Inneihna Chu Pathian Thilpêk Angin Zah Rawh
Inneihna Chu Pathian Thilpêk Angin Zah Rawh
“Chuvângin mipain a nu leh a pa a kalsan ang a, a nupui a vuan ang: tichuan tisa pum khat an lo ni tawh ang.”—GEN. 2:24.
1. Engvângin nge Pathian Jehova chuan kan zah a phu?
INNEIHNA Dintu, Pathian Jehova chuan kan zah a phu ngawt mai. Min Siamtu, Lalchungnungber, leh kan Pa vâna mi a nih angin, ani chu “thilpêk ṭha leh thilpêk famkim zawng zawng” min Petu nia dik taka sawi a ni. (Jak. 1:17; Thup. 4:10, 11) Chu chu min hmangaihna a nasatzia târ lanna a ni a. (1 Joh. 4:8) A thil min zirtîr zawng zawng, kan laka a thil beisei zawng zawng, kan hnêna a thil min pêk zawng zawng chu kan ṭhatna tûr leh kan hlâwkpui tûr hlîr a ni.—Is. 48:17.
2. Pathian Jehova chuan innei hmasa berte hnênah eng kaihhruaina nge a pêk?
2 Bible chuan inneihna chu Pathian thilpek “ṭha” zînga mi niin a sawi a. (Rut. 1:9; 2:12) Pathian Jehova’n nupa hmasa ber Adama leh Evi-te a inneihtîr khân, an hlawhtlinna tûrin kaihhruaina chiang tak a pe a ni. (Matthaia 19:4-6 chhiar rawh.) Pathian kaihhruaina zâwm ta sela chuan, hlimna chatuan daih an nei mai tûr. Mahse, Pathian thupêk chu âtthlâk takin an hnâwl a, a rahchhuah ṭha lo tak chu an têl a ni.—Gen. 3:6-13, 16-19, 23.
3, 4. (a) Engtin nge tûn laia mi tam tak chuan inneihna leh a dintu Pathian Jehova an zah lohzia an lantîr? (b) He thuziakah hian eng entîrnate nge kan ngaihtuah ang?
3 Chu nupa tuak hmasate ang bawkin, tûn laia mi tam tak chuan Jehova kaihhruaina ngaihsak vak lo emaw, ngaihthah hulhual emawin inneihna chungchângah thu tlûkna an siam a. Ṭhenkhat chuan inneih kher a ṭûlna hre lovin an hnâwl a, a dangte erawh chuan an duh dân mila inneihna siam rem chu an tum bawk a ni. (Rom 1:24-32; 2 Tim. 3:1-5) Anni chuan inneihna hi Pathian thilpêk a ni tih an ngaihthah a, chu thilpêk an zah loh hian a Petu, Pathian Jehova pawh an zah lo tel ta a ni.
4 A châng chuan, Pathian mi ṭhenkhatte meuh pawhin inneihna chungchânga Jehova thlîr dân chu an hre fiah chiah lo va. Kristian nupa ṭhenkhat chuan Bible ṭanchhan tûr awm si lovin, awm hran, a nih loh leh inṭhen chu an titlu a ni. Engtin nge hei hi pumpelh theih a nih? Engtin nge Genesis 2:24-a Pathian kaihhruaina hian Kristian nupate chu an inneihna tinghet sauh tûra a ṭanpui theih? Engtin nge inneih tumte chu an inbuatsaih theih? Inneihna nghet neih nâna Pathian Jehova zah a pawimawhzia târ langtu Bible hun laia inneihna hlawhtling pathumte chu i lo en ang u.
Rinawmna Nei La, Vawng Rawh
5, 6. Eng dinhmun hian nge Zakaria leh Elizabeti chu fiah a, engtin nge an rinawmna chu malsâwm a nih?
5 Zakaria leh Elizabeti chuan theihtâwp chhuahin thil dik an ti ngei mai. Thlarau mi tak nupui pasalah an innei a. Zakaria chuan a puithiam hna chu rinawm takin a thawk a, an pahnih chuan theihtâwp chhuahin Pathian Dân chu an zâwm ve ve bawk a. Pathian hnêna lâwm chhan tûr tam tak an nei ngei a ni. Mahse, Judai rama an in chu tlawh ta la chuan thil kim lo a awm tih i hre nghâl thei ang. Anni chuan fa an nei lo a ni. Elizabeti chu a ching a, an nupain an upa hle tawh bawk si.—Lk. 1:5-7.
