Pathian Thlarauva Kaihhruai Lal Hnên Aṭangin Malsâwmna Dawng Rawh!
Pathian Thlarauva Kaihhruai Lal Hnên Aṭangin Malsâwmna Dawng Rawh!
“Lalpa thlarau . . . a chungah a fu ang.”—IS. 11:2.
1. Mi ṭhenkhatin khawvêl buaina an lungkhamzia engtin nge an sawi chhuah?
“POLITICS leh khawtlâng inrêl bâwlna lama buai nuai nuaina leh chhehvêl boruak ṭhat lohna khawvêlah hian engtin nge mihringte hi kum 100 dang an la awm theih ang?” Hetiang hian arsi leilung chanchin zir mi (astrophysicist) Stephen Hawking-a chuan kum 2006 khân a lo zâwt a. New Statesman chanchinbu-a thuziak pakhat chuan: “Retheihna kan la nuai bo lo va, khawvêl remna lah kan la siam hek lo. Chu mi kalh chiah chu kan tihlawhtling zâwk mah niin a lang. Retheihna nuai bo leh khawvêl remna siam kan tum lo chu a ni bîk lo. Sumdâwnna zawng zawng sawrkâr kuta dahna Communist sawrkârna aṭanga mi mal kuta dah vekna Capitalist sawrkârna thleng; indona tihtâwp nâna League of Nations dinna aṭanga chu mi atân vêka nuclear râlthuam chhêk khâwmna thlengin kan tichhin vek tawh. Indona tihreh dân hria anga inngaiin, ‘indona tihtâwp nân’ vawi tam tak kan indo tawh bawk,” a ti.
2. Engtin nge Pathian Jehova chuan lei chungah a lal chungnunna a lantîr thuai ang?
2 Chûng thute chu Jehova chhiahhlawhte chuan mak an ti hran lo. Bible chuan mihringte hi mahnia ro inrêl tûra siam an nih loh thu min hrilh a. (Jer. 10:23) Pathian Jehova chauh hi kan Lal Chungnungber ni tûra dikna neitu awmchhun a ni. Chutiang a nih avângin, ani chuan kan tâna tehna siam tûr te, kan nunin tum a neih tûr te, leh chu thiltum lama min kaihruai tûr tein dikna a nei a ni. Chu bâkah, mahnia ro inrêl tum hlawhtling si lo mihringte rorêlna chu a thuneihnain a rawn titâwp thuai ang. Chutih rual chuan, a lal chungnunna hnâwla sualna te, famkim lohna te, leh “he khawvêl pathian,” Diabol-Setana hnuaia intukluh thlangtu zawng zawngte pawh a tiboral bawk ang.—2 Kor. 4:4.
3. Isaia’n Messia chungchângah eng nge a sawi lâwk?
3 Khawvêl thar Paradis-ah chuan Jehova lalchungnunna duhawm tak chu mihringte chungah Messia Lalram hmanga lantîr a ni ang. (Dan. 7:13, 14) Chuta Lalber tûr chungchângah Isaia chuan heti hian a sawi lâwk a ni: “Jesaia bul aṭangin chawrno a lo chhuak ang a, a zung aṭangtea puak chhuak chu a rah ang: tin, LALPA thlarau—finna leh hriat theihna thlarau, remruatna leh chakna thlarau, hriatna leh LALPA ṭihna thlarau chu—a chungah a fu ang,” tiin. (Is. 11:1, 2) Eng kawngin nge Pathian thlarau thianghlim chuan ‘Jesaia bul aṭanga chawrno lo chhuak’—Isua Krista chu—mihringte chunga rorêl tûra a tlintîr? A rorêlna hnuaiah chuan eng malsâwmnate nge thleng ang? Chûng malsâwmnate dawng thei tûr chuan eng nge kan tih ngai?
Rorêl Tûrin Pathianin A Tlintîr
4-6. Hriatna pawimawh tak eng hian nge Isua chu Lal, Puithiam Lal, leh Rorêltu fing leh khawngaihna ngah tak nihtîr ang?
