Dân Bawhchhiatna I Hua Em?
Dân Bawhchhiatna I Hua Em?
“Bawhchhiatna i huat kha.”—HEB. 1:9.
1. Isua’n hmangaihna chungchângah eng nge a zirtîr?
ISUA KRISTA chuan hmangaihna chungchâng sawi uarin a zirtîrte hnênah: “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” a ti a. (Joh. 13:34, 35) A zirtîrte chu mahni inphat hmangaihna inlantîr tawn tûrin thu a pe a ni. Chu hmangaihna chu anmahni chhinchhiahna a ni ang. Anni chu heti hian a fuih bawk: “In hmêlmate chu hmangaih ula, a tiduhdahtu che u chu ṭawngṭaisak rawh u,” tiin.—Mt. 5:44.
2. Krista zuitute chuan eng huatna nge an neih ngai?
2 Mahse, a zirtîrte hnêna hmangaihna chungchâng a zirtîr bâkah, an huat tûrte pawh a zirtîr bawk a ni. Isua chungchângah: “Felna chu i ngainâ a, bawhchhiatna [suahsualna] chu i huat kha,” tiin kan chhiar a ni. (Heb. 1:9; Sâm 45:7) Chu chuan felna kan ngainat mai bâkah, sualna, a nih loh leh bawhchhiatna kan haw tûr a ni tih a târ lang chiang hle. Tirhkoh Johana’n: “Tupawh thil tisual apiangin dân pawh a bawhchhe ṭhîn; sual hi dân bawhchhiatna a ni si a,” tia a sawi hi chhinchhiah tlâk tak a ni.—1 Joh. 3:4.
3. Dân bawhchhiatna huat chungchângah, he thuziak hian eng nun kawng pali nge a sawiho vang?
3 Kristian kan nih avângin, ‘Dân bawhchhiatna ka hua em?’ tiin kan inzâwt tûr a ni. Hêng a hnuaia kawng chi lîah hian thil ṭha lote kan hua tih kan lantîr theih dân i lo bih chiang ang u: (1) zu hman sual chungchânga kan rilru put hmang te, (2) ramhuai lam thil kan thlîr dân te, (3) nungchang bawlhhlawhna kan chhân lêt dân te, leh (4) dân bawhchhiatna ngainatute kan thlîr dânah te hian.
Zu Bâwihah Tâng Suh
4. Engvângin nge Isua’n a lutuka zu in chungchângah huaisen taka vaukhânna a pêk ngam?
4 Isua chuan uain chu Pathian thilpêk a ni tih hriain, in châng a nei a. (Sâm 104:14, 15) Mahse, a hmang sual ngai lo va, a lutukin a in ngai hek lo. (Thuf. 23:29-33) Chuvângin, chu mi chungchângah chuan huaisen takin mi dangte a zilh ngam a ni. (Luka 21:34 chhiar rawh.) Zu hman sualna chuan sual pawi tak dang a thlen theih avângin tirhkoh Paula chuan: “Uaiin ruiin awm suh u, chu miah chuan insûm lohna a awm si a; thlarauva khatin awm zâwk rawh u,” tiin a ziak a. (Eph. 5:18) Kohhrana hmeichhe upa deuh tawhte pawh “uain heh mite” ni lo tûrin a fuih bawk.—Tit. 2:3-5.
5. Zu in tumte chuan eng zawhna nge an inzawh ang?
5 Zu in i tum a nih chuan, heti hian i inzâwt tûr a ni: ‘A lutuka zuin chungchânga Isua ngaih dân ka ṭâwmpui em? He mi chungchângah hian mi dangte zilh ngai ta se, huai takin ka zilh ngam ang em? Lungkhamna pumpelh nân emaw, rilru hah tihreh nân emawa in ka ni em? Chawlhkâr tin zu eng zât nge ka in? Tuemawin ka in tam thu min hrilh thawi hian engtin nge ka chhân lêt? Mahni thiam thu ka sawi emaw, ka thin a rim emaw mai ṭhîn em?’ tiin. A lutuka zu inna chuan ṭha taka kan thil ngaihtuah theihna leh thu tlûkna fing kan siam theihna tûr chu a khawih buai thei a. Krista zuitute chuan an thil ngaihtuah theihna vênhim chu an tum tlat a ni.—Thuf. 3:21, 22.
