Inlârnaa Thlarau Khawvêl

VAN lam khi eng anga rei pawh thlîr mah la, thlarau mi pakhat mah i hmu lo vang. An aw hriat tumin ngaithla mah la i hre hauh lo bawk ang. Mahse, thlarau thil siamte an awm a ni tih i hre chiang pawh a ni thei. Anni chuan fing tak leh thiltithei tak an nih angin hming bîk leh miziate pawh an nei ve bawk. Ṭhenkhat chuan min ṭanpui an duh laiin a dangte erawh chuan min tihnat an duh thung a. An vaiin min ngaihven vek a ni.

Pathian dik ngei pawh hi Thlarau a ni a. (Joh. 4:24) Ani chuan pathian dik lote laka amah tihrangtu hming danglam bîk tak a nei. Chu chu Jehova a ni. (Sâm 83:18) Fakna hla phuahtu chuan: “LALPA chu a ropui a, nasa taka fak tûr a ni si a: Pathian zawng zawng aia ṭih tûr a ni. Mipuiho pathiante chu milemte an ni si a, LALPA erawh chuan vânte khi a siam a ni. Chawimawina leh ropuina a hmaah an awm a: chakna leh mawina chu a hmun thianghlimah an awm,” tiin a ziak a ni.—Sâm 96:4-6.

Pathian Dik Inlârna

Bible chuan: “Tuman eng lai mahin Pathian an hmu lo,” tih min hrilh a. (Joh. 1:18) Mitdel saa piang tân rawng chi hrang hrang chu hriatthiam phâk bâk a ni ang bawkin, Pathian lan dân leh a ropuina chu kan hriatthiam phâk bâk a ni. Mahse, zirtîrtu thiam takin thil hriatthiam harsa tûrte naupangte hriatthiam theih tûr zâwnga a hrilhfiah ang bawkin, Pathian pawhin a Thu, Bible hmangin kan thil hmuh theih lohte chu kan hmuh theihte hmangin a sawifiah a ni. Pathian Jehova chuan hmân lai mi rinawmte hnênah inlârna pein, vân lam thilte leh a chhûnga awmte nêna kan inkûngkaih dânte hre tûrin min ṭanpui a ni.

Entîr nân, Ezekiela inlârna hmuhah chuan Jehova ropuina chu mei, êng, sapphir lung, leh chhimbâl te nêna sawi kawp a ni a. Inlârna dangah tirhkoh Johana chuan Pathian Jehova chu a lalṭhutthlênga ṭhuin a hmu a, Ani chu “jaspi leh sardion lung ang maiin a lang” tih a sawi bâkah “lalṭhutphah vêlah chuan chhimbâl, ena smaragdin lung ang a zâm” tih a sawi bawk. Chutiang thute chuan Pathian Jehova lan dân chu mawi tak, duhawm tak, leh dam tak a nihzia min hriattîr a ni.—Thu Puan 4:2, 3; Ezekiela 1:26-28.

Zâwlnei Daniela pawhin inlârnaah Pathian Jehova a hmu a, “a hmâah chuan [vântirhkoh] sîng hmun sîng an ding a.” (Daniela 7:10) Chu a thil hmuh chu a va ropui dâwn êm! Inlârna mai pawh ni se, vântirhkoh pakhat chauh hmuh pawh a ropui dâwn tehrêng nên, vântirhkoh ṭha famkim a sîng hmun sîng han  hmuh a ropui dân tûr chu ngaih ruat han tum chhin teh!

Bible-ah chuan vântirhkohte chungchâng chu vawi 400 dâwn lai a lang a, an zîngah chuan seraf te, cherub te an tel a ni. Bible-a “vântirhkoh” tia lehlin Grik leh Hebrai thu malte hi “thuchah kengtu” tihna ve ve a ni a. Chuvângin, vântirhkohte chu an inbe pawp thei a, hun kal tawhah phei chuan mihringte an be pawp a ni. Vântirhkohte hi tûn hmaa leia nung mihringte an ni lo. Pathian Jehova chuan hêng thlarau thil siamte hi mihring a siam hma hun rei takah a lo siam daih tawh a ni.—Joba 38:4-7.

Daniela inlârna hmuhah chuan, vântirhkoh tam tak chu thilthleng pawimawh tak hmu tûrin an lo kal khâwm a. “Mihring fapa ang” chuan “rorêlna te, ropuina te, ram te” dawng tûrin Jehova lalṭhutthlêng a rawn pan a ni; “mi tin te, hnam tin te leh ṭawng tinte zawng zawng chuan a rawng an bawl nân.” (Daniela 7:13, 14) Thlarau khawvêla chanvo pawimawh tak neitu “mihring fapa” chu lei chung zawng zawnga rorêl theihna pêk, tho leh Isua Krista hi a ni. A rorêlna chuan mihring sawrkârna zawng zawng rawn thlâkin, natna te, lungngaihna te, inawpbehna te, retheihna te, leh thihna te thlengin a rawn titâwp ang.—Daniela 2:44.

Lalṭhutthlênga Isua ṭhutna chuan mihringte ṭhatna tûr duhsaktu vântirhkoh rinawm tam takte chu a tihlim hle a. Mahse, thlarau thil siam zawng zawngin an hlimpui lo hi chu a lungchhiatthlâk hle.

