Ṭhalaite U—Pathian Thu Inkaihhruaitîr Rawh U
Ṭhalaite U—Pathian Thu Inkaihhruaitîr Rawh U
“Finna nei la, hriat thiamna nei rawh.”—THUF. 4:5.
1, 2. (a) Engin nge tirhkoh Paula chu a chhûnga awm indona hmachhawn thei tûra ṭanpui? (b) Engtin nge finna leh hriat thiamna i neih theih?
“THIL ṭha tih ka duh laiin sualna ka hnênah a lo awm ṭhîn.” Hêng thute hi tu sawi nge i hria em? Tu dang ni lovin, tirhkoh Paula sawi a ni. Paula chuan Pathian Jehova chu hmangaih hle mah se, thil ṭha, a nih loh leh thil dik tih harsa tih châng a nei a. A chhûnga awm chu indona chu engtin nge a ngaih? Ani chuan: “Mi rethei ka va ni tehlul êm!” tiin a ziak a ni. (Rom 7:21-24) Paula ang hian i awm ve ngai em? Thil dik tih harsa tih châng i nei em? Chu chuan Paula ang bawkin a tibeidawng che em? Chutiang i nih chuan lunghnual mai suh. Paula chuan chu harsatna chu a hneh thei a, nang pawhin i hneh ve thei a ni.
2 Paula hlawhtlin chhan chu “thu dik dân” a inkaihhruaitîr vâng a ni a. (2 Tim. 1:13, 14) Chu chuan a harsatna tawhte hmachhawn nân leh thu tlûkna ṭha siam nâna a mamawh finna leh hriat thiamna a neihtîr a ni. Pathian Jehova chuan finna leh hriat thiamna nei tûrin nang pawh a ṭanpui thei che. (Thuf. 4:5) Ani chuan a Thu, Bible-ah hian kaihhruaina ṭha ber a pe a. (2 Timothea 3:16, 17 chhiar rawh.) Bible-a kan hmuh thu bulte chu i nu leh pa te nêna in indâwrnaah te, sum hman dân tûr thu tlûkna siam hunah te, leh mahni chauhva i awm hunah te i hlâwkpui theih dân ngaihtuah ang che.
Chhûngkuaa Pathian Thu Inkaihhruaitîr
3, 4. Engvângin nge i nu leh pate dân siam zawm chu harsa i tih mai theih a, mahse engvângin nu leh pate chuan dân an siam?
3 I nu leh pate dân siam hnuaia awm chu harsa i ti em? Harsa i tih chuan, eng nge a chhan ni thei ang? A chhan pakhat chu zalên lehzual i duh vâng ani thei ang. Chu chu thil pângngai tak a ni a. Puitling chhoh ruala awm a ni ṭhîn. Mahse, ina i awm lai chuan i nu leh pate thu âwih tûrin mawhphurhna i nei a ni.—Eph. 6:1-3.
4 I nu leh pate’n chutiang dân leh thil phûtte an neih chhan hriat thiamna chuan i tân chûng dânte zawm chu a tiawlsam lehzual thei a. Kum 18 mi Brielle-i * rilru ang put châng pawh i nei ve ngei ang, ani chuan a nu leh pate chungchângah: “Ka kum ang rualte awm dân hi an theihnghilh hmin hmak tawh. Ngaih dân lo sawi ve te, thu tlûkna ka siam te, a nih loh leh puitling anga ka awm te an duh lo,” tiin a sawi. Brielle-i angin, i nu leh pate’n zalênna i hmuh tûr ang hmuhtîr lo che niin i hre mai thei. Amaherawhchu, i nu leh pate’n dân an siam chhan chu nangmah an ngaihtuah vâng che a ni a. Chu bâkah, Kristian nu leh pate chu an enkawl che dânah Pathian Jehova hnêna chanchin sawi tûr an ni tih an inhre bawk a ni.—1 Tim. 5:8.
