Kawppui Neih Lohna Chu Hmang Ṭangkai Hle Rawh
Kawppui Neih Lohna Chu Hmang Ṭangkai Hle Rawh
“Tupawh a pawm thei apiangin pawm rawh se.”—MT. 19:12.
1, 2. (a) Engtin nge Isua, Paula, leh mi dangte chuan kawppui neih loh chu an thlîr? (b) Engvângin nge ṭhenkhat chuan kawppui neih loh chu thilpêk anga an thlîr loh mai theih?
INNEIH hi mihringte hnêna Pathian thilthlâwnpêk hlu berte zînga mi zawng a ni ngei mai. (Thuf. 19:14) Mahse, kawppui nei lo Kristian tam takte pawhin nun hlim leh lungawithlâk tak an nei tho a ni. Nupui nei lo kum 95 mi Harold-a chuan: “Mi dangte nêna inkawm leh khual chhâwn thiamna lantîr chu nuam ti hle mah ila, mahni chauhva ka awm hunah pawh mal ka inti ngai lo. Kawppui neih lohna thilpêk ka dawng tih theih tak zet niin ka hria,” tiin a sawi.
2 Isua Krista leh tirhkoh Paula chuan kawppui neih loh chu inneihna ang bawka Pathian thilpêk niin an sawi a. (Matthaia 19:11, 12; 1 Korinth 7:7 chhiar rawh.) Mahse, kawppui nei lo zawng zawng chu an duh rêng vânga nei lo an ni hran lo. A châng chuan, dinhmun chuan kawppui tûr âwm zawn hmuh a tiharsa a ni. A nih loh leh, kum tam tak chhûng kawppui an neih hnuah nupa inṭhen vâng emaw, thihna vâng emawin ṭhenkhat chu an mal leh a ni. Chuti chu, eng kawngin nge kawppui neih loh chu thilpêk a nih theih? Engtin nge kawppui nei lo Kristiante chuan an dinhmun chu an hman ṭangkai hle theih?
Thilpêk Danglam Tak
3. Kawppui nei lo Kristiante’n hman ṭangkai theih hun ṭha eng nge an neih?
3 Kawppui nei lo chu a nei aiin a zalên zâwk a. (1 Kor. 7:32-35) Chûng chu a rawngbâwlna zauh nân, mi dangte hmangaihna kawnga inhawn lehzual nân, leh Pathian Jehova hnaih lehzual nâna hman ṭangkai theih hun ṭha tak a ni. Chuvângin, Kristian tam tak chuan kawppui neih loh hlâwkna chu an hria a, hun engemawti chhûng tal nupui pasal nei lova awm chu an “pawm” a ni. Mi dangte chuan atîrah kawppui neih loh chu an tum hran lo; mahse, an dinhmunte a inthlâk danglam a, ṭawngṭaina nêna tih tak zeta an dinhmun an ngaihtuah hian Pathian Jehova ṭanpuinain kawppui nei lovin an awm thei dâwn tih an hria a ni. Chuvângin, an dinhmun inthlâkthleng chu pawmin, kawppui nei lova awm chu an pawm ta a ni.—1 Kor. 7:37, 38.
4. Engvângin nge kawppui nei lo Kristiante chuan Pathian rawngbâwlnaa kawp kim nia inhriatna an neih theih?
4 Kawppui nei lo Kristiante chuan Jehova leh a inawpna pâwl hriat hlawh tûr chuan kawppui nei an nih kher a ngai lo tih an hria a. Pathian hmangaihna chu kan dawng ṭheuh a ni. (Mt. 10:29-31) Pathian hmangaihna ata chu mihring tumah leh thil engmahin min ṭhen thei lo. (Rom 8:38, 39) Kawppui nei emaw, nei lo emaw pawh ni ila, Pathian rawngbâwlnaah kawp kim nia inhriatna kan nei thei a ni.
5. Kawppui neih lohna hlâwkpui tak zet tûr chuan eng nge ngai?
5 Chuti chung pawhin, rimawi lam emaw, taksa insâwizawi lam emawa thiam theihna thilpêkte ang bawkin, kawppui neih lohna thilpêk hmang ṭangkai tûr chuan ṭan lâk a ngai a ni. Chuvângin, unaupa emaw, unaunu emaw; la naupang emaw, upa tawh emaw; duh rêng vâng emaw, dinhmun vâng emawa tûn laia kawppui nei lo Kristiante’n an dinhmun chu engtin nge a ṭha thei ang bera an hman theih ang? Kum zabi khatna Kristian kohhrana entîrna ṭhenkhat chu ngaihtuahin, kan thil zir theihte chu i lo en ang u.
