Thlêmna Do Tûr Leh Lunghnualna Hmachhawn Tûra Tihchak
Thlêmna Do Tûr Leh Lunghnualna Hmachhawn Tûra Tihchak
“Thlarau thianghlim chu in chunga a lo thlen hunah thiltihtheihna in la nei ang.”—TIRH. 1:8.
1, 2. Isua chuan a zirtîrte hnênah ṭanpuitu eng nge a tiam a, engvângin nge anni chuan chu chu an mamawh ang?
ISUA chuan a zirtîrte’n mahni chaknain a thupêk zawng zawngte an zâwm thei dâwn lo tih a hria a. Thu an hrilh nasat dân tûr te, an hmêlmate chakzia te, leh mihring taksa derthâwnzia te ngaihtuah chuan mihring thiltihtheihna aia chungnung zâwk an mamawh tih a chiang hle. Chuvângin, vâna a lâwn hma lawk khân a zirtîrte hnênah he thu hi a tiam a ni: “Nimahsela thlarau thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” tiin.—Tirh. 1:8.
2 Chu thutiam chu C.E. 33 Pentikost nî khân a thleng famkim ṭan a, chu mi nî chuan thlarau thianghlimin Isua Krista zirtîrte chu an thu hrilhnaa Jerusalem tikhat tûrin a tichak a ni. Chuvângin eng ang dodâlna mahin an thu hrilhna chu a titâwp thei lo. (Tirh. 4:20) Keimahni pawh tiamin, Isua zirtîr rinawmte chuan “khawvêl tâwp thleng pawhin” he Pathian pêk chakna hi an mamawh hle dâwn a ni.—Mt. 28:20.
3. (a) Thlarau thianghlim leh thiltihtheihna inan lohna sawi rawh. (b) Jehova hnên ata thiltihtheihna chuan eng ti tûrin nge min ṭanpui theih?
3 Isua chuan a zirtîrte hnênah ‘thlarau thianghlim an chunga a lo thlen hunah thiltihtheihna an nei dâwn’ tih a tiam a. “Thlarau” tih leh “thiltihtheihna” tih ṭawngkamte hian awmze hran a nei ve ve a ni. Pathian thlarau—a chakna chevêl reng—chu Pathian duhzâwng hlen chhuah nâna mi emaw, thil emaw hnêna pêk chhuah leh anmahni thununtu chakna hi a ni a. Thiltihtheihna erawh chu “thil engemaw tih theihna leh nghawng neih theihna” tia hrilhfiah theih a ni a. Chu chu mi emaw, thil emaw hnênah thil tih a ṭûl hma loh zawng che châng lovin a awm reng thei a ni. Chuvângin, thlarau thianghlim chu battery-a chakna thuntu electric tha nêna khaikhin theih a nih laiin, thiltihtheihna chu battery-a awm chakna inkhâwl anga sawi theih a ni. A thlarau thianghlim hmanga Pathian Jehova’n a chhiahhlawhte hnêna a pêk thiltihtheihna chuan kan Kristian inpumpêkna hlen chhuah theihna leh a ṭûl huna kan chunga lo thleng thil ṭha lote do theihna min pe ṭheuh a ni.—Mika 3:8; Kolossa 1:29 chhiar rawh.
4. He thuziakah hian eng nge kan ngaihtuah ang a, engvângin nge?
4 Engtin nge thlarau thianghlim hmanga kan dawn thiltihtheihna chu a lan chhuah? Engtin nge thlarau thianghlim chuan dinhmun chi hrang hrang hnuaia thil ti tûr leh chhâng lêt tûra min chêttîr theih? Rinawm taka Pathian rawng bâwl kan tum hian Setana emaw, a khawvêl emaw, a nih loh leh kan ṭhat famkim lohna emaw avânga lo awm harsatna chi hrang hrang kan tâwk a ni. Chûng harsatnate do hneh chu Kristian dik nih reng nân te, rawngbâwlnaa tel ziah nân te, leh Jehova nêna inlaichînna ṭha neih nânte hian a pawimawh hle. Tûnah chuan thlarau thianghlimin thlêmna do tûr leh chauhna leh lunghnualna hmachhawn thei tûra min ṭanpui dân i lo ngaihtuah ang u.
