Thil Sual Tihna A Tâwp Ngei Dâwn!

PATHIAN chuan mite’n thil sual an tih chhan hrilhfiahtu, a thâwk khum Thu min pe a. Zalên taka duh thlan theihna leh thil sual ti lova min awmtîr thei insûm theihna min pe bawk a ni. (Deuteronomy 30:15, 16, 19) Chutiang khawpa thuam famkim kan nih avângin, kan neih theih rilru âwn lam dik lote chu kan hre theiin, kan insiam ṭha thei a ni. Chutianga thil sual tih kan pumpelhna chuan a tâwpah kan tân leh kan bula awmte tân hlimna a thlen ang.—Sâm 1:1.

Amaherawhchu, eng ang pawhin thil sual chu do ṭhîn mah ila, mi dangte thil sual tih chuan khawvêl hi hmun hrehawm takah a chantîr zêl dâwn a ni. Bible chuan: “Hei hi hre rawh, ni hnuhnûngahte chuan hun khirh takte a lo awm ang,” tiin min vaukhân a. Hun ‘khirh tak’ nihtîrtu thilte târ langin, heti hian  a sawi zawm a ni: “Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu âwih lo te, lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si; Pathian ngaihsak anna an nei ang a, nimahsela a thiltihtheihna chu an âwih lo vang; chûng ang chu hawisan rawh,” tiin.—2 Timothea 3:1-5.

A chunga hrilh lâwk thu târ lanah khian “ni hnuhnûngahte” tih ṭawngkam hi i hmu ngei ang a. Chu chuan i tân eng awmzia nge a neih? ‘Ni hnuhnûngte’ tih chuan thil engemaw tâwpna tûr a hril tih mi tam tak chuan an hre thiam ngei ang. A tâwp tûr chu eng nge ni? Bible-a chuang Pathian thutiam hi lo chhinchhiah ang che.

Mi suaksualte chu tihboral vek an ni ang.

“Rei lo tê achinah mi suaksual chu a awm tawh dâwn si lo: a ni, a awmna hmun chu en en mah la, a awm tawh lo vang. Thuhnuairawlhte erawh chuan ram hi an luah ang a: remna chênin an hmuingîl ang.”—SAM 37:10, 11.

“LALPA chuan amah hmangaihtute zawng zawng chu a vawng ṭha ṭhîn a; mi suaksual erawh chu a tiboral vek ang.”—SAM 145:20.

Inawpbehna a awm tawh lo vang.

“Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang a. An nunna chu hnehchhiahna leh nunrâwnna lak ata a tlan ang.”—SAM 72:12, 14.

“Thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a.”—ROM 8:21.

Mite tisa lam mamawh phuhrûk a ni tawh ang.

“Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tuman an tihlau lo vang.”—MIKA 4:4.

“Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang. Mi dang awmna tûrin in an sa tawh lo vang a, mi dang eiah grêp huan an siam tawh lo vang: thing dam chhûng nîte ang hian ka mite dam chhûng nîte chu a awm dâwn si a, ka mi thlante chu rei tak an thawh chhuah chungah chuan an lâwm dâwn a ni.”—ISAIA 65:21, 22.

Rorêlna fel a ding chang tawh ang.

“A mi thlan, achhûn azâna amah kotute phuba chu Pathianin a lâksak lo vang em ni? Ka hrilh a che u, an phuba a lâksak thuai ang.”—LUKA 18:7, 8.

“LALPA chuan rorêlna fel a ngaina si a, a mi thianghlimte chu a kalsan ngai lo; kumkhua atân vawn ṭhatin an awm.”—SAM 37:28.

Mahni hmasialna chu felnain a thlâk thleng tawh ang.

‘Khawvêla awmte chuan felna chu an zir tawh ang.’—ISAIA 26:9.

“A thutiam ang chuan vân tharte leh lei thar, a chhûnga felna awmte chu kan beisei a ni.”—2 PETERA 3:13.

Mite An Inthlâk Danglam Reng—Tûnah Ngei Pawh

Bible thutiam kan hmuh tâkte khân min tihlim ṭheuh ngei ang a. Mahse, chûng thutiamte chu a lo thleng famkim ngei dâwn tih engtin nge kan chian theih? A nihna takah chuan, Pathian thutiamte a lo thleng famkim ngei dâwn tih finfiahna chu tûnah ngei pawh  hian kan nei reng a ni. Chu chu eng nge ni? Tûn laia mi maktaduai tam tak chuan mahni hmasialna te, nungchang bawlhhlawhna te, a nih loh leh tharum thawhna te ang chi an mize ṭha lote chu bânsanin, rinawm dân te, mi dangte nêna inrem dân te, leh ngilneihna lantîr dân te an zir tawh zâwk hi a ni. Tûn laia Jehova Thuhretu mi maktaduai sarih chuangte chuan mihring chanchina inhuatna te, tharum thawhna te, leh thisen chhuahna nasa takte thlentîrtu chi leh hnam inthliarna te, ram leh hnam hmangaihna te, politics leh sum leh pai lama inthlîar hranna te chu dah bovin, khawvêl pumah inunauna duhawm tak an nei a. * Chutiang inthlâk thlengna thleng mêkte chuan Pathian thutiamte chu ropui lehzualin a la thleng famkim dâwn tih min rin nghehtîr thei a ni.

