Ṭhalaite U—Engtin Nge In Nun In Hman Dâwn?
Ṭhalaite U—Engtin Nge In Nun In Hman Dâwn?
“Boruak mai hnektute angin ka bei lo.”—1 KOR. 9:26, Baptist Mid-Missions’ Translation.
1, 2. Hlawhtling taka puitling ni chho tûr chuan eng nge i neih ngai?
INTIHHLIM nâna kea zin mi pakhat chuan a hriat ṭhan loh hmuna a zin nân map leh khaw hawi lam hriat theihna compass chu a keng duh ngei ang. Chu map chuan tûna a awmna lai leh kawng dik zawng hmu tûrin a ṭanpui ang a. Compass chuan chu kawng dik zawh tûrin a ṭanpui ang. Amaherawhchu, a pan lam tûr a hriat loh chuan chu map leh compass chuan ṭangkaina a nei tlêm ngawt ang. Tum nei lêm lova a vah kual mai mai loh nân, a pan lam tûr chu a hriat chian hle a ngai ang.
2 Puitling i han nih chhoh hian chutiang dinhmun bawk chu i tawng a ni. Map leh compass rin tlâk chu i nei a. Bible hi i kawng zawh tûr hre tûra ṭanpui theitu map ang a ni. (Thuf. 3:5, 6) Ṭha taka zirtîr a nih chuan i chhia leh ṭha hriatna chu kawng dik zawh reng tûra nasa taka ṭanpuitu che a ni thei. (Rom 2:13-16) Chu chuan i tân compass angin hna a thawk thei a ni. Mahse nun hlawhtling tak nei tûr chuan i pan lam tûr i hriat a ngai a. I thiltum i hriat chian hle a ngai a ni.
3. Paula chuan 1 Korinth 9:26-ah thiltum neih a sâwtna eng nge a sawi?
3 Tirhkoh Paula chuan: “Tum mumal nei lova tlân ka ni lo va, boruak mai hnektute angin ka bei lo,” tia a ziah khân, thiltum neih leh chu mi thleng thei tûra ṭan lâk a sâwtna chu a khaikhâwm a ni. (1 Kor. 9:26) Thiltum i neih hian tum mumal neiin i tlân thei a ni. Nakin lawkah chuan thu tlûkna pawimawh tak tak—entîr nân, Pathian biakna te, hnathawh te, nupui pasal neih te, leh chhûngkaw din te chungchângah—i siam a la ngai dâwn a. A châng chuan, duhthlân tûr i nei deuh thluah niin i inhre thei ang. Mahse, a hun hmaa kawng dik i zawn hmuh a, Pathian Thua kan hmuh thutak leh thu bulte mila thu tlûkna i siam chuan, kawng dik lo zawh tûra thlêmin i awm lo vang.—2 Tim. 4:4, 5.
4, 5. (a) Mahni tâna thiltum i insiam loh chuan eng nge thleng thei? (b) Engvângin nge nun hman dân tûr i thlanna chu Pathian tihlâwm duhnain a kaihhruai ang?
4 Mahni tâna thiltum i insiam loh chuan, i ṭhiante leh zirtîrtute chuan i tâna ṭha tûra an ngaihte ti tûrin an thunun mai ang che. Thiltum chiang tak i nei chung pawhin, ṭhenkhat chuan an ngaih dân an la hrilh tho mai thei che bawk. An rawtna pêkte i ngaihthlâk hian, ‘Thiltum an sawite chuan ka vânglaia min Siamtu hre tûrin min ṭanpui dâwn nge ni a, min tibuai zâwk dâwn?’ tiin inzâwt ṭhîn ang che.—Thuhriltu 12:1 chhiar rawh.
5 Engvângin nge i nun i hman dân tûr i thlanna chu Pathian tihlâwm duhnain a kaihhruai ang? A chhan pakhat chu, thil ṭha kan neih zawng zawngte min petu a nih vâng a ni a. (Jak. 1:17) Mi tin hian Pathian Jehova hnênah lâwmna lantîr an ba tak meuh meuh a ni. (Thup. 4:10, 11) Thiltum i insiam hunah rilrua Pathian Jehova dah reng aia i lâwmna lantîr dân tûr ṭha zâwk a awm thei dâwn em ni? Thiltum ûm phû takte leh chu mi thleng thei tûra i tih ngaite chu i lo ngaihtuah ang u.
