I Tâna Eden A Pawimawh Chhan

MI THIAM ṭhenkhatin Eden chanchin an hnâwl chhante zînga mak ber mai chu Bible bu dangin a thlâwp lo, tih hi a ni a. Entîr nân, Sakhaw Chanchin Zirna lama an Professor Paul Morris-a chuan: “Bible-ah hian Eden chanchin tlang taka sawina dang a awm lo,” tiin a ziak a. A thil chhût dân chu “mi thiam” tam takin pawm mah se, thu dik chu a kalh tlat a ni.

Bible chuan Eden huan, Adama, Evi, leh rûl chanchin chu hmun tam takah a sawi lang a ni. * Mahse, mi thiam ṭhenkhatte thil ngaih sual palh chu a aia lian zâwk leh darh zau zâwk nêna khaikhin chuan engmah tham lovah a chang a. Sakhaw hruaitute leh Bible sawisêltute’n Genesis-a Eden huan chanchin chu phuah chawp anga an sawi hian, a nihna takah chuan Bible rin tlâkna chu an bei tihna a ni. Engtin nge a nih theih?

Bible bu dang zawngte hriatthiam nân Eden huana thilthleng hriatthiam chu a pawimawh hle a. Entîr nân, Pathian Thu chu mihringte hmachhawn zawhna pawimawh berte zawng hmu tûra min ṭanpuitu atâna duan a ni. Eden huana thilthleng nêna inkûngkaihna nei zawhnate chu Bible chuan a chhâng nawn fo va. Entîrna ṭhenkhat lo ngaihtuah ta ila.

● Engvângin nge kan tar a, kan thih? Adama leh Evi chu Jehova hnuaiah intulût reng sela chuan chatuana nung tûr an ni a. An hel chauhva thi tûr an ni. An hel nî aṭang chuan an thi ṭan ta rêng a. (Genesis 2:16, 17; 3:19) Ṭhat famkimna chu hlohvin, an fate hnênah sual leh ṭhat famkim lohna chauh an hlân chhâwng thei a. Bible chuan heti hian a hrilhfiah a ni: “Chutichuan mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin.—Rom 5:12.

● Engvângin nge Pathianin suahsualna awm a phal? Setana chuan Eden huanah Pathian chu a thil siamte hnêna thil ṭha engemaw pe duh lotu, dawtheiah a puh a. (Genesis 3:3-5) Chutiang chuan Jehova rorêl dân dikna chungah rinhlelhna a siam a ni. Adama leh Evi chuan Setana hnung zui chu an thlang a; chutiang chuan Jehova lalchungnunna chu an hnâwl ve a, mihringte hian a chhia leh a ṭha chungchângah mahniin thu tlûkna an insiam thei an ti tlat ang a ni. Pathian Jehova chuan a dikna leh finna ṭha famkim avângin chu chona chhân dân tûr kawng khat chauh a awm tih a hria a; chu chu hun liamtîr a, mihringte an duh thlanna ang ngeia mahni ro an inrêl phalsak chu a ni. A rah chhuah suahsualna chu Setana’n a thunun chhunzawm zêl vâng pawh a ni tel a, chu chuan thudik ropui tak chu zawi zawiin a rawn târ lang a ni: Mihringte hian Pathian tel lovin ro an inrêlsak thei lo, tih hi.—Jeremia 10:23.

● Lei atâna Pathian thiltum chu eng nge ni? Pathian Jehova chuan Eden huan chu nakina lei pum pui mawi taka awm dân tûr entîr nân a siam a. Ani chuan Adama leh Evi chu an thlahte hmanga lei luah khat tûr leh Eden huan anga mawi a nih theihna tûra ‘an thu thua awmtîr’ tûrin thu a pe a ni. (Genesis 1:28) Chuvângin lei atâna Pathian thiltum chu paradis nihtîr a, Adama leh Evi thlah mi ṭha famkim leh chhûngkaw inlungrual takte luah khahtîr hi a ni a. Chu atîra thiltum tihfamkim nâna Pathian thil hmante chungchâng chu Bible-ah a chuang hnem hle.

