Jehova Inawpna Pâwl Hre Bel Tûrin Naupangte Chu Ṭanpui Rawh

NAUPANGTE chuan thil thar zir an châk a. Aigupta rama Israel naupangte’n Kalhlên Kût hmasa ber zâna zawhna an zawh hnem dân tûr chu han ngaihtuah teh: ‘Engvângin nge berâm talh a ngaih?’ ‘Engvângin nge ka Pain kawngka biangah ran thisen a tah?’ ‘Khawiah nge kan kal dâwn?’ tih zawhnate hi. Pathian Jehova’n chutiang zawhnate a lawmzia chu Israel pate hnêna a thupêkah a lang a ni. Nakina la hman tûr Kalhlên Kût chungchângah: “In faten in hnêna, ‘He rawngbâwlna awmzia hi eng tihna nge ni ngai le?’ an rawn tih chuan, nangnin, ‘Hei hi LALPA kalhlên inthawina a nih hi, ani chuan Aigupta mite a tihhlum lai khân kan inte chu a rawn zuah a, Aigupta rama Israela thlahte in chu a rawn kal hlên a ni,’ in la ti dâwn nia,” tiin a sawi. (Ex. 12:24-27) A hnuah, Pathian Jehova chuan Israel  nu leh pate chu an fate’n Pathian Jehova “thuhriattîr te, dân te, rorêl te” chungchânga zawhna an siamte chhân a pawimawhzia a hriat nawntîr a ni.—Deut. 6:20-25.

Pathian Jehova chuan naupangte’n biakna dik chungchânga an zawhna siamte chhânna lungawithlâk tak—ani chu an Pathian leh Chhandamtu anga hmangaih tûra chêttîr theitu tûr—an hmuh chu a duh a ni tih a chiang hle. Tûn laiah pawh, ani chuan naupangte tân chutiang bawk chu a duhsak a ni. Nu leh pate’n an fate rilrua Pathian leh a mite hmangaihna an tuhsak theih dân kawng khat chu Pathian Jehova inawpna pâwl hre bel tûr leh chu miin kan tâna thil min tihsakte hrethiam tûra ṭanpui hi a ni a. Chuvângin, Pathian inawpna pâwl chungchâng chipchiar lehzuala hre tûra naupangte kan ṭanpui theih dan kawng ṭhenkhat i lo en ang u.

Tualchhûng Kohhran

Naupangte chuan chhûngkuaa in lawina kohhran an hriat chian a ngai a. Chu mi atân chuan nu leh pa in nih angin fate Kristian inkhâwmnaa hruai chu in duh ngei ang. Chutiang chuan, Pathian Jehova’n Israelte tâna a thupêk ang chu in zâwm a ni ang: “Mipuiho ahmei apa, in fanau tê tê te . . . chuan an ngaihthlâk a, an zir a, LALPA in Pathian chu an ṭih a, he dân thu zawng zawng hi fîmkhur taka an zawm theih nân leh an fate la hre ve lote pawhin an hriat a, . . . LALPA in Pathian ṭih an zir theih nân ko khâwm rawh u,” tih hi.—Deut. 31:12, 13.

Naupangte chuan an sên lai aṭangin Pathian Jehova Thu an zir ṭan thei a. Tirhkoh Paula chuan Timothea chungchângah: “Lehkha Thianghlimte chu i naupan têt ata hre tawh i ni,” tiin a sawi a ni. (2 Tim. 3:14, 15)  Kingdom Hall-a inkhâwmnaah naupang tête pawhin thusawite chu an hre ṭan theiin, Lalram hlate chu an hre bel ṭan thei a ni. Chutah chuan Bible leh Bible ṭanchhan thu leh hla chhuahte hman dân leh enkawl dân an zir a. Chu bâkah, kan inkhâwmnaah hian Krista hnungzuitu dikte chhinchhiahna—hmangaihna dik—chu a awm tih an hre thei bawk. Isua chuan: “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” tiin a sawi. (Joh. 13:34, 35) Kingdom Hall-a lang hmangaihna duhawm leh himna dik chuan naupangte rilru a hneh ang a, chu chuan Kristian inkhâwm chu an nuna bet tel tlat nihtîr tûrin anni chu a ṭanpui ang.