Ramhuai Nêna Inzawm Thiltihte Pumpelh Rawh
6, 7. (a) Engtin nge Isua chuan Setana leh ramhuaite a hmachhawn? (b) Engvângin nge ramhuai nêna inzawm thiltihte chu tûn laia a hluar êm êm?
6 Khawvêla a awm lai khân Isua chuan Setana leh a ramhuaite chu a dodâl tlat a. A rinawm nghehna chungchânga Setana’n hmai chhana a beihna chu a hnâwl hmak a ni. (Lk. 4:1-13) Tin, a rilru leh thiltihte thunun tûra ruahman thlêmna hriat mai harsa takte chu a hre theiin, a do tlat bawk. (Mt. 16:21-23) Isua chuan a phûte chu ramhuaite thununna râwng tak ata a chhan chhuak a ni.—Mk. 5:2, 8, 12-15; 9:20, 25-27.
7 Kum 1914-a Lal anga ṭhuttîr a nih hnuah, Isua chuan Setana leh a ramhuaite thununna ata vân chu a thian fai a. Chuvângin, Setana chuan tûn hma zawng aiin ‘khawvêl zawng zawng bum’ chu a tum nasa lehzual a ni. (Thup. 12:9, 10) Chuti chu, ramhuai nêna inzawm thiltihte’n mite rilru a la a, a hluar hle pawh hi mak kan ti lo. Chûng aṭanga invêng tûrin eng nge kan tih theih?
8. Intihhlimna thlan chungchângah eng anga inbih chiang tûr nge kan nih?
8 Bible chuan dawithiamna nêna inkûngkaih thilte hlauhawmna lakah min vaukhân chiang hle a. (Deuteronomy 18:10-12 chhiar rawh.) Tûn lai hian Setana leh a ramhuaite chuan mite ngaihtuahna chu ramhuai nêna inzawmna thiltihte chawi lârtu film te, lehkhabu te, leh eletronic games-te hmangin a thunun tlat a. Chuvângin, intihhlimna kan thlan hian heti hian kan inzâwt ṭheuh tûr a ni: ‘Thla kaltate chhûng khân, ramhuai nêna inzawm thiltihte telna chi film leh TV program te ka enin, electronic games te ka khelh bâkah, lehkhabu te, a nih loh leh comics bu te chu ka chhiar em? Ramhuai nêna inzawm thiltihte hnâwl a pawimawhzia ka hre thiam nge, chûng thilte hlauhawmna chu ka ngainêp zâwk? Ka intihhlimna thlan chungchângah Pathian Jehova ngaih dân tûr pawh ka ngaihtuah tel meuh vem? Chutianga Setana ka inthununtîr ṭan a nih chuan, Pathian Jehova ka hmangaihna leh a thu bul felte ka ngainatna chuan chûngte laka inthiar fihlîm nghâl tûrin min chêttîr ang em?’ tiin.—Tirh. 19:19, 20.
Nungchang Bawlhhlawhna Chungchânga Isua Vaukhânna Zâwm Rawh
9. Engtin nge miin dân bawhchhiat ngainatna a insiam theih?
9 Isua chuan mipat hmeichhiatna lama Pathian Jehova tehna chu a chawisâng a. Ani chuan: “Atîr ata an siamtu khân hmeichhia leh mipaa a siam leh, ‘He mi avâng hian mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,’ a ti tih in chhiar lo vem ni? Chutichuan pahnih an ni tawh lo va, tisa pum khat an ni tawh zâwk a ni. Chuvângin Pathianin a zawm tawh chu mihringin ṭhen suh se,” a ti a ni. (Mt. 19:4-6) Isua chuan kan thil hmuhte hian kan thinlung a hneh thei hle tih a hria a. Chuvângin, Tlâng chunga a Thusawiah: “‘I uirê tûr a ni lo,’ an ti tih in hre tawh. Kei erawh chuan, tupawh ngaih châka hmeichhe melh apiang chu, a thinlungah a uirê tawh reng a ni tih ka hrilh a che u,” tiin a sawi a ni. (Mt. 5:27, 28) Isua vaukhânna ngaihthahtute chuan, a nihna takah chuan dân bawhchhiat ngainatna an insiam a ni.
