I Thinlung Zawng Zawngin Felna Ngaina Rawh
I Thinlung Zawng Zawngin Felna Ngaina Rawh
“Felna chu i ngaina a.”—SAM 45:7.
1. “Felna kawngahte” kal tûrin engin nge min ṭanpui ang?
PATHIAN Jehova chuan a Thu leh a thlarau thianghlim hmangin a mite chu “felna kawngahte” a hruai ṭhîn a. (Sâm 23:3) Mahse, ṭha famkim lo kan nih avângin chu kawng aṭanga pên duhna kan nei ṭhîn. Thil dik ti leh tûr chuan tum ruhna neih a ngai a ni. Chu mi kawnga hlawhtling thei tûrin engin nge min ṭanpui ang? Isua angin, thil dik tih kan ngaina tûr a ni.—Sâm 45:7 chhiar rawh.
2. ‘Felna kawngte’ chu eng nge ni?
2 ‘Felna kawngte’ chu eng nge ni? Heta kawng tih hi atîra ziakah chuan kêa kalna kawng zîm tak sawina thu mal hman a ni a. Hêng ‘kawngte’ hi Jehova tehna felte ṭanchhana siam a ni. Hebrai leh Grik ṭawnga “felna” tih hian “dikna” a kâwk a, chu chuan nungchang lama thu bulte vawn tlatna a hril a ni. Pathian Jehova chu “dikna [a nih loh leh felna] khurpui” a nih avângin, amah chibai bûktute chuan an zui tûr kawng dik thlan nân a ṭanpuina lâwm takin an zawng a ni.—Jer. 50:7.
3. Engtin nge Pathian felna chungchâng chu kan zir tam lehzual theih?
3 Thinlung zawng zawnga Pathian tehna felte mila nun kan tum chauhvin ama lâwmzâwng mi kan ni tak zet thei ang. (Deut. 32:4) Chu chu a Thu, Bible aṭanga Pathian Jehova chanchin a tam thei ang ber zirnain a inṭan a ni. A chanchin kan zir tam a, nî tina amah kan hnaih deuh deuh chuan, a felna chu kan ngaina lehzual ang. (Jak. 4:8) Tin, thu tlûkna pawimawh kan siam a ṭûl hunah Pathian thâwk khum Thu kaihhruaina kan pawm ngei tûr a ni bawk.
Pathian Felna Zawng Rawh
4. Pathian felna zawnnaah chuan eng nge tel?
4 Matthaia 6:33 chhiar rawh. Pathian felna zawnnaah chuan Lalram chanchin ṭha hrilh nâna hun hman mai aia tam a tel a. Kan rawngbâwlna Pathian Jehova pawm tlâk ni tûr chuan, a tehna sângte milin nî tin kan nung tûr a ni. Jehova felna zawngtu zawng zawng tân eng nge tih ngai? ‘Mihring thar, thutak felna leh thianghlimnaa Pathian anga siam khân an inthuam’ tûr a ni.—Eph. 4:24.
5. Engin nge lunghnualna hneh tûrin min ṭanpui ang?
5 Pathian tehna fel mila nun kan tum tlat rual hian, kan tlin lohna avângin lunghnual châng kan nei mai thei a. Engin nge lunghnualna nasa tak hneh tûr leh felna ngaina a, nunpui tûrin min ṭanpui ang? (Thuf. 24:10) Pathian Jehova chu “rinna famkim neia thinlung tak zet puin” ṭawngṭaiin kan pan ziah tûr a ni. (Heb. 10:19-22) Hriak thih Kristian kan ni emaw, lei lam beiseina nei kan ni emaw pawh ni se, Isua Krista tlanna inthawina leh kan Puithiam Lalber anga a rawngbâwlnaah rinna kan nei a ni. (Rom 5:8; Heb. 4:14-16) Isua thisen chhuahna ṭangkaizia chu he magazine chhuak hmasa berah a lang a. (1 Joh. 1:6, 7) Chu thuziak chuan: “Thil sen lâr emaw, sen duk emaw chu dârthlalang sen kal tlanga pâwn ênga kan en chuan a vâr angin a lang ṭhîn a; chuvângin, kan sualte chu sen lâr emaw, sen duk emaw ang ni mah se, Pathianin Krista thisen kal tlanga a enna tûr hmuna kan awm hian a vâr angin a lang a ni,” tiin a sawi. (July 1879, p. 6) A Fapa duh tak tlanna inthawina kal tlanga Pathian Jehova siam ruahmanna chu a va ropui tak êm!—Is. 1:18.
