Thurûk 4

Fîmkhur Takin Ṭhian Thlang Rawh

BIBLE-IN ENG NGE A ZIRTIR? “Mi fing pâwl la, i lo fing ang.”—Thufingte 13:20.

ENG NGE A HARSATNA? Kan ṭhiante hian kan lungawina an tizual theiin, an tikiam thei a. An rilru put hmang leh titite chuan nun kan thlîr dân a thunun ngei dâwn a ni.—1 Korinth 15:33.

Entîr nân, Kanaan ram an enfiahna ata lo kîr leh mi 12-te chanchin Bible-a târ lan hi ngaihtuah teh. A tam zâwk chuan “Israel thlahte hnênah an ram han enthlâk chu . . . a ṭha lo lamin an sawi a.” Mi pahnihte erawh chuan Kanaan ram chungchângah thu ṭha tak sawiin, “ram ṭha tak,” tiin an ko thung a ni. Mahse, enthlatu sâwmte rilru put hmang ṭha lo chu mipuite zîngah a darh ta a. “Pungkhâwmho zawng zawng chu aw chhuah meuhvin an ṭap a . . . Israela thlahte zawng zawng chu . . . an phunnawi” a ni.—Number 13:30–14:9.

Chutiang bawkin, tûn laia mi tam takte chu an dinhmun chungchânga “phunnawitu leh sawisêltute an ni.” (Juda 16) Lungawi ngai lo ṭhiante kâra lungawina neih chu a harsa hle.

ENG NGE I TIH THEIH? I ṭhiante nêna in titi chu chhût ngun rawh. I ṭhiante chuan an thil neihte an uanpui ṭhînin, an thil neih lohte avângin an phunnawi ṭhîn em? An tân eng ang ṭhian nge i nih? I ṭhiante thîk tûr zâwngin i awm lui ṭhîn nge, an thil neiha lungawi tûrin i fuih ṭhîn zâwk?

Lal ni tûr Davida leh, Lal Saula fapa, Jonathana te entawn tûr siam chu han ngaihtuah teh. Davida chu thlalêrah a râl tlân a. Lal Saula chuan a lalna atâna hlauhawm anga ngaiin Davida chu thah a duh a ni. Jonathana chu nakina lalna changtu tûr mah ni se, Davida ṭhian ṭha berte zînga mi a lo ni a. Ani chuan Pathianin Davida chu lal ni tûrin a ruat tih a hria a, a ṭhian chu lungawi takin a thlâwp ta a ni.—1 Samuela 19:1, 2; 20:30-33; 23:14-18.

Lungawi tum tlat leh thinlung taka i ṭhatna tûr duhtu chutiang ṭhian chu i mamawh a. (Thufingte 17:17) Chutiang chi ṭhian nei tûr erawh chuan chutiang miziate i târ lan ve a ngai a ni.—Philippi 2:3, 4. (w10-E 11/01)

[Phêk 7-naa milem]

I ṭhiante chuan i lungawina an tizual nge, an tikiam zâwk?