6 Hmân lai Israel ramah chuan fa neih chu ngaihsân hle a ni a, chhûngkuate chu an hung tlângpui ṭhîn a ni. (1 Sam. 1:2, 6, 10; Sâm 128:3, 4) Chutih hun laia Israel mipa chuan a nupuiin fa a neih theih loh avângin tenawm takin a ma mai thei a. Mahse, Zakaria chuan Elizabeti chu rinawm takin a nei tlat a ni. Ani chuan awlsam takin an inneihna a kalsan lo va, a nupui lahin a kalsan mai hek lo. Fa an neih loh avângin lungngai ṭhîn mah se, rinawm takin Jehova rawng an bâwl dûn zêl a ni. A hun takah chuan, an tar hnu lamah mak taka fa neihtîrin Pathian Jehova’n anni chu mal a sâwm a ni.—Lk. 1:8-14.
7. Eng kawng dangin nge Elizabeti chu a pasal laka a rinawm?
7 Elizabeti chuan kawng dang pawhin rinawmna fak tlâk tak a lantîr a. A fapa Johana a pian lai chuan, Zakaria chu Pathian vântirhkoh thusawi a rinhlelh avânga ṭawng thei lova siam a ni. Chuti chung pawhin, Zakaria chuan kawng engemawti takin Jehova vântirhkohvin naupang hming chu “Johana” sa tûra a tih thu a hrilh a. Ṭhenawm leh an chhûngte chuan nau lo piang chu a pa hminga koh an duh a ni. Mahse Elizabeti chuan a pasal kaihhruaina pêk chu rinawm taka zâwmin: “Ni lo ve, ani zawng Johana sak zâwk tûr a ni,” tiin a sawi a ni.—Lk. 1:59-63.
8, 9. (a) Engtin nge rinawmna chuan inneihna a tihngheh? (b) Nupa inkâra rinawmna lantîr theih dân kawng ṭhenkhat chu engte nge ni?
8 Zakaria leh Elizabeti ang bawkin, tûn laia nupa kawpte chuan lunghnualna leh harsatna dang an tâwk a. Rinawmna tel lo inneihna chu a hlawhtling lo vang. Inchhaiderna te, saruak lem leh thuziak te, uirêna te, nupa inneihna tiderthâwng thei thil dangte chuan nupa inkâra rinawmna chu siamṭhat theih rual lohvin a tichhe thei a. Tin, nupa kâra rinawmna a awm loh hian hmangaihna chu a lo dai ṭan ta ṭhîn a ni. Rinawmna chu kawng engemawti takin mi sual leh thil hlauhawm laka chênna in vênghimtu pal ang a ni a, pal chuan in chhûnga awmte tân himna engemaw chen a pe a ni. Chuvângin, nupui leh pasalte an rinawm tawn hian hlawhtling takin an do tlâng theiin, an rilru ngaihtuahnate chu an inhrilh tawn thei ang a, an inhmangaihna chu a zual zêl ang. Ni e, rinawmna hi thil pawimawh tak a ni.
9 Jehova chuan Adama hnênah: “Mipain a nu leh a pa a kalsan ang a, a nupui a vuan ang,” tiin a hrilh a. (Gen. 2:24) Eng nge a awmzia? Tûn hmaa ṭhiante leh chhûngte nêna inzawmna neihte chu siam danglam a ngai a. Hun leh ngaihsakna chu an kawppuite an pe hmasa ber tûr a ni. Chhûngkaw thar ngaihthah khawpin ṭhiante emaw, chhûngte emaw chu ngaih pawimawh tûr a ni lo va; chhûngkaw thu tlûkna siamah emaw, inrem lohna thu-ah emaw nu leh pate inrawlhtîr tûr lah a ni hek lo. Nupate chu an invuan tlat tûr a ni. Chu chu Pathian kaihhruaina a ni si a.
