Pathian Duhsaknain Chatuana Nunna A Thlen

“Mi fel chu mal i sâwm dâwn si a; Aw LALPA, ani chu phaw ang hian duhsaknain i hual vêl ang.”—SAM 5:12.

1, 2. Elija’n Zarephath hmeithai hnênah eng nge a dîl a, eng thutiam nge a pêk?

HMEICHHIA leh a fapa chu an ril a ṭâm hle a, Pathian zâwlnei pawh a ṭâm hle bawk. Chu Zarephath hmeithai chuan ei siamna tûr thing a fawm laiin, zâwlnei Elija chuan tui in tûr leh chhang ei tûr a dîl a. In tûr pêk chu a inhuam a; mahse, a ei tûr neih chhun chu ‘bêla chhangphut vei khat lek leh, ûma sahriak tlêmtê chauh’ a ni a. Zâwlnei hnêna ei tûr pe thei nia a inhriat loh avângin a neih tlêmzia chu a hrilh a ni.—1 Lal. 17:8-12.

² Elija chuan: “Chu mi chuan chhang tê tak tê mi han siamsak phawt la, chu chu mi rawn lâk la, chu mi zawhah chuan i tân leh i fapa atân i la siam dâwn nia. LALPA, Israelte Pathianin heti hian a ti a ni, ‘LALPAN lei chungah hian ruah a rawn sûrtîr hma loh chuan chhangphut bêl chu a ruak chuang lo ang a, sahriak ûm pawh a kang lo vang,’ tiin,” a ti a.—1 Lal. 17:13, 14.

3. Eng thu tlûkna pawimawh tak nge kan siam ngai?

³ Hmeithai chuan a ei tûr neih chhun chu a pe ve dâwn nge dâwn lo tih mai aia thu tlûkna pawimawh zâwk a siam a ngai a. Amah leh a fapa chhan chhuak tûrin Pathian Jehova chu a ring dâwn nge ni a, Pathian duhsakna leh ṭhian nihna aiin a tisa lam mamawh chu a dah pawimawh zâwk dâwn? Keini pawhin chutiang  bawk zawhna chu kan hmachhawn ṭheuh a ni. Sum leh pai lama intihmuk aiin Pathian Jehova duhsakna dawn chu kan ngai pawimawh zâwk ang em? Pathian rin leh a rawngbâwl nachhan tûr tam tak kan nei a. Pathian duhsakna zawng tûr leh dawng tûrin hma kan la thei a ni.

‘Chibai Bûkna Hmu Tlâk I Ni’

4. Engvângin nge Pathian Jehova chu chibai bûkna hmu tlâk a nih?

⁴ Pathian Jehova chuan mihringte’n a pawm tlâka rawng an bâwl beisei tûrin dikna a nei a. Vân lama a chhiahhlawhte pawhin hetianga sawiin chu chu inlungrual takin an nemnghet a ni: “Nang, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tiin. (Thup. 4:10, 11) Pathian Jehova chu thil engkim Siamtu a nih avângin, kan chibai bûkna hmu tlâk a ni.

5. Engvângin nge Pathian min hmangaihna chuan rawngbâwl tûra min chêttîr ang?

⁵ Pathian Jehova rawng kan bâwl chhan dang pakhat chu min hmangaihna nasa tak vâng hi a ni. Bible chuan: “Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni,” tiin a sawi. (Gen. 1:27) Pathianin mihringte hnênah thil ngaihtuah a, thu tlûkna siam theihna a pêk avângin, anni chuan zalên taka duh thlan theihna an nei a. Nunna min pein Pathian Jehova chu mihringte tân Pa a lo ni a. (Lk. 3:38) Pa ṭha takin a tih ṭhin angin, ani chuan a fate’n nun hlim tak an neih theih nâna an mamawh engkim a pe a. Kan lei mawi tak hian ei tûr tam tâwk a chhuah theih nân “a nî a chhuahtîr ṭhîn a, . . . ruah a sûrtîr ṭhîn” bawk.—Mt. 5:45.

6, 7. (a) Adama chuan a thlah zawng zawngte chungah eng thil pawi nge a thlen? (b) Krista inthawina chuan Pathian duhsakna zawngtute tân eng thil nge a thlen ang?

