Fiahna Eng Pawh Hneh Thei Tûra Tihchak
Fiahna Eng Pawh Hneh Thei Tûra Tihchak
“Mi tichaktuah chuan engkim ka ti thei a ni.”—PHIL. 4:13.
1. Engvângin nge Jehova mite chuan harsatna tam tak an tawh?
JEHOVA mite chuan hrehawmna eng engemaw chu an tâwk deuh reng a. Fiahna ṭhenkhat chu kan ṭhat famkim loh vâng emaw, kan awmna khawvêl suahsual vâng emawin kan tâwk a. A dangte chu Pathian rawngbâwltute leh bâwl lotute inhmêlmâkna avânga lo awm a ni. (Gen. 3:15) Mihring chanchin inṭan tirh aṭangin, Pathian chuan a chhiahhlawh rinawmte chu sakhuana avânga tihduhdahna hmachhawn thei tûr te, ṭhiante nêksâwrna hlauhawm tak do thei tûr te, leh harsatna chi hrang hrang dangte tuar thei tûrin a ṭanpui a. A thlarau thianghlim chuan chutiang bawkin min tichak thei a ni.
Sakhuana Avânga Tihduhdahna Hmachhawn Thei Tûra Ṭanpuina
2. Sakhuana avânga tihduhdahna thiltum chu eng nge ni a, eng angin nge a lo kal theih?
2 Sakhuana avânga tihduhdahna chu an rinna leh thurin avânga tum reng chunga mite tihbuai emaw, tihnat emaw hi a ni a. A tum chu chutiang thurin paih bo, an sawi darhna tûr khuahkhirh, a nih loh leh chutiang ringtute rinawmna tihchhiatsak hi a ni. Tihduhdahna chu chi hrang hrangin a lo kal thei a, a ṭhen hi a langsârin, a ṭhen hi hriatthiam a harsa a ni. Bible chuan Setana beihna chu sakeibaknei vânglai leh rûlrial beihna ang nên a khaikhin a ni.—Sâm 91:13 chhiar rawh.
3. Sakeibaknei leh rûlrial beihna ang tihduhdahnate chu engte nge?
3 Sakeibaknei kawlh tak ang maiin, Setana chuan tharum thawhna te, tân ina khungna te, a nih loh leh khap behna te hmangin hmaichhana beihna a hmang fo va. (Sâm 94:20) Tûn lai huna Jehova Thuhretute rawngbâwlna chanchin chuanna Yearbook-ah chuan chutiang tih dân tam tak a lang a ni. Thunun theih loh mipui pung khâwm chuan hmun tam taka Pathian mite chu an tiduhdah a, pun khâwmna ṭhenkhat chu sakhaw hruaitu emaw, politics pâwl âtchilhho emawte kaihhruai a ni nghe nghe a. Chutianga sakeibaknei anga beihna avângin ṭhenkhat chuan Pathian rawngbâwl an bânsan a ni. Rûlrial angin Diabola chuan mite chu an rilru hneh a, a duhzâwng tihtîr tumin hmun biru aṭangin tenawm takin a bei ṭhîn bawk. Hetiang chi beihna hi thlarau lama min tihchauh nân leh tihchhiat nâna duan a ni. Mahse Pathian thlarau thianghlim zârah beihna chi hnihte chu kan hmachhawn thei ve ve a ni.
4, 5. Tihduhdahna atâna inbuatsaih dân ṭha ber chu eng nge ni a, engvângin nge? Entîrna pe rawh.
4 Tihduhdahna kan la tawh theih tûr âwm chi hrang hrangte ngaihtuah chu, chu mi atâna lo inbuatsaih dân ṭha ber a ni lo. Chutiang chungchânga nakina thil lo thleng tûr chu kan hre thei lo va; chuvângin a lo thleng ngei dâwn tih pawh hriat loh thilte lo lungkham vak chuan sâwtna a nei tlêm hle. Mahse, tih theih erawh kan nei. Tihduhdahna tuar chhuaktu zawng zawng deuhthaw chuan Bible-a chhinchhiah mi rinawmte chanchin leh Isua leh a thu zirtîrte ngun taka an ngaihtuahna avânga tuar chhuak thei an ni a. Chu chuan Jehova an hmangaihna chu a tizual a ni. Chu hmangaihna chuan fiahna an tawh tûr apiang do thei tûrin a ṭanpui a ni.