4 Pathian Jehova chuan a khua leh tuite chu finna leh khawngaihna nei Lalber, Puithiam Lal, leh Rorêltu kaihhruaina hnuaia an ṭhat famkim chhoh chu a duh a. Chuvângin, chûng mawhphurhna pawimawh takte chelh thei tûra a thlarau thianghlima a tlintîr Isua Krista chu a thlang a ni. Isua’n Pathian pêk mawhphurhnate famkim takin a hlen chhuak ang tih kan rin theih chhan ṭhenkhat i lo ngaihtuah ang u.
5 Isua chuan Pathian a hre chiang ber. Pa hriatna nei hmasa ber chu Fapa mal neih chhun hi a ni a, a hriatna chu kum tlûklehdingâwn tam taka rei pawh a ni thei ang. Chutih chhûng chuan, Isua’n Pathian Jehova hriatna famkim a lo neih tâk avângin, ani chu “hmuh theih loh Pathian anpui” tiin a sawi theih hial a ni. (Kol. 1:15) Amah Isua ngei pawhin: “Tupawh mi hmu chu Pa hmu a ni,” tiin a sawi.—Joh. 14:9.
6 Pathian Jehova hnuai chiah a nih angin, Isua chuan mihringte pawh tiamin, thil siam zawng zawngte chu a hre chiang hle. Kolossa 1:16, 17-ah heti hian kan chhiar a ni: “Amahah [Pathian Fapaah] chuan engkim siam a ni a, vâna awmte, leia awmte nên, hmuh theihte, hmuh theih lohte nên, . . . ani hi chu engkim awm hmain a awm rêng a ni, amahah chuan engkim a ding ho bawk,” tiin. Han ngaihtuah teh! Isua chu Pathian “mi themthiam” a nih angin thil dang zawng zawng siamnaah a tel a. Chuvângin, mihring thluak mak tak pawh tiamin, lei leh vâna thil zawng zawng hi a hre thiam vek a ni. Ni e, Krista chu finna anga sawi theih a ni ngei mai!—Thuf. 8:12, 22, 30, 31.
7, 8. Engtin nge Pathian thlarau chuan Isua chu a rawngbâwlnaah a ṭanpui?
7 Isua chu Pathian thlarau thianghlima hriak thih a ni. Isua chuan: “Riangvaite hnênah chanchin ṭha hril tûra mi ruat avângin Lalpa thlarau chu ka chungah a awm; ani chuan salte hnêna chhuahna thu leh, mitdelte hnêna mitvâr neih lehna thu sawi tûr te, tihduhdah tuarte chhuahtîrna tûr te, Lalpa lungawi kum thu sawi tûr tein, mi tîr a ni,” tiin a sawi a. (Lk. 4:18, 19) Baptisma a chan khân, thlarau thianghlim chuan Isua chu Messia anga leia rawng a bâwl chhûnga Pathianin hlen chhuak tûra a duhte pawh tiamin, mihring a lo nih hmaa a thil zir zawng zawngte a hriat chhuahtîr a nih hmêl hle.—Isaia 42:1; Luka 3:21, 22; Johana 12:50 chhiar rawh.
8 Isua chu thlarau thianghlima tihchak leh taksa leh rilru ṭha famkim nei a nih avângin, nung dam tawh zînga mi ropui ber a nih mai bâkah, Zirtîrtu ropui ber a ni bawk. A nihna takah chuan, a thu ngaithlatute chuan ‘a thu zirtîr chu mak an ti hle a.’ (Mt. 7:28) A chhan pakhat chu, Isua chuan mihringte buaina bul ber—sual, ṭhat famkim lohna, leh Pathian hriatna an tlâk chhamna—chungchâng a sawi theih vâng a ni a. Tin, mite thinlung a hriat theih bâkah, chu mi azira anmahni a dâwr vâng a ni bawk.—Mt. 9:4; Joh. 1:47.