Thlêmna Do Tûra Tihchak
5. Engtin nge ṭawngṭainain thlêmna do tûra min tihchak?
5 Isua chuan a hnungzuitute chu: “Sual tûra thlêmnaah min hruai lût suh la, mi sual lakah chuan min chhandam zâwk ang che,” tia ṭawngṭai tûrin a zirtîr a. (Mt. 6:13) Jehova chuan hetianga ṭawngṭaitu a chhiahhlawh rinawmte chu a thlahthlam lo vang. Ṭum dangah, Isua chuan ‘kan Pa vâna mi chuan a dîltute chu thlarau thianghlim a pe ang’ tih a sawi a ni. (Lk. 11:13) Thil fel ti tûra min ṭanpuitu he chakna thiltithei tak Jehova’n pêk min tiam chu a va thlamuanthlâk tak êm! Hei hi Pathianin thlêmna min tawhtîr dâwn lo tihna a ni lo. (1 Kor. 10:13) Mahse, thlêmna kan tawh hun chu nasa lehzuala ṭawngṭai hun a ni.—Mt. 26:42.
6. Isua chuan Setana thlêmnate chu eng ṭanchhanin nge a chhân?
6 Diabola thlêmna chhân nân, Isua chuan Bible chângte a hmang a. “Tih ziak a ni . . . Tih ziak a ni ve bawk e . . . Setan, kal bo daih rawh! ‘Lalpa i Pathian chibi bûk la, ama rawng chauh bâwl rawh,’ tih ziak a ni,” a tih khân Pathian Thu chu a thinlungah a awm tih a chiang hle. Jehova leh a Thu a hmangaihna chuan Isua chu Setana thlêmna zawng zawng hnâwl tûrin a chêttîr a ni. (Mt. 4:1-10) Isua’n Setana thlêmna vawi tam tak a do hnuah chauh Setana chu a kalsawn a ni.
7. Engtin nge Bible chuan thlêmnate do tûra min ṭanpui?
7 Diabola thlêmnate do nân Isua’n Pathian Lehkha Thute a rinchhan si chuan, kan tân chuan rinchhan lehzual tûr a va ni êm! Dik takin, Diabola leh a ṭhuih hruaite kan do theihna chu Pathian tehnate hriat leh zawm tlat kan tumna aṭangin a inṭan a ni. Mi tam tak chuan Bible an zir a, Pathian finna leh felna hriatthiamna leh ngaihhlutna an lo neih tâkah chuan Bible tehnate mila nung tûra chêttîrin an awm a ni. A nihna takah chuan “Pathian thu” chuan “thinlunga ngaihtuah leh tumte” hre thei tûr thiltihtheihna a nei a ni. (Heb. 4:12) Miin Pathian Thu a chhiara a ngaihtuah nasat poh leh ‘Jehova thudik hriat thiamna’ a nei lehzual ang. (Dan. 9:13) Chutiang a nih avângin, kan chak lohna chungchâng sawina Bible chângte chu kan ngaihtuah ngun tûr a ni.
8. Eng kawngin nge thlarau thianghlim kan dawn theih?
8 Isua’n thlêmna a do theih chhan chu Pathian Lehkha Thu a hriat bâkah, ‘thlarau thianghlima a khah’ bawk vâng a ni a. (Lk. 4:1, 2) Chutiang chakna leh theihna kan neih theih nân, a thlarauva kan khah theihna tûra Jehova ruahmanna siam zawng zawng chu hmang ṭangkaiin, amah kan hnaih tûr a ni. (Jak. 4:7, 8) Chûng ruahmannate zîngah chuan Bible zir te, ṭawngṭai te, leh unaute nêna inkawmte a tel a. Mi tam tak chuan thlarau lam thilte ngaihtuah tûra anmahni ṭanpuitu Kristian thiltihna hun duan ṭha neih a hlâwkzia chu an hre bawk.