I Thlarau Lam Râlthuam Chu Enfiah Rawh
6. Engvângin nge kan thlarau lam râlthuam enfiah chu thil pawimawh tak a nih?
6 “Felna âwmphaw” chu engtik lai pawhin kan ha reng tûr a ni, Pathian pêk thlarau lam râlthuamte zînga pawimawh tak a ni si a. (Eph. 6:11, 14) Jehova hnêna kan inpumpêkna a rei tawh hle emaw, a la rei lo emaw pawh ni se, nî tina kan thlarau lam râlthuam enfiah chu a pawimawh hle. Engvângin nge? Diabola leh a ramhuaite chu lei lama paih thlâk an nih tawh avângin. (Thup. 12:7-12) Setana chuan hun a nei tlêm tawh tih a hriat avângin a thinur hle a. Chuvângin, Pathian mite chu a bei nasa lehzual sauh a ni. “Felna âwmphaw” hâk reng a pawimawhna chu kan hria em?
7. “Felna âwmphaw” kan mamawhzia kan hriat chuan engtin nge kan awm ang?
7 Awmphaw chuan thinlung a vênghim a. Kan ṭhat famkim loh avângin entîr nei kan thinlung chu bumhmang tak leh chhe lailet dêr a ni. (Jer. 17:9) Thil sual tih duhna thinlung kan neih avângin, kan thunun leh sawizawi a pawimawh hle. (Gen. 8:21) “Felna âwmphaw” kan mamawhzia kan hriatthiam chuan, Pathian huatzâwng intihhlimna thlangin chu chu rei lo te chhûng pawh kan phelh phal lo vang a; thil sual tih a nawm dân tûr suangtuahin hun kan hmang hek lo vang. Kan hun hlu tam tak chu TV en nân kan khawhral mai mai lo bawk ang. Chutianga hman ai chuan, Jehova tilâwmtu thilte tih chu kan tum hrâm hrâm zâwk ang a. Tisa ngaihtuahna fel lo tak avângin rei lo te chhûng kan tlu a nih pawhin, Jehova ṭanpuinain kan tho leh ṭhîn ang.—Thufingte 24:16 chhiar rawh.
8. Engvângin nge “rinna phaw” kan mamawh?
8 Kan thlarau lam râlthuamte zîngah chuan “rinna phaw” pawh a tel a. Chu mi hmang chuan ‘mi sual thal alh thei zawng zawng chu kan timit thei a ni.’ (Eph. 6:16) Tin, rinna leh thinlung zawng zawnga Jehova hmangaihna chuan fel taka thil ti tûr leh chatuan nunna kawnga awm reng tûrin min ṭanpui a. Jehova hmangaih dân kan zir tam poh leh a felna chu kan ngaihlu lehzual ang. Mahse, kan chhia leh ṭha hriatna chungchâng chu eng nge ni? Chu chuan engtin nge felna ngainat kan tumna kawngah min ṭanpui theih?
