Unaute Chawimawina Kawngah Hma I Hruai Em?
Unaute Chawimawina Kawngah Hma I Hruai Em?
“Unaute hmangaihna kawngah chuan hmangaih takin inlainat tawn ṭheuh rawh u. Inchawimawi tawnna kawngah chuan hma hruai rawh u.” —ROM 12:10, NW.
1, 2. (a) Rom khuaa Kristiante hnêna a lehkha thawnah, tirhkoh Paula chuan eng fuihna nge a pêk? (b) Eng zawhnate nge kan ngaihtuah dâwn?
ROM khuaa Kristiante hnêna a lehkha thawnah, tirhkoh Paula chuan kohhran chhûnga hmangaihna lantîr a pawimawhzia a sawi uar hle a. Ani chuan kan hmangaihna chu ‘vervêkna tel lo’ a ni tûr a ni tih min hriattîr a ni. Tin, “unaute hmangaihna” chungchâng pawh a sawi a, chutiang hmangaihna chu ‘hmangaih taka inlainatna’ nêna lantîr tûr a nihzia a târ lang bawk a ni.—Rom 12:9, 10a, NW.
2 Unaute hmangaihnaah chuan mi dangte lainatna aia tam a tel ngei mai a. Chutiang lainatna chu thiltiha kan lantîr a ngai a ni. Chutianga kan lantîr loh chuan tumahin kan hmangaihna leh lainatna chu an hre dâwn si lo. Chuvângin, Paula chuan he fuihna hi a telh a ni: “Inchawimawi tawnna kawngah chuan hma hruai rawh u,” tiin. (Rom 12:10b, NW) Inchawimawinaah chuan eng nge tel? Engvângin nge unaute chawimawina kawnga hma hruai chu thil pawimawh tak a nih? Engtin nge chu mi kawngah chuan hma kan hruai theih ang?
Zahna leh Chawimawina
3. Atîra Bible ziak nâna hman ṭawngah chuan ‘chawimawi’ tih thu mal hian eng awmzia nge a neih?
3 ‘Chawimawi’ tia lehlin deuh ber Hebrai ṭawng awmze bul ber chu “rihna” a ni a. Mi tuemaw chawimawia awm chu mi rit tak, a nih loh leh mi pawimawh tak engemaw anga ngaih a ni ṭhîn. Chu mi Hebrai thu mal bawk chu Bible-ah chuan “ropuina” tia lehlin a ni fo bawk a, chu chuan chawimawia awma chunga lantîr ngaihsânna chu a kâwk a ni. (Gen. 45:13) Bible-a ‘chawimawi’ tia lehlin Grik thu mal chuan ngaihhlutna, ngaihsânna, hlutna a kâwk bawk. (Lk. 14:10) Ni e, kan mi chawimawite chu kan ngaihah an hluin, an ngaihsânawm a ni.
4, 5. Engtin nge mi dangte chawimawina leh zahna chu a inkûngkaih? Hrilhfiah rawh.
4 Mi dangte chawimawinaah chuan eng nge tel? Anmahni zahnain a inṭan a. ‘Chawimawi’ tih leh “zah” tih ṭawngkam chu a inhnaih êm avângin hman kawp a ni fo ṭhîn. Chawimawi tih chu kan zahna hmuh theiha lan chhuahtîrna a ni a. Thu danga sawi chuan, zah tih chuan mi dangte kan thlîr dân a kawh deuh ber laiin, chawimawina chuan unaute kan cheibâwl dân a kâwk a ni.
5 Kristianin a unaute zahna dik tak a neih loh chuan engtin nge an chungah chawimawina dik tak a lantîr theih ang? (3 Joh. 9, 10) Thlai chu lei ṭhaa zung a kaih chauhvin a duah thei a, rei tak a nun theih ang bawkin, mi dangte chawimawina pawh chuan rilru tak zeta zahnaa zung a kaih chauhvin, a tak ang a, a daih rei bawk ang. Chawimawina der chu zahna dik aṭanga lo awm a nih loh avângin, a hnuah a chuai leh tho ṭhîn. Chuvângin, Paula’n mi dangte chawimawi tûra fuihna a pêk hmain: “Hmangaihna chu vervêkna tel lovin ni rawh se,” tia kaihhruaina chiang tak a pe pawh hi a mak lo ve.—Rom 12:9; 1 Petera 1:22 chhiar rawh.
