Ṭawngṭaina

1 Engvângin Nge?

ṬAWNGṬAINA. Ṭawngṭaina tluka ngaihven leh hriat châk hlawh Bible thu a awm mang meuh lo vang. Ṭawngṭaina chungchânga zawhna zawh ṭhin pasarihte ngaihtuahin, chûng zawhnate Bible-in a chhân dân chu kan bih chiang tlâng dâwn nia. Hêng thuziakte hi ṭawngṭai ṭan tûr emaw, i ṭawngṭaina tihlawhtling lehzual tûr emawa nangmah ṭanpui nâna buatsaih a ni.

KHAWVEL hmun tinah hian, eng hnam leh sakhua pawh ni se, mite chu an ṭawngṭai ṭhîn a. A malin an ṭawngṭai a; a huho pawhin an ṭawngṭai bawk a. Kristian biak inah te, Hindu leh Buddhist biak inah te, Juda sakhaw inkhâwmna inah te, Mosolman biak inah te, leh Shinto pathian biak inah te hian an ṭawngṭai bawk a ni. Anni chuan ṭawngṭai nân ṭhingṭhitna puan te, rosary te, thil tuaivir theih te, lehkhabu te, a nih loh leh banga târ theih ṭawngṭaina inziak sate chu an hmang a ni.

Ṭawngṭaina chuan mihringte chu he leia nunna nei thil dang lakah min tihrang nalh a ni. Nungchate nên hian inanna tam tak zawng kan nei ngei mai. Anni ang bawkin ei tûr, boruak, leh tui kan mamawh a. Anni ang bawkin kan piang a, kan nungin, kan thi a ni. (Thuhriltu 3:19) Mahse, mihringte chauh hi an ṭawngṭai a ni. Engvângin nge?

Chhânna mâwlmang tak chu ṭawngṭai kan ngai, tih hi a ni a. Tihah chuan, ṭawngṭaina hi hmun thianghlim, a nih loh leh zahawm, leh chatuana awm nia ngaih thlarau ram biak pawh theihna nia hriat a ni. Bible chuan chutiang duhna nei tûra siam kan nihzia a târ lang. (Thuhriltu 3:11) Ṭum khat chu Isua Krista chuan: “Mahni thlarau lam mamawh hriate chu an eng a thâwl e,” tiin a sawi a ni.—Matthaia 5:3, New World Translation.

Biak in ropui leh lian tak takte, pathian biakna thilte, ṭawngṭai nâna dârkâr tam tak sênte chu “thlarau lam mamawh” neih vâng a nih nghâl loh chuan eng vâng nge ni ta ang? Ṭhenkhat chuan an thlarau lam mamawh phuhru tûrin mahni emaw, mi dang emaw an rinchhan tlat ngei mai a. Mahse, ṭanpuina ṭha pe tûrin mihringte hi tling tâwk lo nia hriatna i nei a ni lâwm ni? Kan chak lovin, kan dam chhûng a rei loh bâkah, thil hi kan thlîr thui ṭhîn si lo. Kan aia nasa taka fing zâwk, thiltithei zâwk, leh dam rei zâwk tuemaw chauhvin kan thil mamawh chu min pe thei a ni. Tin, ṭawngṭai tûra min turtu hêng thlarau lam mamawhte hi eng nge a nih chiah le?

Hei hi ngaihtuah rawh: Mihring hriat phâk loh tûr kaihhruaina, finna, a nih loh leh zawhnate chhânna hmuh chu i châk ngawih ngawih ngai em? Chânna nasa tak avânga thlamuanna, thu tlûkna khirh tak siam tûra kaihhruaina, a nih loh leh inthiam lohna avânga ngaihdamna mamawh nia inhriat châng i nei em?

Bible sawi dân chuan chûng zawng zawng chu ṭawngṭaina tûr chhan tling vek a ni. He mi chungchângah hian Bible chu innghahna tlâk ber a ni a, a chhûngah chuan mipa leh hmeichhe rinawm tam tak ṭawngṭaina a chuang a. Chûng mite chu thlamuanna te, kaihhruaina te, ngaihdamna te, leh zawhna khirh ber mai chhânna te dîlin an ṭawngṭai a ni.—Sâm 23:3; 71:21; Daniela 9:4, 5, 19; Habakuka 1:3.

Chûng ṭawngṭainate chu chi hrang hrang ni mah se, inanna engemaw tak an nei ṭheuh a ni. A ṭawngṭaitu mi tinte chuan tûn lai khawvêla kan hmuh loh emaw, kan ngaihthah fo emaw thil pakhat, ṭawngṭaina hlawhtling tûra thil pawimawh tak an nei ṭheuh va. An ṭawngṭaina tûra chu an hre ṭheuh a ni. (w10-E 10/01)