Chhia leh Ṭha Hriatna Thiang Nei Reng Rawh
9. Chhia leh ṭha hriatna thiang neih chu engtin nge kan hlâwkpui?
9 Baptisma kan chan hian, Pathian Jehova hnênah ‘chhia leh ṭha hriatna thiang’ kan dîl a. (1 Pet. 3:21) Tlanna kan rin avângin, Isua thisen chuan kan sualte a khuh vek a, chuvângin Pathian hmaah dinhmun thianghlim kan chelh a ni. Amaherawhchu, chutiang dinhmun chelh reng thei tûr chuan chhia leh ṭha hriatna thiang kan neih reng a ngai a. Kan chhia leh ṭha hriatnain a chânga min mawhpuh a, min vaukhân hian hna a la thawk ṭha tihna a nih avângin kan lâwm tûr a ni. Chu chuan kan chhia leh ṭha hriatna hi Jehova kawng felte zahna chungchângah a la chawlawl lo tih a târ lang a ni. (1 Tim. 4:1, 2) Mahse, chhia leh ṭha hriatna chuan felna ngaina duhte tân pawimawhna dang pawh a nei bawk.
10, 11. (a) Bible zirtîr kan chhia leh ṭha hriatna kan ngaihthlâk chhan tûr târ langtu thiltawn pakhat sawi rawh. (b) Engvângin nge felna ngainatna chuan hlimna nasa tak min neihtîr theih?
10 Thil sual kan tih hian kan chhia leh ṭha hriatna chuan thiam loh min chantîr emaw, min tihrehawm emaw thei a. Ṭhalai pakhat chu ‘felna kawng’ ata a pêng a. Saruak lem leh thuziakte en chu a chîng dawklakin, ganza a zu ṭan bawk a ni. Inkhâwma a kal hian a inthiam lo va, thlawhhma rawngbâwlnaa a tel hian vêrvêk tak nia inhriatna a neih avângin chutiang Kristian thiltihte chu a bânsan a. “Mahse, ka chhia leh ṭha hriatnain ka thiltih chungah mawh min phurhtîr ang tih ngaihna rêng ka lo hre lo,” a ti. Chutah, “Chu ka âtna chuan kum li lai a awh a ni,” tiin a sawi zawm bawk. Tichuan thutaka kîrleh zai a rêl ṭan ta a. A ṭawngṭaina chu Pathian Jehova’n a ngaihthlâk ring lo mah se, ngaihdam dîlin a ṭawngṭai ta tho va. Minute sâwm pawh a tlin hmain, a nu-in a rawn tlawh a, inkhâwm leh tûrin a fuih a. Kingdom Hall-ah kalin, upate chu Bible zirpui tûrin a ngên ta a ni. A hnuah chuan baptisma a chang a, a nun a chhanhim avângin Jehova chungah a lâwm hle a ni.
11 Thil dik tihna aṭangin hlimna nasa tak kan hmu ṭhîn a ni lâwm ni? Felna ngainat dân kan zir a, kan nunpui lehzual hian kan Pa vâna mi lâwmzâwng tihnaah hlimna kan hmu lehzual ang. Hei hi han ngaihtuah lawk teh! Mihring zawng zawngin an chhia leh ṭha hriatna aṭanga hlimna hlîr an hmuh hun tûr a lo thleng dâwn a; chutih hunah chuan Pathian mizia chu famkim takin an lantîr tawh ang. Chuvângin, tûnah hian kan thinlungah felna ngainatna tuh nghet tlatin Pathian Jehova thinlung chu i tilâwm ang u.—Thuf. 23:15, 16.
12, 13. Engtin nge kan chhia leh ṭha hriatna chu kan sawizawi theih?