5. Engtin nge i nu leh pate thu âwih chu i hlâwkpui theih?
5 Nu leh pate dân siam zawm chu bank-a pawisa ba rulh ang hi a ni a—i rulh ṭhat chuan bank chuan a pûk tamtîr ngam lehzual dâwn che a ni. Chutiang bawkin, i nu leh pate hnênah zah leh thu âwih i ba a. (Thufingte 1:8 chhiar rawh.) Thu i âwih ṭhat lehzual chuan, i nu leh pate chuan zalênna an pe tam lehzual dâwn che a ni. (Lk. 16:10) Mahse, engtik lai pawha an dân siam i bawhchhiat erawh chuan, zalênna an tihtlêmsak che emaw, an lâk bosak che emaw a nih pawhin mak ti suh ang che.
6. Engtin nge nu leh pate chuan an fate chu thu âwih tûra an ṭanpui theih?
6 Nu leh pate’n an dân siamte zâwm tûra fate an ṭanpui theih dân kawng khat chu entîrna ṭha siam hi a ni. Pathian Jehova thil phûtte inhuam taka an zawm dân chuan Pathian dânte a khirh lohzia a târ lang tûr a ni a. Chu chuan naupangte tân nu leh pate dân siam pawh chutiang bawka thlîr chu a tiawlsam ang. (1 Joh. 5:3) Chu bâkah, Pathian Jehova’n a chhiahhlawhte chu thil engemaw chungchânga an ngaih dân sawitîr châng a nei tih Bible chuan a târ lang bawk. (Gen. 18:22-32; 1 Lal. 22:19-22) Nu leh pate tân an fate chu thil chi hrang hrang chungchânga an ngaih dân sawitîr ve theih châng a awm thei ang em?
7, 8. (a) Naupang ṭhenkhat chuan eng harsatna nge an tawh? (b) Eng hriat thiamnain nge zilhna thu hlâwkpui tûra ṭanpui thei che?
7 Naupangte chuan nu leh pate hnên aṭangin inâwm lo tak nia an hriat sawisêlna chu an dawng thei a. A châng chuan i dinhmun chu: “Ka nu chu thil sual tite chhuitu police ang mai niin ka hria—engtik lai pawhin ka tlin lohna a zawng tlat alâwm,” titu Craig-a dinhmun ang niin i hre mai thei a ni.
8 Thununna emaw, zilhna emaw kan tawh hian sawisêlnaah kan ngai fo ṭhîn a. Bible chuan phu ngawih ngawih avânga pêk pawh ni se, zilhna hrim hrim hi pawm a harsa ṭhîn tih a sawi. (Heb. 12:11) Zilhna i dawnte chu hlâwkpui tûrin engin nge ṭanpui ang che? Thu pawimawh tak hriat reng tûr chu zilhna hi hmangaihna avânga pêk a ni tih hi a ni. (Thuf. 3:12) Anni chuan nungchang ṭha lo chhawm lo tûr leh nungchang ṭha nei tûra ṭanpui che chu an duh a. I nu leh pate chuan thununna an pêk loh che chuan, chu chu an huatna tluk a ni dâwn tih an hria a ni. (Thufingte 13:24 chhiar rawh.) Chu bâkah, thil tih sual hi inzirna chi khat a ni tih hria ang che. Chuvângin, thununna i dawn hian, engvângin nge chuta tel finna thu chu i zawn zâwk loh vang? “Finna hmu chhuaktu chu a nihlawh a, hriatthiamna hmu chhuaktu pawh. Tangkaraw peipun aiin a peipun chu a ṭha zâwk si a, a hlêp pawh rangkachak ṭha mi aiin.”—Thuf. 3:13, 14.
9. Dik lohna nia hriatte ngaihtuah ngut ngut aiin, naupangte chuan eng nge an tih theih?
9 Mahse, nu leh pate chuan thil tihsual châng an nei a. (Jak. 3:2) Zilhna an pêk hunah che na taka ṭawng châng an nei thei a ni. (Thuf. 12:18) Engin nge i nu leh pate chu chutianga thil tihtîr? Lungngaihna nasa tak an nei a ni thei a, a nih loh leh i thil tihsual chu anmahni lama tlin lohna engemaw vângah an ngai pawh a ni thei. Dik lohna nasa tak nia i hriat chu ngaihtuah ngut ngut aiin, engvângin nge ṭanpui che an duhna nasa tak avânga i lâwmzia chu i lantîr zâwk loh vang? Zilhna i pawm theihna chu i puitlin hunah i la hlâwkpui hle dâwn a ni.
