Jehova Chu Kan Lal Chungnungber A Ni!
Jehova Chu Kan Lal Chungnungber A Ni!
“LALPA Chungnungbera chu . . . lei chung zawng zawnga Lal ropui tak a ni.”—SAM 47:2.
1. Paula chuan a thusawi 1 Korinth 7:31-a chhinchhiah hmangin khawvêl hi eng nên nge a tehkhin?
“HE KHAWVEL lan dân hi a inthlâk mêk a ni,” tiin tirhkoh Paula chuan a sawi a. (1 Kor. 7:31, NW) Ani chuan khawvêl hi lem changtute’n an lanna a inthlâk hmaa mi ṭha emaw, mi sual emaw lema an channa chantual nên a tehkhin a nih hmêl hle.
2, 3. (a) Pathian Jehova lalchungnunna chona chu eng nên nge khaikhin theih a nih? (b) Eng zawhnate nge kan ngaihtuah ang?
2 Tûn lai hian, lemchan azawnga pawimawh ber mai chu chhuah mêk a ni a—chutah chuan nang pawh i tel ve tlat mai! Chu chu Pathian Jehova lal chungnunna thiam chantîrna nên a inkûngkaih lehzual a. Chu lemchan chu khawi emaw lai ram pakhata thilthleng nên tehkhin theih a ni ang. Kawng khatah chuan, dân leh hrai kengkawhtu rorêl lai sawrkâr a awm a. Kawng lehlamah chuan, dâwtthu, tharum thawhna, leh tualthahna hmanga rorêl mi sual pâwl pakhat a awm a ni. Chu mi sual pâwl chu rorêl lai sawrkâr tân harsatna thlentu a ni a, sawrkâr ding lai chunga khua leh tui zawng zawngte rinawmna fiahtu pawh a ni.
3 Chutiang dinhmun chu lei leh vân huapah pawh a thleng a. Dân ang taka din “Lalpa PATHIAN” sawrkârna a awm a ni. (Sâm 71:5) Mahse, tûnah hian mihringte hi “mi sual” kaihhruaina hnuaia awm pâwl suaksual tak hian dinhmun derthâwng takah a dah a ni. (1 Joh. 5:19) Chu chuan dân ang taka din Pathian sawrkârna atân harsatna a siam a, a rorêlna hnuaia awmte rinawmna chu a fiah bawk. Chutiang dinhmun chu eng anga lo awm chho nge ni? Pathianin engvângin nge a phal? A mi mal angin eng nge kan tih theih?
Lemchana Thil Telte
4. Lei leh vân huap lemchanah hian inkûngkaihna nei eng thu buai pahnih nge tel?
4 He lei leh vân huap lemchanah hian inkûngkaihna nei thu buai pahnih, Jehova lalchungnunna leh mihringte rinawmna a tel a. Bible-ah chuan Pathian Jehova chu “LALPA Chungnungbera” tia koh a ni fo ṭhîn. Entîr nân, fakna hla phuahtu chu heti hian rin tlatna nên a zai a ni: “LALPA Chungnungbera chu . . . lei chung zawng zawnga Lal ropui tak a ni,” tiin. (Sâm 47:2) “Lalchungnunna” tih hi thiltihtheihna emaw, rorêlna emaw lama chungnungber nihna hi a ni a. Lalchungnungber chuan thu neihna sâng ber a chelh a ni. Pathian Jehova chu Chungnungbera anga thlîr chhan tûr ṭha tak a awm a ni.—Dan. 7:22.
5. Engvângin nge Jehova lalchungnunna thlâwp tûra chêttîrin kan awm ang?
5 Siamtu a nih angin, Pathian Jehova chu lei leh vâna Lalchungnungber a ni a. (Thu Puan 4:10, 11 chhiar rawh.) Ani chu kan Rorêltu, Dân min Petu, leh kan Lal a ni bawk. (Is. 33:22) Amah avânga awm leh amah rinchhan tlat kan nih avângin, kan Lalpa Chungnungbera angin kan thlîr tûr a ni. “LALPA chuan a lalṭhutphah chu vânahte khian a tinghet a; a ram chuan engkim chungah ro a rêl” tih rilrua kan vawn reng chuan a dinhmun chelh sâng tak thlâwp tûra chêttîrin kan awm ang.—Sâm 103:19; Tirh. 4:24.