A nih leh, engin nge chutiang inthlâk thlengna chu awmtîr? A chhânna chu Bible thutiam dang zâwlnei Isaia ziakah kan hmu a. Hetiang hian a ziak a ni:

“Chinghnia chu berâm no nên an awm dûn tawh ang a, keitê chu kêl no nên an bawk dûn tawh ang; bâwng no leh sakeibaknei vânglai leh ran châwmthaute chu an awmho tawh ang a; naupang têin a hruai duah duah ang. . . . Tin, sakeibaknei chuan bâwngpa angin buhpâwl a ei tawh ang. Tin, nau hnute hne lai chu rûlrial kaw kotlângah a tualchai ang a, nau hnute hnêk bâng tawh chuan rûkmuk tawmkûk kotlângah a kut a nghat ang. Ka tlâng thianghlimah rêng rêng chuan intihnat a awm tawh lo vang a, intihchhiat a awm tawh hek lo vang: tuite hian tuifinriat a khuh reng angin, leilung hi LALPA hriatnain a khat zo vek dâwn a ni,” tiin.—Isaia 11:6-9.

He hrilh lâwkna hi ramsate leh mihringte inrem taka an awmho hun tûr sawi lâwkna mai a ni em? Ni lo ve, chu mai aia tam sawina a ni. A châng tâwpna chuan chutiang  inthlâk thlengna awmtîrtu chu a târ lang a ni: “Leilung hi LALPA hriatnain a khat zo vek dâwn” tiin. Pathian hriatna chuan ramsate nunphung a thlâk danglam em? Thlâk danglam lo ve. Mahse, mihringte nungchang chu a thlâk danglam theiin, a thlâk danglam ngei bawk a ni. He hrilh lâwkna hian ramsa kawlh ang rilru put hmang neite pawhin Bible zirtîrna an nunpui avânga Krista neih ang mizia an neih tûr thu a sawi lâwk a ni.

Entîr nân, Pedro-a chungchâng hi han ngaihtuah ta ila. * Firfiaka che pâwl a zawm lai chuan rorêl dikna awmtîr tûra thawk niin a inhre tlat a. Zirtîrna a dawn hnu chuan police-ho awm khâwmna hmun pakhat bomb chhe vek tûra tirh a ni a. A tum vêl lai mêk chuan man a ni ta hlauh mai a ni. Tichuan, thla 18 chhûng lung inah a tâng a, chutah pawh chuan a thil sual tih chu a la chhunzawm zêl tho va. Chutih lai chuan, a nupui chuan Jehova Thuhretute nên Bible an zir ṭan a. Lung in aṭanga a lo chhuah chuan Pedro-a pawh chuan Bible a zir ve a, Pathian Jehova chungchâng a zirte chuan a rilru put hmang leh nun a thlîr dânte chu nasa taka thlâk danglam tûrin a chêttîr ta a ni. Pedro-a chuan: “Kum sâwm chhûng firfiaka ka chêt chhûnga mi tumah ka thah loh avângin Pathian Jehova hnênah lâwmthu ka sawi a. Tûnah chuan, thlarau lam ngûnhnâm, Bible chu mite hnêna remna leh rorêlna dik—Pathian  Ram chanchin ṭha—hrilh nân ka hmang tawh a ni,” tiin a sawi. Pedro-a chuan remna leh tharum thawhna awm tawh lohna khawvêl chungchâng a hrilh theih nân, a hmaa bomb chhiat vek a lo tum tawh police-ho awm khâwmna hmun chu a va tlawh leh hial a ni.

Mite chunga Pathian Thu-in thil a tihtheihna chuan thil sual tihna zawng zawng a tâwp ngei dâwn tih Pathian thutiam chu min rinnghehtîr lehzual a ni. Ni e, mite chuan thil sual ti kumkhua lovin, an insiam ṭha zâwk ang. Nakin lawkah, Pathian Jehova chuan hmuh theih lohva he khawvêl thununtu, Bible-in: “Khawvêl pumhlûm hi mi sual thu thuin a awm,” tia a sawi thil sual tih zawng zawngte lo chhuahna bul, Diabol-Setana chu a tiboral ang. (1 Johana 5:19) Tin, an kawng suak sual tak kalsan duh tlat lo tute pawh chu tihboral an ni bawk ang. Chu mi huna nun chu a va ropuiin, a va nuam dâwn êm!

Chutiang huna nung ve ngei thei tûr chuan eng nge kan tih ngai? Tûn laia mite nun thlâk thlengtu leh kan hma lawka khawvêl pum thlâk thlengtu tûr chu ‘LALPA hriatna’ a ni tih hre chhuak leh ang che. Padro-a anga Bible hriatna neih leh nunpuina hmangin, nang pawhin ‘a chhûnga felna awm’ he khawvêla chên chu i beisei ve thei a ni. (2 Petera 3:13) Chuvângin, hun a la awm lai hian Pathian leh Isua Krista hriatna neih tum tûrin kan fuih che a ni—chatuana i nun theihna tûr a ni si a.—Johana 17:3. (w10-E 09/01)

[Footnote-te]

[Phêk 9-naa thu lâk chhuah]

Nang pawhin ‘a chhûnga felna awm’ he khawvêla chên chu i beisei ve thei a ni.—2 PETERA 3:13