5 Malawi rama kan unau pahnihte entîrna hi han ngaihtuah teh. Party card leitîr an tumna lamah, mipui thinur pung khâwm chuan anni chu an vua a, an thuamhnaw hlihsakin, pâwngsualah an vau va. Pung khâwmho chuan Bethel-a an unaute ngei pawhin party card an lei tih dâwtthu an hrilh a ni. Unaunute chuan engtin nge an chhân lêt? “Pathian Jehova rawng chauh kan bâwl. Chuvângin branch-a unaute’n an lei a nih chuan lo lei mai mai rawh se, chu chuan kan tân danglamna a nei lo. Min that dâwn pawh ni ula kan lei chung lo vang!,” tiin an chhâng a. Chutianga huaisen taka hma an lâk hnu chuan unaunute chu an chhuah ta a ni.
6, 7. Engtin nge Pathian Jehova chuan tihduhdahna tuar thei tûra a chhiahhlawhte a tihchak?
6 Thessalonika khuaa Kristiante chuan chanchin ṭha chu “hrehawm tuar chungin” an pawm a, mahse, “thlarau thianghlima lâwmin” an awm bawk tih tirhkoh Paula chuan a sawi. (1 Thes. 1:6) Dik takin, tihduhdahna tuar chhuak tawh tûn hma leh tûn laia Kristian tam takte chuan dinhmun khirh bera an din laiin Pathian thlarau thianghlim rah pêng pakhat remna, a nih loh leh chhûng lama thlamuanna an neih thu an sawi a ni. (Gal. 5:22) Chu thlamuanna chuan an rilru leh thinlung a vêng lehchhâwng a ni. Ni e, Jehova chuan a chhiahhlawhte chu fiahnate tuar chhuak thei tûr leh buaina hmachhawn laia fing taka che thei tûra tihchak nân a chakna chevêl reng chu a hmang a ni. *
7 Mi dang lo hmutute chuan Pathian mite’n tihduhdahna nasa tak hnuaia rinawmna vawn tlat an tum dân chu mak an ti hle a. Thuhretute chu mihring thiltihtheihna aia chungnung zâwk nei ang mai an ni a, nih pawh an ni rêng a ni. Tirhkoh Petera chuan heti hian min thlamuan a: “Krista hming avânga hau in nih chuan in eng a thâwl e; thlarau ropui tak, Pathian thlarau chu in chungah a awm si a,” tiin. (1 Pet. 4:14) Felna avânga tihduhdah kan nihna chuan Pathian pawm kan nihzia a târ lang a ni. (Mt. 5:10-12; Joh. 15:20) He Pathian malsâwmna kan dawnzia târ langtu hian min va tihlim tak êm!
Ṭhiante Nêksâwrna Do Thei Tûra Ṭanpuina
8. (a) Engin nge Josua leh Kaleba chu ṭhiante nêksâwrna dotîr thei? (b) Josua leh Kaleba entawn tûr siam aṭangin eng nge kan zir theih?
8 Kristiante tawrh tûr dodâlna sawi thiam har tak chu ṭhiante nêksâwrna hi a ni. Mahse, Pathian Jehova thlarau chu khawvêl thlarau aia a chak zâwk daih avângin, min nuihzattute, kan chungchânga thu dik lo theh darhtute, a nih loh leh an tehna mila nung ve tûra min thlêmtute chu kan do thei a ni. Entîr nân, engin nge Josua leh Kaleba chu Kanaan ram enthlatu dang sâwmte thil thlîr dân zawm ve lohtîr thei? Thlarau thianghlim chuan anni chu “rilru” dang a neihtîr a ni.—Number 13:30; 14:6-10, 24 chhiar rawh.
9. Engvângin nge Kristiante chu mipui laka danglam bîk nih an inhuam ang?
9 Thlarau thianghlim chuan Isua tirhkohte pawh mi tam takin sakhaw dik zirtîrtu anga an thlîr leh an ngaihsân êm êmte aia Pathian thu zâwm zâwk tûrin a tichak bawk a. (Tirh. 4:21, 31; 5:29, 32) Mi tam zâwkte chuan inhnialna leh inhmuh thiam lohna pumpelh nâna mipui ngaih dân pawm ve mai chu an duh a ni. Mahse, Kristian dikte tân erawh kawng dik nia an hriat atâna dinngheh fo a ngai ṭhîn. Chuti chung pawhin, Pathian chakna chevêl rengin chakna a pêk azârah chutianga danglam bîk nih chu an hlau lo. (2 Tim. 1:7) Ṭhiante nêksâwrna laka kan tlâwm lohna tûr kawng khat lo ngaihtuah ta ila.