9, 10. (a) Eng ang thlêmnate nge tualchhûngah lâr? (b) Engtin nge ngun taka ngaihtuahna leh ṭawngṭaina chuan i chauh hunah pawh thlêmna do tûra a ṭanpui theih che?
9 Eng thlêmnate nge i do ngai? I kawppui ni lo chhaider tûra thlêmna i tâwk tawh ngai em? Nupui pasal la nei lo i nih chuan, pâwn lam mi ngaihzâwn duhna i nei tawh ngai em? TV en hun leh Internet hman hunah, Kristiante chu thil bawlhhlawh engemaw en tûra thlêm an ni thut thei. Chutiang i lo tawng tawh a nih chuan engtin nge i tih? Thil sual chuan sual dang a hrin theih a, a tâwpa sual pawi tak a thlen theih dân ngaihtuah chu a finthlâk a ni. (Jak. 1:14, 15) Rinawm lohna thiltihin Jehova chungah, kohhran chungah, leh i chhûngkaw chunga hrehawmna a thlen dân tûr chu ngaihtuah rawh. Kawng lehlamah chuan, chhia leh ṭha hriatna thiang chu Pathian thu bulte laka rinawmna aṭanga lo awm a ni. (Sâm 119:37; Thufingte 22:3 chhiar rawh.) Chutiang fiahna i tawh apiangin, do thei tûra i mamawh chakna dîl chu tum tlat ang che.
10 Diabola thlêmna chungchângah hriat reng ngai thil dang a awm a. Setana chuan Isua chu thlalêra ni 40 chhûng chaw A nghei hnuah a rawn pan a ni. Diabola chuan chu hun chu Isua rinawmna fiah nâna ‘hun remchâng’ takah a ngai a ni tih rinhlelh rual a ni lo. (Lk. 4:13) Setana chuan kan rinawmna fiah nân pawh hun remchâng a zawng ve bawk a. Chuvângin, thlarau lama chak renga kan awm chu a pawimawh hle. Setana chuan a mi beih tûra chu a chak loh lai berah a bei ṭhîn. Chuti chu, kan chauh emaw, kan lunghnual emaw lai hian Pathian Jehova hnêna a vênhimna leh a thlarau thianghlim dîl chu kan tum lehzual sauh tûr a ni.—2 Kor. 12:8-10.
Chauhna leh Lunghnualna Hmachhawn Tûra Tihchak
11, 12. (a) Engvângin nge tûn laiah mi tam tak an lunghnual? (b) Engin nge lunghnualna do thei tûrin min tichak thei?
11 Mihring ṭha famkim lo kan nih angin, lunghnual châng kan nei ṭhîn a. A bîk takin hun khirh taka awm kan nih avângin tûn lai hian lunghnual a awlsam lehzual a ni. Tin, mihringte hun tawn tawh zînga a khirh lai ber kan pal tlang mêk pawh a ni thei. (2 Tim. 3:1-5) Armageddon kan hnaih zêl rual hian ei leh bâr lam, rilru lam, leh thil danga nêksâwrna chu a pung zêl a. Chuvângin, ṭhenkhatin chhûngkaw enkawl leh châwm harsa an ti tawlh tawlh pawh hi mak kan ti tûr a ni lo. Anni chu an hah a, an chau va, an chau chhia a, an chau chhe dêr hial a ni. Chutiang chu i nih chuan, engtin nge chu nêksâwrna chu i hmachhawn theih ang?
12 Isua chuan a zirtîrte chu ṭanpuitu—Pathian thlarau thianghlim—pêk a tiam tih hre chhuak ang che. (Johana 14:16, 17 chhiar rawh.) Chu chu lei leh vâna chakna thiltithei ber a ni. Chu mi hmang chuan, Pathian Jehova chuan fiahna engpawh tuar thei tûra kan mamawh chakna leh chhelna “aia nasa zâwk” chu min pe thei a ni. (Eph. 3:20) “Lehlam lehlama nêksâwrin” awm mah ila, chu thlarau kan rinchhan chuan ‘thiltihtheihna nasa tak’ chu kan dawng ṭhîn tih tirhkoh Paula chuan a sawi. (2 Kor. 4:7, 8) Jehova chuan kan hrehawmna paih bosak min tiam lo; mahse, a thlarau thianghlim zârah hmachhawn thei tûra kan mamawh chakna pêk erawh min tiam a ni.—Phil. 4:13.