10. Engin nge nupate chu rinawmna nei a, vawng reng tûrin ṭanpui ang?
10 Sakhaw thuhmun vawn lohna chhûngkuaah pawh rinawmna chuan rah ṭha a chhuah a. A pasal thutaka awm lo unaunu pakhat chuan: “Ka pasal laka intukluh dân tûr leh amah zahna thûk tak neih dân tûr min zirtîr avângin Jehova chungah ka lâwm êm êm a. Rinawmna chuan kum 47 chhûng zawng amah hmangaihna leh zahna min neihtîr reng a ni,” tiin a sawi. (1 Kor. 7:10, 11; 1 Pet. 3:1, 2) Chuvângin, i kawppui chu him nia inhriatna neihtîr tûrin thawk rim hle rawh. I ṭawngkam chhuak leh thiltihin, i kawppui chu i tân khawvêla mi pawimawh ber a nihzia tiam nawn dân kawng dap ṭhîn ang che. Nangma lama a innghah chhûng tal chu, i kawppui nêna in inkârah engmah tlâktîr suh ang che. (Thufingte 5:15-20 chhiar rawh.) Kum 35 chhûng hlim taka innei tawh Ron-a leh Jeannette-i chuan, “Pathian thil min phûtte rinawm taka kan tih avângin, inneihna hlimawm leh hlawhtling tak kan nei a ni,” tiin a sawi a ni.
Inpumkhatna Chuan Inneihna A Tinghet
11, 12. Engtin nge Akuila leh Priskilli chuan (a) in lamah, (b) ei zawnna lamah, leh (c) Kristian rawngbâwlna lamah an thawh dun ṭhin?
11 Tirhkoh Paula’n a ṭhian ṭha Akuila leh Priskilli chanchin a sawi hian, sawi kawp loh châng a nei ngai lo. He nupa inpumkhat tak hi Pathianin nupate chu “pum khat” ni tûra a sawi laia a tum hriltu entawn tûr ṭha tak an ni a. (Gen. 2:24) Anni chuan inah te, an hnathawhna hmunah te, leh Kristian rawngbâwlnaah te hna an thawk tlâng reng ṭhîn. Entîr nân, Paula Korinth khua a thlen hmasak ber ṭumin, Akuila leh Priskilli chuan an lo thleng a, chu mi hmun ṭanchhanin hun engemaw ti chhûng chu rawng a bâwl zui ta a. Ephesi khuaa an insawn hnuah pawh an in chu kohhran inkhâwm nân leh Apollova ang mi tharte thlarau lama ṭanpui dun nân an hmang chho zêl a ni. (Tirh. 18:2, 18-26) Tichuan, he nupa ṭhahnemngai takte chu Rom khuaah an kal leh a, chutah pawh chuan an in chu kohhran inkhâwm nân an hmang leh a ni. A hnuah, Ephesi khuaah kîr lehin, unauhote chu an tichak bawk.—Rom 16:3-5.
12 Hun engemawti chhûng chu Akuila leh Priskilli chuan Paula rualin an kut hnathawh ber puan in siam hna chu an thawk tlâng a. Chutah pawh chuan an nupain inelna leh innghîrnghona awm miah lovin an thawk dûn leh ta a ni. (Tirh 18:3) Mahse, inneihna hlimawm tak leh nghet tak an neih chhan chu Kristian rawngbâwlnaa an thawh dun vâng a ni a. Korinth te, Ephesi te, leh Rom pawh ni se an awmna apiangah “Krista Isuaa . . . hnathawhpui” anga hriat an ni. (Rom 16:3) An awmna apiangah chuan Lalram thu hrilh rawngbâwlnaah an thawk dûn reng ṭhîn a ni.
13, 14. (a) Eng dinhmunin nge inneihnaa inpumkhatna tichhe thei? (b) Nupate’n tisa “pum khat” anga inzawmna an tihngheh theih dân ṭhenkhat chu engte nge ni?
13 Dik takin, thiltum leh thiltiha inpumkhatna chuan inneihna chu a tinghet a ni. (Thur. 4:9, 10) Vânduaithlâk takin, tûn laia nupa tuak tam tak chuan hun an hmang dûn ngai mang meuh lo va. Anni chuan hmun hrangah dârkâr rei tak tak hna an thawk a. Mi dangte chu an ei zawnna avângin an zin chhuak fo emaw, ram pâwnah mahni chauhva kal chhuaka hna va thawkin in lamah sum an thawn emaw a ni. In lama awm tlângte zîngah pawh, TV en nân, an tuizâwng thil tih nân, infiam nân, video games khelh nân, a nih loh leh Internet khawih nâna hun an hman tam avângin nupa ṭhenkhat chu an inlahrang hlawm a ni. Chutiang chu in chhûngkaw awm dân a ni em? A nih chuan, hun tam zâwk in hman theihna tûrin dinhmun chu in siam danglam thei ang em? Ei rawngbâwl te, thlêng sil te, a nih loh leh huana hnathawh ang chite thawh dun chungchâng chu engtin nge? Naupangte enkawlna emaw, nu leh pa tar tawhte enkawlna emawah in thawk dûn thei ang em?
