Thurûk 1

Mite Hmangaih Rawh, Tangka Sum leh Thilte Ni Lovin

BIBLE-IN ENG NGE A ZIRTIR? “Tangka sum ngainat hi sual tinrêng bul a ni.”—1 Timothea 6:10.

ENG NGE A HARSATNA? Thil thar fak mawitute chuan kan thil neiha lungawi lo tûrin min nawr a. Thil thar zâwk, ṭha zâwk, leh man tam zâwk kan lei theih nâna hna thawk ngawrh tûrin min duh a ni. Tangka sum hian mi a thlêm thei hle a, awlsam takin kan ngaina thei a ni. Mahse, hausak ngainatu chuan lungawina a hmu tak tak ngai dâwn lo tih Bible chuan min hrilh a. Lal Solomona chuan: “Tangka sum ngainatu chuan tangka sumah duhtâwk a hmu lo vang a, hausak ngainatu chuan duhtâwk a hlêp hek lo vang,” tiin a ziak a ni.—Thuhriltu 5:10.

ENG NGE I TIH THEIH? Isua entawnin thil aia mihringte hmangaih dân zir rawh. Isua chuan mite a hmangaih avângin a neih zawng zawng—a nunna hial pawh—chân a inhuam a. (Johana 15:13) Heti hian a sawi a ni: “Eng lo lâk aiin pêkin lukhâwng a nei zâwk,” tiin. (Tirhkohte 20:35) Kan hun leh thil neihte mi dangte hnêna kan pêk chuan, mite pawhin chutiang bawkin min pe ve ang. Isua chuan: “Pe rawh u, chutichuan pêkin in awm ang,” a ti. (Luka 6:38) Tangka sum leh thil neih tumtute chuan lungngaihna leh hrehawmna nasa tak an tawrh phah ṭhîn. (1 Timothea 6:9, 10) Kawng leh lamah chuan lungawina dik tak chu mite hmangaihna neih leh an hmangaihna dawnna aṭanga lo awm a ni.

Engvângin nge i nun i tihsamkhai theih leh theih loh chu i ngaihtuah loh vang? I thil neih tawhte emaw, neih belh i tumte emaw chu i titlêm thei em? I tihtlêm theih chuan, nuna thil pawimawh zâwk, mite ṭanpui nân leh i thil neih zawng zawng petu che Pathian rawng bâwl nân hun leh tha tam zâwk i nei thei ang.—Matthaia 6:24; Tirhkohte 17:28. (w10-E 11/01)

[Phêk 4-naa milem]

“Pe rawh u, chutichuan pêkin in awm ang”