10. Saruak lem leh thuziakte laka inthen fai theih a nihzia târ langtu thiltawn sawi rawh.
10 Setana chuan saruak lem leh thuziakte hmangin mipat hmeichhiatna lama nungchang bawlhhlawhna chu a theh lâr a. He khawvêl hi chûng thilte chuan a chiahpiah hneh hle a ni. Saruak lem entute chuan an thil hmuh chu an rilru mitthla ata paih bo harsa an ti hle a. Chutiang en chu an chîng dawklak hial thei a ni. Kristian pakhat thiltawn hi han ngaihtuah teh. Ani chuan: “Saruak lemte chu a rûkin ka lo en ṭhîn a. Jehova rawng ka bâwlna chu khawvêl nêna inzawmna nei lo suangtuahna khawvêl ka insiam niin ka hria a. Chu thiltih chu a dik lo tih hre mah ila, ka rawngbâwlna chu Pathianin a pawm tho tiin ka inhrilh nawn ṭhîn,” tiin a sawi. Chu unaupa ngaihtuahna chu engin nge thlâkthleng? “Thu tlûkna ka siam tawhte zînga harsa ka la tih ber ni mah se, upate hnêna hrilh chu ka tum ta tlat a ni,” tiin a sawi. Chu unaupa chuan a tâwpah chuan a thil chîn bawlhhlawh tak chu a bânsan thei ta a. “Chu thil sual tihna ata ka inthen fai hnu chuan, chhia leh ṭha hriatna thiang tak nei nia inhriatna ka nei ta a ni,” tiin a sawi zawm a ni. Dân bawhchhiatna hawtute chuan saruak lem leh thuziakte chu an haw ngei tûr a ni.
11, 12. Engtin nge rimawi ngaihthlâk tûr thlan chungchângah dân bawhchhiatna kan huatzia kan lantîr theih?
11 Rimawi leh a hla thute chuan kan rilru a hneh thei hle a, chuvângin entîr nei kan thinlung pawh a hneh thei a ni. A rimawi tak hi chu Pathian thilpêk a ni a, hma sâng ata tawh amah chawimawi nâna hman a ni ṭhîn. (Ex. 15:20, 21; Eph. 5:19) Mahse, Setana khawvêl suaksual chuan nungchang bawlhhlawhna chawimawitu rimawite chu a siam chhuak a ni. (1 Joh. 5:19) I rimawi ngaihthlâkin nangmah a tihbawlhhlawh leh hlawh loh engtin nge i hriat theih?
12 Hetiangin i inzâwt ṭan thei a ni: ‘Ka hla ngaihthlâk chuan tualthahna te, uirêna te, inngaihna te, leh Pathian sawichhiatna te a chawimawi em? Mi tuemaw chu eng hla thu ber emaw chhiarsak ta ila, ani chuan dân bawhchhiatna ka hua tih a hmu thei ang em? Nge, a hla thute chuan ka thinlung bawlhhlawhzia a târ lang zâwk dâwn?’ tiin. Hlaa chawimawi reng chung chuan dân bawhchhiatna chu kan haw thei lo. Isua chuan: “Kaa chhuakte erawh chu thinlungah a lo chhuak a ni; chûng ngei chuan mihring a tibawlhhlawh ṭhîn a ni. Thinlungah hian ngaihtuahna sualte, tualthahnate, uirênate, inngaihnate, rûkrûknate, hêknate, sawichhiatnate a lo chhuak si ṭhîn,” tiin a sawi.—Mt. 15:18, 19; Jakoba 3:10, 11 nên khaikhin rawh.