9. Leia a awm laia a thil tawnte ngaihtuahna chuan engtin nge Rorêltu anga Isua i rinna a tihzual?
9 Isua chu mihring angin a nung. Mihring anga a thiltawn leh mi ṭha famkim lote nêna an khawsakho ṭhinna chuan Isua chu Lal nih tling tûrin a ṭanpui nasa hle. Tirhkoh Paula chuan heti hian a ziak a ni: “[Isua chu] mite tân sual thupha chawina siamsak tûrin, Pathian lam thilahte chuan puithiam Lalber mi lainat thei leh rinawm tak a nih theih nân, engkima a unaute anga lo awm chu a tân a ṭûl rêng a ni. Amah ngei chuan thlêmna tâwkin a lo tuar tawh avângin thlêmna tâwkte chu a ṭanpui thei a ni,” tiin. (Heb. 2:17, 18) Isua chu ‘thlêmna tâwk’ tawh a nih avângin thlêmna tâwkte chu a hre thiam thei a. Khawngaihna a ngahzia chu he leia rawng a bâwl chhûng khân chiang takin a lang a ni. Dam lo te, piangsual te, hnehchhiaha awm te—leh naupangte—pawhin ani chu pan nuam an ti a. (Mk. 5:22-24, 38-42; 10:14-16) Thuhnuairawlhte leh thlarau lama rilṭâmte pawh chu a lama hîpin an awm bawk. Kawng leh lamah chuan, mi chapo te, intivei te, leh ‘Pathian hmangaihna nei lote’ chuan ani chu an hnâwlin, an hua a, an dodâl thung a ni.—Joh. 5:40-42; 11:47-53.
10. Eng kawng ropui takin nge Isua’n min hmangaihzia a târ lan?
10 Isua chuan kan tân a nun a pe. Rorêltu atâna Isua a tlin chhan ber chu kan aia thih a inhuamna hi a ni ngei ang. (Sâm 40:6-10 chhiar rawh.) Krista chuan: “Mihringin a ṭhian aia a nun a paih aliama hmangaihna nasa zâwk tuman an nei lo,” tiin a sawi. (Joh. 5:13) Ni e, an mi leh sate chan ai eia intilian ṭhîn mihring rorêltute ang lo takin, Isua chuan mihringte tân a nun a pe a ni.—Mt. 20:28.
Tlanna Hlâwkna Hmang Tûra Thuneihna Pêk
11. Engvângin nge Isua chu min Tlantu anga kan rin thlap theih?
11 Puithiam Lalber a nih angin, a tlanna hlâwkna hmang tûra Isua’n hma a hruai chu a va inâwm tak êm! Dik takin, leia rawng a bâwl chhûng khân Isua chuan min Tlantu a nih anga Kum Sâng Rorêl chhûnga a thil tih tûrte a lo entîr lâwk a, kan rinawm phawt chuan chûng a thil tih tûrte chu kan chên thei ang. Ani chuan dam lote leh piangsualte a tidam a, mitthite a kaitho va, mipui a hrai puar bawk a, thli leh dîl te pawh a thunun hial a ni. (Mt. 8:26; 14:14-21; Lk. 7:14, 15) Chûng thilte a tih chhan chu a thuneihna leh thiltihtheihna lantîr nân ni lovin, a khawngaihna leh hmangaihna lantîr nân a ni zâwk. Phâr pakhatin tihdam a ngen khân: “Ka duh e,” tiin a chhâng a ni. (Mk. 1:40, 41) Isua chuan Kum Sâng Rorêl chhûngin chutiang khawngaihna bawk chu khawvêl pum puiah hian a lantîr dâwn a ni.
12. Engtin nge Isaia 11:9 thu hi a thlen famkim ang?
12 Krista leh a rorêlpuite chuan Isua’n kum 2,000 chuang kal taa a lo ṭan tawh thlarau lam zirtîr rawngbâwlna chu an chhunzawm bawk ang. Tichuan, Isaia 11:9 thu: “Tuite hian tuifinriat a khuh reng angin, leilung hi LALPA hriatnain a khat zo vek dâwn a ni,” tih hi a thleng famkim tawh ang. Chu thlarau lam inzirtîrnaah chuan atîra Adama hnêna pêk ang, lei leh a chhûnga chêng nunna nei chhiar sên lohte enkawl dân pawh a tel ngei ang. Kum 1,000 tâwpah chuan, Genesis 1:28-a sawi Pathianin a tîra a thiltum chu a famkim tawh ang a, tlanna inthawina chu a kima hman a ni tawh ang.
