Inring Rengin Awm Rawh U!
Inring Rengin Awm Rawh U!
“Inring rengin awm rawh u, in rin loh hunah Mihring Fapa a lo kal dâwn si a.” —MT. 24:44.
1, 2. (a) Sakei beihna nêna khaikhin theih Bible hrilh lâwknaa thilthleng chu eng nge ni? (b) Lo thleng tûr chu beihna chuan engtin nge a nghawng che?
KUM tam tak chhûng chu ennawm chhuahtu hmingthang tak pakhat chuan Bengal sakei lian a khawi ngamte nêna inkâwmin mipui a tihlim ṭhîn a. Heti hian a sawi a ni: “Nungchate’n min rin hian, khawvêla thilpêk mawi ber dawng nia inhriatna kan nei ṭhîn,” tiin. Amaherawhchu, October 3, 2003 khân chu an inrinna chu a tâwp ta. A chhan hriat lohvin, a sakei khawite zînga pakhat, pound 380 (kg 172) laia rit chuan ani chu a bei ta si a. Chu beihna chu beisei hauh lova thilthleng a nih avângin, a zirtîrtu chu a inrâlring hman lo a ni.
2 Ngaihvenawm takin, Bible pawhin “sakawlh” beihna chungchâng a sawi a, chu mi atân kan inrâlrin a ngai a ni. (Thu Puan 17:15-18 chhiar rawh.) Chu sakawlh chuan tunge a beih? Rin phâk bâkin vawi leh khatah Diabola khawvêl chu a inṭhen phawk a. Sakawlh sen tak chuan United Nations a entîr a, a “ki sâwm” chuan politics thiltihtheihna zawng zawng a entîr bawk a. Hêng hian nawhchizuar ang Babulon Khaw Ropui, khawvêl sakhaw dik lo infinkhâwm chu rawn bei thutin, a tiboral ang. He thil hi eng hunah nge a lo thlen dâwn? A lo thlen hun tûr nî leh dârkâr chu kan hre lo. (Mt. 24:36) Kan rin loh hunah tak a ni dâwn tih leh chu beihna chu kan hnaih tawh hle tih erawh kan hria a ni. (Mt. 24:44; 1 Kor. 7:29) Chuvângin, chu mi beihna a lo thlen a, Krista chu Rorêltu anga a lo kal hun chuan, kan tân Chhan Chhuaktu a nih kawp theih nân thlarau lama kan lo inrâlrin reng chu a pawimawh hle! (Lk. 21:28) Chutianga inrâlring tûr chuan, inring renga an awm avânga Pathian thutiamte thlen famkimna lo hmu tawh hmân lai Pathian chhiahhlawh mi rinawmte hnên aṭangin kan inzir thei a ni. Chûng thilthleng tak takte chu i rilruah i vawng tlat ang em?
Nova Angin Inring Rengin Awm Rawh
3. Eng dinhmunin nge Nova tân rinawm taka Pathian rawngbâwl tiharsa?
3 Nova chu a dam chhûnga khawvêl dinhmun a ṭha lo hle chung pawhin Pathian thutiamte thlen famkimna a hmuh theih nân inring rengin a awm a ni. Vântirhkoh helte’n mihring tisa pu a, hmeichhe îtawm tak takte an khawsakpui laia Nova hmachhawn tûr harsatnate chu han ngaihtuah teh! Chutiang dân pângngai lova inpâwlna aṭangin mihring aia chungnung, an chakna mi dangte hnehchhiah nâna hmang “Milianho” an lo piang a ni. (Gen. 6:4) Chûng milianhovin an kalna lam apianga buaina an chawh chhuah avânga tharum thawhna a hluar dân tûr chu han ngaihtuah teh. Chuti chuan, suahsualna a lo pung ta hle a, mihring ngaihtuahna leh nungchang chu a chhe lailet dêr a ni. Chuvângin, Lal Chungnungber Jehova chuan chu Pathian ngaihsak lohna khawvêl atâna tâwpna hun a inṭan tih târ langtu thupêk chu a chhuah ta a ni.—Genesis 6:3, 5, 11, 12. *
4, 5. Eng kawngin nge tûn laia kan dinhmun chu Nova dam lai nîte nên a inan?
4 Isua chuan kan hun laia thil awm dân chu Nova dam lai nîte ang a ni dâwn tih a sawi lâwk a. (Mt. 24:37) Entîr nân, keini pawhin thlarau suaksualhote tihbuaina kan hmu ve a ni. (Thup. 12:7-9, 12) Hêng vântirhkoh ramhuaite hian Nova hun laiin mihring tisa an pu a. Tûnah hian mihring angin chang thei tawh lo mah se, anni chuan mi tupawh apui apangte thunun chu an tum tlat a ni. Mite hriat lohvin, hêng mipat hmeichhiatna âtchilhtu ramhuaite chuan leia an thunun theih mite thiltih sual tak leh ṭha lo takte aṭangin hlimna an hmu a ni.—Eph. 6:11, 12.
