Thlarau Thianghlim—Thil Siamnaa Thawktu Chu!
Thlarau Thianghlim—Thil Siamnaa Thawktu Chu!
“LALPA thuin vânte chu siam a ni a; chûnga awmho zawng zawngte pawh chu a kâa thaw [a nih loh leh, thlarau] chuan siam an ni.”—SAM 33:6.
1, 2. (a) Engtin nge lei leh vân chungchânga mihringte hriatna chu a pun chhoh zêl? (b) Eng zawhna nge chhân ngei ngai?
KUM 1905 khân scientist hmingthang Albert Einstein-a leh scientist dang tam tak chuan vân boruak zau takah hian arsi hlâwm pakhat—Thlasik Kawng—chauh a awm niin an hria a. Vân boruak zau zâwng chu an va chhût sual nasa tak êm! Tûnah chuan vân boruak zau takah hian arsi hlâwm tlûklehdingâwn 100 chuang a awm nia hriat a ni a, arsi hlâwm ṭhenkhatah phei chuan arsi tlûklehdingâwn tam tak a awm lehchhâwng bawk a ni. Enhlatna ṭha lehzualte chu leia hman emaw, boruaka kah chhuah emaw a nih hnu hian, arsi hlâwm pawh hmuh belh zêl a ni ta.
2 Kum 1905-ah chuan vân boruak chungchâng hriatna a la beitham hle ang bawkin, lei lam chanchin hriatna pawh a la beitham hle a. Kum za kaltaa mite chuan an pi leh pute ai chuan thil an hre tam zâwk ngei ang. Mahse, chûng hun lai ai chuan tûnah hian nunna ropuizia leh makzia te, leilungin nunna a châwm dânte chu hriat thiam lehzual a ni ta a. Hun lo la awm zêl tûrahte hian lei leh vân chungchâng tam lehzualin kan hriat belh ngei ang. Mahse, hei hi zawhna pawimawh tak a ni, Hêng zawng zawngte hi engtin nge a lo awm ṭan? tih hi. Siamtuin a Thu Thianghlima a târ lan vâng chauhvin a chhânna kan hre thei a ni.
Thil Siamte Makna
3, 4. Engtin nge Pathianin lei leh vân a siam a, a kut chhuakte chuan engtin nge amah an chawimawi?
3 Lei leh vân lo awm ṭan dân chu Bible châng hmasa ber chuan heti hian hrilhfiah a ni: “Atîrin Pathianin lei leh vân a siam a,” tiin. (Gen. 1:1) Pathian Jehova chuan engmah lo ata lei leh vân leh a chhûnga thil awm zawng zawng chu a thlarau thianghlim—a chakna che vêl reng thiltithei tak—hmangin a siam a. Mi themthiam chuan a kut leh hmanruate hmangin thil a siam ṭhîn a, Pathian erawh chuan a hna ropui takte thawh nân a thlarau thianghlim a tîr chhuak thung a ni.
4 Bible chuan thlarau thianghlim chu Pathian “kutzung” angin a sawi a. (Lk. 11:20; Mt. 12:28) “A kut chhuak”—a thlarau thianghlim hmanga a thil siamte—chuan amah an chawimawi a ni. “Vânte khian Pathian ropuizia chu a hriattîr a; boruak zau tak khian a kut chhuak chu a lantîr ṭhîn,” tiin fakna hla phuahtu Davida chu a zai a. (Sâm 19:1) Ni e, hmuh theih thil siamte chuan Pathian thlarau thianghlim thiltihtheihna ropuizia a târ lang a ni. (Rom 1:20) Engtin nge a târ lan?
Tiam Chin Nei Lo Pathian Thiltihtheihna
5. Jehova thlarau thianghlimin thil siam theihna a neihzia hrilhfiah rawh.
5 Kan ngaihtuah phâk loh khawpa zau vân boruak hian Jehova thiltihtheihna leh chaknain tiam chin a neih lohzia a târ lang chiang hle a. (Isaia 40:26 chhiar rawh.) Nî hi han ngaihtuah teh. Kan nî hi arsi pakhat a ni a, kan awmna lei aṭanga kilometer maktaduai 150 aia hlaa awm a nih bâkah degree Celsius maktaduai 15 vêl laia sâ a ni bawk. Chuti khawpin sa mah se, leia nunna nei zawng zawngte an nun chhunzawm theih nân lei aṭanga a tawk chauhva hlaah a awm a ni. Nî chauh ni lovin, arsi dang tlûklehdingâwn tam takte siam tûr chuan thiltihtheihna leh chakna nasa tak a ngai ang tih a chiang hle. Jehova chuan chutiang chakna chu a nei a ni.
