Eden—Atîra Mihringte Awmna A Ni Em?

HUANA awm angah han inchan teh. Chutah chuan rilru lapêng thei thil a awm lo va, khawpui nun buai tak leh bengchheng tak hriat tûr lah a awm hek lo. Chu huan chu a zauvin, a râlmuang êm êm a. Chu mai bâkah, rilru hahna engmah i nei lo va, natna, thil ngeih loh, leh hrehawmna engmah i nei lo bawk. I chhehvêl boruak nuam tak dawng thei tûrin taksa leh rilru hrisêl tak i nei zâwk a ni.

I mit chu pangpâr rawng chi hrang hrang lamah i lênin, lui tui luang tle ser ser lamah i han lên leh a; chutah, ni sa leh daihlim hnuaia thing hnah hring tinrêng leh hnim hringte lam i han thlîr leh chuan i mit a tlai hle a ni. Thlifîm dam takin a chhêm heuh heuh che a, pangpâr rimtui tak rim lah a rawn nam chêk chêk mai bawk nên. Thliin thing hnah a chhêm rîk siau siau te, lung chhawr dawh chunga tui luang thla sawr sawr te, sava hrâm mawi takte leh rannung hrâm neuh neuhte i hre bawk a ni. Chu mi hmun i han mitthla chuan, chuta awm chu i châk hle lo maw?

Khawvêl puma mite hian mihringte hi chutiang hmun aṭanga bul inṭan niin an ring a. Juda sakhaw mite, Kristianna rama mite, leh Islam sakhaw mite chuan Pathianin Adama leh Evi-te chêng tûra a dahna Eden huan chungchâng zirtîrna chu kum za têl an lo dawng tawh a ni. Bible sawi dânin, Adama leh Evi chuan bul ṭanna hlimawm leh muanawm tak an nei a. Anmahni inkârah te, nungchate nêna an inkârah te, leh chu hmun nuam taka chatuana nun beiseina petu Pathian nêna an inkârah te remna a awm a ni.—Genesis 2:15-24.

Hindu-ho pawhin hmân lai paradis chungchângah ngaih dân hran an lo nei ve a. Buddhist-ho chuan khawvêl hi paradis ang dinhmuna a awm hian thlarau lama hruaitu, a nih loh leh Buddha-te chu an lo lang ṭhîn niin an ring bawk. Tin, Africa khawmuala sakhaw tam tak pawhin Adama leh Evi chanchin nêna inang deuh deuh thawnthu tam tak an nei bawk a ni.

Dik takin, hmân lai paradis chanchin chuan sakhua leh thurochhiah tam tak a chiahpiah hneh hle a. Lehkha ziaktu pakhat chuan: “Hnam tam tak chuan famkimna te, zalênna te, remna te, hlimna te, hnianghnârna tea khat, leh innawrluihna te, rilru hahna te, leh innghirnghona te awm lohna hmân lai paradis chu an ring a. . . . Chu rinna chuan mi tam tak chu an thil chânte avânga nun hlui ngaihna a neihtîr bâkah, neih lêt leh châkna lian tak a neihtîr a ni,” tiin a sawi.

 Chûng thawnthu leh thurochhiahte chu bul thuhmun aṭanga lo chhuak a ni thei ang em? ‘Mi tam takin nun hlui an ngaih chhan’ chu thilthleng tak tak engemaw an hriatrengnain a tur vâng a ni thei ang em? Hun tam tak liam ta khân Eden huan chu a lo awm tak takin, Adama leh Evi-te pawh an awm tak tak em?

Ringhleltute chuan chu ngaih dân chu an nuihzat a. Tûn lai science lam thiamna a sân hle hunah hian, mi tam tak chuan chûng thute chu thawnthu leh phuahchawp mai mai a nih an ring a ni. Mak tak maiin, chûng ringhleltute chu khawvêl mi an ni vek lo. Sakhaw hruaitu tam tak pawhin Eden huan a awm tak tak lo tih ngaih dân chu an theh lâr a. Chutiang hmun chu a awm tak tak lo va, chu chu hmehbelna ṭawngkam, phuahchawp, thawnthu, leh zirtîr nei tehkhinna thu mai niin an sawi a ni.

Bible-ah chuan zirtîr nei tehkhinna thute chu a awm ngei mai a. Chûng zînga a hmingthang ber berte chu Isua sawi a ni nghe nghe. Mahse, Bible chuan Eden huan chungchâng chu zirtîr nei tehkhinna thu ang ni lovin, hmân laia thil awm tak tak angin, chiang leh fiah takin a sawi zâwk a ni. Chutianga a sawi chung pawhin, chu chu thil awm tak tak a nih si loh chuan, engtin nge Bible-a thu dang zawngte chu kan rin theih ang? Tûnah chuan mi ṭhenkhatin Eden huan a awm tak tak an rin loh chhan leh an ṭan fung a dik leh dik loh i lo bih chiang ang u. Tichuan, he mi chungchâng kan ngaihven ṭheuh a ngaih chhan kan bih chiang bawk dâwn nia. (w11-E 01/01)