“Pathian Anga” Siamte Chu Chawimawi Rawh
6, 7. Engvângin nge mi dangte zahna kan neih a ngaih?
6 Mi dangte chunga chawimawina lantîr tûr chuan rilru tak zeta zahna neih a ngaih avângin, Pathian Lehkha Thu-in kan unaute zahna tûr chhan min pêkte chu kan theihnghilh ngai tûr a ni lo. Chuvângin, chûng a chhan pahnihte chu i lo ngaihtuah ang u.
7 Leia thil siam dangte ang lo takin, mihringte hi “Pathian anga” siam an ni a. (Jak. 3:9) Chuvângin, Pathian mizia hmangaihna te, finna te, leh rorêl dikna te ang chu kan nei a ni. Siamtu hnên aṭanga kan thil dawn dangte lo chhinchhiah ang che. Fakna hla phuahtu chuan: “Aw LALPA, . . . i ropuina chu vân chungahte khian i dah a. . . . [Mihring] chu Pathian aia hnuai deuh chauhvin i siam a, ropuina leh chawimawina i khumtîr si a,” tiin a sawi. (Sâm 8:1, 4, 5; 104:1) * Pathian chuan mihringte chu a tlângpui thuin zahawmna te, ropuina te, leh chawimawina te a khumtîr, a nih loh leh chûng chuan a thuam mawi a ni. Chuvângin, mi dangte zahawm taka kan cheibâwl hian, mihringte hnêna zahawmna Petu, Pathian Jehova kan pawmzia kan lantîr tihna a ni. Chutianga mi nâwlpuite chungah mah zahna lantîr tûrin chhan ṭha kan neih chuan, kan unaute chungah phei chuan zahna kan lantîr lehzual tûr a va ni êm!—Joh. 3:16; Gal. 6:10.
Chhûngkaw Khat Kan Ni
8, 9. Paula chuan unaute kan zah nachhan tûr eng nge a sawi?
8 Kan inzah tawh nachhan tûr dang pakhat chu Paula chuan a sawi a. Inchawimawi tûra min fuih hma chiahin heti hian a sawi a ni: “Unaute hmangaihna kawngah chuan hmangaih takin inlainat tawn ṭheuh rawh u,” tiin. ‘Hmangaih taka inlainat’ tih sawina Grik thu mal chuan chhûngkaw inhmangaih leh ṭangrual tak inpumkhattîrtu phuarna nghet chu a kâwk a. Chu ṭawngkam chu hmangin, Paula chuan kohhran chhûnga awm inlaichînna chu chhûngkaw inhmangaih leh ṭangrual taka awm inpumkhatna ang a ni tûr a ni tih a sawi uar a ni. (Rom 12:5) Chu bâkah, Paula chuan chûng thute chu Pa thuhmun, Jehova’n fa anga a pawm ṭheuh hriak thih Kristiante hnêna a ziak a ni tih hre reng ang che. Chuvângin, kawng pawimawh takin anni chu chhûngkaw inhnaih tak an ni rêng a ni. Chutiang chuan, Paula hun laia hriak thih Kristiante chuan inzah tawnna tûr chhan ṭha an nei tak zet a ni. Tûn laia hriak thihte pawhin chutianga inzah tawnna tûr chhan an nei ve bawk.
9 A nih leh, “berâm dang” chungchâng hi eng nge ni ve le? (Joh. 10:16) Pathian fate anga pawm la ni hrih lo mah se, khawvêl pum huap Kristian chhûngkaw zînga mi an nih avângin unaupa leh unaunu tiin an inko thei a ni. (1 Pet. 2:17; 5:9) Chuvângin, chûng berâm dang zînga mite chuan “unaupa” emaw, “unaunu” emaw tih ṭawngkam an hman huna a awmze dik tak an hriat thiam chuan, anni pawhin an unaute rilru tih tak zeta zah nachhan tûr an nei ngei ang.—1 Petera 3:8 chhiar rawh.
