I Fate Chu Mi Dangte Zah Thiam Tûrin Zirtîr Rawh

HNAM dân tam takah chuan, mi ina luh dâwn emaw, in chibai dâwn emawa lukhum hlih chu chêt dân mawi leh mi zah kaina anga ngaih a ni a. Chuvângin, German thufing pakhat phei chuan: “Miin a lukhum a hlih phawt chuan khawiah pawh a leng ṭhîn,” a ti. He thufingin a sawi tum ber chu chêt dân mawi lantîrtute chungah chuan mite chu an ngilnei duh bîkin, an fel duh bîk tih hi a ni.

Ṭhalaite’n nun dân mawi tak an lantîr hian hmuh an va nuam tak êm! In tina Pathian thu hrilhnaa thuchhuahtu a pui a pangte thawhpui ṭhîn Honduras rama bial kantu pakhat chuan: “Ṭha taka zirtîrna dawng mi dangte zah thiam tak naupangte chuan ka thusawi aiin in neitute rilru an hneh zâwk tih ka hmu fo ṭhîn,” a ti.

Mi dangte zah loh a hluar zualna tûn lai hunah hian, mi dangte cheibâwl dân thiam chu a ṭhain, a ṭangkai a ni. Chu mai bâkah, Bible chuan: “In awm dân chu Krista chanchin ṭha nên inmawi phawt rawh se,” tiin min fuih bawk. (Phil. 1:27, 28; 2 Tim. 3:1-5) Kan fate chu mi dangte zah thiam tûra kan zirtîr a pawimawh hle. Engtin nge anni chu a pâwnlânga hawihhâwm mai ni lo va, mite zah thiam tak zet ni tûra zirtîr theih an nih? *

Entawn Tûr Hmanga Chêt Dân Mawi Zirtîr

Naupangte chuan mi dangte thiltih chu an entawn ṭhîn a. Chuvângin, nu leh pate’n an fate nun dân mawi an zirtîr theih dân ṭha ber chu entawn tûr ṭha siam hi a ni. (Deut. 6:6, 7) I fate hawihhâwm dân hrilh ṭhin chu a pawimawh a, mahse, chu chauh chu a tâwk lo. Chu mi chungchâng hrilh ṭhin mai bâkah entawn tûr ṭha siam pawh chu a pawimawh hle.

Nupa kawp chawi loh Kristian chhûngkuaa seilian Paula-i * chungchâng hi ngaihtuah teh. Mi tinte chunga zahna lantîr chu a mize zînga pakhat a lo ni. Engvâng nge? “Ka nuin entawn tûr ṭha a siam avângin mi dangte zah chu kan pianken ang mai a lo ni,” tiin a sawi. Kristian pa pakhat Walter-a chuan a fapate chu thutaka awm lo an nu zah thiam tûrin a zirtîr a. Ani chuan: “Ka entawn tûr siamna hmangin ka fapate chu an nu zah thiam tûra zirtîr ka tum tlat a, ka nupui chu ka sawisêl ngai lo,” a ti. Walter-a chuan a fapate chu Pathian Thu a zirtîr zawm zêl a, Pathian Jehova ṭanpuina a dîl bawk a ni. An  zînga pakhat chuan Jehova Thuhretute branch office-ah rawng a bâwl mêk a, a pakhat chuan pioneer a thawk a ni. A fapate chuan an nu leh pate chu an hmangaihin, an zah ve ve a ni.

Bible chuan: “Pathian chu buaina Pathian a ni lo va, remna Pathian a ni zâwk si a,” a ti a. (1 Kor. 14:33) Pathian Jehova thiltih engkim mai chu a buai lo va, a fel vek zâwk a ni. Kristiante chuan he Pathian mizia hi entawn tum tlatin, an in chhûng thil vêl chu an dah fel fai tûr a ni. Nu leh pa ṭhenkhat chuan an fate chu school an kal hmaa an khum siam ziah tûr te, an thawmhnaw a hmun dik taka dah tûr te, leh in chhûng chêt vêla pui tûr tein an zirtîr a. Naupangte chuan in chhûng hmun dangte a fel fai tih an hmuh hian an pindan leh thil neihte pawh fel fai takin an dah tlângpui ṭhîn.

I fate chuan school-a an thil zirte chu engtin nge an thlîr? Zirtîrtute’n an tâna thil an tihsak avânga an lâwmzia an sawi chhuak em? Nu leh pa i nih angin, chutianga zirtîrtute chunga i lâwmzia i sawi chhuak ngai em? I fate chuan an school hna leh an zirtîrtute chunga i lantîr ang rilru put hmang chu an lantîr ve ngei a rinawm hle. An zirtîrtute chunga lâwmthu sawi ṭhîn tûrin engvângin nge i fuih loh vang? Zirtîrtu, doctor, dâwr nghâktu, a nih loh leh mi dang tupawh chunga an thiltih avânga lâwmthu sawi chhuah chu zah thiamna lantîr dân kawng ṭha tak a ni. (Lk. 17:15, 16) An felna leh nungchang ṭhatna avânga an school kalpuite zînga danglam bîk kan ṭhalaite chuan fak an phu hle.

Kristian kohhran mi leh sate chuan chêt dân mawi chungchângah entawn tûr ṭha an siam tûr a ni a. Kohhran chhûnga ṭhalaite’n “khawngaihin,” tih leh “ka lâwm e,” tih ṭawngkamte hmanga hawihhâwmna an lantîr hmuh chu a va nuam tak êm! Puitlingte’n inkhâwmnaa thusawite ṭha taka ngaithlaa Pathian Jehova zahna an lantîr hian, naupangte chu anmahni entawn tûrin an fuih tihna a ni. Naupangte chuan Kingdom Hall-a chêt dân mawi an hmuhte aṭangin an ṭhenawmte zah thiam dân an zir thei a. Entîr nân, kum li mi Andrew-a chuan puitlingte a kal pelh dâwna hawihhâwmna leh zah thiamna lantîr dân a zir daih tawh a ni.