10. Kristian ṭhenkhatin eng dinhmun hrehawm tak nge an hmachhawn theih?
10 An ṭhian tuemaw chu Pathian thu nêna inmil lo nungchang ṭhat lohnaah a inhnamhnawih tih an hriat hian ṭhalai ṭhenkhat chuan dinhmun hrehawm tak an hmachhawn thei a. Anni chuan an ṭhiante tâna thlarau lam ṭanpuina dîlsak chu anmahni phatsannaah an ngai thei a; chuvângin, rinawmna dik lo avângin sawi chhuah chu an duh lo thei a ni. Thil sual titu chuan a ṭhiante chu a thil sual tih thuppui tûrin a nawr hial thei bawk. Hetiang chi buaina hi ṭhalaite zînga thleng mai a ni lo. Puitling ṭhenkhat pawhin an ṭhiante emaw, an chhûngkaw zînga mite emaw thil sual tih kohhran upate hnêna hrilh chu harsa an ti thei a ni. Mahse, chutiang nêksâwrna chu engtin nge Kristian dikte’n an chhân lêt ang?
11, 12. Kohhrana mi tuemawin a thil sual tih upate hrilh lo tûra a tih che chuana chhân lêt dân ṭha ber eng nge ni a, engvângin nge?
11 He dinhmun hi han mitthla teh. Unaupa tleirâwl pakhat Alex-a chuan kohhrana a ṭhian pakhat Steve-a’n saruak lem en a chîng tih lo hre ta se. A thil chîn pawi a tih thu a hrilh a ni. Mahse, Steve-a chuan a ngai pawimawh lo va. Upate hnêna thlen tûra a tih chuan Steve-a chuan a ṭhian dik tak a nih chuan upate hnênah a thlen lo vang tiin a lo chhâng lêt a ni. Alex-a chuan an inṭhianna chân chu a hlau tûr em ni? Ani chuan Steve-a’n a thiltihte pawm duh lo ta se, upate chuan tunge an rin zâwk ang tih a ngaihtuah mai thei. Mahse, engmah a sawi loh chuan dinhmunin ṭhat lam a pan lo vang. Steve-a chuan Pathian Jehova nêna an inlaichînna a hloh phah thei hial zâwk ang. Alex-a chuan: “Mi dang ngaih dân pawisak luat a hlauhawm a, LALPAa innghah erawh chu a him,” tih thu hi a hre chhuak tûr a ni. (Thuf. 29:25) Ani chuan eng dang nge a la tih theih? Steve-a dik lohna chu hmangaih takin a sawipui leh thei a ni. Chutianga ti tûr chuan huaisen zawng a ngai ngei ang. Mahse, tûn ṭumah chuan Steve-a chu a harsatna sawipui theih a lo ni tawh mai thei a. Alex-a chuan Steve-a chu upate be tûrin a fuih leh tûr a ni a, hun engemawti chhûnga a hrilh loh chuan amah ngeiin a biak tûr thu a hriattîr tûr a ni.—Lev. 5:1.
12 Chutiang harsatna chu i lo hmachhawn tawh ngai a nih chuan, i ṭhian chuan ṭanpui i tumna chu a ngaihlu nghâl lo mai thei a. Mahse, a hnuah chuan a ṭhatna tûr i duh vânga ti i nihzia a hre chhuak thei a ni. Thil sual titu chuan ṭanpuina a dawn a, a pawm chuan, i huaisenna leh rinawmna avângin i chungah a lâwm kumkhua thei ang. Chutiang ni lo va i chunga a thinrim tlat chuan, chutiang mi chu em ni, ṭhian atâna i duh chu? Kan Ṭhian ropui ber, Pathian tihlâwm chu kan tih tûr dik tak a ni fo. Pathian Jehova kan dah pawimawh ber chuan, amah hmangaihtu mi dangte chuan kan rinawmna avângin min zah ang a, kan ṭhian dik tak an lo ni ang. Kristian kohhranah hian Diabola tân hmun kan kian ngai tûr a ni lo. Kan ken chuan, Pathian Jehova thlarau thianghlim kan tilungngai ngei ang. Mahse, Kristian kohhran thianghlim nâna kan thawh zêl chuan thlarau thianghlim milin thil kan ti tihna a ni.—Eph. 4:27, 30.