Engvângin Nge A Pawimawh?
10, 11. Engvângin nge zahna neih leh chawimawina lantîr chu thil pawimawh tak a nih?
10 Engvângin nge zahna leh chawimawina lantîr chu thil pawimawh tak a nih? Hei vâng hi a ni: Kan unaute kan chawimawi hian kohhran pum pui ṭhatna tûr leh inpumkhatna tûrin thil ropui tak kan ti tihna a ni, tih hi.
11 Pathian Jehova nêna inlaichînna ṭha tak neih leh a thlarau ṭanpuina dawn chu Kristian dikte anga kan chakna hnâr thiltithei ber a ni tih kan hria a. (Sâm 36:7; Joh. 14:26) Chutih rual chuan, kan unaute’n min ngaihlu a ni tih kan hriat hian kan chak phah ṭhîn a ni. (Thuf. 25:11) Tuemawin min zahna an sawi emaw, thiltiha an lantîr emaw hian chu chuan min tiphûr hle a. Nunna kawnga hlim tak leh tum ruhna nêna kal zêl tûrin min tihchak belhchhah a ni. Chutiang chu nang pawhin i tawng tawh ngei ang.
12. Engtin nge kohhranah hmangaihna boruak duhawm tak kan awmtîr ṭheuh theih?
12 Pathian Jehova’n zahna dawn mamawha piang kan ni tih a hriat avângin, a Thu chuan “zahna inlantîr tawn chu châk hle” tûrin min fuih a. (Rom 12:10, Today’s English Version; Matthaia 7:12 chhiar rawh.) Engtik lai pawha hman tlâk chu fuihna nunpuitu Kristian zawng zawngte chuan Kristian inunaunaah hmangaihna boruak duhawm tak an awmtîr a ni. Chuvângin, heti hian kan inzâwt tûr a ni, ‘Kohhrana unaupa emaw, unaunu emaw hnêna ṭawngkam emaw, thiltih emawa amah ka zah tak zetzia ka lantîrna hnuhnûng ber chu engtik khân nge?’ tiin.—Rom 13:8.
Kan Tih Ṭheuh Tûr Chu
13. (a) Tuin nge inchawimawina kawngah hma hruai ang? (b) Rom 1:7-a Paula thu chuan eng nge a târ lan?
13 Tuin nge mi dangte chawimawina kawngah hma hruai ang? Hebraiho hnêna a lehkha thawnah Paula chuan Kristian upate chu “in hotute,” a nih loh leh in zînga hma hruaitute tiin a ko a ni. (Heb. 13:17) Upate chuan thil tam takah hma an hruai ngei mai a. Chuti chung pawhin, berâm vêngtute an nih angin upa dangte pawh tiamin unaute chawimawina kawngah hma an hruai ngei a ngai a ni. Entîr nân, thlarau lama kohhran mamawhte ngaihtuaha upaho an inhmuh khâwm hian, upa dang tupawh thusawi chu ngun taka ngaihthlâksakin an inchawimawi tawn a ni. Chu bâkah, thu tlûkna an siam hunah upa zawng zawngte ngaih dân leh thusawite chhût telin, chawimawina an lantîr bawk. (Tirh. 15:6-15) Mahse, Rom-ho hnêna Paula lehkha thawn chu upate tân chauh ni lovin, kohhran chhûnga mi zawng zawngte tâna ziak a ni tih kan hre reng tûr a ni. (Rom 1:7) Chuvângin, mi dangte chawimawina kawnga hma hruai tûra fuihna chu kan zâ atân pawh a ni tel a ni.
14. (a) Mi dangte chawimawina leh inchawimawina kawnga hma hruai a danglamna sawi rawh. (b) Eng zawhna nge kan inzawh theih?
