Ṭawngṭaina

4 Eng Chungchângah Nge?

HEI hi Kristiante ṭawngṭaina zînga chham ngun ber tia sawi a ni ṭhîn a. A dik emaw, dik lo emaw pawh ni se, Isua zirtîr Lal Ṭawngṭaina chu mi tam takte hriat sual ber a ni tih a chiang hle. Mi tam takte chuan nî tin emaw, ni khatah vawi tam tak emaw chu a awmzia ngaihtuah meuh lovin an sawi ṭhîn. Mahse, Isua chuan chu ṭawngṭaina chu chutianga hman atân a ti miah lo. Chu chu engtin nge kan hriat theih?

Chu ṭawngṭaina a sawi hmain, Isua chuan: “In ṭawngṭaiin, . . . sawi nawn mai mai suh u,” a ti a. (Matthaia 6:7) Ani chuan ama thusawi ngei kalhin, rilrua chhinchhiaha hman nawn fo tûr ṭawngṭai dân a zirtîr tihna a ni em? Ni lo ve! Isua chuan kan ṭawngṭaia kan thil dîl tûr min zirtîrna a ni a, ṭawngṭai huna kan thil ngaih pawimawh tûr indawt dân chiang tak min zirtîr zâwk a ni. A thusawi chu i lo bih chiang ang u. Chu ṭawngṭaina chu Matthaia 6:9-13-ah kan hmu a ni.

“Kan Pa vâna mi, i hming zahawm rawh se.”

Hetiang hian Isua chuan ṭawngṭaina zawng zawng chu a Pa, Jehova hnêna hlan tûr a nihzia a hnungzuitute chu a hriat nawntîr a ni. Mahse, Pathian hming hi thil pawimawh tak a nih chhan leh a hming tihzahawm, a nih loh leh tihthianghlim a ngaih chhan i hria em?

Mihringte chanchin inṭan tirh aṭangin, Pathian hming thianghlim tak chu dâwt thua tihbawrhbân a ni a. Pathian hmêlma Setana chuan Ani chu A thil siamte chunga rorêl tûra dikna nei tak tak lo, Rorêltu dâwt sawi leh mahni hmasial takah a puh a ni. (Genesis 3:1-6) Mi tam tak chuan Pathian chu hmangaihna nei lo, nunrâwng tak, leh phuba lâk chîng emaw, Siamtu ni lo emaw ang hiala zirtîrin Setana chu an ṭan a. Mi dangte chuan a hming hrim hrim pawh chu huain, an Bible lehlin aṭangin Jehova hming chu an paih bo va, a hman pawh an khap hial a ni.

 Chûng thil dik lo zawng zawng chu Pathianin a siam ṭha vek dâwn tih Bible chuan min hrilh a ni. (Ezekiela 39:7) Chutianga a siam ṭhatna lamah, i thil mamawh leh i harsatna zawng zawng pawh a phuhru vek ang. Engtin nge a phuhrûk ang? Isua zirtîr ṭawngṭaina thu a dawta mi hian a chhâng a ni.

“I ram lo thleng rawh se.”

Tûn lai hian, sakhaw zirtîrtute zîngah Pathian Ram chungchâng hriat dân a inang lo nuai a. Mahse, Isua thu ngaitlatute’n an hriat angin, hmân ata Pathian zâwlneite’n an lo sawi lâwk Messia, Chhandamtu ni tûra Pathian mi thlan chuan khawvêl thlâk danglamtu tûr Lalramah ro a rêl ang. (Isaia 9:6, 7; Daniela 2:44) Chu chuan Setana dâwt sawi pho langin, Setana leh a hnathawh zawng zawng a tichhe vek ang a, Pathian hming chu a tithianghlim ang. Pathian Ram chuan indona te, natna te, ṭâm te bâkah, thihna te thlengin a tibo vek ang. (Sâm 46:9; 72:12-16; Isaia 25:8; 33:24) Pathian Ram lo thleng tûra i ṭawngṭai hian, chûng thutiam zawng zawngte thleng famkim tûrin i dîl tihna a ni.

“I duhzâwng vâna an tih angin leia mi’n ti rawh se.”