Harsatna Eng Pawh Tuar Thei Tûra Tihchak
13. Jehova mite chuan eng ang harsatnate nge an tawh a, engvângin nge chûng thilte chu a hluar êm êm?
13 Harsatna chu chi hrang hrang—sum leh pai lama dinhmun inthlâk thlengna te, hna chânna te, leilung chhiatna te, hmangaih takte boralna te, hrisêl lohna te, leh thil dang dangte—a ni thei a. “Hun khirh takte” kâra awm kan nih avângin, engtik hunah pawh fiahna engemaw chu kan tâwk thei reng a ni. (2 Tim. 3:1) Chutiang kan tawh huna kan phili loh chu a pawimawh hle. Thlarau thianghlim chuan harsatna eng pawh tuar thei tûrin min tichak thei a ni.
14. Engin nge Joba chu a harsatnate tuar chhuak tûra tichak?
14 Joba chuan harsatna chu a inzawm zatin a tâwk a. A thil neih zawng zawng bâkah, a fate, a ṭhiante, leh a hrisêlna thlengin a chân a; a nupui lahin Jehova a rinchhanna a hloh bawk. (Job. 1:13-19; 2:7-9) Chuti chung pawhin, Joba chuan Elihua hnên aṭangin thlamuanna dik tak a dawng a ni. Joba hnêna Elihua thusawi leh Jehova thusawi bul ber chu hei hi a ni: “Hei hi ngaichâng teh, beng sikin Pathian thiltih makte chu ngaihtuah teh,” tih hi. (Job. 37:14) Engin nge Joba chu fiahnate tuar chhuak tûra ṭanpui? Engin nge kan fiahna tawhte tuar chhuak tûra min ṭanpui ve? Pathian Jehova thlarau thianghlim leh thiltihtheihna a lanchhuahna chi hrang hrangte hriat reng leh ngun taka ngaihtuahna chuan min ṭanpui ang. (Job. 38:1-41; 42:1, 2) Pathianin mi mal taka min ngaihsakzia a lanna kan nuna thilthlengte kan hre chhuak pawh a ni thei a. Ani chuan tûnah pawh min la ngaihsak reng a ni.
15. Engin nge tirhkoh Paula chu fiahna tuar chhuak tûra tichak?
15 Tirhkoh Paula pawhin a rinna avângin nunna atâna hlauhawm harsatna tam tak a tuar chhuak a. (2 Kor. 11:23-28) Chûng hun khirh takte chhûng chuan engtin nge inbûk tâwk tak leh rilru mangang lutuk lova a awm theih? Ṭawngṭaina leh Jehova chunga innghahna chuan a ṭanpui a ni. A tâwpa martar anga a thihna thlentu tûr fiahna a tawh chhûng khân, Paula chuan heti hian a ziak a ni: “Chanchin ṭha keimah avânga hrilh kimin a awm theih nân leh Jentailte zawng zawng chuan an hriat theih nân, Lalpa chuan mi ṭan a, mi tichak ta zâwk a ni; tin, sakeibaknei kaa mi kha chhan chhuahin ka lo awm ta a ni,” tiin. (2 Tim. 4:17) Chuvângin, Paula chuan ringtute chu ama thiltawn ngei ṭanchhanin “engahmah mangang” taka awm a ngai lo tih a hrilh thei a ni.—Philippi 4:6, 7, 13 chhiar rawh.
16, 17. Pathian Jehova’n tûn laia harsatnate hmachhawn thei tûra a mite a tihchak dân entîrna pakhat pe rawh.