Naupan Deuh Laia Kawppui Neih Lohna
6, 7. (a) Philipa fanu nula thianghlimte chuan Pathian rawngbâwlnaah eng chanvo nge an dawn? (b) Timothea chuan eng kawngin nge kawppui nei lova a awm hun chu a hman ṭangkai a, a ṭhat laia rawng a bâwlna chuan eng malsâwmna nge a thlen?
6 Chanchin ṭha hriltu Philipa chuan amah ang bawka thu hrilhna kawnga ṭhahnemngai fanu nula thianghlim pali a nei a. (Tirh. 21:8, 9) Thu hrilh lâwkna chu mak taka thlarau thianghlim thilpêkte zînga mi a ni a, hêng nulate hian Joela 2:28, 29 hrilh lâwkna thlen famkim nân chu thilpêk chu an hmang a ni.
7 Timothea chu kawppui a neih lohna hmang ṭangkaitu ṭhalai pakhat a ni a. A naupan têt aṭangin a nu, Euniki leh a pi, Loisii te chuan “lehkha thianghlimte” an zirtîr a ni. (2 Tim. 1:5; 3:14, 15) Mahse, C.E. 47-na vêla Lustra khuaa Paula a va zin hmasak ber ṭumah chauh Kristianna chu an pawm a ni. A hnu kum hniha a vawi hnihna atâna Paula a va zin chuan, Timothea chu kum sawmhnih la tling lo deuh emaw, pêl âwrh chauh emaw a ni a. La naupang hle mah se, Lustra leh Ikonion khuaa Kristian upate chuan “an fak” hle a ni. (Tirh. 16:1, 2) Chuvângin, Paula chuan Timothea chu zinpui atân a sâwm ta a ni. (1 Tim. 1:18; 4:14) Timothea’n nupui a neih leh neih loh chu kan sawi chiang thei lo. Mahse, Paula sâwmna chu lâwm taka pawmin, a hnu kum tam tak chhûng chu nupui nei lo missionary leh kohhran upa angin rawng a bâwl a ni tih chu kan hre chiang a ni.—Phil. 2:20-22.
8. Engin nge Johana Marka chu thlarau lam thiltumte ûmtîr thei a, chu mi avângin eng malsâwmnate nge a dawn?
8 Johana Marka pawhin kawppui a neih hma hun chu ṭha takin a hmang a. Amah leh a nu Mari, leh a laichîn unaupa Barnaba-te chu Jerusalem kohhran din ṭantirh lama mi an ni vek a ni. Marka chhûngkua chuan khawpui chhûnga mahni in leh chhiahhlawh an neih avângin nuamsa thawkhatin an khawsa a ni ngei ang. (Tirh. 12:12, 13, NW) Chutiang a ni chung pawhin, ṭhalai Marka chu nawmsip bâwlna emaw, mahni hmasialna emawah a inhnamhnawih lo va; nupui neia chhûngkaw nun nuam taka chen mai lah a tum hek lo. Tirhkohte nêna atîr lama an inkawmna chuan missionary anga rawngbâwl châkna a neihtîr a. Chuvângin, Paula leh Barnaba te missionary zin vawi khatna chu phûr taka zuiin, an rawng a bâwlsak a ni. (Tirh. 13:5) A hnuah, Barnaba nên an zin leh a, chu mi hnuah pawh Babulon-ah Petera chu rawng a bâwlpui a ni. Eng chen nge Marka chu nupui nei lova a awm tih kan hre lo. Mahse, mi dangte rawngbâwlsak inhuam tak leh Pathian rawngbâwlnaa mi inhmang tak nihna hming ṭha a nei a ni.
9, 10. Tûn laia kawppui nei lo Kristian ṭhalaite tân an rawngbâwlna zauh tûrin eng hun remchângte nge inhawng? Entîrna pe rawh.
9 Kohhran chhûnga awm ṭhalai tam takte pawhin kawppui an neih hma kumte chu inhuam takin Pathian rawngbâwl nân an hmang a. Marka leh Timothea ang bawkin, anni chuan kawppui neih lohnain ‘Lalpa rawng buai lovin a bâwltîr thei’ tih an hre thiam a ni. (1 Kor. 7:35) Hei hi sâwtna nasa tak a ni. Kawppui nei lote tân hun remchâng tam tak a awm—pioneer thawh te, Lalram thu hriltu mamawh zualna hmuna rawngbâwl te, ṭawng dang zir te, Kingdom Hall leh branch in tûr sakna ṭanpuina te, Ministerial Training School kal theihna te, leh Bethel-a rawngbâwl theihna te chu. Kawppui la nei lo ṭhalai i nih chuan, i dinhmun chu i hmang ṭangkai hle em?