Kingdom Hall-a i thlen hma a, bân hnua i awm khawtlai ziah chuan, i fate chuan ṭhian siamna hun an nei thei ang. Naupang dangte nêna inkawmtîr mai ai chuan, engvângin nge unau apui apangte chu i hmêlhriattîr loh vang? An aia upa zâwkte nêna an inhmêlhriat chuan, naupangte chuan upa zâwkte’n thiltawn ṭha an neiin, finna an nei bawk tih an hmu chhuak ang. “Pathian thu lama kaihruaitu” hmân lai Zekaria’n Judai lal naupang tak Uzia chu kawng dik zawh tûrin a ṭanpui thei a; chutiang bawkin, tûn laia kum tam tak chhûng rinawm taka Pathian Jehova rawng lo bâwl tawhte pawhin naupangte chu kawng dik zawh tûrin an ṭanpui thei a ni. (2 Chro. 26:1, 4, 5, C.L. Re-edited) Kingdom Hall-a in awm laiin, in fate hnênah library te, information board te, leh thil dang dangte hman a nih dân chu i hrilhfiah thei bawk.

Khawvêl Pum Huap Inawpna Pâwl

Naupangte chuan tualchhûng kohhran hi kohhran 1,00,000 awmna khawvêl pum huap inawpna pâwl pêng pakhat a ni tih an hriat a ngai a. He inawpna pâwl kalphung, a hnathawh dân te, leh naupangte’n chu hna an ṭanpui theih dânte chu hrilhfiah ang che. An hnênah chuan bial inkhâwmpui te, district inkhâwmpui te, leh bial kan kârte i nghahhlelhzia lantîr rawh.—“ Chhûngkuaa Pathian Biakna Neih Zâna Ngaihtuah Tûr Thute” tih bâwm, phêk 28-a lang chu en ang che.

Hun remchâng i neih ang zêlin, bial kantute, missionary-te, Bethel-a rawngbâwltute, leh hunbi kima rawngbâwltu dangte chu chaw ei-ah sâwm ṭhîn rawh. Anni chuan naupangte tân hun an nei lo tûrah ngai ngawt suh. Hêng hunbi kima rawngbâwltute hian engtik lai pawha naupangte lâwm a, be ṭhîntu Isua entawn chu an tum tlat a ni. (Mk. 10:13-16) Chutianga Jehova rawngbâwltute sawi thiltawnte an hriat a, rawngbâwlna thianghlima hlimna an neihzia an hmuh hian naupangte chuan hunbi kima rawngbâwl chu thiltumah an nei ve thei a ni.

I fate chu Jehova inawpna pâwl hre bel lehzual tûra ṭanpui nân chhûngkua angin eng dang nge in tih theih? Hetah hian rawtna ṭhenkhat a awm e: Chhûngkua angin Jehovah’s Witnesses—Proclaimers of God’s Kingdom, tih lehkhabu emaw, Jehova Thuhretute—Tute Nge An Nih? Eng Nge An Rin? tih brochure leh a chânga chhuak ṭhîn Vênnainsâng-a nun kawng chanchinte emaw chu in zir thei a. Chuta Pathian chhiahhlawhte lantîr inpêkna, inngaihtlâwmna, leh rinawmna te chu sawi uar rawh. Pathianin leilung zawng zawnga chanchin ṭha theh darh nâna a hman dân chu târ lang bawk rawh. Pathian Jehova inawpna pâwl buatsaih video-te chu hun kal tawh leh tûn hun aṭanga zir theih thu pawimawhte zirtîr nân hmang ang che. In theih chuan, in ram chhûng emaw, ram dang emawa branch office leh Bethel inte chu tlawh ula. Chutianga tlawhna chuan C.E. kum zabi khatna hun lai ang bawkin tûn laiah pawh Jehova inawpna pâwl lei lam pêngin bâwih rinawm leh fingte kaihhruaina hnuaiah khawvêl puma unaute hnêna thlarau lam chaw leh kaihhruaina a pêkzia chu i fate thinlungah a tuh nghet ang.—Mt. 24:45-47; Tirh. 15:22-31.

