Isua Angin Lusûnte Hnêm Rawh

BETHANI khuaa mi Lazara chu thih ngamin a na a. A unaunu, Mari leh Marthi te chuan chu mi chanchin hriattîr tûrin an ṭhian Isua hnênah mi an tîr a ni. Mahse, a natna chuan Lazara nun chu a la ta mai si. Thlâna zalh a nih tâkah chuan, an ṭhiante leh ṭhenawmte chu Mari leh Marthi ‘thlamuan tûrin’ an va lêng a ni. (Johana 11:19) A tâwpah Isua chu Bethani khua a lo thleng ta nge nge a, a ṭhiante hmu tûrin a va kal a. Chuta a thusawi leh thiltihte ngaihtuahna aṭangin lusûnte hnem dân tûr chungchângah thil engemaw tak kan zir thei a ni.

Va Inlanna Chuan I Ngaihsakzia A Lantîr

Bethani thleng tûr chuan Isua chu Jordan Lui kânin, Jeriko ata tlâng ram kawng chho invêt kualah ni hnih lai kea a kal a ngai a. Marthi chu Isua va hmuak tûrin khaw pâwnah a va tlân chhuak nghâl a. A hnuah, Mari’n Isua a lo kal tih a hriat chuan ani pawh chuan hmanhmawh takin a va hmu ve ta a ni. (Johana 10:40-42; 11:6, 17-20, 28, 29) Isua va inlanna chuan  lungngaihnain a tlâk buak chûng unaunute chu a thlamuanin, a hnêm ngei ang.

Tûn laiah pawh, kan va inlanna chuan lusûnte chu a hnêm thei a. An fapa kum ruk mi Theo-a accident avânga sûntu Scott-a leh Lydia-i te chuan: “Chhûngte leh ṭhiante ṭanpuina kan mamawh a. Zan laiah lo kalin, damdawi in lamah an rawn tlang nghâl a,” tiin an sawi. Chûng an ṭhiante chuan eng nge an sawi? “Chutih lai tak chuan an ṭawngkam kan mamawh lo. An lo inlanna chuan engkim a sawi a ni—mi an ngaihsak tih chu,” tiin an sawi belh bawk.

Bible chuan, Isua’n Lazara ṭahtute a hmuhin a “lungngai a, . . . a ṭap ta,” tih min hrilh a ni. (Johana 11:33-35, 38) Isua chuan mi dang hmaa mittui tihtlâk chu pa lohnaah a ngai lo. Ani chuan an tawrhna chu tawrhpuiin, an chân chu a chânpui ve a ni. Eng nge kan zir tûr chu ni ta? Lusûn ina kan va lên hian ṭapte ṭahpui chu kan zak tûr a ni lo. (Rom 12:15) Kawng lehlamah chuan, lusûnte ṭahtîr kher erawh kan tum tûr a ni lo. Ṭhenkhat chuan mipui hmaa ṭah chu an duh lo thei a ni.

Khawngaihna Nên Ngaithla Rawh

Isua chuan Mari leh Marthi hnênah hnemna thusawi tûr chu a nei ngei ang a, mahse anni chu thu a sawi hmasaktîr a ni. (Johana 11:20, 21, 32) Marthi a han biak ṭan chuan, zawhna a zâwt a, a chhân dân chu a ngaithla a ni.—Johana 11:25-27.

Ngaithlatu ṭha nihna chuan ngaihsakna dik tak a lantîr a. Lusûnte hnêm tûr chuan, ngaithlatu ṭha nih a ngai a ni. Lusûnte’n thu an sawi belh nâna zawhnate zawh belhin ngaithlatu ṭha kan ni thei a. Amaherawhchu, ngawi renga awm an duh zâwk a nih chuan biak ṭawng chu tum lui lo vang che. Anni chu an chauvin, chawlh hahdam an mamawh pawh a ni thei si a.

Lusûnte chu an rilru a chawmawlhin, an sawi tawh sate pawh an sawi nawn fo thei a. Ṭhenkhat chuan an rilru veizâwng chu an sawi chhuak a ni. Mari leh Marthi chuan Isua hnênah: “Lalpa, heta awm ni la chu ka nuṭa a thi lo tûr,” an ti ve ve a ni. (Johana 11:21, 32) Isua’n eng nge a tih? Dawh thei tak leh khawngaihna nên a ngaithla a ni. An rilru vei dân tûr hrilh chu a tum lo. Lusûnte chuan nasa takin rilru hrehawmna an tuar tih a hre chiang si a.

Lusûnte va tlawh huna thusawi tûr i hriat loh chuan, thil sawi duh an neihte ngaihthlâk i duh thu hriattîrin titipui ṭan ang che. Tichuan, an thusawi chu ngun takin ngaithla la. I thu ngaihthlâkah chuan chêng rawh. Lusûntu chu en tlatin, a rilru veizâwng chu hriat tum ang che.

Lusûntu rilru veizâwng hriat chu thil harsa tak a ni thei a. Lydia-i chuan: “Kan thil mamawh chu a inthlâk a. A châng chuan inlêngte hmaah insûm thei lovin kan ṭap chhuak hawm hawm mai ṭhîn. Mi dangte chu min hre thiam tûr leh min fuih tûrin kan duh a. Kan ṭhiante chuan kan rilru vei dân chu theih tâwp chhuaha hriat thiam an tum a ni,” tiin a sawi.

