Engah Nge Mite’n Thil Sual An Tih?

Ṭha famkim lo vek kan ni a, chuvângin a hnua kan inchhîr lehna tûr thil kan ti palh ṭhîn, tih hi hnial buai duh kan awm mang meuh lo vang. Mahse, chu chu nî tin deuhthawa mahni ngei emaw, chanchin thar emaw aṭanga kan thil hmuh leh hriat thil sual tih tênau leh lian tham tak takte thlen chhan a ni em?

Ṭha famkim ni lo mah ila, mite chuan an tih ngai loh tûr thil a awm tih leh thil sual tih an pumpelh thei tih chu an pawm tlângpui a. Tin, tum rêng vâng ni lova thudik lo sawi leh mi dang sawichhiat a inang lo va, tihpalh thil avânga mi dang hliam palhna leh tum rêng vânga tualthahna a inang lo tih chu an pawm deuh vek bawk a ni. Chuti chung pawhin, thil sual râpthlâk tak takte chu vêngchhûnga mi pângngai tak anga langte tih a ni fo ṭhîn. Engah nge mite’n thil sual an tih?

 Bible chuan he mi chungchâng hriat thiamna min pe a. Mite’n thil sual a ni tih an hriat reng pawh an tih chhan chiang takin a sawi a ni. A sawi dân chu lo en ta ila.

▪ “Hnehchhiahna hian mi fing a ti-â.” —THUHRILTU 7:7.

Bible chuan mite’n an tih ngai loh tûr thil pawh an dinhmun khirh tak avângin an ti mai ṭhîn tih a sawi a. Ṭhenkhat chuan harsatna leh hleih neihna tihven an tumna lamah, kawng awmchhun nia an hriat chu zawhin thil sual nasa tak an ti hial thei a ni. Urban Terrorism tih lehkhabu chuan: “Firfiaka chête chêttîrtu chu politics lam, khawtlâng lam, leh ei leh bâr lama siam ṭhat theih rual loh buainate avânga beidawnna hi a ni deuh ber ṭhîn,” tiin a sawi.

▪ “Tangka sum ngainat hi sual tinrêng bul a ni.”—1 TIMOTHEA 6:10.

Mi tin hi suma lei theih an ni, tih hi hmân lai thufing pakhat a ni a, a awmzia chu mi fel takte pawhin sum tam tâwk hmuhna tûr a nih phawt chuan dân leh dûn an pawisa lo, tihna a ni a. Mi ṭhenkhat, dinhmun pângngai tak hnuaia mi ngilnei leh nêlawm tak anga langte pawh sum a inrawlh tawh phawt chuan an inthlâk danglamin, ngeiawm tak leh sual tak an ni daih thei a ni. Duhâmna avânga thleng dân bawhchhiatna tam takte hi han ngaihtuah teh—sum hmuh nâna thurûk engemaw puang chhuak tûra invauna te, sum inhneh chhuhna te, inbumna te, suma tlan atâna mihring rûk bona te, leh tualthahna hial te chu.

▪ “Thiltih sual chungah hremna hlen nghâl mai a nih ṭhin loh avângin, mihring fate thinlung chu thil sual ti tûrin a lo ngampa tawh ṭhîn.”—THUHRILTU 8:11.

He Bible châng hian thu neitute’n an hmuh loh chuan miin hremna tuar lovin eng pawh a ti thei tih mihringte ngaihtuah dân chu a târ lang a. Chutiang a nihzia chu kawngpuia phal chin aia chaka motor khalhtu te, exam-naa an entawntu te, mipui sum ei rû te, leh chûng aia thil râpthlâk zâwk an tihte aṭangin a lang a ni. Dân kenkawh ṭhat a nih loh emaw, man palh an hlauh loh emaw hian, tûn hmaa dân zâwm ṭhînte pawhin an zâwm lo thei a ni. Arguments and Facts tih magazine chuan: “Dân bawhchhetute hrem lo va an chhuak mai ṭhîn hian mi ṭha pângngaite chu dân bawhchhiatna râpthlâk tak tih duhna a neihtîr a ni,” tiin a sawi.

▪ “Mi tin mahni châknaa hruai bo leh hîpa an awm chuan thlêmna an tâwk a ni. . . . Tin, châkna chuan no a pai a, sual a hring ṭhîn.”—JAKOBA 1:14, 15.

Mi tin hian ngaihtuahna ṭha lo kan nei thei ṭheuh va. Nî tin mai hian, thil ṭha lo ti tûra thlêmna tam takin min dêng reng a. Bible hun laia Kristiante chu: “Mihring tuar theih ang chauh lo chu thlêmna rêng rêng in chungah a thleng ngai lo,” tia hrilh an ni a. (1 Korinth 10:13) Chutiang ni mah se, thlêmnain thil ṭha lo tihna a thlen dâwn leh dâwn loh chu kan thu tlûkna siamah—ngaihtuahna ṭha lo kan paih bo nghâlna emaw, ngaihtuah chhunzawm a, kan ṭhan lentîrnaah emaw—a innghat a ni. A chunga Bible châng târ lan thlarauva thâwk khum lehkha thawn Jakoba ziak chuan miin châkna sual chu ‘no a paitîr’ chuan, thil  ṭha lo tihin a zui ngei ngei dâwn tih a târ lang a ni.

▪ “Mi fing pâwl la, i lo fing ang a, mi â pâwl erawh chu hrehawm tuar phahna a ni.” —THUFINGTE 13:20.

Kan ṭhian kawmte hian a ṭha lam emaw, a ṭha lo lam emawin kan chungah nghawng nasa tak an nei thei a. Mite chuan ṭhiante nawrna avâng emaw, mi tam tak sawi dânin, ṭhian ṭha lo an kawm vâng emawin an tih tum miah loh thil sualte an ti a, rah ṭha lo tak an seng fo ṭhîn a ni. Bible-in “mi â” a tih hian mi ang lo sawina ni lovin, Pathian Thu fuihna fing ngaihthahtute sawina mai a ni zâwk a. Kan naupang emaw, kan upa emaw fing taka Bible kaihhruaina mila ṭhian kawm tûr kan thlan loh chuan ‘hrehawm kan tawrh phah’ ngei dâwn a ni.

Hêng Bible chângte leh a dang tam takte chuan mite’n—kawng danga mi pângngai takte’n—thil ṭha lo leh râpthlâk tak an tih chhan chiang fek fawkin min hrilh a ni. Mite thil râpthlâk tak tihtîrtu hriatthiam chu a ṭangkai hle rualin, dinhmun ṭha zâwk a lo inher chhuah a beiseiawm em? Awm e, Bible chuan mite’n thil sual an tih chhan min hrilhfiah mai bâkah, chûng thil sual tihnate a awm tawh loh tûr thu min tiam bawk si a. Chûng thutiamte chu engte nge ni? He khawvêla thil ṭha lo zawng zawngte hi a tâwp tak zet ang em? A dawta thuziak chuan a chhânna min pe ang. (w10-E 09/01)