6. Rinawmna chu eng nge ni?
6 Jehova lalchungnunna thlâwp tûr chuan a chungah kan rinawm tlat tûr a ni a. “Rinawmna” chu rilru lam ṭhatna emaw, a puma himna emaw hi a ni. Rinawmna vawngtu chu mi ngîl leh sawisêlbo hi a ni a. Thlahtu Joba chu chutiang mi a ni.—Job. 1:1.
Lemchan Inṭan Dân
7, 8. Engtin nge Setana chuan Pathian Jehova lalchungnunna dikzia chu a cho?
7 Kum 6,000 chuang kalta khân thlarau thil siam pakhat chuan rorêl tûra Pathian Jehova dikna neih chu a cho va. Chu hel hmang thusawi leh thiltih chhan ber chu mahni hmasial taka chibai bûkna dawn a duh vâng a ni. Ani chuan, nupa hmasa ber Adama leh Evi chu Pathian lalchungnunna laka rinawm lo tûrin a thlêm a, Pathian Jehova chu dâwt sawia puhin a hming tihhliau a tum a ni. (Genesis 3:1-5 chhiar rawh.) Chu hel hmang chu Hmêlma lian tak, Setana (Dodâltu), Diabola (Sawichhetu), rûlpui (bumtu), leh drakon (lemtu) a lo ni ta a ni.—Thup. 12:9.
8 Setana chu Pathian ep chiaha rorêltuah a insiam a. He dinhmun a hmachhawn tâkah chuan, Lalpa Chungnungber Jehova chuan eng nge a tih ang? Hel hmang pathumte—Setana, Adama, leh Evi—chu a tiboral nghâl ang em? Chutianga tiboral tûrin thiltihtheihna zawng a nei ngei mai a, chu chuan thiltihtheihna chungnungber a neihzia pawh a tilang chiang ngei bawk ang. Tin, Pathian Jehova’n a dân siam bawhchhetute tawh tûr hremna a sawi pawh a thleng dik tih a târ lang bawk ang. A nih leh, engvângin nge Pathianin chutianga thil a tih loh?
9. Setana’n eng nge a cho?
9 Dâwt hmanga Adama leh Evi Pathian hnên ata a hruai pên khân, Setana chuan Pathianin mihringte hnêna thu âwihna phût tûra dikna a neih chu a cho va. Chu bâkah, mihring tuak hmasa ber chu Pathian thu âwih lo tûra a thlêm khân, finna nei Pathian thil siamte rinawmna pawh a cho tel bawk a ni. Pathian Jehova lalchungnunna laka rinawm tak Joba chungchânga a lan angin, Setana chuan mi zawng zawng chu Pathian hnên ata la pêng theiah a inchhâl a ni.—Job. 2:1-5.
10. Pathianin a lalchungnunna chona chhân lêt nghâl mai lohna chuan eng tihna hun nge awmtîr?
10 Pathian Jehova chuan a lalchungnunna chona chu chhâng lêt nghâl lovin, Setana hnênah a inchhâlna a dikzia finfiah theihna hun a pe a. Tin, mihringte hnênah pawh a lalchungnunna chunga an rinawmzia lantîr theihna hun a pe bawk a ni. Kum zabi tam tak a liam chuan engtin nge ni ta zêl? Setana chuan dân bawhchhe pâwl thiltithei tak chu a din a ni. Pathian Jehova chuan atâwpah chu pâwl leh Diabola chu tiboralin, lalchungnung ni tûra dikna a neih chu hnial rual lohvin a finfiah ang. Chutiang a lo thleng dâwn tih a hriat chian êm avângin, Pathian Jehova chuan Eden huana helna a thlen khân chu chu a sawi lâwk a ni.—Gen. 3:15.