13. (a) Engtin nge ṭhalai pakhat chu dinhmun khirh tak hmachhawn thei tûra tihchak a nih? (b) Hetiang thiltawn dang hriat i nei em?
13 Kum 19 mi regular pioneer thawk lai Stephanie-i hi han ngaihtuah teh. Kum 12 mi a nihin a chau thut a, thluak chawr a nei a ni tih hmuh chhuah a ni. Chuta ṭang chuan vawi hnih zaipui a tâwk a, êngzung hmanga enkawl a nih bâkah, vawi hnih lai a chau leh thut bawk a, chu chuan a taksa vei lam pang chu che hlei thei lo leh khua hmu ṭha hlei thei lovin a siam a ni. Stephanie-i chuan a ngaih pawimawh êm êm Kristian inkhâwm leh thlawhhma rawngbâwlnaa tel nân a tha leh zung a khêk a ngai a. Chuti chung pawhin, Jehova thlarau thianghlim chuan kawng tam taka chhel tûrin a ṭanpui niin a hre tlat a ni. Kan Kristian unaute thiltawn telna Bible ṭanchhan thu leh hla chhuahte chuan ani chu a lunghnual châng pawhin a chhâwk hle a ni. Unaute chuan lehkha thawnin emaw, inkhâwm hma leh bân hnu lama fuihin emaw ani chu an ṭanpui a. Tuina neite pawhin Stephanie-i zirtîrna pêk an ngaihhlutzia chu Bible zirna nei tûra in lama va panin an lantîr bawk. Hêng zawng zawngte avângin Stephanie-i chu Pathian Jehova chungah a lâwm hle a ni. A Bible châng duh tak chu Sâm 41:3 a ni a, ama chungah thleng famkim niin a hre tlat bawk a ni.
14. Kan lunghnual hunah eng nge kan pumpelh ang a, engvângin nge?
14 Kan chauh hunah emaw, nêksâwrna kan tawh hunah emaw hian a hmachhawn dân tûr chu thlarau lam thiltihte paih ṭhen niin kan ngai tûr a ni hauh lo. Chutianga thlarau lam thil ngaihthah chu thiltih âwm lo ber a ni. Engvângin nge? Mi mal leh chhûngkuaa Bible zirna te, thlawhhma rawngbâwlna te, inkhâwm ang chite hi min tichaktu thlarau thianghlim kan dawn theihna a nih avângin. Kristian thiltihte chuan engtik lai pawhin min tihahdam a ni. (Matthaia 11:28, 29 chhiar rawh.) Inkhâwmnaa chau taka lo thleng unaute chu inkhâwm a bân meuh chuan battery-a chakna thun thar ang maia tihchak an va ni zing tak êm!
15. (a) Jehova chuan Kristian tân nun hahdam tak a tiam em? Bible ṭanchhanin hrilhfiah rawh. (b) Eng nge Pathianin min tiam a, eng zawhnate nge lo chhuak?
15 Mahse, hetianga kan sawi hian Kristian zirtîr nih mawhphurhna hi a zâng hle kan tihna zawng a ni lo. Kristian rinawm ni tûr chuan ṭan lâk a ngai a. (Mt. 16:24-26; Lk. 13:24) Nimahsela, thlarau thianghlim hmangin Jehova chuan chau hnênah chakna a pe thei a ni. Zâwlnei Isaia chuan: “LALPA nghâktute erawh chuan an chakna chu an siam ṭha leh ang a; mupuite angin thlain an thlâwk chho vang a; hah lovin an tlân ang a; chau lovin kêin an kal ang,” tiin a ziak a ni. (Is. 40:29-31) Chutiang a nih si chuan, Thlarau lama chauhna awmtîrtu ber chu eng nge ni? tiin kan inzâwt tûr a ni.
