Chhûngkaw Hlim Neih Dân Kawngte

I Fate Chu Mipat Hmeichhiatna Chungchâng Sawipui Rawh

Tleirâwl Alicia-i * chuan heti hian a sawi: “A châng chuan mipat hmeichhiatna chungchâng hriat duh ka nei ṭhîn a, mahse ka nu leh pate ka zawh chuan thil ṭha lo engemaw ti angah min ngai dâwn niin ka hre tlat,” tiin.

Alicia-i nu, Inez-i ve thung chuan: “Ka fanu ṭhutpuia mipat hmeichhiatna chungchâng sawipui chu ka duh a, mahse a hman hlei thei lo. Biak theihna tûr hun âwl a nei mang meuh lo,” tiin a sawi.

TUN lai hian, mipat hmeichhiatna lam thilte hi hmun tinah a awm a—TV-ah te, film-ah te, thil siam chhuah faknaahte a lang deuh vek a ni. He mi chungchâng sawi hrehna hmun awmchhun chu nu leh pate leh fate inkâra inbiaknaah mai niin a lang. Canada rama mi Michael-a chuan: “Nu leh pate hian an hnêna mipat hmeichhiatna chungchâng sawipui a hrilhhaithlâkzia leh a zahthlâkzia hria se ka ti ngawt mai. Chutiang chungchâng ṭhiante sawipui chu a awlsam zâwk hle,” tiin a sawi.

An fate angin nu leh pate pawhin mipat hmeichhiatna chungchâng an fate sawipui chu an hreh deuh fo va. Hrisêlna lam zirtîrtu Debra W. Haffner-i chuan mipat hmeichhiatna chungchâng fate sawipuina chanchin a ziakna Beyound the Big Talk, tih a lehkhabu chhuahah heti hian a sawi a ni: “Nu leh pa tam tak chuan mipat hmeichhiatna emaw, tleirâwl chhuah chhoh chungchâng emaw ziakna lehkhabute chu leiin, an fa tleirâwl chhuak tûrte pindana an dah chawt mai thu leh a hnua sawihona an neihpui ngai loh thu min hrilh hlawm a ni,” tiin. Chutianga tih chu nu leh pate’n an fate hnêna: “In taksa ṭhan chhoh dân leh mipat hmeichhiatna chungchâng in hriat kan duh; mahse sawipui che u kan duh lo,” an tihna niin Haffner-i chuan a sawi.

Fa nei i nih chuan, rilru put hmang dang i neih a ngai a. I fate hnêna nangmah ngeiin mipat hmeichhiatna chungchâng i sawipui chu a pawimawh hle a ni. A chhan pathum lo en ta ila:

1. Mipat hmeichhiatna awmzia a inthlâk. “Mipat hmeichhiatna chu nupa inpâwlna tia tawi têa hrilhfiah a ni tawh lo. Tûnah chuan kâa châkna inhrîkthlâksak te, mawngkuaa inpâwlna te, Internet hmanga mipat hmeichhiatna lam thu inthawn cybersex an tih te—phone hmanga tih ‘sexting’ * te thlengin a tel a ni.

2. An naupan lai aṭangin i fate chu thu dik lo hrilhhriat an ni thei. Nu pakhat, Sheila-i chuan: “Anni chuan school an luh phat aṭangin mipat  hmeichhiatna chungchâng mi sawi chu an hria ang a, neihtîr i duh thlîr dân dik chu an nei lo vang,” tiin a sawi.

3. I fate chuan mipat hmeichhiatna lamah hriat duh an nei a, mahse an sawipui lo vang che. Brazil rama kum 15 mi Ana-i chuan: “Han sawi tâkah chuan, ka nu leh pate chu mipat hmeichhiatna chungchâng sawipui ṭan dân tûr ka hre thlâwt lo,” a ti.