10. Engtin nge i nu leh pate dân siam leh thununna chu i pawm thiam a, i hlâwkpui lehzual theih ang?
10 I nu leh pate dân siam leh thununna pawm thiam lehzual leh hlâwkpui lehzual chu i duh em? I duh chuan inbiakpawh dân i thiam lehzual a ngai a ni. Chu chu engtin nge i tih ang? Rahbi hmasa ber chu ngaihthlâk hi a ni. Bible chuan: “Mi tinin ngaihthlâk chuh sela, thusawi chuh lo sela, thin tinel rawh se,” tiin a sawi. (Jak. 1:19) Hmanhmawh taka mahni thiam thu sawi aiin i rilru chu thunun tum la, i nu leh pate thusawi tûr chu ngaithla phawt ang che. An sawi dân lam ni lovin, an sawia chu ngaihsak zâwk ang che. Tichuan, an thusawi i hriatthiamzia lantîr nân i ir-âwm chhuak ṭawngkamin sawi nawn leh la, anmahni zah thiam takin i thil tihsual chu pawm ang che. Chutianga i tihna chuan an thusawi i ngaithla tih a hriattîr ang. A nih leh, i thusawi emaw, i thiltih emaw chungchângah sawi duh nei ta la engtin nge ni ang? A tam zâwkah chuan i nu leh pate duh dân i zawm hma loh zawng ‘i ka sûm’ rih chu a finthlâk a ni. (Thuf. 10:19) I nu leh pate’n an thu i ngaithla tih an hriat hnu chuan i thusawi pawh an ngaihthlâksak duh lehzual ang che. Chutianga puitling taka i dâwrna chuan Pathian Thu i inkaihhruaitîr tih a târ lang a ni.
Sum Hman Dân Chungchânga Pathian Thu Inkaihhruaitîr
11, 12. (a) Tangka sum chungchângah, Pathian Thu-in eng ti tûrin nge min fuih a, engvângin nge? (b) Engtin nge i nu leh pate’n sum enkawl thei tûra an ṭanpui theih che?
11 Bible chuan: “Tangka sum himna a ni,” a ti a. Mahse, chu mi châng bawk chuan finna chu tangka sum aia a hlut zâwkzia a târ lang a ni. (Thur. 7:12) Pathian thu chuan tangka sum ngaina tûrin min ti lo va, thlîr dân dik nei tûr erawh chuan min fuih a ni. Engvângin nge tangka sum ngainatna chu kan pumpelh ang? He tehkhin thu hi han ngaihtuah teh: Ei rawngbâwl thiam tak tân chuan chemte hriam tak chu hmanraw ṭangkai tak a ni a. Mahse chu chemtê vêk chu mi fîmkhur lo tak tân hliam nasa tak tawrhna a ni thei a ni. Tangka sum pawh hi thiam taka hman a nih chuan a ṭangkai hle a. Amaherawhchu, “hausak tumte” chuan inṭhianna te, chhûngkaw inlaichînna te, leh Pathian nêna an inlaichînna thlengin an chân fo va. Chuvângin, “lungngaihna tam takin an inchhun tlang ta chuk” a ni.—1 Timothea 6:9, 10 chhiar rawh.
12 Engtin nge tangka sum chu thiam taka i enkawl theih ang? I sum hman dân tûr chungchângah engvângin nge i nu leh pate thurâwn i lâk loh vang? Solomona chuan: “Mi fing chuan ngaithlain kaihhruaina a pawm belh ang a, hriatthiamna nei mi chuan kaihhruaina ṭha a hmu ang,” tiin a ziak a ni. (Thuf. 1:5, NW) Tleirâwl Anna-i chuan a nu leh pate hnên aṭangin kaihhruaina ṭha a zawng a. Heti hian a sawi a ni: “Ka pa hian sum ka hman dân tûr ruahmanna siam dân min zirtîr a, chhûngkaw sum enkawl fel a pawimawhzia min kawhhmuh a ni,” tiin. A nu pawhin thil ṭangkai tak takte a zirtîr a: “Thil lei hmaa a man inthlauh dân chhût a ṭangkaizia min kawhhmuh a ni,” tiin Anna-i chuan a sawi a ni. Chu chu engtin nge a hlâwkpui? “Tûnah chuan mahni sum ka enkawl ve thei ta. Sum hman dâna ka fîmkhur hle avângin, leiba neih avânga lo awm lungngaihna ka pumpelh thei a ni,” tiin a sawi.