16. Chauhna emaw, lunghnualna emaw awmtîr thei thilte paih bo tûrin eng nge kan tih theih?
16 Pathian Jehova Thu chuan “thil pawimawh zâwkte fiah” tûrin min fuih a. (Phil. 1:10, NW) Kristian nun kawng chu kêa thui tak intlânsiakna nêna khaikhinin, thlarauva thâwk khum tirhkoh Paula chuan: “Min tihnawk apiang . . . i dah ve ang u, . . . kan hmaa intlânsiakna tûr awmah hian chhel takin i tlân zêl ang u,” tiin a sawi. (Heb. 12:1, 2) A sawi tum chu min tichau thei tûr thil ṭûl lo ûmte leh phur rit dangte kan pumpelh tûr tihna a ni. Kan zînga ṭhenkhat chuan kan buai tawh nâk alaiin thil tam tak tihbelh kan tum mai pawh a ni thei ang. Chuvângin, i chauh va, nêksâwr nia i inhriat fo chuan, i ei zawnna hnathawh atâna i hun pêk zât te, i zin thawnven ngun dân te, infiamna leh intihhlimna dang atâna hun i hman hnem dânte ennawn chu i hlâwkpui thei a ni. A âwm tâwk hriatna leh inngaihtlâwmna chuan mahni tlin tâwk hre tûr leh thil ṭûl lo dangte atâna inhmang lutuk lo tûrin min chêttîr ṭheuh vang.
17. Engvângin nge ṭhenkhat chu an lunghnual mai theih a, he mi chungchângah hian Jehova chuan eng thu nge min tiam?
17 Kan zînga ṭhenkhat chu beisei anga tâwpna a lo thlen mai loh avângin an lunghnual pawh a ni thei. (Thuf. 13:12) Mahse, chutiang mite chuan Habakuka 2:3 thu hi an thlamuanpui thei a ni: “Inlârna hi hun ruat chhûng atân mai a ni nghe nghe si a, a kin nî chu a hnai tial tial a, a thlâwn lo vang. Rei deuh mah se, nghâk rawh; a lo thlen ngei dâwn avângin a tlai chuang lo vang,” tih hi. Khawvêl tâwpna chu a hun ruatah tak a lo thleng dâwn tih Pathian Jehova tiamkamna kan nei a nih chu!
18. (a) Eng thutiamin nge tichak che? (b) Engtin nge a dawta thuziak chu kan tân a ṭangkai ang?
18 Jehova chhiahhlawh rinawm zawng zawngte chuan chauhna leh lunghnualna a awm tawh loh va, mi nungdam tawh phawtin an “vânglai chakna” an neih hun tûr chu an nghâkhlel ngei mai a. (Job. 33:25) Tûnah ngei pawh hian thlarau lama min tichaktu thiltiha kan inhman hian thlarau thianghlim hnathawh azârah chhûng lamah kan lo chak thei a ni. (2 Kor. 4:16; Eph. 3:14-19) I chauhna chuan chatuan malsâwmna i dawn tûrte chântîr che suh se. Thlêmna emaw, chauhna emaw, a nih loh leh lunghnualna emaw vânga lo awm pawh ni se, eng ang fiahna pawh hi tûnah mai a nih loh pawhin Pathian khawvêl tharah chuan a tâwp ngei dâwn a ni. A dawta thuziakah chuan, thlarau thianghlimin tihduhdahna hmachhawn thei tûr te, ṭhiante nêksâwrna hlauhawm tak do thei tûr te, leh harsatna dangte tuar thei tûra Kristiante a tihchak dân kan en ang. (w11-E 01/15)
Engtin Nge Kan Chhân Ang?
• Engtin nge Bible chhiarna chuan min tihchak?
• Engtin nge ṭawngṭaina leh rilrua chhût ngunna chuan min tihchak theih?
• Engtin nge lunghnualna awmtîr thei thilte chu kan paih bo theih?
[Zirlai Atâna Zawhnate]
[Phêk 27-naa milem]
Kristian inkhâwmte chuan thlarau lamah min tichak thei