Pathian Hnaih Rawh

Ani Chuan Duhthlan Theihna Min Pe

2 LALTE 18:1-7

NU LEH PATE chuan an fate tân entawn tûr ṭha an siam tûr a ni a. Nu leh pa entawn tûr ṭha siam chuan naupang chu mize duhawm tak nei tûr leh duhthlanna fing siam tûrin a ṭanpui thei ang. Mahse, nu leh pa tam takin an fate tâna entawn tûr ṭha an siam lo chu a lungchhiatthlâk hle. Chutiang naupangte tân hlawhtlin ngaihna a awm lo tihna a ni em? A chhânna thlamuanthlâk tak chu, Pathian Jehova chuan mi tin hi zalên taka duhthlan theihna pein min chawimawi tih thu dikah hian kan hmu a ni. Lalte pahnihna 18:1-7-a târ lan Hezekia chungchâng hi han ngaihtuah ta ila.

Hezekia chu “Juda lal Ahaza fapa” a ni a. (Châng 1) Ahaza chuan a khua leh tuite chu Pathian Jehova biakna dik ata a hruai pêng a ni. He lal suaksual tak hian mihring hlanna tel Baala biakna chu a chîng a. Hezekia unaute zînga pakhat emaw, a aia tam emaw chu a hlân nghe nghe a ni. Ahaza chuan biak in kawngkhârte chu a khâr tlat a, “Jerusalem kil tinah [a tân] maichâm a siam a.” ‘Pathian Jehova a tithinur a ni.’ (2 Chronicles 28:3, 24, 25) Hezekia tân chuan hei aia pa ṭha lo zâwk hi neih ngaihna a awm tawh lo vang. Mahse, Hezekia chu a pa kawng sualte zawh lo thei lo dinhmunah a ding em?

Ahaza lalṭhutthlêng a han chan tâkah chuan, Hezekia chuan a pa kawng sualte zawh lo thei lo dinhmuna a din lohzia a lantîr ta thuai a. Ani chuan “LALPA mithmuha thil ṭha tak a ti ṭhîn” a ni. (Châng 3) Hezekia chuan Pathian Jehova a ring a, “Juda lal zawng zawngte zîngah amah ang tumah an awm lo.” (Châng 5) A lal ṭan kum chuan, lal naupang tak chuan biakna dik atân beihpui a thlâk a, an milem biakna hmun sângte chu a thehthang bo va. Biak in kawngkhârte chu hawng lehin, biakna dik chu a din thar leh a ni. (Châng 4; 2 Chronicles 29:1-3, 27-31) Hezekia chuan “LALPA chu a vuan tlat a, . . . tichuan, LALPA chu a hnênah a awm a.”—Châng 6, 7.

Engin nge Hezekia chu a pa entawn tûr siam ṭha lo tak entawn lo tûra ṭanpui? A chanchin kan hriat tam vak loh a nu Abijai chuan a fapa chungah nghawng ṭha a nei a ni thei ang em? Hezekia pian hma aṭanga zâwlnei lo ni tawh Isaia entawn tûr siam ṭha tak chuan lal fapa naupang tak chungah nghawng ṭha a nei a ni thei ang em? * Bible chuan engmah a sawi lang lo. A enga pawh chu ni se, thil pakhat chu a chiang a ni: Hezekia chuan a pa kawng zawh nêna inkalh tak nun kawng a thlang, tih chu.

Hezekia entîrna chu nu leh pate entawn tûr siam ṭha lo tak avânga naupan laia harsatna tâwkte tân a thlamuanthlâk hle. Thil kal tawh chu siam ṭhat theih a ni lo va; tûn hmaa thiltawn hrehawm takte chu kan paih bo theih a ni lo va. Mahse, chûng thiltawnte avâng chuan kan hlawhchham ngei ngei dâwn tihna a ni chuang lo. Tûna duhthlanna kan siam hian nakina hun hlimawm min neihtîr thei a ni. Hezekia angin, Pathian dik Jehova be tûr leh hmangaih tûrin duh kan thlang thei a. Chutiang nun kawng chuan tûna nun lungâwithlâk tak leh Pathian khawvêl thara chatuana nunna min neihtîr thei a ni. (2 Petera 3:13; Thu Puan 21:3, 4) Thilpêk hlu ber—zalên taka duhthlan theihna—min petu hmangaihna Pathian chunga lâwm tûr kan va ni êm! (w10-E 09/01)

[Footnote]