13. Sum hman dân chungchângah engtin nge i inthunun ang?
13 Ngaihtuah chiang mang lova thil i lei thawt thawt emaw, ṭhiante rilru lâk nân maia sum i hman emaw chuan leiba tam tak i nei thuai ang. He thang pumpelh tûrin engin nge ṭanpui ang che? Sum hman chungchângah mahni inthunun dân i zir a ngai a ni. Chu chu kum 20 pêl hret tawh Ellena-i thil zir chu a ni. Ani chuan: “Ṭhiante nêna kan kal chhuah hian sum ka hman zât tûr ka bituk lâwk a. . . . Bâkah, pawisa hman kawnga fîmkhur leh hmuh hmasak apiang lei nghâl mai lova a man inthlauh dân chhût phawt tûra min fuih thei ṭhiante nêna bazâr chu a finthlâk a ni tih ka hre bawk,” tiin a sawi.
14. Engvângin nge “hausakna bumna te” laka i invên ang?
14 Sum thawh chhuah leh enkawl hi nuna pêng pawimawh tak pakhat a ni a. Amaherawhchu, Isua chuan hlimna dik tak chu “mahni thlarau lam mamawh hriate” neih theih niin a sawi. (Mt. 5:3, NW) Mahse, miin thlarau lam thil a ngaihsakna chu “hausakna bumna te” hian a dîp thei tiin a vaukhân a ni. (Mk. 4:19) Chuti chu, Pathian Thu inkaihhruaitîr a, sum thlîr dân dik i neih chu a va pawimawh tak êm!
Mahni Chauhva Awm Huna Pathian Thu Inkaihhruaitîr
15. Eng hunah nge Pathian laka i rinawmna chu fiah a nih deuh ber dâwn?
15 Pathian laka i rinawmna chu eng hunah nge fiah a nih ber dâwn? Mi dang nêna inawm tlân hunah nge ni ang a, nangmah chauhva i awm hunah? Aw le, school emaw, hnathawhna hmun emawa i awm lai hian thlarau lamah i invên nasat lehzual a rinawm hle. Thlarau lam tâna thil hlauhawm awm theite lakah harhvâng takin i invêng a ni. Mahse, i inthlahdah a, i invên ṭhat loh lai tak hi a ni, nungchang lama beihna laka i tlâwm mai a hlauhawm hun chu.
16. Engvângin nge mahni chauhva i awm hunah pawh Pathian Jehova thu chu i âwih ang?
16 Engvângin nge nangmah chauhva i awm hunah pawh Pathian Jehova thu âwih chu i duh ang? Hei hi hre reng rawh: Pathian Jehova rilru i tina theiin, i tilâwm thei bawk a ni, tih hi. (Gen. 6:5, 6; Thuf. 27:11) Pathian Jehova chuan “a ngaihsak ṭhin che” avângin, i thiltih hian amah a nghawng a. (1 Pet. 5:7) A hlâwkna i têl theih nâna amah i hnaih chu a duh a ni. (Is. 48:17, 18) Hmân laia Jehova chhiahhlawh Israel ṭhenkhatin a zilhna thu an ngaihthah khân, ani’n rilru nat nân a hman phah a ni. (Sâm 78:40, 41) Kawng lehlamah chuan, Pathian Jehova chuan zâwlnei Daniela chu a ngaina hle a, vântirhkoh chuan “mi duhawm tak” tiin a ko a ni. (Dan. 10:11) Engvângin nge? Daniela chu vântlâng hmaah mai ni lo, mahni chauhva a awm hun pawha Pathian laka a rinawm reng avângin.—Daniela 6:10 chhiar rawh.