Eng Thiltumte Nge I Insiam Theih?
6. Eng thiltum pawimawh bul nge i insiam theih a, engvângin nge?
6 Thuziak hmasaa kan sawi tâk ang khân, thiltum pawimawh bul i insiam theih chu Bible-a lang thute a dik a ni tih mahnia fiah hi a ni. (Rom 12:2; 2 Kor. 13:5) I ṭhiante chuan mi dangin ring tûra an hrilh avângin chanchhâwnna emaw, sakhaw dik lo thurin chi hrang hrangte emaw chu an ring mai thei. Amaherawhchu, mi dangin ring tûra an duh che avâng maiin, i ring mai tûr a ni lo. Pathian Jehova chuan i rilru zawng zawnga a rawng bâwl tûrin a duh che tih hre chhuak ang che. (Matthaia 22:35-37 chhiar rawh.) Kan Pa vâna mi chuan finfiahna ṭanchhana rinna nei tûrin min duh a ni.—Heb. 11:1.
7, 8. (a) Rei lo te chhûnga tihhlawhtlin tûr thiltum tênau eng ang chi insiamnain nge i rinna tichak tûra ṭanpui thei ang che? (b) I thiltum tênau ṭhenkhat i thlen theih hunah eng nge i tawn ang?
7 I rinna tichak tûrin, engvângin nge rei lo te chhûnga tihhlawhtlin tûr thiltum tênau i insiam loh vang? I insiam theih tûr thiltum pakhat chu nî tina ṭawngṭai hi a ni thei ang. I ṭawngṭainaah dîl bîk nei tûr leh thu ngai sawi nawn ṭhîn lo tûrin ni khat chhûnga thilthleng i chham tel duhte chu i rilruah emaw, lehkha phêkah emaw i ziak chhuak thei ang. Harsatna i tawhte mai bâkah, thil tihnuam i tihte pawh chham tel rawh. (Phil. 4:6) Thiltum dang pakhat i insiam theih tûr chu nî tina Bible chhiar hi a ni. Ni khata phêk li vêl i chhiar ziah chuan kum khat chhûngin Bible bu pum i chhiar chhuak thei tih i hria em? * Sâm 1:1, 2 chuan: ‘LALPA dâna lâwm mi chu a eng a thâwl e, a dân thu achhûn azâna ngaihtuahtu chu,’ tiin a sawi.
8 Rei lo te chhûnga tihhlawhtlin tûr thiltum tênau i insiam theihte zînga a pathumna chu kohhran inkhâwmna apianga a chhânna pakhat tal pêk hi a ni. Atîrah chuan a chhânna emaw, Bible châng emaw chhiar chhuah mai chu i duh mai thei. A hnuah chuan, mahni ir-âwm chhuaka chhân chu i tum leh thei ang. A nihna takah chuan, chhânna i pêk apiangin Pathian Jehova hnênah thilpêk i hlân tihna a ni. (Heb. 13:15) Hêng thiltumte zînga ṭhenkhat i hlen hnu chuan mahni i inring tâwk sauh vang a; Pathian Jehova i ngaihhlutna a pun rualin, tihhlawhtlin nâna hun duh rei zâwk thiltum lian thamte insiam tûrin i inpeih ang.
9. Lalram thuchhuahtu i la nih loh chuan, hun duh rei zâwk thiltum lian tham eng nge i insiam theih?
9 Tihhlawhtlin nâna hun duh rei zâwk thiltum lian tham eng ang chite nge i insiam theih? Vântlâng hmaa chanchin ṭha la puang ṭan lo i nih chuan Lalram thuchhuahtu nih chu thiltum lian thamah i siam thei a ni. Chu thiltum fakawm tak i thlen tawh chuan, thiam tak leh pelh hauh lova tih leh thla khat tê pawh rawngbâwl hmaih chu i duh lo vang. Rawngbâwlnaa Bible hman dân pawh i zir duh ngei bawk ang. Chutianga i tih chuan, thu hrilh chu nuam i ti lehzual ang. Tichuan, in tin kal nâna i hun hman zât chu i tipung emaw, Bible zirna kaihhruai emaw i tum thei ang. Baptisma chang lo thuchhuahtu i nih angin, baptisma changa Pathian Jehova hnêna inpumpêk Thuhretu nih aia thiltum ṭha eng nge awm thei tawh chuang ang?
