Tuemaw Chu A Awm Ngei Alâwm—Mahse Chu Chu Tunge?

Europe-ah nu tar tawh tak pakhat chu rosary keng chungin biak inah a lût a, Mari lim hmaah a ṭhingṭhi a. Africa-ah, chhûngkaw pakhat chuan an chhûng khat mi zahkai tak pakhat thlânah chuan zu fîr chak chi an leih a. America khawmuala tlangvâl pakhat chuan amah vêngtu vântirhkoh a biak theih a rin avângin chaw ngheiin thil a ngaihtuah a. Tin, Asia khawmuala puithiam pakhat chuan rawng chi hrang hrang nei lekha themte chu hâlin thlahtu thlaraute hnênah inthawina a hlân a ni.

HENG zawng zawngte hian inanna eng nge an neih? An vai hian thlarau khawvêlah biak pawh theih tûr leh mihringte nun nasa taka thunun thei hriatna nei tuemaw a awm tih an ring ṭheuh hi a ni. He thurin hi thil thar a ni lo va, mak tih vak tûr lah a ni hek lo. A mak zâwk tak chu thlarau khawvêlah tunge awm tih chungchânga ngaih dân inkalh tak tak a awm deuh thluah mai hi a ni.

Mosolman-ho chuan Pathian pakhat—Allah—an tih chu an bia a. * Kristianna rama mite chuan Pathian chu Pa Pathian, Fapa Pathian, leh Thlarau Thianghlim Pathian hmanga din Trinity niin an sawi. Hindu-ho chuan pathian leh pathiannu sâng chuang awm niin an ring bawk a. Mi dangte erawh chuan ran, thing, lungpui, leh lui ṭhenkhatah thlarau a awm niin an sawi bawk. Tin, a dang lehte chu vântirhkoh leh ramhuaite, thlahrâng leh phûngte, pathian leh pathiannute chungchâng tam tak tichhuaktu lehkhabu te, film te, leh TV program-te chuan a thunun a ni.

Pathian chungchânga ngaih dân inkalh a tam ang bawkin, anmahni biak pawh dân tûr chungchângah pawh ngaih dân a tam hle a. Mahse, biak pawh an tum dân kawngte chu a dik vek thei lo tih hriatsa a ni. Heti hian han ngaihtuah teh: Phone-a mi kan biak hmain, kan mi biak tum chu tunge a nih hriat leh ani chu a awm tak zet a, kan phone a lo dawng dâwn tih kan rin tlat chu a ngai a. Awm nia ngaih ruat tuemaw biak tum chu a âtthlâk hle ang. Chu aia pawi zâwk chu, kan mi biak tum nia inchhâl tuemaw biak fuh a hlauhawm thei hi a ni.

Chuti chu, thlarau khawvêlah chuan tunge awm tak tak? Bible chuan he zawhna hi a chhân mai bâkah, kan biak pawh tûr leh a rawn chhân lêtna kan beisei theihte chu a hrilhfiah bawk a ni. Chuvângin, a dawta thuziak hi chhiar zawm rawh. Bible aṭanga i thu hriat chu mak i ti hle pawh a ni thei asin. (w10-E 12/01)

[Footnote]