Dân Bawhchhiatna Ngainatute Chu Isua Thlîr Dân Angin Thlîr Ve Rawh
13. Engtin nge Isua’n kawng sual zawh lui tlattute chu a thlîr?
13 Isua chuan mi sualte, a nih loh leh dân bawhchhetute lam a, simtîr tûra lo kal a nih thu a sawi a ni. (Lk. 5:30-32) A nih leh, kawng sual zawh lui tlattute chu engtin nge a thlîr? Isua chuan chutiang mite thununa awm lo tûrin vaukhânna khauh tak min pe a. (Mt. 23:15, 23-26) Heti hian fiah takin a sawi bawk: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titu erawh chu an lût ang. Chu mi niah chuan mi tam takin, ‘Lalpa, Lalpa, i hmingin thute kan sawiin, i hmingin ramhuaite kan hnawt chhuakin, i hmingin thil mak tam takte kan ti ṭhîn lo vem ni,’ an la ti ang,” tiin. Chu mi hunah chuan, inchhîrna nei lova dân bawhchhetute chu hnâwlin: “Ka hnên ata kal bo rawh u,” tiin a la hrilh ang. (Mt. 7:21-23) Engvângin nge chutianga ro a rêl? Chûng mite chuan Pathian an chawimawi loh va, an dân bawhchhiatna hmanga mi dangte chunga chhiatna an thlen bawk avângin.
14. Engvângin nge mi sual inlamlêt duh lote chu kohhran aṭanga hnawhchhuah an nih?
14 Pathian Thu chuan mi sual inlamlêt duh lote chu kohhran ata hnawtchhuak tûrin thu a pe a. (1 Korinth 5:9-13 chhiar rawh.) A lo berah pawh chhan pathum: (1) Jehova hming sawi chhiata a awm loh nân, (2) kohhran thianghlimna vawn ṭhat nân, leh (3) a theih phawt chuan thil sual titu inlamlêt tûra ṭanpui nân chutianga tih chu a ngai a ni.
15. Jehova chunga rinawm tûr chuan eng ang zawhna pawimawh takte nge kan inzawh ang?
15 Isua’n thil sual tiluitute a thlîr dân chu kan ṭâwmpui ve em? Hêng zawhnate hi kan ngaihtuah a ngai a ni: ‘Kristian kohhran ata hnawhchhuah, a nih loh leh kawm serh tuemaw chu ka kâwm ṭhîn ang em? Ani chu in khata kan khawsakpui loh chhûngkhatte ni ta se engtin nge ni ang?’ tiin. Chutiang dinhmun chu felna kan ngainatna leh Pathian chunga kan rinawmna fiahna nasa tak a ni thei ngei ang.
16, 17. Kristian nu pakhatin eng harsatna nge a tawh a, engin nge thil sualti inlamlêt duh lote hnawhchhuah chungchânga ruahmanna zâwm tûrin ani chu ṭanpui?
16 Unaunu pakhat thiltawn hi han ngaihtuah teh. Ani chuan tûn hmaa Jehova hmangaihna nei ṭhîn fapa puitling tawh a nei a. Mahse, a fapa chuan inchhîrna nei lovin dân bawhchhiatna sual chu a ti a. Chuvângin, kohhran ata hnawhchhuah a ni ta a ni. Kan unaunu chuan Jehova chu a hmangaih a, chutih rual chuan a fapa pawh chu a hmangaih hle bawk avângin amah kâwm tawh lo tûra Bible thupêk zawm chu harsa a ti hle a ni.
17 Chu unaunu hnênah chuan eng thurâwn nge i pêk ang? Upa pakhat chuan unaunu chu Pathian Jehova’n a rilru nat dân a hriatthiamzia hmu thiam tûrin a ṭanpui a. Unaupa chuan Pathian fa vântirhkoh ṭhenkhat an hel laia Jehova tawrh nat dân tûr ngaihtuah tûrin unaunu chu a sâwm a ni. Tichuan Pathian Jehova’n chutiang dinhmun a hrehawm dân tûr hre reng chung pawha inchhîrna nei lo mi sualte chu hnawtchhuak tûrin min phût tho tih a sawipui a. Unaunu chuan chu thu chu la thutak hlein, hnawhchhuah chungchânga ruahmanna chu rinawm takin a thlâwp ta a. * Chutiang rinawmna chuan Jehova thinlung a tilâwm hle.—Thuf. 27:11.