14 Paula chuan Rom khuaa awm unaute chu inchawimawi tawn tûrin a ti mai lo va, inchawimawina kawnga hma hruai tûrin a ti bawk a ni tih hi chhinchhiah bawk ang che. Chu chu eng nge a danglamna? He entîrna hi han ngaihtuah teh. Zirtîrtu chuan ziak leh chhiar thiamsa zirlaite chu lehkha chhiar dân zir tûrin a fuih dâwn em ni? Fuih lo vang. An thiam tawhsa si a. Chu ai chuan chhiar thiam lehzual tûrin a ṭanpui zâwk ngei ang. Chutiang bawkin, mi dangte chawimawi tûra min chêttîrtu Kristian dikte chhinchhiahna ni bawk hmangaihna chu kan nei sa reng a. (Joh. 13:35) Amaherawhchu, ziak leh chhiar thiamsa zirlaite’n chhiar thiam lehzual tuma hma an sâwn thei ang bawkin, keini pawhin mi dangte chawimawina kawnga hma hruaiin hma kan sâwn thei a ni. (1 Thes. 4:9, 10) Chu tih tûr chu pêk kan ni ṭheuh va. Heti hian kan inzâwt thei a ni, ‘Kohhrana mi dangte chawimawi tûra hma lain, chutiang chuan ka ti em?’ tiin.
“Mi Rethei” Chawimawi Rawh
15, 16. (a) Chawimawina kan lantîr hunah tute nge kan hmaih loh vang a, engvângin nge? (b) Engin nge kan unau zawng zawngte kan zah tak zet tih târ lang thei?
15 Chawimawina kan lantîrin, kohhrana tute nge kan hmaih loh vang? Pathian Thu chuan heti hian a sawi a ni: “Mi rethei khawngaih chuan LALPA a pûktîr a ni a, a thiltih ṭhat chu a rûl ang,” tiin. (Thuf. 19:17) Engtin nge hêng thua lang thu bul chuan inchawimawina kawnga hma hruai kan tumnaah min kaihhruai ang?
16 Mi tam zâwk chuan an aia sâng zâwkte chunga chawimawina an lantîr theih laiin, an aia hniam zâwk nia an ngaihte chu zahna nei mang lo emaw, zah lo takin emaw an cheibâwl mai thei tih i pawm ngei ang. Amaherawhchu, Pathian Jehova chu chutiang a ni ve lo. Ani chuan: “Mi chawimawi apiangte chu ka chawimawi ang,” tiin a sawi a ni. (1 Sam. 2:30; Sâm 113:5-7) Pathian Jehova chuan a rawngbâwl a, amah chawimawitu apiang chu a chawimawi ṭhîn. “Rethei” chu a ngaihthah ngai lo. (1 Samuela 2:8 chhiar rawh; 2 Chro. 16:9) Pathian Jehova entawn chu kan duh a ni. Chuvângin, mi dangte hnêna chawimawina dik kan lantîr dân hriat kan duh chuan, heti hian kan inzâwt tûr a ni, ‘Kohhrana mi challang lo, a nih loh leh mawhphurhna nei lo, dinhmun sâng nei lote chu engtin nge ka cheibâwl?’ tiin. (Joh. 13:14, 15) Chu zawhna chhânna chuan mi dangte kan zah tak zet dân a târ lang ang.—Philippi 2:3, 4 chhiar rawh.
Hun Pein Chawimawina Kan Lantîr
17. Inchawimawina kawnga hma kan hruai theih dân bul ber chu eng nge ni a, engvângin nge chutiang chu a nih?
17 Kohhran chhûnga mi zawng zawngte kan chawimawi theih dân bul ber chu eng nge ni? Mi dangte tâna kan hun neihte pêk hi a ni. Engvângin nge chu chu inchawimawina a nih? Kristian kan nih avângin, kohhran thiltih pawimawh hrang hrangte tih nân hun tam tak kan hmang a, kan buai hle ṭhîn. Chuvângin, kan hun neihte kan hlut hle pawh hi a mak hran lo. Tin, kan unaute chu an hun tam tak min pe tûrin kan phût tûr a ni lo tih pawh kan hre bawk. Chutiang bawkin, kohhran chhûnga mite pawhin hun tam tak min phût tûr a ni lo tih an hriat hian kan lâwm a ni.
