Thurûk 5

I Thlarau Lam Mamawh Phuhru Rawh

BIBLE-IN ENG NGE A ZIRTIR? “Thlarau lama an pachhiatzia inhriate chu an chan a ṭha e.”—Matthaia 5:3, C.L. Re-edited.

ENG NGE A HARSATNA? Sakhaw chi hrang sâng tam tak a awm a, a tam zâwk chuan thlarau lam mamawh phuhrûk dân kawng inkalh tak takte chu an zirtîr a ni. Khawi sakhuain nge thutak zirtîr a, Pathian tilâwm tak zet tih engtin nge i hriat theih ang? Lehkha ziaktu hmingthang ṭhenkhat chuan Pathian rin leh a hnêna inpumpêk chu a âtthlâkin, a hlauhawm hial niin an sawi a. Maclean’s magazine chuan Pathian awm ring lotu mi lâr tak pakhat ngaih dân chu hetiang hian a khaikhâwm a ni: “Science thiamna piah lam leh tûna kan nunna piah lamah nunna awm nia hriatna he Kristian thurin hian . . . kan nun neih lai mêk hlutna a tikiamin, tharum thawh duhna min neihtîr a ni,” tiin.

ENG NGE I TIH THEIH? Pathian a awm tih finfiahnate chu bih chiang rawh. (Rom 1:20; Hebrai 3:4) Hêng thil pawimawh tak tak: Eng nge kan pian chhan? Thih hnuah nunna a la awm em? Engvângin nge hrehawm tawrhna a tam êm êm? Eng nge Pathianin min phût? tih ang chi zawhnate chhânna zawng lo tûrin tuma’n tilunghnual che suh se. Chûng zawhnate chhânna lungawithlâk tak hmuh chu chatuan lungawina i hmuh nân a pawimawh hle si a.

Mahse, mi dang sawi apiang chu pâwngpaw rin mai suh. Pathian Thu chuan a lawm tlâk thilte hriat fiah theih nâna “ngaihruat thiamna” hmang tûrin a fuih che a ni. (Rom 12:1, 2, New World Translation) Chutianga hmang tûra ṭan i lâk chuan malsâwmna i dawng ang. Bible zir nâna hun i insiam a, a fuihna thu ṭha tak takte i nunpui chuan buainate i pumpelhin, lungkham i nei tlêm sawt ang a, i hlimna a pung bawk ang. Hei hi duhthusâm thil mai a ni lo. Mi chi hrang hrang maktaduai têlte chuan Pathian leh a thiltumte chungchâng thutak zirna chu an hlâwkpui hle a ni.

Bible fuihna thu fing takte mila nun i hlâwkpui hian, Pathian hnêna i inpêkna chu a nasa zual ang. Engvângin nge Jehova Thuhretute nêna Bible zir tûra sâwmna chu i pawm loh vang? Chu sâwmna i pawm chuan: “Pathian ngaihsakna hi lungawina tel zawngin hlâwkna nasa tak a ni rêng a ni,” tia tirhkoh Paula ziah hi i pawmpui ve ngei ang.—1 Timothea 6:6. (w10-E 11/01)

[Phêk 8-naa milem]

Pathian lawm tlâk chu eng nge a nih hre fiah rawh