6, 7. (a) Engvângin nge Pathianin a thlarau thianghlim chu mumal takin a hmang tih kan sawi theih? (b) Engin nge lei leh vân leh a chhûnga thil awmte hi tihpalh thila lo awm a ni lo tih târ lang?
6 Pathian chuan a thlarau thianghlim chu mumal takin a hmang tih finfiahna tam tak a awm a. Entîr nân: Ball rawng hrang hrang awmna bâwm i lo nei ta a. Ball rawngte chu a inpawlh vek theih nân i thing vak vak a. Chutah leiah chuan i han theh chhuak rual ta vek mai a ni. Ball chu a rawng ang zêla an awm hran thliah thliah i beisei ang em? Beisei hauh lo vang! Thunun lova thil pâwngpaw tih a nih chuan hetiang bâk beisei theih a ni lo rêng rêng. Hei hi mi zawng zawngin an pawm vek a ni. *
7 Vân lama mit kan lên chhoh emaw, entlang hmanga kan en emaw hian eng nge kan hmuh? Mumal taka inher kual ṭhîn arsi hlâwm liante, arsite, leh planet-te chu kan hmu ang. Chûng chu vân sâng boruaka ruahman loh leh thunun loh tihpalh thilthleng avânga lo awm a ni thei lo vang. Chuvângin, mumal taka awm kan lei leh vân leh a chhûnga thilawmte chu eng chakna avângin nge a lo awm ṭan? tiin kan inzâwt tûr a ni. Mihringte thiamna leh tihchhinna ringawt aṭangin chu chakna chu kan hre thei lo. Amaherawhchu, Bible chuan chu chu lei leh vâna chakna thiltithei ber, Pathian thlarau thianghlim niin a sawi. Fakna hla phuahtu chuan “LALPA thuin vânte chu siam a ni a; chûnga awmho zawng zawngte pawh chu a kâa thaw [a nih loh leh, thlarau] chuan siam an ni,” tiin. (Sâm 33:6) Mit lâwng chuan, chûng vâna thil “awmho zawng zawngte” zînga tlêm tê chauh kan hmu thei a ni.
Thlarau Thianghlim leh Leilung
8. Jehova thil siamte chungchâng eng zât nge kan hriat?
8 Kan thil zir tûr zawng zawngte ngaihtuah chuan tûna kan hriat tawhte hi eng tham mah a ni lo. Pathian thil siamte chungchâng kan hriat tlêm chungchângah mi rinawm Joba chuan heti hian a sawi a ni: “Ngai teh, hêng hi a kawng pâwn lam lek a ni, a chanchin kan hriat hi a va beitham êm! A thiltihtheihna ri thâwm chu tunge hre zo thei ang?” tiin. (Job. 26:14) Kum zabi têl a liam hnuah, Jehova thil siamte chîk ṭhîntu Lal Solomona chuan: “Engkim hi an hun ṭheuhvah chuan mawi takin a siam a; mihring rilruah chuan chatuan a dah bawk a; mahse, chuti pawhin anni chuan Pathianin a tîr ata a tâwp thlenga thil a tih chu an hmu chhuak thei chuang lo,” tiin a puang bawk.—Thur. 3:11; 8:17.
9, 10. Pathianin leilung a siam khân eng chakna nge a hman a, thil siam ni hmasa ni thum chhûng khân eng thil mak takte nge thleng?
9 Mahse, Pathian Jehova chuan a thil siamte chungchâng a ṭûl chin chu a târ lang a ni. Entîr nân, Bible chuan Pathian thlarauvin leiah hian kum chhiarsên loh khawpa tam hna a lo thawk reng tawh tih min hrilh a. (Genesis 1:2 chhiar rawh.) Chutih lai chuan, khawmual leh êng pawh a la awm lo va, hîp luh theih tûr chi boruak te pawh a la awm lo niin a lang.