10 Mark-a tih hming pu unaupa pakhat chuan kum 20 a tlin dâwn hnaih lamah pioneer a thawk ṭan a, Ministerial Training School aṭanga zir chhuakin, khawvêl hmun hrang hranga rawngbâwlna chanvo a dawng a ni. Kum 25 chhûng hunbi kima a rawngbâwlna chu thlîr lêtin, heti hian a sawi a ni: “Kohhran chhûnga mi zawng zawngte fuih chu ka tum a, rawngbâwlnaah ka thawhpui a, anmahni ka tlawh bawk a, ka ina chaw ei tûra sâwmin, thlarau lama mi tichak thei intihhlimnate ka buatsaih bawk. Hêng zawng zawngte hian hlimna nasa tak min pe a ni,” tiin. Mark-a thusawi aṭanga a lan angin, hlimna nasa tak chu pêk chhuahna aṭanga neih theih a ni a; tin, rawngbâwlna thianghlim atâna inpêkna chuan mi dangte tâna inpêk theihna hun remchâng tam tak a awmtîr a ni. (Tirh. 20:35) I tuizâwng te, i thiamzâwng te, a nih loh leh i thiltawnte chu eng ang pawh ni se, tûn laia ṭhalaite tân Lalpa hna ṭhahnemngai taka thawh tûr a tam hle a ni.—1 Kor. 15:58.
11. Nupui pasal neih hmanhmawh loh a hlâwkna ṭhenkhat chu engte nge ni?
11 Ṭhalai zawng zawng deuhthaw chuan atâwpa nupui pasal neih chu duh mah se, hmanhmawh loh chhan tûr a awm a ni. Paula chuan ṭhalaite chu tisa châkna a sosân hun, “tleirâwl pârmawina” a chuai thleng nghâk tûrin a fuih a ni. (1 Kor. 7:36, Baptist Mid-Mission Translation) Mahni inhriat nân leh kawppui tûr âwm thlan theih nâna thiltawn neih nân hun a ngai a ni. Inneihna thutiam intiam chu thu tlûkna khûn tak a ni a, dam chhûng daih a ni tûr a ni.—Thur. 5:2-5.
Upat Hnu Lama Kawppui Neih Lohna
12. (a) Engtin nge hmeithai Anni chuan a dinhmun inthlâkthleng chu a hmachhawn? (b) Eng chanvo nge a chan?
12 Chanchin Ṭha Luka ziaka târ lan hmeithai Anni chu kum sarih an inneih hnua a pasalin beisei loh taka a boralsan avângin a lungngai hle ngei ang. Fa a neih leh neih loh emaw, pasal neih leh a tum leh tum loh emaw chu kan hre lo. Mahse, Bible chuan kum 84 mi a nih thlenga a la hmeithai thu min hrilh a. Bible sawi dân aṭang chuan, Anni chuan a dinhmun inthlâkthlengna hnuaiah pawh Jehova a hnaih tlat tih thu tâwp kan siam thei a ni. Ani chuan “Pathian biak in kalsan lovin achhûn azânin chaw ngheitea ṭawngṭaiin Pathian a be ṭhin.” (Lk. 2:36, 37) Chuvângin, a nunah thlarau lam thil a dah pawimawh ber a ni. Chu mi atân chuan ṭan lâk zawng a ngai ngei mai; mahse, nasa taka malsâwmna a dawng a ni. Ani chuan Isua sên lai a hmuh mai bâkah, he Messia kal tlanga zalênna lo awm tûr mite hnêna hrilh theihna chanvo pawh a nei bawk a ni.—Lk. 2:38.
13. (a) Engin nge Dorki chu kohhran thiltihah a inhmang hle tih târ lang? (b) Engtin nge Dorki chu a ṭhatna leh a ngilneihna avânga lâwmman pêk a nih?