Naupang Phâk Tâwk Ang Zêla Thu Siam Rem

Fate i zirtîrnaah Isua’n a tirhkohte a zirtîr  dân chu hre reng ang che. Ṭum khat chu an hnênah: “In hnênah thusawi tûr tam tak ka la nei cheu va, nimahsela tûnah zawng in tlin rih lo vang,” tiin a sawi a ni. (Joh. 16:12) Isua chuan a zirtîrte chu vawi khatah a zirtîr nghek lo. An pawma an hriatthiam theih nân thutak pawimawh takte chu zawi zawiin a zirtîr zâwk a ni. Chutiang bawkin, i fate chu vawi khatah zirtîr nghek suh. Inawpna pâwl chanchin chu hunbi neia tlêm tê têa i zirtîr chuan, an tuina chu i chhawmnunsak reng thei ang a, Kristian kohhran chanchin zir chu an tân thil nuam tak a ni ang. I fate mamawh a inthlâk chhoh ang zêlin, an thu hriat tawhte hrilh nawnin i sawi zaupui thei a ni.

Kristian kohhran chu thlarau lam chakna hnâr pawimawh tak a ni a, kohhran thiltiha ṭhahnemngai taka tel naupangte chu Setana khawvêl thununna do tûrin an inthuam ṭha lehzual a ni. (Rom 12:2) Pathian Jehova inawpna pâwl hre bel tûra i fate i ṭanpuina kawngah hlimna i hmu dâwn tih kan ring tlat a ni. A malsâwmna zârah, i fate chuan chu pâwl leh a rawng kan bâwl hmangaihna Pathian chu rinawm takin bêl tlat rawh se. (w10-E 10/15)

[Phêk 27-naa bâwm/milem]

 Chhûngkuaa Pathian Biakna Neih Zâna Ngaihtuah Tûr Thute

Hetah hian Chhûngkuaa Pathian Biakna neih zâna inngaihtuah theih tûr inawpna pâwl chungchâng nêna inkûngkaih thu ṭhenkhat a awm e.

▪ Tualchhûng kohhran chanchin ennawn rawh. Engtikah leh eng anga din nge a nih? Khawi lai hmunte nge Kingdom Hall atâna hman a nih? Chutiang sawiho nân, engvângin nge kohhran chhûnga hun rei tak lo awm tawh tuemaw chu i fate zawhna chhâng tûrin lênga i sâwm loh vang?

▪ Naupangte hnênah chuan kohhran inkhâwm hrang hrangte leh inkhâwmpuite thiltum hrilhfiah la, chûngte an hlâwkpui theih dân chu hrilhfiah bawk rawh.

▪ Jehova inawpna pâwlin a din school hrang hrangte thiltum chu chhûtpui rawh. Chûng school-a kal chhuakte’n rah ṭha an chhuahzia târ langtu thiltawnte pawh hrilh ang che.

▪ Chanchin ṭha hril thuchhuahtu nih a pawimawhzia hre thiam tûrin naupangte chu ṭanpui rawh. An hnênah chuan Yearbook of Jehovah’s Witnesses-a chuang ṭhîn khawvêl pum huap report-a an tel ve theih dân kawhhmuh ang che.

▪ Jehova inawpna pâwl chhûnga naupangte thawh theih hunbi kima rawngbâwlna pêng hrang hrangte chu sawipui rawh. Organized to Do Jehovah’s Will tih lehkhabu bung 10-naah chuan he mi chungchâng thu ṭha tak a chuang a ni.

▪ Naupangte chu kohhranin ruahmanna eng engemawte a zui chhan hre thiam tûrin ṭanpui rawh. Thil hotê-ah pawh ni se, Pathian Jehova inawpna pâwl kaihhruaina ang lova thiltih an pumpelh chhan tûr hrilhfiah rawh. Upate kaihhruaina an zawm hian kohhranah thil engkim fel taka tih a ni thei tih kawhhmuh ang che.

[Milem]

I fate chuan hun rei tak chhûng Pathian rawngbâwl tawhte nêna inṭhianna chu an hlâwkpui ang

[Phêk 25-naa milemte]

Hmân lai Israel hun lai angin, tûn laia nu leh pate chuan Jehova inawpna pâwl chungchâng an fate’n an zawh hian lungawithlâk taka chhân an tum hrâm hrâm