10 Bible chuan thil siam nîte chhûnga Pathian thiltih chu a târ lang a. Chûngte chu dârkâr 24-a rei nî ni lovin, thil pawimawh tak a thlen hun, hun rei tak awh hunbi-te a ni. Thil siam nî a ni khatnaah chuan Pathian Jehova chuan leilungah hian êng a awmtîr a. Chu chu a hnua leilung aṭanga nî leh thla te chiang taka hmuh theih a nih hunah peih fel a ni chauh vang. (Gen. 1:3, 14) Ni hnih nî chuan, boruak zau tak a lo awm ṭan a. (Gen. 1:6) Chuti laia leilung hian tui te, êng te, leh thli te a nei tawh a; mahse, khawmual erawh a la nei lo cheu. Thil siam ni thum nî tîr lamah chuan, Pathian Jehova chuan a thlarau thianghlim hmangin khawmual a awmtîr a, tuifinriat ata khawmual a lan theih nân leilung chakna nasa takte a hmang pawh a ni thei ang. (Gen. 1:9) Thil siam ni thum nî leh a ni dangahte chuan thilthleng mak tak dangte chu a la thleng dâwn a ni.
Thlarau Thianghlim leh Nunna Nei Thil Siamte
11. Thil nungte mak ropuizia, pian felzia, leh mawizia chuan eng nge a târ lan?
11 Pathian Thlarau thianghlim chuan nunna nei thilte siamna kawngah felfai takin hna a thawk bawk a. Pathian chuan a thlarau thianghlim hmangin, thil siam ni thum nî aṭanga ni ruk chhûngin thlai leh nungcha chi tam tak a siam a ni. (Gen. 1:11, 20-25) Chuvângin, thil nungte mak ropuizia, pian felzia, leh mawizia entîrna tam takte chuan ṭha taka duan an nihzia a târ lang.
12. (a) DNA chuan eng hna nge a thawh? (b) DNA-in hlawhtling taka hna a thawh zawm zêlna aṭangin eng nge kan hriat theih?
12 Thlai leh nungchate ziarâng inthlah chhâwnna ber DNA (deoxyribonucleic acid) hi han ngaihtuah teh. Hrik te tak tê tête, hnimte, saite, blue whale sanghapuite, leh mihringte pawh tiamin leia thil nung zawng zawngte chu DNA hmangin an inthlah pung a ni. Leia thil nungte chu inang lo hlawm hle mah se, an ze inthlahchhâwnna thununtu ber DNA chu a inthlâk danglam lo va, an nihna bulpui kumkhuaa vawng ṭhatu a ni. Chuvângin, leia thil nung chi hrang hrangte hi Pathian Jehova thiltum angin an inthlahchhâwng chho zêl a ni. (Sâm 139:16) He ruahmanna fel tak leh ṭha tak hian thil siamte chu Pathian “kutzung,” a nih loh leh a thlarau thianghlim hmanga siam a nihzia finfiahna a pêk belh a ni.
Lei Lam Thil Siam Pawimawh Ber
13. Engtin nge Pathianin mihring a siam?
13 Kum tam tak a liam hnu chuan, Pathian chuan thil nung leh nung lo chhiarsên lohte chu a siam a, leilung chu ‘a chhiain, a ruak ngawt’ tawh lo. Mahse, Pathian Jehova chuan thil siam nân a thlarau chu a la hmang zêl dâwn. A lei lam thil siam ropui ber chu a la siam thuai dâwn a ni. Thil siam ni ruk nî tâwp lamah chuan, Pathian chuan mihring a siam a. Engtin nge a siam? A thlarau thianghlim leh leilunga bâwlhlo awmte hmangin a siam a ni.—Gen. 2:7.