12 Kan chhia leh ṭha hriatna sawizawi tûrin eng nge kan tih theih? Bible leh kan thu leh hla chhuahte kan zir hian, “mi dikte chuan an chhân hmain an ngaihtuah ngun ṭhîn,” tih hriat reng chu a pawimawh hle. (Thuf. 15:28, C.L. Re-edited) Hnathawh tûr thlan chungchânga he thufing ṭangkaizia hi han ngaihtuah teh. Hna ṭhenkhat chu Bible thu nêna a inkalh tih a lan chian hian, bâwih rinawm leh fing pâwl kal tlanga pêk kaihhruaina chu kan zâwm nghâl deuh vek a. Mahse, hnathawh tûr chu pawm theih a nih leh nih loh a chian nghâl loh chuan a kaihhnawih Bible thu bulte zawng chhuakin, ṭawngṭaina nên ngun taka ngaihtuah tûr a ni. * Hei hian mi dangte chhia leh ṭha hriatna hliam loh a pawimawhzia chungchâng thu bulte pawh a huam tel a. (1 Kor. 10:31-33) A bîk takin, Pathian nêna kan inlaichînna lam thil a nih phei chuan kan fîmkhur lehzual tûr a ni. Pathian Jehova chu kan tân a tak chuan, ‘He ka hna thawh hian Pathian Jehova a tivuiin, a thinlung a tina ang em?’ tiin kan inzâwt hmasa ngei ang.—Sâm 78:40, 41.
13 Vênnainsâng Zirna emaw, Kohhrana Bible Zirna emaw atâna kan inpuahchah hian, a thute chhût ngun a ngai tih kan hre reng tûr a ni a. Kan thu zir tûr a zawhna atâna chhânna lai chu kan rîn zung zungin, paragraph dawtah kan kal leh nghâl mai ṭhîn em? Chutiang inzirna chuan felna ngainatna a tihzual emaw, kan chhia leh ṭha hriatna a tihchak emaw chu a beisei awm lo hle. Felna ngaina tûr chuan Pathian Thu taima taka zir leh kan chhiarte kan chhût ngun a ngai a. Thinlung zawng zawnga felna ngainat zir tûr chuan theih tâwp chhuah a ngai a ni.
Felnaa Rilṭâma Tuihâlna
14. Pathian Jehova leh Isua Krista chuan kan rawngbâwlna chungchâng eng anga ngai tûrin nge min duh?
14 Pathian Jehova leh Isua Krista chuan rawngbâwlnaa kan hlim chu an duh a. Engin nge min tihlim thei ang? Felna ngainatnain min tihlim thei ang! Tlâng Chunga Thusawiah, Isua chuan: “Felnaa rilṭâma tuihâlte chu an eng a thâwl e; an la tlai dâwn si a,” tiin a sawi a ni. (Mt. 5:6) Felna ngaina duhtute tân hêng thute hian pawimawhna eng nge a neih?
15, 16. Eng kawngin nge thlarau lama rilṭâmna leh tuihâlna chu phuhrûk theih a nih?
15 Kan awmna khawvêl hi mi sual thu thua awm a ni a. (1 Joh. 5:19) Khawi rama chanchinbu pawh han chhiar ila, nunrâwnna leh tharum thawhna chu tûn hma zawng aia nasain kan hmu a ni. Mi a mihringpui chunga a nunrâwnna chuan mi fel rilru a tibuai ṭhîn . (Thur. 8:9) Keini Pathian Jehova hmangaihtute hi chuan amah chauhvin felna zir châkna neite thlarau lam rilṭâmna leh tuihâlna a phuhrûk thei tih kan hria a. Pathian ngaihsak duh lotute chu tihboral an ni thuai ang a, felna ngainatute chuan dân bawhchhetute leh an thil tih sual takte avânga manganna chu an tawng leh tawh lo vang. (2 Pet. 2:7, 8) A va thawventhlâk dâwn êm!
16 Pathian Jehova chhiahhlawh leh Isua Krista zuitute kan nih angin, felnaa rilṭâma tuihâlte chu “an la tlai dâwn” tih kan hria a ni. Anni chu Pathian ruahman vân tharte leh lei thar “a chhûnga felna awmte” kal tlanga tihtlai hle an ni ang. (2 Pet. 3:13) Chuvângin, he khawvêl sual takah hian inawpbehna leh tharum thawhnain felna a lâk bo avângin i lunghnual lovin, mak i ti hek lo vang u. (Thur. 5:8) Pathian Chungnungber Jehova chuan thil engkim a hria a, felna ngainatute chu a chhanhim thuai ang.
