fapa, ang hi ka hmu a, Hmakhawsânga hnênah chuan a lo kal a, a hmâah chuan ani chu an rawn hruai hnai a. Tin, rorêlna te, ropuina te, ram te, a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân: a rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang,” tiin a ziak a ni.—Daniela 7:13, 14; Luka 1:31, 32; Johana 3:13-16.

Pathian Ram Rorêlna hnuaia awmte chuan hrisêlna ṭha famkim, himna tluantling, leh chatuana nun an chên ang. “Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh tawh lo vang a, mi dang eiah grêp huan an siam tawh lo vang,” tiin zâwlnei Isaia chuan a ziak a. (Isaia 65:21-23) Tirhkoh Johana chuan chutih huna  thil awm dân tûr chu heti hian a ziak: “Ngai teh, Pathian bâwkte chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin.—Thu Puan 21:3, 4.

4 Dam Khawchhuak Tûrin Eng Nge I Tih Ngai?

Tirhkoh Petera chuan tâwpna huna awm mi ṭhenkhatin Pathian chu mihringte chung thu-ah rawn inrawlhin leia suahsualna a titâwp ang tih ngaih dân chu an nuih zat dâwn tih a sawi a. (2 Petera 3:3, 4) Chuti chung pawhin Petera chuan kan hun laia mite chu a hnuaia mi anga hma la tûrin a fuih a ni.

Thilthleng tawh aṭangin inzir rawh. Pathian chuan “amah ngaihsak lote awmna khawvêlah khân tui tilêtin hmân lai khawvêl chu a zuah lo va, nimahsela Nova, felna thu hriltu chu, mi dang pasarih nên a chhandam ta a,” tih Petera chuan a ziak a ni. (2 Petera 2:5) Petera chuan nuihzattute chunga thil thleng tûr chungchângah: “Hêng hi an haider lui si ṭhîn: Pathian thuin hmân laiin vânte a lo awm a, lei pawh tui ata leh tui zîngah awm khâwmin a lo awm a; chûngah chuan chu mi  laia khawvêl awm chu tuiin a chîm a, a boral ta, tih hi; nimahsela tûnah vânte leh lei * awmte hi chu mi thu avâng vêk chuan Pathian ngaihsak lo mite rorêl leh boral nî atâna dahin hâl tûra khêk a ni,” tiin a sawi.—2 Petera 3:5-7.

Nungchang lama Pathian tehnate milin nung rawh. Tâwpnaa dam khawchhuak duhte chu “awm dân thianghlim leh Pathian ngaihsak” takin an awm ang tih Petera chuan a ziak a. (2 Petera 3:11, 12) Petera chuan “awm dân thianghlim” leh ‘Pathian ngaihsakna’ a sawi uar tih chhinchhiah rawh. Chuvângin, rinna neia inchhâlna mai emaw, a dâwn ṭêpa Pathian nêna inlaichînna neih tumna mai emaw aia tam a tel a ni.

Pathian pawm tlâk awm dân leh amah ngaihsakna chu eng chiah hi nge ni? Engvângin nge he mi chungchâng i hriat dân leh Bible zirtîr dân chu i khaikhin loh vang? Jehova Thuhretute chuan ṭanpui che an châk ngawt ang. An chhânna ṭanchhan chu i Bible aṭang ngeiin inkawhhmuhtîr ang che. Chutianga i tih chuan tûnah thil hlauhawmte’n min hualvêl chung pawhin, nakin hun chu huaisen tak leh inring tâwk takin i hmachhawn thei ang. (w10-E 08/01)

[Footnote]

[Phêk 7-naa thu lâk chhuah]

Lei hi a boral lo vang; mahse, a tichhetute erawh tihchhiat an ni ang