⁶ Pathian Jehova chuan sual rah chhuah râpthlâk tak ata min chhan chhuak bawk a. Thil sual a tih khân, Adama chu pawisa khelh chîng, a inkhelh theih nâna a chhûngte sum rûksaktu ang a lo ni. Pathian Jehova chunga helin, Adama chuan a fate beiseina neih—chatuana hlimna—chu a chhuhsak a ni. A hmasialna chuan mihringte chu ṭhat famkim lohna salah a hruai lût a. Chuvângin, mihring zawng zawng chu dam lo thei, lungngaihna tawng thei, leh a tâwpa thi thei kan lo ni ta vek a ni. Sal tâng chhuah tûr chuan man pêk a ngai a, Pathian Jehova chuan chûng rah chhuah hlauhawm takte laka min chhan chhuah nân man a pe a ni. (Rom 5:21 chhiar rawh.) Isua Krista chuan a Pa duhzâwng nêna inmila thil tiin, ‘mi tam tak tlan nân a nun’ a pe a. (Mt. 20:28) Pathian duhsakna dawngtute chuan a hlâwkna chu an la têl kim thuai ang.

⁷ Nun hlim leh awmze nei tak kan neih nâna min Siamtu Pathian Jehova aia thilti nasa zâwk an awm lo. A duhsakna kan dawn avângin, mihringte chunga chhiatna thleng tawh zawng  zawngte a sût leh dân kan hmu thei ang a. Tin, Pathian Jehova chuan amah “zawngtute hnêna lâwmman pêk hmang” a nihzia min hmuhtîr ṭheuh zêl bawk ang.—Heb. 11:6.

‘I Mite Chu Mahni Duh Thuin An Inpe Ang’

8. Isaia thiltawn chuan Pathian rawngbâwl chungchâng eng nge min zirtîr?

⁸ Pathian duhsakna dawng tûr chuan zalên taka duhthlan theihna ṭha taka hman a ngai a. A chhan chu Pathian Jehova chuan a rawngbâwl tûrin tumah a tihluih loh vâng a ni. Isaia hun lai khân: “Tunge ka tirh ang a, tunge kan tân kal ang?” tiin a zâwt a. Pathian Jehova chuan zâwlneiin thu tlûkna siam tûra dikna a neih chu pawmin a chawimawi a ni. Isaia’n: “Kei heta hi ka awm, mi tîr ta che,” tia a chhân laia a lungawi dân tûr chu han ngaihtuah teh.—Is. 6:8.

9, 10. (a) Eng ang rilru puin nge Pathian rawng kan bâwl ang? (b) Engvângin nge thinlung zawng zawnga Pathian Jehova rawngbâwl chu thil inâwm tak a nih?

⁹ Mihringte chuan Pathian rawng an bâwl theiin, an bâwl lo thei a. Pathian Jehova chuan mahni duhthua a rawng kan bâwl chu a duh a ni. (Josua 24:15 chhiar rawh.) Hreh deuh chunga chibai bûkna chuan Pathian a tilâwm lo va; mi dangte tihlâwm duh avânga a hnêna inpêkna lah a pawm hek lo. (Kol. 3:22) Khawvêl thilte avânga “thinlung zawng zawnga” Pathian rawng kan bâwl theih loh chuan a duhsakna kan dawng lo vang. (Sâm 119:2) Ani chuan thinlung zawng zawnga a rawngbâwl chu kan ṭhatna tûr a ni tih a hria a. Mosia pawhin Israelte chu ‘LALPA an Pathian hmangaih a, a awkâ âwih a, amah vawn tlatna hmanga’ nunna thlang tûrin a fuih bawk a ni.—Deut. 30:19, 20.