18, 19. (a) Dân bawhchhiat chîng tuemaw nêna inzawmna pawh chah chuan eng kan huatzia nge a târ lan? (b) Pathian leh a ruahmanna siam chunga kan rinawmna chuan eng nge a rah chhuah theih?
18 Chutiang dinhmun i hmachhawn ve a nih chuan, Pathian Jehova’n a tawrhpui che tih hre reng rawh. Hnawhchhuah emaw, kawm serh emawte nêna inzawmna pawh chahna hmangin, chu mi thlentu rilru put hmang emaw, thiltih emaw i huatzia chu i târ lang a. Chu bâkah, thil sual titu i hmangaihzia leh a tâna ṭha ber tûr tih i duhzia i târ lang bawk tihna a ni. Jehova chunga i rinawmna chuan thununna dawngte chu inchhîr a, Pathian Jehova hnêna an rawn kîr leh beiseina a awmtîr lehzual thei a ni.
19 Hnawhchhuah a nih hnua lâk luh leh tâk nu pakhat chuan heti hian a ziak a ni: “Pathian Jehova’n a mite a hmangaih avânga a inawpna pâwl a vawng fai chu a lâwmawm ka ti. Pâwn lam mite tâna nunrâwnthlâk tak anga lang chu thil tih ngai leh hmangaihna a ni zâwk,” tiin. A chhûngte pawh tiamin, kohhran chhûnga mite’n hnawhchhuah a nih laiin be pawp reng ta se, he nu hian chutiang thu tâwp a siam chu i ring em? Bible ṭanchhan hnawhchhuah ruahmanna kan thlâwpna chuan felna kan ngainatzia leh Jehova’n nungchang tehna siam tûra dikna a neih kan pawmzia a târ lang a ni.
“Sual Haw Rawh U”
20, 21. Engvângin nge dân bawhchhiatna huat dân zir chu thil pawimawh tak a nih?
20 Tirhkoh Petera chuan: “Ngaihven ula, fîmkhur rawh u,” tiin a vaukhân a. Engvângin nge? “In khingpui Diabola chu sakeibaknei rûm ṭhîn angin a ei theih tûr zawngin a phi ruai ṭhîn” si a. (1 Pet. 5:8) Chu a ei theih tûr chu nangmah i ni thei ang em? Dân bawhchhiatna huat dân i zir ṭhat leh ṭhat lohvah a innghat thui hle.
21 Thil sual huat dân zir chu a awlsam lo hle. Sual neia piang kan ni a, tisa châkna min chhawmnunsaktu khawvêlah hian kan awm bawk si a. (1 Joh. 2:15-17) Amaherawhchu, Isua Krista entawn a, Pathian Jehova hmangaihna thûk tak kan neih chuan dân bawhchhiatna huatna chu kan nei thei ang. Pathian Jehova chuan “a mi thianghlimte nunna chu a vawng ṭha ṭhîn a; anni chu mi suaksualte kut ata a chhanhim ṭhîn” tih hre rengin, ‘sual huat’ chu i tum tlat ang u.—Sâm 97:10. (w11-E 02/15)
[Footnote]
^ par. 17 January 15, 2007, chhuak Vênnainsâng, (English) phêk 17-20 en rawh.
Engtin Nge Kan Chhân Ang?
• Engin nge zu lam thilte chunga kan rilru put hmang fiah tûrin min ṭanpui ang?
• Ramhuai nêna inkûngkaihna thiltihte lakah engtin nge kan invên theih?
• Engvângin nge saruak lem leh thuziakte chu a hlauhawm?
• Kan hmangaih tak tuemaw hnawhchhuah a nih hian, dân bawhchhiatna kan huatzia engtin nge kan lantîr?
[Zirlai Atâna Zawhnate]
[Phêk 26-naa milem]
Zu in i tum a nih chuan, eng nge i ngaihtuah ang?
[Phêk 27-naa milem]
Intihhlimna lama Setana thununna lakah fîmkhur rawh
[Phêk 28-naa milem]
Saruak lemte en chîngtu chuan eng thil ngainatna nge a insiam?