Dik takin, fate hnêna mipat hmeichhiatna chungchâng sawipui chu nu leh pate hnêna Pathian pêk mawhphurhna zînga mi a ni a. (Ephesi 6:4) Chutianga sawipui chu in tân leh an tân pawh a nuam lo hle ngei ang. Mahse, a ṭha lam han thlîr chuan, ṭhalai tam tak chuan kum 14 mi Danielle-i thusawi: “Mipat hmeichhiatna chungchâng chu zirtîrtu emaw, TV program emaw aṭang ni lovin, kan nu leh pate hnên aṭanga zir chu kan duh a ni,” tih chu an thlâwp tlat a ni. Chuti chu, engtin nge he thu pawimawh tak, sawi nuam lo tak si hi i fate i sawipui theih ang? *

An Kum Upat Ang Mil Zêlin

Naupangte chuan inkulh hrang an nih ngawt loh chuan mipat hmeichhiatna chungchâng mi sawi an hre hma hle a. Chu aia pawi zâwk chu hêng “ni hnuhnûngahte” hian mi sualte chu “an sual zual deuh deuh” hi a ni. (2 Timothea 3:1, 13) Puitlingte’n naupang tam tak an khawih chingpen ṭhîn hi chu a pawi hle.

Chuvângin i fate chu an naupan hle lai aṭanga i zirtîr ṭan chu a pawimawh a ni. German rama Renate-i chuan: “An tleirâwl chhuah dâwn thlenga i nghah chuan, an zahzum hun lai a nih avângin tlang takin thu an sawi hreh thei a ni,” tiin a sawi. A pawimawh ber chu naupangte an kum upat ang mil zêla thil hrilh hi a ni.

School la kal lote tân: Serh hming dik tak zirtîr la, tumah khawihtîr loh a pawimawhzia sawi uar ang che. Mexico rama nu pakhat, Julia-i chuan: “Ka fapa chu kum thum mi lek a nih aṭangin ka zirtîr ṭan a. Zirtîrtute, nau awmtute, a nih loh leh a aia upa zâwk naupang dangte’n an tina thei tih ka hriatna ringawt pawh chuan ka rilru a tihah hle ṭhîn. Mahni invênhim dân a hriat a ngai a ni,” a ti.

HETI HIAN TICHHIN TEH: I fa chu mite’n a serh an khawih phal miah lo tûrin zirtîr rawh. Entîr nân, i fa chu hetianga sawi tûrin i zirtîr thei a ni: “Khawih suh! Ka sawi dâwn nia!” tiin. Sawi lo tûra thlêm emaw, vau emaw a nih pawhin, sawi chhuah ngei a ṭha tih i fa chu rinnghehtîr ang che.

Primary school kalte tân: Hêng hun chhûng hi i fa thil hriatte zawi zawia belhchhah nân hmang rawh. Pa pakhat Peter-a chuan: “Inbiakna i neihpui hmain an thil lo hriat tawh chen leh hriat belh an duh leh duh loh hre phawt la. Sawipui luih tum suh. I fate hun i hmanpui ziah chuan chu mi chungchâng pawh chu awlsam têin i sawipui thei ang,” tiin a sawi.

HETI HIAN TICHHIN TEH: Ṭum khata ‘rei tak sawipui’ ai chuan rei lo tê tê-in sawipui ngun zâwk ang che. (Deuteronomy 6:6-9) Chutiang chuan i fate chu thu tam takin i chîmbuai lo vang. Chu bâkah, an kum a lo upat a, an lo puitlin chhoh ang zêlin, an mamawh thute chu an hre chho zêl ang.

Tleirâwl chhuak chhote tân: Tûn hi i fa-in tisa lam, rilru lam, leh nungchang lama mipat hmeichhiatna nih phung zawng zawngte chungchânga a mamawh tâwk hriatna a nei a ni tih tihchian hun a ni. A thusawi kan lâk chhuah tâk kum 15 mi Ana-i chuan: “Kan school-a mipa leh hmeichhiate chuan mipat hmeichhiatna an hmang der tawh a. Kristian ka nih angin, he mi chungchâng hi ka hriat belh a ngai niin ka hria. Mipat hmeichhiatna chungchâng sawi chu zahthlâk hle mah se, ka hriat a ngai tlat a ni,” tiin a sawi. *

Fîmkhurna tûr: Tleirâwlte chuan an nu leh pate’n nungchang ṭha lova inhnamhnawih anga an ngaih an hlauh avângin, thil an zawh hreh phah thei a. Chutiang a nihzia chu Steven-a hian a hmu chhuak a ni. Ani chuan: “Kan fapa hian mipat hmeichhiatna chungchâng sawiho a hreh ṭan a. A hnuah chuan a nungchang kan ringhlel nia a hriat  vâng a ni tih kan hmu chhuak a. Chutiang kan sawipui chhan chu amah kan rinhlelh vâng ni hauh lovin, a chhehvêla thil ṭha lote do thei tûra thuam kan duh vâng a nihzia kan hrilh ta a ni,” tiin a sawi.