¹⁰ Hmân lai Israel Lal Davida chu Pathian Jehova chawimawiin heti hian a zai a ni: “I mite chu i thiltihtheihna nîah chuan mahni duh thuin an inpe ṭhîn: thianghlim mawinaah, zîng pum chhûng aṭangin, i tleirâwl daifîm chu i nei a,” tiin. (Sâm 110:3) Tûn laia mi tam tak chuan sum leh pai lama insawhngheh leh hun âwl nuam taka hman chu an nunah an dah pawimawh ber a. Pathian Jehova hmangaihtute erawh chuan thil dang zawng aiin rawngbâwlna an dah pawimawh ber zâwk a ni. Ṭhahnemngai taka chanchin ṭha an hrilh dân chuan an nuna an dah pawimawh ber chu a târ lang chiang hle a. Pathian Jehova’n an nî tin mamawh a pe thei tih an ring nghet tlat a ni.—Mt. 6:33, 34.

Pathian Duhsakna Dawng Tlâk Inthawinate

11. Israel mite’n Pathian Jehova hnêna inthawina an hlan hian eng hlâwkna nge dawn an inbeisei?

¹¹ Dân thuthlung hnuaiah Pathian mite chuan a duhsakna hlawh nân inthawina pawm tlâk an hlân ṭhîn. Leviticus 19:5 chuan: “LALPA tâna remna thil hlana in inthawi hunin pawm tlâk ni tûrin in hlân tûr a ni,” tiin a sawi. Chu mi buah vêk chuan heti hian kan chhiar bawk: “Lâwmthu sawi inthawia LALPA hnêna in inthawi hunin chhân tlâk in nih theihna tûrin in inthawi tûr a ni,” tiin. (Lev. 22:29) Israel mite’n Pathian Jehova maichâma ran pawm tlâk an hlan chuan a khu chu Pathian dik hnênah “rimtui” angin a chho ṭhîn a. (Lev. 1:9, 13) Ani chuan hmangaihna lantîr nâna a mite thil hlan chu a lâwmin, a pawm a ni. (Gen. 8:21) He Dân thupêkah hian tûn lai atân pawha hman theih thu bul kan hmu a. Chûng pawm tlâk inthawina hlântute chuan Pathian Jehova duhsakna an dawng a ni. Ani chuan eng ang inthawina nge a pawm? Kan nun kawng chi hnih, kan nungchang leh kan ṭawngkam hi lo ngaihtuah ta ila.

12. Eng thil chînte’n nge ‘kan taksa inhlanna’ chu Pathian tân tenawm tak nihtîr thei?

¹² Rom mite hnêna a lehkha thawnah tirhkoh Paula chuan: “Inthawina nung leh thianghlim leh Pathian lawm tlâk ni tûrin in taksa chu inhlânah ka ngên a che u,” tiin a ziak a. (Rom 12:1) Pathian duhsakna dawng tûr chuan miin a taksa chu Pathian pawm tlâk a nihtîr tûr a ni. Miin zûk leh hmuam a tih a, kuhvate eiin, damdawi leh zu a hman sual chuan, a inthawina chuan hlutna rêng a nei lo vang. (2 Kor. 7:1) Chu bâkah, ‘mi ngaih hmang chuan ama taksa chunga thil a tihsual’ avângin, nungchang bawlhhlawhna engpawh chîng mi inthawina  chu Pathian Jehova tân a tenawm a ni. (1 Kor. 6:18) Pathian tilâwm tûr chuan, mi chu ‘a chêtzia zawng zawngah a thianghlim’ tûr a ni.—1 Pet. 1:14-16.

13. Engvângin nge Pathian Jehova fak chu thil âwm rêng a nih?

¹³ Jehova lawm êm êm inthawina dang chu kan ṭawngkam chhuak hi a ni a. Pathian Jehova hmangaihtute chuan vântlâng hmaah leh mahni chauhva ina an awm hunah pawh amah chu an fak ṭhîn. (Sâm 34:1-3 chhiar rawh.) Sâm 148-150 chhiar la, chûng fakna hla pathumte’n Pathian Jehova fak tûra min fuih ngun dân chu chhinchhiah ang che. Ni e, “mi dik tân chuan Pathian fak hi a âwm rêng a ni.” (Sâm 33:1) Kan Entawn tûr Isua Krista pawhin chanchin ṭha hrilha Pathian fak a pawimawhzia a sawi uar hle bawk.—Lk. 4:18, 43, 44.

14, 15. Hosea chuan Israel mite chu eng ang inthâwina nge hlân tûra a fuih a, engtin nge Pathian Jehova’n a chhân lêt?