11. Jehova lalchungnunna chungchângah mi tam takin eng nge an tih?
11 Mi tam tak chuan Jehova lalchungnunna leh a hming tihthianghlimna chungchângah rinna lantîrin rinawmna an vawng a. Chûng mite zîngah chuan Abela te, Enoka te, Nova te, Abrahama te, Sari te, Mosia te, Ruthi te, Davida te, Isua te, leh Krista zirtîr hmasa te, leh tûn laia rinawmna vawngtu mi a nuai têlte an tel a ni. Chûng Pathian lalchungnunna thlâwptute chu Setana dâwt theihzia finfiahnaah an tel a; tin, Setana’n mi zawng zawng hruai pêng thei anga inchhâla Jehova hming a tihchhiat tawh tihthianghlimnaah an tel bawk a ni.—Thuf. 27:11.
Lemchan Tâwp Dân Tûr Chiang Tak Chu
12. Pathianin suahsualna a dawh kumkhua dâwn lo tih engtin nge kan chian theih?
12 Pathian Jehova chuan a lalchungnunna a puang thuai dâwn tih kan hre chiang thei a. Ani chuan suahsualna a dawh kumkhua lo vang a; tin, ni hnuhnûngah kan awm tih kan hre ve bawk. Ani chuan Tuilêtah mi suaksualte chu a lo tiboral tawh a. Sodom leh Gomorra khuate, leh Pharaoa leh a sipaite chu a lo tiboral tawh bawk a. Tin, Sisera leh a sipaite, Senakeriba leh a Assuria sipaite chu Chungnungbera tân eng tham mah a ni lo bawk. (Gen. 7:1, 23; 19:24, 25; Ex. 14:30, 31; Ro. 4:15, 16; 2 Lal. 19:35, 36) Chuvângin Jehova chuan a hming zah lohna leh a Thuhretute tihduhdahna chu a dawh kumkhua dâwn lo tih kan ring tlat thei a ni. Chu bâkah, tûnah chuan Isua lo awm lehna leh he khawvel suaksual tâwpna chhinchhiahnate chu kan hmu tawh bawk a ni.—Mt. 24:3.
13. Jehova hmêlmate ruala tihboralna chu engtin nge kan pumpelh theih?
13 Jehova hmêlmate ruala tihborala kan awm loh nân, A lalchungnunna lakah kan rinawm tlat tûr a ni. Engtin nge kan rinawm theih ang? Setana rorêlna suaksual laka inla hrangin leh a mi hmante tihhlauhva awm lovin kan rinawm thei a ni. (Is. 52:11; Joh. 17:16; Tirh. 5:29) Chutianga kan awm chauhvin kan Pa vâna mi lalchungnunna thiam chantîrna kan thlâwp thei ang a, Lei leh Vâna Lal Chungnungber a nihzia lantîra a hming a tihthianghlim hunah dam khawchhuah kan inbeisei thei ang.
14. Bible bu hrang hrangahte hian eng thute nge târ lan a nih?
14 Mihringte leh Jehova lalchungnunna chungchâng chipchiar tak chu Bible bu pumah a lang a. Bible-a bung hmasa pathumte chuan thil siamna leh mihringte suala tlûk luhna chanchin a sawi laiin, bung hnuhnûng ber pathumte chuan mihringte chhanchhuah lehna chungchâng a sawi thung a ni. A inkâra bung awmte chuan Lal Chungnungber Jehova’n mihring, leh lei leh vân tâna a thiltum tihlawhtling tûra hma a lâk dân chipchiar takin a târ lang a ni. Genesis thuziak chuan khawvêla Setana leh suahsualna a luh dân a sawi a; tin, Thu Puan bu tâwpna lam chuan suahsualna nuai bo a nih dân tûr te, Diabola tihboral a nih dân tûr te, leh vâna Pathian duhzâwng tih a nih anga leia tih a nih dân tûrte chu a târ lang a. Dik takin, Bible chuan sual leh thihna a lo awm chhan bâkah, chûng chu lei ata paih bova, rinawmna vawngtute neih tûr hlimna nasa tak leh chatuana nunnain a rawn thlâk dân tûr a târ lang a ni.