14. Eng kawng pawimawh takin nge mihringte chu nungchate laka a danglam bîk?
14 Genesis 1:27 chuan: “Pathianin ama anpuiin mihring a siam a, Pathian anpui ngeiin a ni a siam ni; mipaah leh hmeichhiaah a siam a ni,” tiin a sawi. Pathian anpuia siam tih awmzia chu Pathian Jehova’n hmangaihna lantîr thei tûr te, zalên taka duh thlang thei tûr te, leh min Siamtu nêna mi mal inlaichînna nei thei tûrtein min siam tihna a ni. Chuvâng chuan, kan thluak chu nungchate thluak lakah chuan a danglam hle. Pathian Jehova chuan mihring thluak chu amah leh a hna thawhte chatuana kan zir zawm zêl theihna tûrin a siam a ni.
15. Adama leh Evi khân eng hma bâk nge an neih?
15 Mihring awm ṭantirh khân, Pathian chuan Adama leh a nupui, Evi hnênah leilung leh a chhûnga thil siam ropui tak takte hlim taka an zir atân a pe a. (Gen. 1:28) Ei tûr hnianghnâr tak leh an awmna tûr paradis pawh a pe bawk. Anni chuan chatuana nun theihna leh mihring ṭha famkimte thlahtu nih theihna hun remchâng an nei a ni. Mahse, chutiang chuan thil a kal ta lo.
Thlarau Thianghlim Chanvo Chu Pawmin
16. Mihring hmasa berte an hel chung pawhin eng beiseina nge kan neih?
16 Adama leh Evi chu lâwm taka Siamtu thu âwih ai chuan, mahni hmasial takin an hel a. An thlah mihring ṭha famkim lo zawng zawngte chuan hrehawm an tawrh phah ta a ni. Mahse, Bible chuan kan nu leh pa hmasa berte kawng sual zawhnain a tihchhiat zawng zawngte Pathianin a sût lêt dân tûr min hrilh a. Pathian Jehova’n atîra a thiltum a hlen chhuak dâwn tih min hrilh bawk. Leilung hi chatuan nunna nei mihring hlim leh hrisêl takte luah khah paradis-ah a lo chang ang. (Gen. 3:15) Chu hma bâk hlimawm taka rinna nei reng tûr chuan, Pathian thlarau thianghlim ṭanpuina kan mamawh a ni.
17. Eng ang ngaih dân nge kan pumpelh ang?
17 Thlarau thianghlim dîlin Pathian Jehova hnênah kan ṭawngṭai tûr a ni a. (Lk. 11:13) Chutianga kan tihna chuan thil siamte chu Pathian kut chhuak a nihzia kan rinna tinghet tûrin min ṭanpui ang. Tûn lai hian ngaih dân dik lo leh nghahchhan nei lo Pathian awm rin lohna leh chanchhâwnna ngaih dân thehdarh chu a hluar hle a. Hêng ngaih dân dik lo tak avâng hian kan buai tûr a ni lo va, kan zâm tûr lah a ni hek lo. Kristian zawng zawngte chu chutiang beihna leh chu miin a kaihhnawih ṭhiante nêksâwrna do tûrin an inbuatsaih tûr a ni.—Kolossa 2:8 chhiar rawh.
18. Lei leh vân leh mihringte lo awm ṭan dân chungchâng ngaihtuah huna Siamtu fing tak a awm tih rin loh chu engvângin nge dâwn tâwina a nih?
18 Thil siam thlâwptu thilte tih tak zeta bih chianna chuan Bible leh Pathian rinna chu ma thei lovin a tinghet ngei ang. Lei leh vân, leh mihringte bul inṭanna an ngaihtuah hian mi tam tak chuan hmuh theih khawvêl piah lama ṭanpuitu a awm tih an ring ṭha duh lo. Mahse, chûng mite thlîr dân aṭanga thil kan chhût dâwn a nih chuan, finfiahna zawng zawng hi thlei bîk nei lovin kan bûk tawn lo tihna a ni ang. Chu bâkah, fel tak leh tum nei thlapa ruahman thil siam “chhiar sên rual loh” awmte chu kan ngaihthah tihna a ni bawk ang. (Job. 9:10; Sâm 104:25) Kristian kan nih angin, thil siamnaa thawktu chakna che vêl reng chu Pathian Jehova’n fing taka a kaihhruai a thlarau thianghlim a ni tih kan chiang hle a ni.