17. Intihhlimna i thlan hunah eng zawhnate nge i inzawh theih?
17 Mahni chauhva i awm hun pawha Pathian laka rinawm tûr chuan, ‘chhia leh ṭha fiah thei tûrin hriat theihna’ i nei tûr a ni a, chu hriat theihna chu dik nia i hriatte anga thiltihna ‘hmangin’ i sawizawi tûr a ni. (Heb. 5:14) Entîr nân, rimawi ngaihthlâk tûr te, film en tûr te, a nih loh leh Internet site hawn tûrte i thlan hunah a hnuaia zawhnate hian thil dik thlang a, thil sual pumpelh tûrin a ṭanpui ang che. Heti hian inzâwt rawh: ‘Hei hian khawngaihna nei tûrin min ṭanpui ang nge, “mi vânduaina” chunga lo lâwm tûrin min thunun zâwk dâwn?’ (Thuf. 17:5) ‘Hei hian “ṭhatna ngaina” tûrin min ṭanpui dâwn nge ni a, “sualna huat” chu ka tân a tiharsa zâwk dâwn?’ tiin. (Amos. 5:15) Mahni chauhva i awm laia i thiltih chuan i thinlung duhzâwng tak chu a târ lang ang.—Lk. 6:45.
18. A rûkin nungchang ṭhat lohnaah i inhnamhnawih reng a nih chuan eng nge i tih ang a, engvângin nge i tih ang?
18 Thil sual nia i hriat nungchang engemaw chu a rûkin i lo ti ṭhîn a nih chuan eng nge i tih tûr chu ni ta ang? “Bawhchhiatna zêptu chu a hmuingîl lo vang a, zêp lova inpuanga hawisantute chuan zahngaihna an hmu ang,” tih hre reng ang che. (Thuf. 28:13) Kawng sual zawh zêla ‘Pathian thlarau thianghlim tihlungngaih’ chu a va âtthlâk dâwn êm! (Eph. 4:30) I thil sual tih chu Pathian, i nu leh pate, leh i chung ngei pawha inpuang tûrin mawhphurhna i nei a ni. He mi chungchângah hian, ‘kohhran upate’ chuan nasa takin an ṭanpui thei ang che. Zirtîr Jakoba chuan: “Lalpa hminga hriak hnawihin a chungah ṭawngṭai rawh se; tin, rinnaa ṭawngṭaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang,” tiin a sawi. (Jak. 5:14, 15) Hei hi a zahthlâkin, tlêmin a hrehawm deuh pawh a ni thei ang. Mahse ṭanpui dîl tûra mamawh huaisenna i neih chuan chhiat lehzualna ata i inhum ang a, chhia leh ṭha hriatna ṭha aṭanga lo awm hahdamna i hmu ang.—Sâm 32:1-5.
Jehova Thinlung Tilâwm Rawh
19, 20. Pathian Jehova chuan i tân eng nge a duhsak che a, mahse eng nge i tih ngai?
19 Pathian Jehova chu Pathian hlim a ni a, hlim taka i awm chu a duh a ni. Ani chuan a ngaihven hle che a. Thil dik ti tûra ṭan i lâknate chu mi dang tumahin hmu lo mah se, ani chuan a hmu reng a ni. Thil engmah hi Pathian Jehova mit hmuh ata thup theih a ni lo. Ani chuan i sualna zawng tûr ni lovin, thil dik i tihna kawnga ṭanpuina a pêk theih dân tûr che zawngin a en reng che. “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn a ni.”—2 Chro. 16:9.
20 Chuvângin, Pathian Thu inkaihhruaitîr la, a thurâwnte nunpui ang che. Chutiang chuan, nuna buaina leh thu tlûkna siam tûr khirh takte hmachhawn theih nâna i mamawh finna leh hriat thiamna chu i lo nei ang. I nu leh pate leh Pathian Jehova i tihlâwm bâkah, nun hlimawm tak chu i chên bawk ang. (w10-E 11/15)
[Footnote]
^ par. 4 He thuziakah hian an hmingte chu thlâk a ni.
Engtin Nge I Chhân Ang?
• Engtin nge nu leh pate dân siam leh thununna chu i pawm theih ang a, i hlâwkpui theih ang?
• Engvângin nge tangka sum thlîr dân inbûk tâwk neih chu thil pawimawh tak a nih?
• Mahni chauhva i awm hunah pawh engtin nge Pathian Jehova chunga i rinawm theih?
[Zirlai Atâna Zawhnate]
[Phêk 14-naa milem]
Mahni chauhva i awm hunah Pathian chungah i rinawm ang em?