13 Dorki, a nih loh leh Tabithi tih hming pu hmeichhe pakhat chu Jerusalem hmâr thlang lam tuipui kama awm Joppa khuaah a awm a. Bible-in a pasal chanchin a sawi lan loh avângin, chutih lai chuan pasal a la nei lo a ni ngei ang. Dorki chuan “thil tih ṭhat leh thilpêk a ngah hle.” Hmeithai retheite tân kawrte a siamsak a, anni chuan an hmangaih hle a ni. Chuvângin, vawi leh khata na thuta a thih tâkah chuan, a kohhran pum chuan mi tîrin Petera chu an unaunu duh tak kaitho tûrin an chah a ni. A thawhleh tâk thu Joppa khuaa a than chuan, mi tam tak chu ringtu an lo ni ta a. (Tirh. 9:36-42) An zînga mi ṭhenkhat chu a ngilneihna thiltih ropui tak hmanga a lo ṭanpui tawhte pawh an ni thei ang.
14. Engin nge kawppui nei lo Kristiante chu Jehova hnaih tûra chêttîr?
14 Anni leh Dorki te angin, kohhran chhûnga mi tam tak chuan an upat hnu lamah kawppui an nei lo va. Ṭhenkhat chuan kawppui tûr âwm an hmu lo pawh a ni thei ang. A dangte chu an inṭhen emaw, nupui pasal sûn emaw an ni. An harsatna thlenna tûr kawppui an neih loh avângin, anni chu Jehova chungah an innghat nasa lehzual fo ṭhîn. (Thuf. 16:3) Bethel-a kum 38 chuang rawngbâwl tawh Silvia-i chuan kawppui a nei lo chu malsâwmna angin a thlîr a ni. “A châng chuan chak tak anga awm hi ka ning. ‘Tuin nge min fuih ang?’ tiin ka ngaihtuah ṭhîn,” tiin a sawi. Mahse, heti hian a sawi zawm a ni: “Pathian Jehova’n kei aiin ka mamawh a hria tih rinna chuan amah hnaih lehzual tûrin min ṭanpui a ni. Tin, ka mamawh fuihna chu ka dawng reng ṭhîn a, a châng chuan beisei loh lam daih aṭangin ka dawng ṭhîn,” tiin. Jehova kan hnaih zual apiang hian, ani chuan duhawm leh thlamuanawm thei ang berin min chhâng lêt ṭhîn a ni.
15. Engtin nge kawppui nei lo Kristiante chu hmangaihna kawnga an ‘inhawn’ lehzual theih?
15 Kawppui neih lohna chuan hmangaihnaa ‘inhawn’ lehzual theihna hun remchâng ṭha bîk tak a awmtîr a. (2 Korinth 6:11-13 chhiar rawh.) Kum 34 chhûng hunbi kima rawngbâwl tawh kawppui nei lo unaunu Jolene-i chuan: “Ka rualpuite mai ni lovin, mi chi hrang hrangte nêna inlaichînna ṭha tak neih ka tum ṭâng ṭâng a. Kawppui neih loh chu Pathian Jehova te, chhûng te, unaute, leh ṭhenawmte tâna inpêk theihna hun remchâng ṭha tak a ni. Ka upat poh leh kawppui ka neih loh avângin ka lâwm lehzualin ka hria,” tiin a sawi. Tar te, dam lo te, nu leh pa mal ṭan te, ṭhalai te, leh kohhrana mi dangte chuan kawppui nei lote pêk ṭanpuina chu an ngaihlu ngei ang. A nihna takah chuan, hmangaihna kan lantîr apiang hian ṭhat phah sawt nia inhriatna kan nei ṭhîn. Mi dangte hmangaihna kawngah i “inhawng” lehzual thei ang em?
Dam Chhûnga Kawppui Neih Loh
16. (a) Engvângin nge Isua chuan a dam chhûnga kawppui a neih loh? (b) Engtin nge Paula chuan kawppui a neih lohna chu a hman ṭangkai?
16 Isua chuan nupui a nei lo; a rawngbâwlna atân a inbuatsaih leh a thawh a ngaih avângin. Ani chu a zin nasa a, zîng aṭanga zan rei thlenga hna thawkin, a tâwpah chuan a nunna chu inthawi nân a hlân hial a. Kawppui a neih lohna chuan chûng chu a tihtîr thei a ni. Tirhkoh Paula pawh mêl sâng tam tak zinin, rawngbâwlnaah harsatna namai lote chu a tâwk a. (2 Kor. 11:23-27) Tûn hmain nupui a lo nei tawh pawh a ni thei a; mahse, tirhkoh anga rawngbâwlna pêk a nih hnuah kawppui neih loh chu a thlang ta a ni. (1 Kor. 7:7, 8; 9:5) Rawngbâwlna avângin Isua leh Paula chuan a theih chuan an entawn tûr siam zui tûrin mite chu an fuih a ni. Mahse, nupui pasal neih loh chu rawngbâwltu nih nâna thil ṭûl angin an sawi lo ve ve bawk.—1 Tim. 4:1-3.