Rorêl Tûra Thuneihna Pêk
13. Engtin nge Isua chuan felna a ngainatzia a târ lan?
13 Krista chu “mitthite leh mi nungte chunga Rorêltua Pathian ruat chu a ni.” (Tirh. 10:42) Chuti chu, Isua chu thi thei lo, felna leh rinawmna kâwnghrêna hmangtu a ni tih hriat chu a va thlamuanthlâk tak êm! (Is. 11:5) Duhâmna te, vervêkna te, leh thil ṭha lo dangte a huatzia a târ lang a, mi dang hrehawm tawrhna lo diriam chîngte chu a dem a ni. (Mt. 23:1-8, 25-28; Mk. 3:5) Chu bâkah, Isua chu pawn lam lan dân mai maia bum theih a ni ve lo, ani chuan “mihring chhûnga awm apiang chu a hre si a.”—Joh. 2:25.
14. Eng kawngin nge Isua chuan felna leh rorêl dikna a ngainatzia tûnah a lan chhuahtîr a, eng zawhnate nge kan inzawh ang?
14 Isua chuan khawvêl puma thu hrilh leh zirtîrna campaign ropui ber chu enkawlin, felna leh rorêl dikna a ngainatzia chu a lantîr chho zêl a. Pathian lungawi thlenga he rawngbâwlna thawh zawhna tûr chu mihring tumah, eng sawrkâr mah, eng thlarau suaksual mahin a titâwp thei lo. Chuvângin, Armageddon zawhah chuan Pathian rorêl dikna a ding chang ang tih kan ring tlat thei a ni. (Isaia 11:4; Matthaia 16:27 chhiar rawh.) Heti hian inzâwt rawh: ‘Ka rawngbâwlnaa mite chungah Isua rilru put hmang ang ka lantîr em? Ka hrisêlna leh mi mal dinhmunte avângin ti ṭha thei lo mah ila, Pathian Jehova hnênah ka theih ang tâwka ṭha ka pe em?,’ tiin.
15. Eng kan hriat rengnain nge theih tâwpa Pathian rawngbâwl tûra min ṭanpui thei?
15 Thu hrilh rawngbâwlna chu Pathian hna a ni tih kan hriat reng chuan thinlung zawng zawnga rawngbâwl tûra ṭanpui kan ni ang. Ani chuan thu hril tûrin thu min pe a; a Fapa kal tlangin min kaihruai a; chuta telte chu a thlarau hmangin a tichak a ni. Thlarauva kaihhruai a Fapa ruala Pathian hnathawhpui i nih theihna chanvo chu i hlut em? Pathian Jehova tih loh tu dangin nge “lehkha thiam lo, mi mâwl tak” anga ngaih mi maktaduai sarih aia tamte chu ram 236-a Lalram thuchah puang tûra chêttîr thei ang?—Tirh. 4:13.
Krista Kal Tlangin Malsâwmna Dawng Rawh!
16. Genesis 22:18 hian Pathian malsâwmna chungchângah eng nge a târ lan?
16 Pathian Jehova chuan Abrahama hnênah: “Ka thu i âwih tâk avângin i thlahah chuan khawvêla chi tin an la thawveng ang,” tih a hrilh a ni. (Gen. 22:18) Hei hian Pathian leh a Fapa rawngbâwl ngaihlu tute’n Messia rawn thlen tûr malsâwmnate chu an beisei tlat thei tih a târ lang a. Anni chuan chûng malsâwmna an dawn tûrte chu rilrua vawng rengin, ṭhahnemngai takin Pathian rawng an bâwl a ni.
17, 18. Deuteronomy 28:2-ah Pathian Jehova thutiam eng nge kan hmuh a, chu chuan kan tân eng awmzia nge a neih?