15. Lalchungnunna telna lemchan tâwpna hlâwkpui tûr chuan eng nge kan tih ngai?
15 Rei lo têah he khawvêl lan dân hi a inthlâk pumhlûm ṭhak dâwn a. Lalchungnunna thu buai telna kum zabi tam tak chhûng daih lemchan puanzâr chu a tla dâwn ta. Chutih hunah chuan nakina tihboral atân Setana chu chantual ata paih chhuah a ni ang a, Pathian duhzâwng chu a ding chang tawh ang. He mi aṭanga hlâwkna hmu tûr leh Pathian Thu-a sawi lâwk malsâwmna tam takte chên thei tûr chuan, Pathian Jehova lalchungnunna chu tûnah kan thlâwp tûr a ni. Tuilairapin kan awm thei lo. “LALPA chu ka lama ṭang a ni,” kan tih theih nân a lama kan ṭan a ngai a ni.—Sâm 118:6, 7.
Rinawmna Kan Vawng Thei!
16. Engvângin nge mihringte’n Pathian lakah rinawmna an vawng thei tih kan hriat theih?
16 Jehova lalchungnunna kan thlâwpin, rinawmna kan vawng thei a ni; tirhkoh Paula chuan: “Mihring tuar theih ang chauh lo chu thlêmna rêng rêng in chungah a thleng ngai lo. Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin a ziak si a. (1 Kor. 10:13) Paula sawi thlêmna lo chhuahna chu eng nge ni a, engtin nge Pathian chuan kan tân tlân chhuahna kawng a siam?
17-19. (a) Israelte khân thlalêrah eng thlêmna nge an do zawh loh? (b) Pathian Jehova hnêna kan rinawmna chu engvângin nge kan vawn theih?
17 Thlalêra Israelte thiltawnin a târ lan angin, “thlêmna” chu Pathian dân bawhchhe tûra min thlêm thei dinhmun aṭangin a lo kal a. (1 Korinth 10:6-10 chhiar rawh.) Israelte chuan thlêmna chu an do tûr a ni nâa le; mahse, Pathian Jehova’n vahmîm thla khat tla tûr a pêk khân “thil sual an châk” zâwk a ni. Mite chu sa ei lovin hun eng emawti chhûng awm mah se, Pathian chuan manna kham khawp tûr a pe reng a. Mahse, vahmîm an chhar khâwm lai khân duhâmna nasa tak lantîr tûra thlêmna lakah an tlâwm a ni.—Num. 11:19, 20, 31-35.
18 Chu mi hma, Mosia’n Sinai Tlânga Dân thupêk a lâk lai khân, Israelte chu milem biaknaa tlu lûtin bâwng no lem an bia a, nawmsip an bâwl a ni. Mita hmuh theih anmahni hruaitu a awm tâk lohvah chuan thlêmna lakah an invêng ta lo. (Ex. 32:1, 6) Ram Tiama an luh hma lawk pawh khân, Israel mi sâng tam takte chu Moab hmeichhiate’n an thlêm a, mipat hmeichhiatna sualah an tlu a. Chu mi ṭum chuan, Israel sâng tam tak chu an sual avângin an thi a ni. (Num. 25:1, 9) A châng chuan, Israel mite chu hel khawpa phunnawi tûra thlêmna lakah an tlâwm a, ṭum khat phei chu Mosia leh Pathian thleng thlengin an sawi chhia a. (Num. 21:5) Israel mite chu mi suaksual Kora te, Dathana te, Abirama te, leh an ṭhiante tihboral an nih hnuah pawh, chutianga tihboral an ni chu dik lo nia ngaiin an phunnawi ta cheu va. Chuvângin, Israel mi 14,700 chu Pathian lêntîr hri avângin an thi a ni.—Num. 16:41, 49.