14 A pawimawh ber chu, Pathian Jehova biakna nêna inkûngkaihna nei thiltiha thawh dun hi a ni a. Ni châng sawiho leh chhûngkuaa Pathian biakna neih chu chhûngkaw ngaihtuahna leh thiltum inpumkhattîr theihna hun ṭha tak a ni. Tin, rawngbâwlnaah thawk dûn bawk ang che u. A theih phawt chuan, in dinhmun avânga thla khat emaw, kum khat emaw chauh in thawk thei a nih pawhin pioneer thawh tlân tum ang che u. (1 Korinth 15:58 chhiar rawh.) A pasal nêna pioneer thawk dûn unaunu pakhat chuan: “Rawngbâwlna hi hun kan hman dun theih dân leh kan inbiak tak tak theih dân kawng khat a ni. Kan pahniha mi dangte thlarau lama ṭanpuina pêk kan tum avângin, tum thuhmun nei team khat ang tak tak nia inhriatna ka nei a. Ani chu ka pasal ang mai ni lovin, ka ṭhian ṭha tak anga hnaih sawt niin ka inhre bawk,” tiin a sawi. Thiltih manhla tak intih dun chuan Akuila leh Priskilli te ang bawkin in tuizâwngte, in thil ngaih pawimawhte, leh in thil tih ṭhinte chu a inmil chho zêl ang a, tisa “pum khat” ang maiin in ngaihtuahna, in rilru vei zâwng, leh in thil tih dânte chu a rawn inang chho tial tial ang.
Pathian Kaihhruaina Zui Rawh
15. Inneihna hlawhtling neih nâna thil pawimawh tak chu eng nge ni? Hrilhfiah rawh.
15 Isua chuan inneihnaa Pathian dah hmasak a pawimawhzia chu a hria a. Pathian Jehova’n nupa hmasa berte a inneihtîr lai chu a hmu a ni. Ani chuan Pathian kaihhruaina an zawm chhûng zawnga Adama leh Evi te hlim dân a hmuh bâkah, an ngaihthah aṭanga buaina a chhuah dân pawh a hmu bawk a ni. Chuvângin, Isua’n mi dangte a zirtîrnaah, a Pa kaihhruaina Genesis 2:24-a kan hmuh chu a sawi chhâwng a. “Pathianin a zawm tawh chu mihringin ṭhen suh se,” tiin a belhchhah a ni. (Mt. 19:6) Chuvângin, Pathian Jehova zahna thûk tak chu inneihna hlawhtling leh hlimawm neih nâna thil pawimawh tak a la ni reng a ni. He mi chungchângah hian, lei lama Isua nu leh pa, Josefa leh Mari te chuan entawn tûr ṭha tak an siam a ni.
16. Engtin nge Josefa leh Mari chuan an chhûngkuaah thlarau lam thil an ngaih pawimawhzia an lantîr?
16 Josefa chuan Mari chu a zah thiamin a chungah a ngilnei hle a. Mari a rai tih a hriat chuan, Pathian vântirhkohvin thil awm dân a hrilh hma pawhin, a chunga zahngaihna lantîr chu a tum a ni. (Mt. 1:18-20) An nupain, Kaisara thupêk chu an zâwm a, Mosia Dân pawh an zâwm bawk. (Lk. 2:1-5, 21-24) Tin, Jerusalem-a sakhaw kût pawimawhahte chuan mipa chauh kal tûra phût ni mah se, Josefa leh Mari chuan kum tinin an fate chu an hruai ziah a ni. (Deut. 16:16; Lk. 2:41) Chûng leh kawng dangte hmangin, Pathian ngaihsak tak he mite nupa hian Jehova tihlâwm chu an tumin, thlarau lam thilte zahna thûk tak an lantîr a ni. Pathian Jehova’n a Fapa Isua naupan lai enkawltu atâna a thlang pawh hi a mak lo ve.
17, 18. (a) Eng kawngin nge nupate chuan an chhûngkuaah Pathian kaihhruaina an zawm theih? (b) Chu chu engtin nge an hlâwkpui ang?