17 Ṭum khat chu Pathianin Abrahama thlah, Israel hnam hnênah: “LALPA in Pathian chu in pawm phawt chuan hêng malsâwmna [Dân thuthlunga târ lan] zawng zawngte hi in chungah a lo awm ang a, a zui zêl ang che u,” tiin a hrilh a. (Deut. 28:2) Tûn laia Pathian chhiahhlawhte chungchâng pawh chutiang bawka sawi theih a ni. Pathian Jehova malsâwmna dawn i duh chuan, a thu “pawm” zêl ang che. Tichuan, a malsâwmna chu ‘i chungah a lo awm ang a, a zui zêl ang che.’ A nih leh, “pawm” zêlnaah chuan engte nge tel?
18 Pawmnaah chuan Pathian min pêk Bible leh thlarau lam chawte ngun taka ngaihtuahna a tel a. (Mt. 24:45) Pathian leh a Fapa thu âwih pawh a tel bawk a ni. Isua chuan: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titu erawh chu an lût ang,” tiin a sawi. (Mt. 7:21) Tin, Pathian thu pawmnaah chuan a ruahmanna anga kohhran upa, ‘mihringte hnêna thilpêkte’ hnuaia inhuam taka intukluh pawh a tel bawk.—Eph. 4:8.
19. Engtin nge malsâwmna kan dawn theih ang?
19 Chûng ‘mihringte hnêna thilpêkte’ zîngah chuan Kristian kohhran zawng zawng aiawhtu Governing Body member-te pawh an tel a. (Tirh. 15:2, 6) Dik takin, Krista thlarau lam unaute chunga kan rilru put dân chuan hrehawm nasa tak lo thlen huna kan chungthu rêlnaah kawng ro a su hle dâwn a ni. (Mt. 25: 34-40) Chuvângin, malsâwmna kan dawn theih dân kawng khat chu Pathian hriak thihte rinawm taka thlâwp hi a ni.
20. (a) ‘Mihringte hnêna thilpêkte’ mawhphurhna bulpui ber chu eng nge ni? (b) Engtin nge chûng unaupate kan hlutzia kan lantîr theih?
20 ‘Mihringte hnêna thilpêkte’ zîngah chuan thlarau thianghlim ruat, Branch Committee member-te, bial kantute, leh kohhrana upate pawh an tel a. (Tirh. 20:28) Hêng unaute mawhphurhna bulpui ber chu ‘rinna leh Pathian Fapa hriatna kawnga thu khat vua a, puitling a, Krista famkimna lenzia tluka an zaa an lo awm hma loh zawnga’ Pathian mite tihchak chu a ni. (Eph. 4:11-13) Anni chu keimahni ang bawka ṭha famkim lo an ni ngei a. Mahse, hmangaih taka min enkawlna chu kan hlut a, kan zawm chuan malsâwmna kan dawng ang.—Heb. 13:7, 17.
21. Engvângin nge Pathian Fapa thu kan zawm chu a hmanhmawhthlâk?
21 Nakin lawkah Krista chuan Setana khawvêl suaksual tak hi a rawn tichhe dâwn a. Chu mi a lo thlen hun chuan, kan nun chu Krista rorêlnaah a innghat ang; ani chu sawi lâwk “mipui tam tak” ‘nunna tuikhurahte hruai’ tûra Pathianin thu neihna a pêk tawh avângin. (Thup. 7:9, 16, 17) Chuvângin, tûnah hian Pathian Jehova thlarauva kaihhruai Lal hnênah inhuam tak leh lâwm takin i intulût ang u. (w10-E 12/15)
Eng Nge Kan Zir . . .
• Isaia 11:1-5 aṭangin?
• Marka 1:40, 41 aṭangin?
• Tirhkohte 10:42 aṭangin?
• Genesis 22:18 aṭangin?
[Zirlai Atâna Zawhnate]
[Phêk 25-naa milem]
Isua khawngaihna ngahzia chu Jaira fanu a kaih thawh aṭang khân a lang
[Phêk 26-naa milemte]
Isua Krista chuan khawvêl puma thu hrilh leh zirtîrna campaign ropui ber a enkawl