HETI HIAN TICHHIN TEH: I fa tleirâwl chhuak chu mipat hmeichhiatna chungchânga zawhna tlang taka zawh aiin, a school kalpuite thlîr dân chu zâwt zâwk ang che. Entîr nân, heti hian i sawi thei ang: “Tûn lai mi tam takte chuan kâa châkna inhrîkthlâksak hi mipat hmeichhiat hmanna ni chiah lovin an ngai a. Chu chu school-a i ṭhiante ngaih dân a ni ve em?” tiin. Chutiang thu khuh deuhva zawhna chuan i fa chu inhawng a, a thlîr dân zalên taka a sawitîr theih a rinawm hle.

Nuam Tih Lohna Hmachhawn Rawh

Fate mipat hmeichhiatna chungchâng sawipui chu nu leh pate tih tûr zînga tih nuam lo ber pâwl a ni ngei ang. Mahse, ṭan lâk erawh a phu hle a ni. Diane-i chuan: “A hnuah chuan, nuam tih lohna chu a rehin, i fa nêna mipat hmeichhiatna chungchâng sawi chu inlaichînna tinghettu a lo ni thei a ni,” tiin a sawi. Chu chu a hmaa a thusawi kan lâk tâk Steven-a chuan a pawm khawp mai. Heti hian a sawi a ni: “Chhûngkuaa lo chhuak eng chungchâng pawh hunbi neia sawihona neih ṭhin a nih chuan, sawi nuam vak lo mipat hmeichhiatna chungchâng ang chi-te pawh sawiho a awlsam phah ṭhîn. Nuam tih lohna chu a bo ṭhak thei lo va, mahse inhawng taka inbiak pawhna chu Kristian chhûngkaw hrisêl tak neih nân a pawimawh hle a ni,” tiin. (w10-E 11/01)

[Footnote-te]

[Phêk 14-naa bâwm/milem]

INZAWT RAWH . . .

Khawvêl hmun hrang hranga ṭhalaite thusawi hi chhiar la, chutah a hnuaia zawhnate hi inzâwt ang che.

• “Ka nu leh pate chuan mipat hmeichhiatna lam hawi thuziakte chhiar a, zawhna ka neihte zâwt tûrin min ti a. Mahse, min titipui thui deuh zâwk se ka ti ṭhîn khawp mai.”—Ana-i, Brazil.

Engvângin nge i fa hnêna lehkhabu chhiar tûr pêk mai chu tâwk lo nia i hriat?

• “Ka pa pawhin a hriat ka rin loh mipat hmeichhiatna chungchâng bawraw tak tak ka hre deuh ṭeuh mai a. Chu mi chungchâng chu zâwt ta ila a râp ngei ang.”—Ken-a, Canada.

I fa chuan amah tibuaitu thil chungchâng sawipui tûrin eng ang hlauhna nge a neih mai theih?

• “A tâwp a tâwpa mipat hmeichhiatna chungchâng zawhna pakhat ka nu leh pate ka zawh ngam tâkah chuan, min mawhpuh ang hrimin, ‘Engah nge chu mi chungchâng min zawh? Thil ṭha lo engemaw a thleng ta em ni?’ tiin min zâwt lêt a ni.”—Masami, Japan.

Mipat hmeichhiatna chungchânga i fain zawhna a zawh che hunah, engtin nge i lo chhân lêt dân chuan nakina sawihona tûr kawng a hawn a, a khâr tlat theih?

• “Ka nu leh pate’n keimah ang rual an nih lai hian ka zawhna neih ang an zâwt tho va, ka tân pawh zawhna zawh hi a mak lo tih min hrilh ṭhîn se ka ti ngawt mai.”—Lisette-i, France.

I fain mipat hmeichhiatna chungchâng ngaihngam taka a sawipui theih nân che engtin nge rilru râl muang taka i awmtîr theih?

• “Ka nu chuan mipat hmeichhiatna chungchâng chu aw dam takin min zâwt ṭhîn a. Chutianga tih chu naupangin thiam loh chantîr nia a inhriat loh nân a pawimawh hlein ka hria.”—Gerald-a, France.

Mipat hmeichhiatna chungchâng i sawipui hunah eng ang ṭawngkam nge i hman ṭhin? Insiam ṭhat i ngai em?