16 Pioneer thawk Roxana-i chuan Pathian Jehova’n a mite tâna thil a tihsak dân a hmu a. A hnathawhna pu hnêna inkhâwmpui hmang tûra chawlh a dîl chuan, ani chuan thinur takin a kal chuan a hna ata a bân dâwn tih a lo hrilh a ni. Roxana-i chu a hna chân lohtîr tûra tih tak zeta ṭawngṭai chungin a kal ta tho va. Chutianga a ṭawngṭai hnu chuan a rilru a dam huai a. A sawi ang ngeiin, inkhâwmpui zawh Thawhṭanni-a a hna a va zawm chuan, a pu chuan a lo bân tak tak ta mai. Roxana-i chu a mangang ta hle mai a. Hlawh tam lutuk lo mah se, a chhûngte châwm nân chu hna chu a thawh a ngai a ni. Chutah a han ṭawngṭai leh a, Pathianin inkhâwmpuinaah a thlarau lam a lo châwm tawh avângin a tisa lam mamawh pawh a pe thei ngei ang tih a ngaihtuah a. A hâwn kawngah, Roxana-i chuan khâwl lian hmanga puan ṭhui lama thiltawn neite tâna dîl theih hna ruak a awm tih hriattîrna intâr chu a hmu a, hna chu a dîl ta a ni. Chuta manager chuan unaunuin thiltawn a nei lo tih hre mah se, hna thawk tûr chuan a la ta tho va, a hlawh pawh a hmaa aiin a lêt dâwnin a tam nghe nghe. Roxana-i chuan Pathianin a ṭawngṭaina a chhâng niin a hria a ni. Mahse, a malsâwmna dawn ropui ber chu a hnathawhpui tam takte hnêna chanchin ṭha a hril thei hi a ni a. Manager pawh tiamin a thawhpui panga laiin thutak an pawm a, baptisma an chang a ni.
17 A châng chuan kan ṭawngṭaina hi chhân loh—a nih loh pawhin chhân nghâl loh emaw, kan beisei anga chhân loh emaw—niin a lang mai thei a. Chutiang a nih chuan, chhan ṭha tak a nei ngei ang. Pathian Jehova chuan a chhan chu a hria a, nakinah a lo lang chiang ta ṭhîn a ni. Kan hriat chian theih thil pakhat a awm—Pathianin a mi rinawmte a thlahthlam ngai lo tih hi.—Heb. 6:10.
Fiahna leh Thlêmnate Hneh Thei Tûra Ṭanpuina
18, 19. (a) Engvângin nge fiahna leh thlêmnate tawh chu kan beisei theih? (b) Engtin nge fiahnate hlawhtling taka i hmachhawn theih?
18 Jehova mite chuan thlêmna te, lunghnualna te, tihduhdahna te, leh ṭhiante nêksâwrna te tawh chu mak an ti lo. A bul berah chuan khawvêl hian min hua a ni. (Joh. 15:17-19) Chuti chung pawhin, thlarau thianghlim chuan Pathian rawng kan bâwlna kawnga harsatna kan tawh apiang hneh thei tûrin min ṭanpui thei a ni. Jehova chuan kan tawrh theih chin bâk thlêmna kan tawh chu a phal lo vang. (1 Kor. 10:13) Ani chuan engtikah mah min thlahthlamin, min kalsan lo vang. (Heb. 13:5) Thlarauva thâwk khum a Thu chuan min vênghimin, min tichak bawk a. Chu bâkah, Pathian thlarau chuan kan unaute chu ṭanpui kan mamawh lai taka min ṭanpui tûrin a chêttîr thei a ni.
19 Kan zain ṭawngṭaina leh Bible zirna aṭangin thlarau thianghlim i zawng chhunzawm zêl ang u. “Hlim taka chhelna leh dawhtheihna tinrêng nei tûra a ropuina chakzia ang zêla chakna tinrênga lo chakin” i awm ṭheuh bawk ang u.—Kol. 1:10-12. (w11-E 01/15)
[Footnote]
^ par. 6 Entîr nân, May 1, 2001 chhuak Vênnainsâng, phêk 15-16 en rawh.
Engtin Nge Kan Chhân Ang?
• Engtin nge tihduhdahna hmachhawn tûra kan inbuatsaih theih?
• Mi tuemawin a thil sual tih zêppui tûra min tih chuan engtin nge kan chhân lêt ang?
• Harsatna eng pawh kan hmachhawn hunah eng nge kan rin tlat theih?
[Zirlai Atâna Zawhnate]
[Phêk 31-naa milem]
Josua leh Kaleba hnên aṭangin eng nge kan zir theih?
[Phêk 32-naa milem]
Engtin nge thil sual engemaw titu i ṭhian chu i ṭanpui theih?