Felna Ngainat Chu Hlâwkpui Rawh
17. Felna ngainat avânga hlâwkna ṭhenkhat chu engte nge ni?
17 Sâm 146:8 chuan felna kawng zawh hlâwkna langsâr tak chu a sawi uar hle a. Fakna hla phuahtu chu: “LALPA chuan mi felte chu a hmangaih ṭhîn,” tiin a zai a ni. Han ngaihtuah teh! Felna kan ngainat avângin lei leh vâna Lal Chungnungber chuan min hmangaih a ni tih hi! Pathian Jehova chuan min hmangaih avângin, kan nuna Lalram kan dah hmasak phawt chuan kan mamawh min pe ang tih kan ring ngam thlap a ni. (Sâm 37:25; Thufingte 10:3 chhiar rawh.) A tâwp atâwpah chuan kan lei pum pui hi felna ngainatute hlîrin a khat tawh ang. (Thuf. 13:22) Pathian mi tam zâwkte tân chuan felna nunpui lâwmman chu lei paradis mawi taka hlimna leh tâwp nei lova nunna a ni ang. Pathian felna ngainatute chuan tûnah ngei pawh hian chhûngril muanna an nei a, chu chuan chhûngkuaah leh kohhranah inremna a awmtîr a ni.—Phil. 4:6, 7.
18. Pathian Jehova nî kan nghah lai hian eng thil ṭhate nge kan tih theih?
18 Pathian Jehova ni ropui tak lo thlen hun kan nghah mêk lai hian, a felna kan zawng chhunzawm zêl tûr a ni. (Zep. 2:1-3) Chuvângin, Pathian Jehova kawng felte ngainatna dik tak i lantîr ang u. Chutah chuan entîr nei kan thinlung vênghim tûra “felna âwmphaw” hâk tlat a tel a ni. Tin, keimahni leh kan Pathian thinlung tilâwm tûr chhia leh ṭha hriatna thiang kan vawn a ngai bawk a ni.—Thuf. 27:11.
19. Eng thil nge tih kan tum tlat ang a, a dawta thuziakah eng nge kan sawiho vang?
19 “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn.” (2 Chro. 16:9) Dinhmun ngheh lohna pung zêl te, tharum thawhna te, leh suahsualna tea khat he khawvêl buai taka kan awm lai hian chûng thute chu a va thlamuanthlâk tak êm! Kan kawng felte chu Pathian laka inmihran mipuite mak tihzâwng pawh a ni thei. Mahse, Pathian Jehova felna vawn tlat chu kan hlâwkpui hle a ni. (Is. 48:17; 1 Pet. 4:4) Chuti a nih chuan, thinlung zawng zawngin felna hmangaih leh nunpuinaah chuan hlimna hmuh i tum chhunzawm zêl ang u. Mahse, thinlung zawnga zawnga felna ngainatnaah chuan dân bawhchhiatna huat pawh a tel bawk a. Chu mi awmzia chu a dawta thuziakah hrilhfiah a ni ang. (w11-E 02/15)
[Footnote]
^ par. 12 Hna thawh tûr thlan chungchânga zawhnate nêna inkaihhnawih Bible thu bulte hriat nân,Vênnainsâng April 1, 2006, phêk 9-10, par. 11-13 en rawh.
Engtin Nge Kan Chhân Ang?
• Engvângin nge felna ngaina tûr chuan tlanna ngaihhlut a pawimawh?
• Engvângin nge “felna âwmphaw” hâk a pawimawh?
• Engtin nge kan chhia leh ṭha hriatna kan sawizawi theih?
[Zirlai Atâna Zawhnate]
[Phêk 23-naa milem]
Chhia leh ṭha hriatna sawizawi tawh chuan hnathawh tûr thlang thiam tûrin min ṭanpui