10, 11. Baptisma chang tawh ṭhalaite chuan hun duh rei zâwk eng thiltumte nge an insiam theih?
10 Baptisma chang tawh Pathian Jehova chhiahhlawh i nih chuan, hun duh rei zâwk thiltum lian tham i insiam theihte chu hêngte hi a ni. A châng chângin thawh ngai vak lohna hmuna rawngbâwl tûra kohhran ruahmanna siam chu i ṭanpui duh thei ang a. Tin, i hrisêlna leh i chakna chu auxiliary emaw, regular emaw anga pioneer thawh nâna hman i thlang thei bawk. Hlim taka pioneer thawk mi sâng tam takte chuan vânglaia Siamtu hriat reng theih dân ṭha ber a ni tih an hrilh thei ang che. Hêngte hi ina i awm laia i tihhlawhtlin theih thiltum a ni. I thiltum i tihhlawhtlinna chu i lawina kohhran pawhin a hlâwkpui bawk ang.
11 Hun duh rei zâwk thiltum lian tham dangte tihhlawhtlinna chu i lawina kohhran bâk kohhran dangte pawhin a hlâwkpui thei a. Entîr nân, mamawh zualna bial emaw, ram emawa rawngbâwl chu i tum thei a ni. Ram danga Kingdom Hall sakna emaw, branch in tûr sakna emawa ṭanpui chu i duh thei bawk ang. A nih loh leh, Bethel emaw, missionary ang emawin rawng i bâwl thei hial bawk ang. Mahse, hêng kan târ lan tâk hun duh rei zâwk thiltum zawng zawng deuhthaw thlen nâna thiltum thlen hmasak ber tûr chu baptisma chan hi a ni. Baptisma i la chang lo a nih chuan, i nuna he thil pawimawh tak thlen theih dân tûr chu ngaihtuah ang che.
I Baptisma Chan Tum Chu Hlenin
12. Mi ṭhenkhatin baptisma an chan chhan chu engte nge ni a, engvângin nge chûng chu chhan ṭha tâwk a nih loh?
12 Baptisma chan chhan chu engtin nge i hrilhfiah ang? Ṭhenkhat chuan suala tlûk loh nâna invênhimna niin an ngai mai thei a. Mi dangte chuan an ṭhiante’n an chan avâng maiin chan ve an duh thei bawk. Ṭhalai dang lehte lahin an nu leh pate tihlâwm an duh vângin an chang a ni thei bawk a ni. Mahse, baptisma chu a rûka i thil tih duhte lak aṭanga dangtu che intiamkamna a ni lo va; mi dangte nawrna avânga chan mai tûr lah a ni hek lo. Jehova Thuhretute zînga mi nihnain a ken tel mawhphurhnate i hriat chian a, chu mawhphurhna lâk i inpeih hun leh i inhuam hun chauhva chan tûr a ni.—Thur. 5:4, 5.
13. Engvângin nge baptisma i chan ang?
13 Baptisma chan chhan tûr pakhat chu “zirtîrah te siam ula, . . . baptis ula” tia Isua’n a hnungzuitute hnêna thu a pêk vâng a ni a. Ani pawhin baptisma changin entawn tûr min hnutchhiah a ni. (Matthaia 28:19, 20; Marka 1:9 chhiar rawh.) Chu bâkah, baptisma chan chu chhandamna duhte tâna rahbi pawimawh tak a ni bawk. Tuilêta a chhûngte chhan chhuahna Nova lawng tuk chungchâng a sawi hnuah, tirhkoh Petera chuan: “Chu mi anpui (baptisma) chuan Isua Krista thawhlehna avângin tûnah a chhandam che u a ni,” tiin a sawi a ni. (1 Pet. 3:20, 21) Mahse, baptisma chan hi chhiatna tawh huna zângnadawmna hmuh theih nâna an neih ṭhin insurance ang a ni lo. Pathian Jehova i hmangaih vâng leh i thinlung, i rilru, leh i chakna zawng zawnga a rawngbâwl i duh avângin i chang zâwk a ni.—Mk. 12:29, 30.