Isua ṭawngkam hman chuan Pathian awmna vâna Pathian duhzâwng tih a nih angin leiah pawh tih a ni ngei dâwn tih a târ lang. Vâna Pathian duhzâwng tihna chu engmahin a dang thei lo; chutah chuan, Pathian Fapa chuan Setana leh a ṭhuihhruaite chu dovin, leiah a paih a ni. (Thu Puan 12:9-12) He Lal Ṭawngṭainaa dîlna pathumna hian a hmasa pahnihte ang bawkin thil pawimawh ber—mahni duhzâwng ni lova Pathian duhzâwng—ngaihsak tlat tûrin min ṭanpui a ni. A duhzâwng hian thil siam zawng zawngte tâna ṭha tûr a thlen ṭhîn si a. Chuvângin, mi ṭha famkim Isua meuh pawhin a Pa hnênah: “Keia thu ni lovin, nangma thu thu ni zâwk rawh se,” a ti a ni.—Luka 22:42.

“Vawiinah hian kan ei khawpin chaw min pe ang che.”

A dawtah Isua chuan mahni mamawh pawh kan dîl ve thei tih a târ lang a. Pathian hnêna nî tin nuna kan mamawhte dîl chu thil sual a ni lo. Chutianga kan dîlna chuan Pathian Jehova chu “engkim hnêna nunnate, thâwknate leh thil zawng zawngte petu” a nihzia min hriattîr zâwk mah a ni. (Tirhkohte 17:25) Bible chuan ani chu fate hnêna an mamawh pêkna aṭanga hlimna hmutu pa ber angin a târ lang a. Mahse, pa ṭha tak angin, an tâna ṭha lo tûr an thil dîlte chu a pe lo vang.

“Kan batte hi min ngaidam ang che.”

Pathian lakah bat i nei tak zet em? A ngaihdamna i mamawh em? Tûn laia mi tam takte chuan sual nihna leh a pawizia chu an hre chang tawh lo va. Mahse, Bible chuan sual chu mihringte thihna thlentu ber a nih avângin kan buaina khirh takte awmtîrtu ber niin a zirtîr a ni. Suala piang kan nih avângin sualah kan tlu fo va, kan chatuan beiseina chu Pathian ngaihdamnaah liau liau a innghat a ni. (Rom 3:23; 5:12; 6:23) Chuvângin, Bible-in: “LALPA, nang chu i ṭha a, ngaihdam i peih reng a,” tia a sawi chu a thlamuanthlâk hle.—Sâm 86:5, C.L. Re-edited.

“Mi sual lakah chuan min chhandam zâwk ang che.”

Pathian vênhimna i mamawh nghâlzia leh i mamawh nasatzia i hria em? Mi tam tak chuan “mi sual,” Setana hi a awm tak tak an ring lo va. Mahse, Isua chuan Setana chu a awm tak tak tih a zirtîr a, ani chu “khawvêl lal” tiin a ko hial a ni. (Johana 12:31; 16:11) Setana chuan a thununna hnuaia awm khawvêl chu a tichhia a, i Pa, Jehova nêna inlaichînna ṭha tak i neih theih loh nân nang ngei pawh tihchhiat che a châk hle a ni. (1 Petera 5:8) Amaherawhchu, Jehova chu Setana aiin a chak zâwk fê a, Amah hmangaihtute humhim chu nuam a ti hle bawk a ni.

Tûna tâwi têa kan ennawn tâk Isua zirtîr Lal Ṭawngṭaina-ah chuan ṭawngṭainaa kan telh theih zawng zawng a kim vek lo. Pathian chungchângah 1 Johana 5:14 chuan: “Engpawh a duhzâwng anga kan dîl chuan, anin min ngaihthlâksak ṭhin hi,” a ti tih hre reng ang che. Chuvângin i buaina chu ṭawngṭainaa telh atân tê tham lutukah ngai suh ang che.—1 Petera 5:7.

A nih leh, a hun leh hmun chungchâng hi eng nge ni ve? Kan ṭawngṭaina hun leh hmun hian kawngro a su em? (w10-E 10/01)