¹⁴ Ṭhahnemngai taka thu hrilin, Pathian Jehova kan hmangaihzia leh a duhsakna dawn kan duhzia kan târ lang a ni. Entîr nân, zâwlnei Hosea’n biakna dik lo an zawm avânga Pathian duhsakna hloh ta Israelte a fuih dân hi ngaihtuah teh. (Hos. 13:1-3) An hnênah: “Khawlohna zawng zawng chu la bo la, a ṭha apiang chu pawm ang che; tichuan kan hmui rahte chu bâwngpa aiah ka rawn hlân ang e,” tia Jehova ngên tûrin a hrilh a ni.—Hos. 14:1, 2.

¹⁵ “Kan hmui rahte” tih chuan Pathian dik fak nâna thu ṭha takte tih tak zeta sawi chhuah chu a kâwk a ni. Engtin nge Pathian Jehova chuan chûng inthawina hlântute chu a chhân lêt? “Anni chu ka hmangaih hrim hrim dâwn a ni,” a ti. (Hos. 14:4) Chutiang fakna inthawina hlântute chuan Jehova ngaihdamna te, duhsakna te, leh a ṭhian nihna te an dawng a ni.

16, 17. Pathian rinnain mi chu chanchin ṭha hril tûra a chêttîr hian, chu mi fakna hlan chu Pathian Jehova’n engtin nge a lo dawn sawn?

¹⁶ Rawngbâwlnaa Pathian Jehova fak chu biakna dika hmêlhmang langsâr tak a ni reng ṭhîn. Pathian dik chawimawi chu fakna hla phuahtu tân a pawimawh êm avângin heti hian Pathian a ngên hial a ni: “Aw LALPA, khawngaih takin ka kâa duh thua thilpêkte hi la . . . ang che,” tiin. (Sâm 119:108) Tûn lai hian engtin nge a nih ve? Kan hun laia mipui tam tak chungchângah Isaia chuan heti hian a lo hrilh lâwk a: “LALPA fakna thu an hriattîr ang. . . . [Pathian] maichâmah chuan [thilpêkte chu] lâwmin an chho vang,” tiin. (Is. 60:6, 7) Chu mi thlen famkim nân, mi maktaduai têlte chuan ‘faka inthawina hi Pathian hnênah an hlân fo va, chu chu a hming ṭanna hmuite rah chu a ni.’—Heb. 13:15.

¹⁷ I chungchâng eng nge ni ve le? Pathian pawm tlâk inthawina i hlân em? I hlân lo a nih chuan, a ṭul anga insiam ṭhain, rawngbâwlnaah Pathian Jehova i fak ṭan ang em? I rinnain chanchin ṭha hril ṭan tûra a chêttîr che chuan, i thil hlan chuan “bâwngpa . . . ai chuan, LALPA a tilâwm zâwk ang.” (Sâm 69:30, 31 chhiar rawh.) I “rimtui” hlan faka inthawina chuan Pathian Jehova hnên a thleng ang a, a duhsakna i dawng  ngei ang tih i chiang thei a ni. (Ezek. 20:41) Chutih huna i hlim tûrzia mai chu!

‘Jehova Chuan Mi Fel Chu Mal A Sâwm Ang’

18, 19. (a) Tûn laia mi tam takte chuan Pathian rawngbâwl chu engtin nge an thlîr? (b) Pathian duhsakna chân chuan eng nge a thlen?

¹⁸ Malakia hun laia mi ṭhenkhatte ang bawkin, tûn laia mi tam tak chuan: “Pathian rawngbâwl hi a thlâwn a ni: a thuchah kan zawm . . . hi sâwtna eng nge awm?” tih ngaih dân an nei a. (Mal. 3:14) Sum leh pai an âtchilh avângin, Pathianin a thiltum tihlawhtling thei lo tûrah leh a dânte chu chhawr tlâk tawh loh angin an thlîr a. An tân chuan chanchin ṭha hrilh chu hun khawhralna leh thil ninawm tak mai a ni.