14. Engvângin nge ṭhenkhatin baptisma chan an hreh a; mahse, eng tiamkamna nge i neih?
14 Ṭhenkhat chuan nakina hnawhchhuah nih an hlauh avângin baptisma chan an hreh a. Chutiang hlauhna chu i nei em? I nei a nih chuan, thil sual a ni hran lo. Jehova Thuhretute zînga mi nih hi mawhphurhna lian tak a ni tih i hriatzia a târ lang si a. Mahse, chhan dang pawh a awm thei ang em? Pathian tehnate mila nun chu nun dân ṭha ber a ni tih i la ring tâwk chiah lo a ni thei. Chutiang a nih chuan, Bible tehnate mila nung lote tawh tûr a sawhkhâwk ngaihtuahna chuan i rilru siam fel tûrin a ṭanpui ang che. Kawng lehlamah chuan, Pathian tehnate chu ngaina hle mah la, chûngte mila nung thei tûrah i inngai lo pawh a ni thei. Chu chu thil ṭha tak hriltu a ni thei; inngaihtlâwmna lantîrna a nih avângin. Tihah chuan, mi ṭha famkim lote thinlung chu chhe lailet dêr a ni tih Bible chuan a sawi si a. (Jer. 17:9) Mahse, ‘Pathian thu ang zêla i awm dân i vên ṭhat’ reng chuan i hlawhtling thei a ni. (Sâm 119:9 chhiar rawh.) Baptisma i chan hreh chhan chu eng pawh ni se, chûng thilte chu i chinfel a ngai a ni. *
15, 16. Baptisma chang tûra i inpeih leh peih loh engtin nge i hriat theih?
15 A nih leh, engtin nge baptisma chan i inpeih leh peih loh i inhriat theih ang? I inhriat theih dân kawng khat chu hêng zawhnate inzawh hi a ni: ‘Mi dang hnênah Bible zirtîrna thu bulte chu ka hrilhfiah thei em? Ka nu leh pate an tel loh hunah pawh thlawhhma rawngbâwlnaah ka tel em? Kristian inkhâwm zawng zawnga tel chu ka tum em? Thil engemaw chungchânga ṭhiante nêksâwrna ka lo do dân hriat chhuah theih ka nei em? Ka nu leh pate leh ka ṭhiante’n Pathian Jehova rawngbâwl bânsan ta se, ka la bâwl reng tho vang em? Pathian hnênah amah nêna kan inlaichînna ka ngaih pawimawhzia ka hrilh tawh em? Ṭawngṭaiin Pathian Jehova hnênah tiam chin awm lova inpumpêkna ka nei tawh em?’ tiin.
16 Baptisma chan hi nun thlâk danglamtu hma lâkna pakhat a ni a, holam taka lâk tûr a ni lo. Tih tak zeta baptisma chan ngaihtuah tûrin i puitling tâwk em? Puitlinna tih chu platform aṭanga thiam taka thusawi theih emaw, inkhâwmnaa chhânna ṭha tak pêk theih emaw mai a ni lo. Bible thu bulte ṭanchhana thu tlûkna siam theih hi a ni. (Hebrai 5:14 chhiar rawh.) Baptisma chang thei tawh tûr dinhmuna ding i nih chuan, i hmaah hian chanvo zawng zawnga ropui ber—thinlung zawng zawnga Pathian Jehova rawngbâwlna leh a hnêna i inpumpêk tak zetzia lantîr tûr zâwnga nunna—a awm a ni.