Nu leh pate chuan an fate lantîr atâna an beisei nungchang mawi an zirtîr theih dân kawng dang leh chu eng nge ni? Nu leh pate chuan an fate chu Bible-a chuang entîrna tam tak aṭanga zir tûrte sawipui tûrin hun an pe thei a, an pe bawk tûr a ni.—Rom 15:4.

Bible-a Entîrnate Aṭangin Zirtîr Rawh

Samuela nu chuan a fapa chu Puithiam Lal Elia hmaa kûn tûrin a zirtîr ngei ang. Biak bûka a hruai khân, Samuela chu kum thum emaw, kum li emaw lek a nih hmêl a. (1 Sam. 1:28, C.L. Re-edited) I fate chu in awmna hmun inchibai dân leh hawihhâwmna lantîr dân te i zirtîrin, tihchhinnate i neihpui thei ang em? Naupang Samuela angin, i fate pawh “Pathian leh mihring duhzâwngin” an awm ve thei a ni.—1 Sam. 2:26.

Engvângin nge mi dangte zahna leh zah lohna inthlauhzia târ lan nân Bible thuziakte chu i hman loh vang? Entîr nân, Israel lal rinawm lo Ahazia’n zâwlnei Elija hmuh a duh khân, ‘a sipai sawmnga hotu leh a hote sawmnga’ a hnênah a tîr a. Sipai hotu chuan zâwlnei chu amah zui tûrin a phût a. Pathian aiawhtu chutianga biak chu  thil inâwm a ni lo. Engtin nge Elija’n a chhân lêt? “Pathian mi ka nih zet chuan vân ata mei lo tla thla sela, nangmah leh i hote sawmnga kha rawn kângral vek che u rawh se,” a ti a. Chutiang chiah chuan thil a lo thleng a. “Vân ata mei a lo tla a, amah leh a hote sawmnga chu an kângral ta vek a.”—2 Lal. 1:9, 10.

Sipai 50 hotu dang chu Elija hruai tûra tirh a ni leh a. Ani pawhin amah zui tûrin Elija hnênah thu a pe leh a. Vân aṭangin mei a lo tla leh a ni. Chutah, sipai 50 hotu dang chu Elija hnênah a lo thleng a. Ani chuan Elija phu ang ngeiin zahna a lantîr a. A hnênah thu pe lovin, a hmaah ṭhingṭhiin, heti hian a ngên zâwk a ni: “Aw Pathian mi, ka nunna leh, hêng i chhiahhlawh mi sâwmngate nunna hi i mithmuhah hian lo hlu teh se. Ngai teh, vân ata mei a lo tla a, sipai sawmnga hotute pahnih kha an hote sâwmnga nên khân an lo kângral ta a; keia nunna erawh hi chu i mithmuhah hian lo hlu teh se,” tiin. Pathian zâwlnei chuan hlau tak leh zah thiam tak chunga amah betu kanral nân vân ata mei a ko thla leh ang em? A koh thlâk a rinawm lo hle! Chu ai mah chuan, Pathian Jehova vântirhkoh chuan chu sipai hotu ruala kal tûrin Elija chu a hrilh ta zâwk a ni. (2 Lal. 1:11-15) Chu chuan zahna lantîr hlutzia a târ lang a ni lâwm ni?

Tirhkoh Paula chu Rom sipaiin biak in ata tân ina an hruai khân, thu sawi tûra dikna nei angah a inngai mai lo. Zah thiam takin sipai hotu lal ber hnênah chuan: “I hnênah thu kamkhat ka sawi thei ang em?” tiin a dîl zâwk a. Chuvângin, Paula chu a thiam thu sawi theihna hun remchâng pêk a ni ta a ni.—Tirh. 21:37-40.

Rorêlna hmaa a din lai khân, Isua chu a hmaia ben a ni a. Chuti chung pawhin, a duh lohzia lantîr dân tûr a hria a, heti hian a zâwt a ni: “Thu sual sawi ka nih chuan ka sualna mi hriattîr rawh; nimahsela thu ṭha ka sawi pawhin engah nge mi ben?” tiin. Isua thusawi dân chu tuman sawisêlna tûr rêng an hre lo.—Joh. 18:22, 23.

Pathian Thu chuan thununna khauh tak kan dawn huna kan chhân lêt dân tûr min pêk bâkah, tûn hmaa kan thil sual tih emaw, thil ngaihthah emawte zah thiam taka pawm dân tûr entîrna pawh min pe bawk. (Gen. 41:9-13; Tirh. 8:20-24) Entîr nân, Abigaili chuan a pasal Nabala’n Davida a cheibâwl ṭhat loh avângin ngaihdam a dîl a. Ngaihdam a dîl bâkah, ei tûr tam tak a pe bawk a ni. Abigaili thiltih chuan Davida rilru a khawih êm avângin, Nabala thih hnu chuan nupui atân a thlang ta hial a ni.—1 Sam. 25:23-41.

Dinhmun khirh tak hnuaia zah thiamna lantîr a ni emaw, engtik lai pawha chêt dân mawi lantîr emaw pawh ni se, i fate chu mite zah thiam dân zirtîr rawh. Hetiang kawnga ‘kan êng chu mi mit hmuha kan êntîr’ chuan ‘kan Pa vâna mi chu chawimawiin’ a awm ang.—Mt. 5:16. (w11-E 02/15)

[Footnote-te]