17 Chutiang bawkin in chhûngkuaah Pathian kaihhruaina in zâwm em? Entîr nân, thu tlûkna pawimawh tak in siam hian, Bible thu bulte in zir chîkin, chu mi chungchângah in ṭawngṭaiin, Kristian puitlingte thurâwn in zawng em? Nge, buaina chu mahni ngaih dân leh chhûngte leh ṭhiante ngaih dân ṭanchhana sut kian in tum zâwk? Bâwih rinawm pâwl tih chhuah inneihna leh chhûngkaw nun chungchânga thurâwn ṭangkai tak takte chu nunpui in tum em? Nge, tualchhûng hnam dân leh mithiamte thurâwn lâr takte chu in zui mai mai zâwk? Bible zirna leh ṭawngṭainate in nei dûnin, thlarau lam thiltumte in insiamin, chhûngkaw thil ngaih pawimawhte in sawi dûn ṭhîn em?
18 Kum 50 chhûng hlim taka an inneihna chungchângah, Ray-a chuan: “Kan hmachhawn theih loh tûr buaina kan tâwk ngai lo, Pathian Jehova chu kan ‘hrui thum hrual-ah’ kan dah avângin,” tiin a sawi. (Thuhriltu 4:12 chhiar rawh.) Danny-a leh Trina-i chuan an pawm khawp mai. “Pathian rawng kan bâwl dun hian, kan inneihna chu a nghet sauh a ni,” an ti. Anni chu kum 34 chhûng hlim takin an innei tawh a ni. In inneihnaa Jehova in dah hmasak ber reng chuan, hlawhtling tûrin a ṭanpui ang che u a, malsâwmnain a vûr ang che u.—Sâm 127:1.
Pathian Thilpêk Chu Zah Zêl Rawh
19. Engvângin nge Pathianin inneihna thilpêk a pêk?
19 Tûn laia mi tam takte ngaih pawimawh awmchhun chu mahni hlimna a ni a. Mahse, Pathian Jehova chhiahhlawhte chu chutiang an ni ve lo. Anni chuan inneihna chu Pathianin A thiltum tihhlawhtlin nâna a thilpêk a ni tih an hria a ni. (Gen. 1:26-28) Adama leh Evi chuan chu thilpêk chu lo zah ta sela chuan, leilung zawng zawng hi paradis-ah changin, Pathian chhiahhlawh mi fel leh hlim takte’n an luah khat tawh mai tûr.
20, 21. (a) Engvângin nge inneihna chu Pathian din thil thianghlim tak angin kan thlîr ang? (b) Chawlhkâr lehah chuan eng thilpêk chungchâng nge kan zir dâwn?
20 A pawimawh berah chuan, Pathian chhiahhlawhte chuan inneihna chu Jehova chawimawi theihna hun remchâng angin an thlîr a. (1 Korinth 10:31 chhiar rawh.) Kan hmuh tâk ang khân, rinawmna te, inpumkhatna te, leh Pathian kaihhruaina zui te chu inneihna thuam nghettu Pathian duhzâwng miziate a ni. Chuvângin, innei tûrin kan inbuatsaih emaw, kan inneihna kan tichak mêk emaw, a nih loh leh kan inneihna tlu chhe lo tûrin ṭan kan la mêk emaw pawh ni se, inneihna chu a nihna tak: Pathian din angin kan thlîr tûr a ni. He thudik rilrua vawn rengna chuan inneihnaa thu tlûkna siam tûrte chu Pathian Thu ṭanchhana siam tûra theih tâwp chhuah tûrin min chêttîr ang. Hetiang kawng hian, inneihna thilpêk ngawr ngawr ni lovin, a Petu, Pathian Jehova kan zahzia kan lantîr a ni ang.
21 Mahse, inneihna hi Pathian Jehova thil min pêk awmchhun a ni lo va, nun hlimna kawng awmchhun lah a ni hek lo. A dawta thuziakah chuan, Pathian thilpêk hlu tak dang—nupui pasal nei lova awmna—chungchâng chu kan hmu ang. (w11-E 01/15)
Engtin Nge Kan Chhân Ang?
• Engtin nge rinawmna chuan nupui pasal nei Kristiante chu a thunun ang?
• Engvângin nge inpumkhata thil tih tlânna chuan inneihna a tihngheh?
• Eng kawngin nge nupui pasal neite chuan Pathian kaihhruaina an zui theih?
• Engtin nge inneihna Dintu Pathian Jehova zahna kan lantîr theih?
[Zirlai Atâna Zawhnate]
[Phêk 18-naa milemte]
Thil tih tlânna chuan nupate chu inpumkhat tûrin a ṭanpui