19 Tûna kan sawi tâk thlêmna zawng zawngte hi Israelte tâna do theih loh tûr thlêmna a ni lo. Thlêmna laka an tlâwm chhan chu rinna an hloh vâng leh Pathian Jehova te, anmahni a ngaihsakna te, leh a kawng felte an theihnghilh vâng a ni. Israelte ang bawkin, tûn laia thlêmna kan tawhte chu mihringte tawrh ṭhin pângngai a ni a. Chûng thlêmnate do tûra ṭan kan lâka min chhawmdâwl tûra Pathian kan rinchhan chuan, kan rinawmna kan vawng thei a ni. “Pathian zawng a rinawm a,” kan “tuar theih tâwk aliam chu thlêmna” kan tawh a phal lo. Pathian Jehova chuan mihringte’n a duhzâwng an tihtheih lohna tûr dinhmuna ding tûr khawpin min thlahthlam ngai lo.—Sâm 94:14.
20, 21. Thlêmna kan tawh hian, engtin nge Pathianin “tlân chhuahna kawng” min siamsak?
20 Jehova chuan thlêmna do thei tûra min tichakin “tlân chhuahna kawng” min siamsak a. Entîr nân, min tiduhdahtute chuan kan rinna phatsan tûrin min sawisa hrep pawh a ni thei. Chu chuan vuak te, hrem te, a nih loh leh thih mai theihnate pumpelh nâna phatsan mai tûrin min thlêm thei a ni. Mahse, thlarauva thâwk khum Paula thutiam 1 Korinth 10:13-a chhinchhiah ṭanchhanin, thlêmna awmtîrtu dinhmunte chu rei lo tê atân chauh a ni tih kan hria a. Jehova chuan a chunga rinawm thei lo tûr khawpa dinhmun a chhiat chu a phal lo vang. Pathian chuan kan rinna a tinghet theiin, rinawmna vawn nâna kan mamawh thlarau lam chakna min pe thei bawk.
21 Pathian Jehova chuan a thlarau thianghlim hmangin min chhawmdâwl a. Chu thlarau chuan thlêmna do nâna kan mamawh Bible thute hre chhuak tûrin min ṭanpui bawk. (Joh. 14:26) Chutiang chuan, kawng sual zawh tûra thlêmin kan awm lo. Entîr nân, Pathian Jehova lalchungnunna leh mihringte rinawmna thu buai chu kan hre thiam a ni. Chu hriatna neiin, mi tam takte chu an thih thlenga rinawm tûrin Pathianin a chhawmdâwl a. Mahse, thihna hi an tâna tlân chhuahna kawng siamtu a ni lo; Pathian Jehova ṭanpuina zâwk hi a ni, thlêmna laka tlâwm lova a tâwp thlenga chheltîrtu chu. Ani chuan kan tân pawh chutiang bawk chu a ti thei a. A nihna takah chuan, “chhandamna rochungtu tûrte tân rawngbâwl tûra tirh chhuah” a vântirhkoh rinawmte chu min ṭanpui tûrin a hmang bawk. (Heb. 1:14) A dawta thuziakin a târ lang angin, rinawmna vawngtute chauhvin chatuana Pathian lalchungnunna thlâwp theihna chanvo hlimawm tak neih chu an beisei thei a ni. Pathian Jehova chu kan Lal Chungnungber anga kan vawn tlat chuan, chûng mite zîngah kan tel ve thei ang. (w10-E 11/15)
Engtin Nge Kan Chhân Ang?
• Engvângin nge Jehova chu kan Lalpa Chungnungbera anga kan pawm ang?
• Pathian laka rinawmna vawng tih chu eng tihna nge ni?
• Pathian Jehova chuan a lalchungnunna a puang thuai dâwn tih engtin nge kan hriat theih?
• Korinth thawn khat 10:13 thu aṭangin, engvângin nge rinawmna kan vawn theih?
[Zirlai Atâna Zawhnate]
[Phêk 24-naa milem]
Setana chuan Adama leh Evi chu Jehova chunga rinawm lo tûrin a thlêm thlu
[Phêk 26-naa milem]
Jehova lalchungnunna thlâwp chu tum tlat rawh