Thlarau Thianghlim leh Pathian Kan Rinna
19. Engin nge Pathian a awm tih leh a thlarauvin hna a thawk tih târ lang?
19 Pathian rinna nei tûr leh amah hmangaih a, zahna thûk tak nei tûr chuan thil siam chanchin engkim kan hriat vek kher a ngai lo. Pathiana rinna neih chu mihringte inkâra inṭhianna ang a ni a. Mi tuemaw chanchin eng engemawte kan hriatna chuan a ṭhianah min siam kher lo. Amaherawhchu, ṭhian inkâra inlaichînna nghet nei tûr chuan kan inhriat tawn chu a ngai a ni. Chutiang bawkin Pathian chanchin eng engemawte hriat mai chu amaha rinna neih nân a tâwk lo. A chanchin kan zir belh hian amah kan rinna chu a pung zêl ṭhîn zâwk a ni. Dik takin, kan ṭawngṭainate a chhân a, a thu bulte nunpui a ṭhatzia kan hmuh hian Pathian a awm tih kan chiang lehzual ṭhîn. Kan pheikhai a hruaizia te, min vênhimzia te, a rawngbâwlnaa kan thawhrimnate mal a sâwmzia te, leh kan thil mamawh min pêkzia te târ langtu thil tam tak kan hmuh hian Pathian Jehova chu kan hnaih lehzual a. Hêng zawng zawngte hian Pathian a awm tih leh a thlarau thianghlimin hna a thawk tih a târ lang chiang hle.
20. (a) Engvângin nge Pathianin lei leh vân leh mihringte a siam? (b) Pathian thlarau thianghlim kaihhruaina kan zui zêl chuan eng nge a rah chhuah ang?
20 Pathian Jehova’n a chakna che vêl reng a hmang tih a lan chianna langsâr tak chu Bible hi a ni; a ziaktute’n “thlarau thianghlim tirhin Pathian hnên ata an sawi” avângin. (2 Pet. 1:21) Pathian Lehkha Thu ngun taka zirna chuan thil engkim siamtu Pathian kan rinna a tichak thei a ni. (Thup. 4:10, 11) A mize duhawm tak, hmangaihna lan chhuahtîr nân Pathian Jehova chu Siamtu a lo ni a. (1 Joh. 4:8) Chuvângin, hmangaihna ngah kan Ṭhian leh kan Pa vâna mi chanchin zir tûra mi dangte ṭanpui tûrin theihtâwp i chhuah ang u. Keimahniah phei chuan, Pathian thlarau kan inkaihhruaitîr zêl chuan chatuana a chanchin zir theihna hun remchâng kan nei ang. (Gal. 5:16, 25) Kan za hian Pathian Jehova leh a thiltih ropuite chanchin chu zir chhunzawm zêl ila, lei leh vân, leh mihringte siam nâna a thlarau thianghlim a hman laia a lantîr hmangaihna nasa tak chu kan nunah hian i lan chhuahtîr ṭheuh vang u. (w11-E 02/15)
[Footnote]
^ par. 6 Is There a Creator Who Cares About You? tih lehkhabu Sâpṭawnga chhuah phêk 24 leh 25 en rawh.
Kan Hrilhfiah Thei Em?
• Lei leh vân hian Pathianin a thlarau thianghlim a hman dân eng nge min zirtîr?
• Pathian anpuia siam kan nihna hian eng hun remchâng ṭha nge min pêk?
• Engvângin nge thil siam thlâwptu finfiahnate kan bih chian a ngaih?
• Eng kawngin nge Pathian Jehova nêna kan inlaichînna kan tihngheh theih?
[Zirlai Atâna Zawhnate]
[Phêk 13-naa milem]
Lei leh vân mumal taka ruahman a nihna hian thil siam chungchâng eng nge min zirtîr?
[Milem Hawhtîrtu]
Arsite: Anglo-Australian Observatory/David Malin Images
[Phêk 14-naa milemte]
Engtin nge hêng zawng zawngte hian DNA an neih vek?
[Phêk 15-naa milem]
I rinna humhim tûrin i inpeih reng em?