Isua chuan chûng chu ṭha famkim takin a ti a. Ani chuan mi tinin “hri vei emaw, . . . lungngaihna emaw” an nei tih a hria a ni. (2 Chronicles 6:29) Isua chuan Lazara unaunu pahnihte chibaina thu thuhmun chu a chhân lêt dân a inang lo. Marthi chuan thu a sawi zawm avângin a be zawm a. Mari chu a ṭah avângin a be tam lo thung. (Johana 11:20-28, 32-35) A hnên aṭangin eng nge kan zir theih? Inbiakna kawnga lusûntu  hmahruaitîr chu a ṭha ber mai thei a. An lungngaihna an sawite ṭha taka i lo ngaihthlâksakna chuan a hnêmin a thlamuan thei hle a ni.

Tidamtu Ṭawngkamte

Mari leh Marthi chuan: “Heta awm ni la chu,” an tih khân, Isua chuan tumah a mawhpuh lo va, an thusawi chu a haw hek lo. Marthi hnênah chuan: “I nuṭa a tho leh ang,” tih thu thlamuanthlâk tak hi a sawi zâwk a ni. (Johana 11:23) Hêng ṭawngkam tlêm tê hmang hian, Isua chuan ani chu nakin hun thlîr tûra ṭanpuiin, beisei tûr a awm tih a hriatnawntîr a ni.

Lusûnte i biak hian, tlêm tê pawh ni se rilru tih tak zeta thu ṭha tak sawi chu a sâwt hle thei tih hre reng ang che. Hnemna thute chu sawi chhuah emaw, ziak chhuah emaw theih a ni a. Lehkha thawn leh card-te chu chhiar nawn fo theih a nih avângin, hun rei tak chhûng mi a thlamuan thei a ni. A pasal, Bob-a a thih hnu thla kuaah, Kath-i chuan a card dawn zawng zawng chu a chhiar leh vek a. “Chutih hun lai chuan thlamuanna min pêk avângin atîr aiin min ṭanpui lehzualin ka hria,” tiin a sawi a ni.

Tawrhpuina thuziakah chuan eng thute nge i telh theih? Mitthi ta chanchin—amah nêna in thiltawn emaw, a mize duhawm i ngaihhlut tak emaw—chu i ziak tel thei ang. Kath-i chuan: “Bob-a leh a mizia chungchâng thu ṭha tak ziakte chuan min ṭah nuihtîr a. A thiltawn nuihzatthlâk tak takte chuan min tinuiin, hlim taka kan awm laite min hriatchhuahtîr a ni. Ka card duh tam takte zîngah chuan Bible châng chuannate pawh a awm nual mai,” tiin a sawi.

Ṭanpuina Ṭangkai Tak Pe Rawh

Lazara chhûngkua ṭanpui tûrin Isua chuan kan tih theih loh tûr thil a ti a. Lazara chu a kaitho a ni. (Johana 11:43-44) Mahse, kan tih theih ang chin ei rawng bâwlsak te, mi khual lo thlen te, insûksak te, naupang lo enkawlsak te, mamawh châkkhai lei tûra kalsak te, a nih loh leh kal vêlna tûr ruahmansak te ang chite chu kan tihsak thei a ni. Hmangaihna dik târ langtu thiltih mâwl mang takte chu lusûntute chuan an hlut hle ngei ang.

Lusûnte chuan mahni chauhva awm duh châng pawh an nei ve ngei ang. Mahse, anmahni be pawp tûrin a ṭûl angin hma ila thei tho a ni. Lusûn nu pakhat chuan: “Lungngaih hun chhûng tûr bituk chin a awm lo va, a reh hun tûr ni ruat lah a awm hek lo,” a ti. Ṭhenkhat chuan lusûnte chu ni pawimawh bîk, inneih champha emaw, thih champha emawa hriat chhuah chu an tum a. Chutiang huna i awmpui theih chuan, hun harsat laia an ṭhian ṭha hlu tak i ni mai ang.—Thufingte 17:17.

Isua pêk thlamuanna thu-ah chuan a zirtîrte a hrilh beiseina: “Kan ṭhian Lazara chu a muhîl ta a; a mihîl kai harh tûrin ka kal dâwn a ni,” tih pawh a tel a ni. (Johana 11:11) Isua chuan a hnungzuitute hnênah thihna ata thawhlehna a awm dâwn tih a tiam a. Marthi hnênah chuan: “Chu thu chu i ring em?” tiin a zâwt a. Ani chuan: “Ring e, Lalpa,” tiin a chhâng a ni.—Johana 11:24-27.

Isua’n mitthite a kaitho dâwn tih i ring em? I ring a nih chuan, he beiseina hlu tak hi lusûnte hrilh la. An hnênah ṭanpuina ṭangkai tak pe bawk ang che. Chutiang chuan, i thusawi leh thiltih chuan anni chu nasa taka thlamuanin, a hnêm dâwn nia.—1 Johana 3:18. (w10-E 11/01)

[Phêk 9-naa map]

(A lan dân tûr dik tak hriat nân, a lehkhabu en rawh)

PEREA

Jordan Lui

Jeriko

Bethani

Tuipui Al

Jerusalem

SAMARIA