Ṭawngṭaina

6 Min Ṭanpui Ang Em?

ṬAWNGṬAINA hian min ṭanpui em? Bible chuan min ṭanpui tih a târ lang a, Pathian chhiahhlawh rinawmte chuan ṭawngṭai chu an hlâwkpui tak zet a ni. (Luka 22:40; Jakoba 5:13) A nihna takah chuan, ṭawngṭai chu thlarau lamah te, rilru lamah te, leh taksa lamah te kan ṭhatpui hle thei a ni. Engtin nge?

Awle, i fa chuan thilpêk pakhat lo dawng ta se la. Lâwmna rilrua a neih chu a tâwk mai tiin i zirtîr ang em? Nge ni a, a lâwmna chu sawi chhuak tûrin i zirtîr zâwk dâwn? Kan rilru veizâwng pawimawh tak ṭawngkama kan sawi chhuah hian, chu chu kan ngaihtuah lehzualin, kan vei lehzual a ni. Pathian kan biak pawhna chungchângah pawh chutiang bawk chu a ni em? Ni tehmeuh mai! Entîrna ṭhenkhat lo ngaihtuah ta ila.

Lâwmthu sawi ṭawngṭaina. Thil ṭha kan dawnte avânga kan Pa hnêna lâwmthu kan sawi hian, kan malsâwmna dawnte chu kan ngaihtuah lehzual a. Chuvângin kan lâwmna te, kan hlimna te a zual thei a, kan thil thlîr dân pawh a ṭha lehzual thei a ni.—Philippi 4:6.

Entîr nân: Isua chuan a Pain a ṭawngṭaina a ngaihthlâk leh a chhânsak avânga a lâwmzia a sawi chhuak.—Johana 11:41.

Ngaihdam dîl ṭawngṭaina. Pathian hnêna ngaihdam kan dîl hian, kan chhia leh ṭha hriatna kan tiṭha lehzual a, kan inchhîrna a lo zualin, sual pawizia kan hriatna a zual bawk a. Tin, mahni inthiam lohna nasa tak ata min chhâwk bawk.

Entîr nân: Davida chuan a inchhîrna leh a lungngaihna chu ṭawngṭaiin a sawi chhuak.—Sâm 51.

Kaihhruaina leh finna dîla ṭawngṭaina. Pathian Jehova hnêna kaihhruaina kan dîlna emaw, thu tlûkna ṭha siam tûra kan mamawh finna kan dîlna emaw chuan inngaihtlâwmna dik tak nei tûrin min ṭanpui thei a. Chu chuan kan tlin lohnate min hriattîr theiin, kan Pa vâna mi ring lehzual tûrin min ṭanpui thei bawk.—Thufingte 3:5, 6.

Entîr nân: Solomona chuan Israelte chunga ro a rêl theih nân inngaitlâwm takin kaihhruaina leh finna a dîl.—1 Lalte 3:5-12.

Lungngaih manganna avânga ṭawngṭaina. Rilru manganga kan awm huna Pathian hnêna kan thinlung kan leih buak chuan, kan rilru a dam huai ang a, mahni inring lovin Pathian Jehova kan rinchhan zâwk ang.—Sâm 62:8.

Entîr nân: Lal Asa chu hmêlma hlauhawm tak a hmachhawn laiin a ṭawngṭai.—2 Chronicles 14:11.

Ṭanpui ngaite tâna ṭawngṭaina. Chutiang ṭawngṭaina chuan mahni hmasialna do hneh tûr leh khawngaihna leh mite dinhmun hriatthiamna nei lehzual tûrin min ṭanpui a ni.

Entîr nân: Isua chu a hnungzuitute tân a ṭawngṭai.—Johana 17:9-17.

Fakna ṭawngṭaina. Pathian Jehova chu a thiltih ropui tak leh a miziate avânga kan fak hian, amah kan zahna leh kan ngaihhlutna chu a pung chho vang. Chutiang ṭawngṭaina chuan kan Pathian leh Pa hnaih lehzual tûrin min ṭanpui thei bawk.

Entîr nân: Davida chuan Pathian chu a thil siamte avângin a fak.—Sâm 8.

Ṭawngṭaina nêna inzawmna nei malsâwmna dang chu “Pathian thlamuanna, rilru rêng rênga hriat sên loh” kan nei hi a ni. (Philippi 4:7) He buaina khawvêla rilru thlamuanna neih chu malsâwmna dawn zen zen loh a ni a. Chu chuan tisa lamah pawh hlâwkna a nei a ni. (Thufingte 14:30) Mahse, chu chu mahni ṭan lâkna ngawr ngawr avânga neih a ni em? Nge ni a, chu aia pawimawh thil dang engemaw a tel zâwk? (w10-E 10/01)

[Phêk 9-naa thu lâk chhuah]

Ṭawngṭaina chuan tisa lam, rilru lam leh, a pawimawh ber thlarau lamah hlâwkna a nei