Pathian leh Mihringte Hmêlma

Mihring chanchin inṭan tirh phat aṭangin, Pathian biaka biak nih duh ngawih ngawih vântirhkoh pakhat chu Pathian Jehova lakah a  hel a, “Dodâltu” tihna Setana-ah a insiam a. Mi suaksual ber Setana chuan Hmangaihna ngah ber Pathian Jehova chu a kalh tlat a ni. Vântirhkoh dangte chuan Setana chu a helnaah an va zâwm a. Bible chuan anni chu ramhuaite tiin a ko a ni. Setana ang bawkin ramhuaite chu mihringte hmêlma râwng takah an insiam a. Leia hrehawm tawrhna tam tak, rorêl dik lohna te, natna te, retheihna te, leh indona angte hi an thununna ṭha lo avânga lo awm a ni.

Kristianna rama kohhran tam takahte hian Setana chanchin chu sawi tam ni tawh lo mah se, Bible-a Joba lehkhabu chuan he vântirhkoh hel nungchang leh rilru put hmang hriatthiamna min pe a. Chu lehkhabu chuan: “Tin, Pathian fapate LALPA hmaa an inlan nî a lo awm a, Setana pawh an zîngah a lo tel ve a,” a ti. A hnua an inbiaknaah Setana chuan Joba’n Pathian a biak chhan chu a hnên aṭanga a thil dawnte vâng niin huatthlala takin a puh a. A puhna dikzia finfiah nân, Setana chuan Joba chungah hrehawmna nasa tak a thlentîr a, a ran rual neihte leh a fate zawng zawng chu a tihhlumsak vek a ni. Chu mi hnuah, Joba chu a kephah hnuai aṭanga a lu thlengin pânchhia a veitîr a. Mahse, Setana beihna zawng zawng chuan a puhna dikzia a finfiah chuang lo.—Joba 1:6-19; 2:7.

Pathian Jehova’n Setana awm zêl a phal chhan ṭha tak a awm a; mahse a phal kumkhua lo vang. Rei lo têah Diabol-Setana chu a tiboral ang. Thu Puan bua târ lan angin, tiboral tûrin hma lâk a ni der tawh a ni—chutah chuan kawng danga kan hriat theih hauh loh tûr thlarau khawvêla thilthleng pawimawh tak dang chu a chuang a ni: “Tin, vânah chuan indona a lo awm a; Mikaela [tho leh Isua Krista] leh a vântirhkohte chuan drakon [Setana] chu an do va; drakon leh a tirhkohte pawh chuan an do ve a; nimahsela an hneh ta lo va, an hmun chu vânah a awm ta bawk hek lo. Tin, drakon lian pui, rûlpui tar Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a,” tiin.—Thu Puan 12:7-9.

Setana chu “khawvêl zawng zawng bumtu” tia koh a ni tih chhinchhiah ang che. Ani chuan mite chu Pathian Jehova leh a Thu aṭanga lâk pên nân sakhaw lama dâwt thute sawiin a bum a. Chutiang dâwt thute zînga pakhat chu mite an thih hian thlarau khawvêlah an kal vek tih hi a ni. He mi chungchângah hian ngaih dân chi hrang hrang a awm a. Entîr nân, Africa leh Asia khawmualahte hian mi tam tak chuan mi a thih hian thlahtute luah thlarau khawvêlah an kal niin an ring tlat a. Sual kan faina purgatory leh hremhmun meidîl zirtîrnate pawh chuan mi a thih hnuah a la dam zêl tih ngaih dân chu a ṭanchhan a ni.

Thihna Chu Vân Nunnain A Zui Em?

A nih leh, mi ṭha zawng zawng vânah an kal vek nia khawvêla mi tam takte thurin chu engtin nge ni ta ang? Mi ṭha ṭhenkhat chu vânah an kal ngei mai a, mahse, mitthi tawh tam takte nêna khaikhin chuan an tlêm tham hle. Bible chuan mi 1,44,000 chu “lei ata tlan” an ni ang a, anni chuan “puithiamahte” ṭangin “leiah chuan ro an rêl” ang tih a târ lang a ni. (Thu Puan 5:9, 10; 14:1, 3) Anni chuan mihring Fapa Isua Krista rualin vân sawrkâr, Pathian Ram chu an din ang. Chu sawrkâr chuan Setana leh a ramhuaite chu a tiboral ang a, lei hi paradis-ah a rawn chantîr ang. Mitthi tawh zawng zawng deuh thaw chu lei Paradis-a chatuana nun beiseina neiin an lo la tho leh dâwn a ni.—Luka 23:43.

A tlâng kawm nân, thlarau khawvêlah chuan mi tam tak an awm a. An zînga chungnung ber chu nunna zawng zawng Siamtu Pathian Jehova hi a ni. Vântirhkoh sîng hmun sîngin rinawm takin a rawng an bâwl a. Setana kaihhruai vântirhkoh dangte chu Jehova laka helin mihringte hruai bo an tum a ni. Chu bâkah, vâna mawhphurhna ṭha bîk tak chelh tûrin leilung ata number bi tuk chin nei mihringte chu “lei,” a nih loh leh thlan an ni. Hei hi rilrua vawng rengin, thlarau khawvêla awm kan biak pawh theih tûrate leh kan biak pawh dân tûr chu i lo ngaihtuah ang u. (w10-E 12/01)