¹⁹ Chutiang ngaih dân chu Eden huan aṭanga lo chhuak a ni a. Pathian Jehova nunna pêk ropui tak ngainêp tûr leh A duhsakna dawn duhna nei lo tûra Evi hmintu chu Setana kha a ni. Tûn laiah hian, Setana chuan mite chu Pathian duhzâwng tihnain hlâwkna engmah a thlen lo tih rintîr a tum reng a. Mahse, Evi leh a pasal chuan Pathian duhsakna chân chu nun chânna a ni tih an hmu chhuak ta a. Tûna an kawng ṭha lo zawhtute pawh hian a rah ṭha lo chu an la seng ve thuai ang.—Gen. 3:1-7, 17-19.

20, 21. (a) Zarephath hmeithai khân eng nge a tih a, chu mi hnu chuan eng thil nge a tawn tâk? (b) Engtin nge Zarephath hmeithai kan entawn ang a, engvângin nge kan entawn ang?

²⁰ Adama leh Evi tâwp dân lungchhiatthlâk tak leh atîra kan sawi tâk Elija leh Zarephath hmeithaite dinhmun chu han khaikhin teh. Elija thusawi thlamuanthlâk tak a hriat hnu chuan hmeichhia chuan a chhangphut neih chhun chu siamin zâwlnei chu a ṭhen a pe hmasa a. Tichuan, Pathian Jehova chuan Elija hmanga a thutiam chu a hlen ta a ni. Thuziak chuan: “Amah leh a chhûngte leh Elija nên chuan ni engzât emaw lai an ei a. Elija hmanga a sawi LALPA thu ang khân chhangphut bêl chu a ruak chuang lo va, sahriak ûm pawh a kang hek lo,” tiin a sawi.—1 Lal. 17:15, 16.

²¹ Zarephath hmeithai chuan tûn laia mi tam takte tih duh loh tûr thil chu a ti a. Ani chuan chhandamna Pathian chu a rinchhan tlat a, Pathian pawhin a kalsan lo. He Bible thuziak leh thuziak dangte chuan Pathian Jehova chu  rinchhan tlâk a nihzia a nemnghet a ni. (Josua 21:43-45; 23:14 chhiar rawh.) Tûn laia Jehova Thuhretute thiltawn pawh hian a duhsakna dawngtute a phatsan ngai dâwn lo tih a târ lang chiang hle bawk.—Sâm 34:6, 7, 17-19. *

22. Engvângin nge Pathian duhsakna zawn nghâl chu a hmanhmawhthlâk?

²² ‘Lei chung zawng zawnga awmte chunga’ Pathian rorêlna nî chu a lo thleng ṭêp tawh a. (Lk. 21:34, 35) Chu chu pumpelh theih a ni lo. Pathian ruat Rorêltuin: “Ka pa voh bîkte u, lo kal ula khawvêl siam ṭantirh ata in tâna ram buatsaih chu chang rawh u,” a tih malsâwmna lakah chuan khawvêl hausakna leh nawmsakna chu engmah a ni lo. (Mt. 25:34) Ni e, ‘Jehova ngei chuan mi fel chu mal a sâwm dâwn si a; ani chu phaw ang hian duhsaknain a hual vêl ang.’ (Sâm 5:12) Pathian duhsakna chu kan zawng tûr a ni lâwm ni? (w11-E 02/15)

[Footnote]

Kan Hre Chhuak Em?

• Engvângin nge Pathian Jehova chuan tih tak zeta chibai bûk a phu?

• Eng ang inthawina nge tûn laiah Pathian Jehova’n a pawm?

• “Kan hmui rahte” tih hi eng tihna nge ni a, engvângin nge chûng chu Jehova hnêna kan hlan ang?

• Engvângin nge Pathian duhsakna kan zawn ang?

[Zirlai Atâna Zawhnate]

[Phêk 17-naa milem]

Pathian zâwlnei chuan nu rethei tak chu eng thu tlûkna pawimawh tak nge siam tûra a ngen?

[Phêk 19-naa milem]

Pathian Jehova hnêna faka inthawina kan hlan hian eng hlâwknate nge kan dawn?

[Phêk 20-naa milem]

Pathian Jehova i rin tak zetna chuan lunghnualna a thlen ngai lo vang che