● Engvângin nge Isua Krista leia a lo kal? Eden huana helna chuan Adama leh Evi leh an thlah zawng zawngte chungah zawi zawia thihna a thlen a; mahse, Pathian chuan a hmangaihna avângin beiseina min pe a. A Fapa chu Bible-in tlanna a tih pe tûrin leiah a rawn tîr a ni. (Matthaia 20:28) Chu chu eng tihna nge ni? Aw le, Isua kha “Adama hnuhnûng zâwk” a ni a; Adama tih theih loh chu a rawn ti thei ta a. Isua chuan Jehova thu âwih tlatin, a hring nun ṭha famkim chu a hmang a. Chutah a nun chu inthâwina, a nih loh leh tlanna atân a pe a; chu chu mi rinawm zawng zawngte’n an sualte ngaihdamna an hmuh a, a tâwpa Adama leh Evi’n thil sual an tih hmaa Eden-a an neih ang nun an neih leh theihna tûr a ni. (1 Korinth 15:22, 45; Johana 3:16)  Chutiangin, Isua chuan Jehova’n he lei Eden huan paradis anga chantîr a tumna chu a thleng famkim ngei dâwn tih a tiam a ni. *

Pathian thiltum chu a mumal lo lova, tak nei lo ngaih dân mai mai lah a ni hek lo. Chu chu a tak a ni. Eden huan hi nungcha leh mihring tak takte awmna he leia hmun awm tak tak a nih ang bawkin, nakin hun atâna Pathian thutiam pawh lo thleng mai tûr thil tak tak a ni. Chu chu i nakin hun tûr leh i thiltawn tak tak tûr a ni ang em? Nangmahah a innghat thui hle. Pathian chuan mi a tam thei ang berte’n chutiang nakin hun an neih chu a duh a, tûna a duhzâwng anga la nung lote tân pawh chutiang chu a duhsak a ni.—1 Timothea 2:3, 4.

Isua chuan a thih hma lawk khân, chutiang mi pakhat chu a bia a. Ani chu dân bawhchhetu a ni a; thih a phû tih a hria a ni. Mahse, thlamuanna leh beiseina hmu tûrin Isua lam a hawi a. Isua’n engtin nge a chhân lêt? “Ka hnênah Paradis-ah i awm ve ang,” tiin a hrilh a ni. (Luka 23:43) Isua chuan tûn hmaa dân bawhchhetu chu, Eden huan ang paradis-a chatuana nun beiseina neia kaihthawh leha a awm hmuh a duh si chuan, i tân pawh chutiang bawk malsâwmna chu a duhsak dâwn lo che em ni? Duhsak tehrêng e! A Pa pawhin a duhsak che a ni! Chu nakin hun chu neih i duh chuan Eden huan siamtu Pathian chungchâng zir tûrin theihtâwp chhuah ang che. (w11-E 01/01)

[Footnote-te]

 [Phêk 10-naa bâwm/milemte]

Bible Phuar Khawmtu Hrilh Lawkna Pakhat

“Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang.”—Genesis 3:15.

Hei hi Eden-a Pathian sawi chhuah Bible-a hrilh lâwkna hmasa ber a ni a. Tute nge chuta tel mi pali: hmeichhia, hmeichhe thlahte, rûl, leh rûl thlahte chu? Engtin nge an inkâra ‘indona’ awm tûr sawi lâwk chu a thlen chhoh?

RUL

Diabol-Setana.—Thu Puan 12:9.

HMEICHHIA

Pathian Jehova inawpna pâwla vân lam thil siamte. (Galatia 4:26, 27) Isaia chuan thlarau lam hnam thar lo la piang tûr hringtu tûr ‘hmeichhe’ chungchâng a sawi.—Isaia 54:1; 66:8.

RUL THLAH

Setana duhzâwng tih thlangtute.—Johana 8:44.

HMEICHHE THLAH

A bul berah chuan Isua Krista, Jehova inawpna pâwl vân lam pêng aṭanga lo chhuaka hi a ni. Chu ‘thlah’ zîngah chuan vâna Krista rorêlpui tûr a thlarau lam unaute pawh an tel bawk. Chûng hriak thih Kristiante hmang chuan thlarau lam hnam, “Pathian Israelte” chu din a ni.—Galatia 3:16, 29; 6:16; Genesis 22:18.

KE ARTUI TIHTHITLINNA

Messia chunga kut thlâkna na tak, chhiat hlenna thlen si lo hi a ni. Setana chuan Isua chu leiah hian a tihlum a. Mahse, kaihthawh leh a ni.

LU TIHTHITLINNA

Thihna thlen thei Setana chunga kut thlâkna. Isua chuan Setana chu chatuan atân a tiboral ang. Chu mi hma pawh chuan Eden huana Setana bul ṭan thil ṭha lo zawng zawng chu a sût lêt ang.—1 Johana 3:8; Thu Puan 20:10.

Bible thupui ber tawi fel taka târ lanna, Jehova Thuhretute tihchhuah Bible—Eng Thuchah Nge A Ken? tih brochure en rawh.

[Phêk 11-naa milem]

Adama leh Evi chuan sual man ṭha lo tak chu an têl