18. Phêk 18-na milemin a târ lan angin, engtin nge unaute tâna hun ṭhenkhat pêk kan inhuamzia kan lantîr theih?
18 Chutiang chu ni mah se, kan thiltih lai chawlhsan lawka unaute tâna hun kan pêk hian, anmahni kan zahzia kan lantîr a ni tih (a bîk takin kohhrana berâm vêngtute hian) kan hre ve bawk a ni. Eng kawngin nge hun pêk hi zahna lantîrna a nih? Unaute biak nâna kan thiltih lai kan bânsan hian, an hnêna, ‘Ka mithmuhah i hlu êm êm a, ka thiltih lai tih zawm aiin nang nêna hun hman dun hi ka ngai pawimawh zâwk,’ ti ang mai kan ni. (Mk. 6:30-34) Mahse, a lehlam pawh hi a dik ve thei a. Unau tuemaw biak nâna kan thiltih lai bânsan kan hreh chuan, amah kan ngaihlu vak lo nia inhriatna kan pe thei a ni. Mahse, tihbuai theih loh thil hmanhmawhthlâk tak tih a ngaih châng pawh a awm ve ngei ang. Chuti chung pawhin, mi dangte tâna hun ṭhenkhat pêk kan inhuamna—a nih loh leh kan hrehna—chuan kan unaute thinlung taka kan zah leh zah loh a târ lang a ni.—1 Kor. 10:24.
Hma Hruai Tum Tlat Rawh
19. Hun kan pêk bâkah, eng kawng dangin nge unaute chu kan chawimawi theih?
19 Unaute kan chawimawi theih dân kawng pawimawh tak dang pawh a la awm a. Entîr nân, hun kan han pêk hian ngaihsakna pawh kan pe tel tûr a ni. He mi chungchângah pawh Pathian Jehova chuan entawn tûr a siam a. Fakna hla phuahtu Davida chuan: “LALPA mit chuan mi felte lam a en ṭhîn a, a beng chuan an au hre tûrin a ngaithla reng ṭhîn,” a ti a. (Sâm 34:15) Kan unaute, a bîk takin ṭanpuina min dîltute hnênah kan mit leh beng—kan ngaihsakna zawng zawng—pein Pathian Jehova entawn chu kan tum hrâm a. Chutianga tiin, anmahni kan chawimawi a ni.
20. Inchawimawina kawnga hriattîrna eng nge rilrua vawn reng kan duh?
20 Kan hmuh tawh angin, unaute tih tak zeta kan zah chhan tûr chu rilrua vawn reng kan duh a. Chu bâkah, mi retheite pawh tiamin mi zawng zawngte chawimawina kawnga hma hruai theihna hun remchâng chu kan zawng reng a ni. Chutianga kan tih chuan, kohhrana unaute hmangaihna leh inpumkhatna chu kan awmtîr sauh a ni ang. Chuvângin, mi dangte chawimawi mai ni lovin, inchawimawi tawnna kawngah hma i hruai chho zêl ang u. Chutianga tih chu i tum tlat em? (w10-E 10/15)
[Footnote]
^ par. 7 Sâm 8-naa Davida ṭawngkamte hi hrilh lâwkna a ni bawk a, mi ṭha famkim Isua Krista chungchâng sawina a ni.—Heb. 2:6-9.
Kan Hre Chhuak Em?
• Engtin nge chawimawina leh zahna a inkûngkaih?
• Unaute chawimawi chhan tûr eng nge kan neih?
• Engvângin nge inchawimawi tawn chu thil pawimawh tak a nih?
• Eng kawngtein nge unaute chu kan chawimawi theih?
[Zirlai Atâna Zawhnate]
[Phêk 22-naa milem]
Unaute chu engtin nge kan chawimawi theih?