17. Baptisma i chan hnua harsatna i tawhte hmachhawn thei tûrin engin nge ṭanpui ang che?
17 Baptisma i chan hnuah chuan, Pathian rawngbâwl châkna nasa tak i nei ang a. Mahse, i rinna leh i chhelna fiahtu tûr harsatnate i la tâwk dâwn a ni. (2 Tim. 3:12) Hêng harsatnate hi nangmah chauhva hmachhawn tûrah inngai suh. I nu leh pate hnênah thurâwn la rawh. Kohhrana mi puitlingte ṭanpuina zawng bawk rawh. Nangmah ṭanpui theitu tûr ṭhiante nei ang che. Pathian Jehova’n a ngaihsak che a, i tawh theih dinhmun engpawh hmachhawn thei tûra i mamawh chakna a pe dâwn che tih theihnghilh suh ang che.—1 Pet. 5:6, 7.
Engtin Nge I Thiltumte I Thlen Theih Ang?
18, 19. I thil ngaih pawimawhte bih chianna chu engtin nge i hlâwkpui theih?
18 Rilru ṭha tak pua i ti chung pawhin, i tih duhte leh i tih ngaite tih nân hun i nei tam tâwk lo niin a lang ṭhîn em? A lang a nih chuan, i thil ngaih pawimawhte chu bih chiang leh ang che. Entîr nân: Plastic bucket pakhat la la, a chhûngah lungtum lian engemaw zât dah ang che. Chutah, bucket-ah ṭiau vut han chhûng lût teh. Lung leh ṭiau vuta khat bucket i nei ta. Bucket chu bun chhuakin chûng ṭiau vut leh lungte chu dah leh rawh. Mahse, tûn ṭumah chuan bucket-ah ṭiau vut dah hmasa la, a dawtah lungte chu dah tum rawh. A leng thei lo vem? A len loh chhan chu ṭiau vut i dah hmasak vâng a ni.
19 Hun hman dân chungchângah pawh chutiang bawk harsatna chu i tâwk a ni. Intihhlimna ang chi thil dangte i ngaih pawimawh hmasak chuan, i nuna thil lian zâwk—thlarau lam thil—atân hun nei thei ngai lo tûr i ang thei ang. Mahse, ‘thil pawimawh zâwkte fiah’ tûra Bible fuihna thu i zawm chuan, Lalram dah hmasak nân leh intihhlim nân hun i nei thei ang.—Phil 1:10, NW.
20. I thiltumte thlen i tumna kawngah manganna leh rinhlelhna i neih chuan eng nge i tih ang?
20 Baptisma channa pawh tiama i thiltumte thlen i tum hian, a châng chuan manganna leh rinhlelhna i nei mai thei a. Chutiang hunah chuan, “i rit phurh chu LALPA chungah nghat la, tichuan anin a tichak ang che.” (Sâm 55:22) Tûnah hian, mihring chanchina hna phûrawm leh pawimawh ber, khawvêl pum huapa thu hrilh leh zirtîr rawngbâwlnaa tel theihna hun remchâng i nei a ni. (Tirh. 1:8) Mi dangin he hna an thawh lai lo thlîrtu mai nih chu i thlang thei a. A nih loh leh, phûr taka thawktu zîngah i tel thei bawk. Pathian rawngbâwl nân leh Lalram thlâwp nân i thiamna chu hmang hreh rêng rêng suh. ‘I vânglaia Siamtu’ rawngbâwl chu i inchhîr ngai hauh lo vang.—Thur. 12:1. (w10-E 11/15)
[Footnote-te]
^ par. 7 Vênnainsâng, August 1, 2009, (English) phêk 15-18 en rawh.
^ par. 14 He mi chungchânga ṭanpuina hmuh nân, Questions Young People Ask—Answers, That Work Volume 2, bung 34-na chu en rawh.
Engtin Nge I Chhân Ang?
• Engvângin nge thiltum i insiam ang?
• Thiltum thlen manhla tak ṭhenkhat chu engte nge ni?
• Baptisma chang tûra i thiltum hlennaah eng nge tel?
• Engtin nge i thil ngaih pawimawhte bih chianna chuan i thiltumte hlen tûra a ṭanpui theih che?
[Zirlai Atâna Zawhnate]
[Phêk 21-naa milem]
Nî tina Bible chhiar chu i tum em?
[Phêk 22-naa milem]
Baptisma chang tûra i thiltum hlen tûrin engin nge ṭanpui dâwn che?
[Phêk 23-naa milem]
He tehkhin thu aṭang hian eng nge i zir?