17. Engtin nge tûn laia mi ṭhenkhatin Isua leh Paula chu an entawn a, engvângin nge chutianga inpete chu Jehova’n a ngaihlu a ni tih kan chian theih?
17 Tûn lai hian, ṭhenkhat chuan chutiang bawkin rawngbâwlna an ûm theih nâna kawppui neih loh chu an thlang tlat a. Atîr a kan sawi tâk Harold-a chuan kum 56 lai Bethel-ah rawng a bâwl tawh a ni. Ani chuan: “Bethel-a kum sâwm rawng ka bâwl chhûng chuan, dam lohna vâng emaw, nu leh pa tar tawhte enkawl ngaih vâng emawa Bethel chhuahsan nupa tam tak ka hmu a. Ka nu leh pate an thi tawh ve ve a. Bethel rawngbâwlna ka ngaihhlut êm avângin, nupui neih avânga chu chanvo chân thei dinhmuna indah chu ka duh lo,” tiin a sawi. Chutiang bawkin, kum tam tak liam ta khân hun rei tak chhûng pioneer thawk Margaret-i chuan: “Pasal neih theihna hun remchâng chu ka nei nual mai; mahse, rawngbâwlnaa ka buai êm avângin nei hman ka ni lo. Kawppui neih loh avânga zalênna leh kal sawn vêl awlsam lehzualna chuan rawngbâwlnaa buai reng thei tûrin min ṭanpui a, chu chuan hlimna nasa tak min pe a ni,” tiin a sawi bawk. Pathian Jehova chuan chutianga mahni hmasial lo inpêkna nei apiangte chu a theihnghilh ngai lovang tih a chiang hle.—Isaia 56:4, 5 chhiar rawh.
I Dinhmun Chu A Sâwt Thei Ang Berin Hmang Rawh
18. Engtin nge mi dangte chuan kawppui nei lo Kristiante chu an fuih a, an ṭanpui theih?
18 Jehova rawngbâwlnaa theih tâwp chhuahtu kawppui nei lo zawng zawngte chuan tih tak zeta fak leh fuih an phu a ni. An nihna avângin anni chu kan hmangaih a, kohhrana an thiltihte avângin kan lâwm hle bawk. An tâna thlarau lam “unaupate, farnute, nute, fate,” kan nih chuan, anni chuan mal nia inhriatna an nei ngai lo vang.—Marka 10:28-30 chhiar rawh.
19. Kawppui i neih lohna a sâwt thei ang bera hmang tûr chuan eng nge i tih theih?
19 Mahni duh vâng emaw, dinhmun vâng emawa kawppui nei lo i nih chuan, hêng Bible hun lai leh tûn lai huna entîrnate hian nun hlimawm leh hlawhtling i nei thei tih tiam nawn che rawh se. Thilpêk ṭhenkhat chu beisei rêng a ni a, a dangte chu beisei loh taka dawn a ni ṭhîn. Thilpêk ṭhenkhat hlutna chu hriat nghâl theih a ni a, a dangte chu nakin hnu lama hriat a ni chauh ṭhîn bawk. Chuvângin, kan rilru put hmangah a innghat thui hle a ni. Kawppui i neih lohna chu a sâwt thei ang bera hmang tûrin eng nge i tih theih? Jehova hnaih lehzual la, Pathian rawngbâwlnaah buai rengin, mi dangte hmangaihna kawngah inhawng lehzual rawh. Inneihna ang bawkin, kawppui neih lohna chu Pathian thlîrna aṭanga kan thlîr a, chu thilpêk ṭha taka kan hman chuan a manhla thei hle a ni. (w11-E 01/15)
Kan Hre Chhuak Em?
• Eng kawngtein nge kawppui neih loh chu thilpêk a nih theih?
• Engtin nge naupan deuh laia kawppui neih loh chu malsâwmna a nih theih?
• Kawppui nei lo Kristiante chuan Pathian Jehova hnaih tûr leh hmangaihnaa inhawng lehzual tûrin eng hun remchângte nge an neih?
[Zirlai Atâna Zawhnate]
[Phêk 21-naa milemte]
Pathian rawngbâwlnaa hun remchâng i neihte chu a sâwt thei ang berin i hmang em?