5 Pathian Thu chuan Diabola chu “tualthat” tia a koh bâkah, “thihna thuneitu” a nih thu a sawi bawk. (Joh. 8:44; Heb. 2:14) Chu chu, a duh apiang tihhlum theihna a nei tihna erawh a ni lo. Mahse, he thlarau suaksual tak hian bumna leh thlêmna a awmtîr a. Mite chu tual thah duhna rilru leh thinlung a neihtîr a ni. Entîr nân, United States rama nau piang 142 zêla pakhat chu mi kut tuara thi tûr anga chhût an ni. Tharum thawhna âtthlâk hluar takte hi Pathian Jehova’n Nova hun lai aia a ngaih theih zâwk i ring em? A ngawihsan mai mai ang em?
6, 7. Engtin nge Nova leh a chhûngte chuan rinna leh Pathian ṭihna an lantîr?
6 A hnuah chuan, Nova chu leia tui tilêta nunna nei zawng zawng tiboral vek tûra Pathian thu tlûkna siam hrilh hriat a lo ni ta a. (Gen. 6:13, 17) Jehova chuan Nova chu thingrem lian tak anga lang lawng tuk tûrin a hrilh a. A chhûngte nên chuan an tuk ṭan ta a ni. Anni chu engin nge thu âwih tûr leh Pathian rorêlna a lo thlen hun atâna inring renga awm tûrin ṭanpui?
7 Rinna leh Pathian ṭihna chuan Nova leh a chhûngte chu Pathian thupêk ang ngeia thil ti tûrin a chêttîr a. (Gen. 6:22; Heb. 11:7) Chhûngkaw lû a nih angin, Nova chu thlarau lamah harhvâng rengin a awm a, chu hmân lai khawvêl suaksual tihbawrhbânin a awm lo. (Gen. 6:9) Ani chuan an chhehvêla awm tharum thawhna nungchang leh hel duhna rilru put hmang chu chhûngkuaa pumpelh tûr an ni tih a hria a. An tân nî tin nun thiltih ang chi-tea inhman lutuk loh chu a pawimawh a ni. Pathian chuan an thawh tûr hna a tuk a, chu chu an chhûngkuaa an thawh tlat a pawimawh hle a ni.—Genesis 6:14, 18 chhiar rawh.
Nova leh A Chhûngte Chu An Inring Reng
8. Nova chhûngte’n Pathian an ngaihsakzia engin nge târ lang?
8 Bible thuziak chuan chhûngkaw lû Nova chanchin a sawi deuh ber a; mahse, a nupui leh a fate leh a monute pawh Jehova betu vek an ni. Zâwlnei Ezekiela chuan chutiang an nihzia a nemnghet a. Ani chuan Nova meuh pawh Ezekiela hun laia dam ni ta se, a felna avânga a fate chhan chhuah an nih loh tûr thu a sawi. Anni chu thuâwih tûr emaw âwih lo tûr emawin an puitling tawh a ni. Chuvângin, anmahni ngeiin Pathian an hmangaih a, a kawngte an ngainatzia an târ lang a ni. (Ezek. 14:19, 20) Nova chhûngte chuan a kaihhruaina an zâwm a, a rinna an ṭâwmpuiin, Pathian pêk an hnathawh dâl tûrin mi dangte an inthununtîr lo.
9. Tûn laia Nova neih ang rinna neite entîrna eng nge sawi theih kan neih?
9 Tûn laiah khawvêl puma kan unau chhûngkaw lûte zînga Nova entawn tûra theih tâwp chhuahtute hmuhna chuan min va tichak tak êm! Anni chuan an chhûngte ei leh bâr, silh leh fên, in leh lo, leh zirna pêk mai chu a tâwk lo tih an hria a. An chhûngte thlarau lam mamawh an pêk a ngai tih an hria a ni. Chutianga tiin, anni chu nakin lawka Jehova thiltih tûr atân inring rengin an awm a ni.
10, 11. (a) Lawng chhûnga an awm laia Nova leh a chhûngte rilru tûr chu eng nge ni? (b) Eng zawhna nge kan inzawh ngai?
10 Nova chuan a nupui te, a fate, leh a monute nên lawng chu kum 50 dâwn lai an tuk a. Lawng an tuk lai chuan, lawngah chuan vawi tam tak an lût chhuak ngei ang. Anni chuan lawng chu tui lût thei lovin an siam a, ei leh in tûrte dah lûtin, nungchate chu an khalh lût a ni. Hei hi han mitthla teh. Atâwp atâwpah chuan an ni nghahhlelh tak chu a lo thleng ta. B.C.E. 2370 a thla hnihna ni 17 chuan an lawng tuk chhûngah chuan an lût ta a. Jehova chuan lawng kawngka chu khârsakin, ruah a lo sûr ṭan ta a. Chu ruah chu khawi emaw laia ruah sûr buan buan mai a ni lo. Vân tukverh, a nih loh leh vân lam tuipui chu inhawngin, ruahpui vânâwn chuan lawng chu a rawn dêng ta a. (Gen. 7:11, 16) Lawng pâwna mite an thih laiin, a chhûnga mite erawh an him a ni. Nova leh a chhûngte chu an va hlimin, Pathian chungah an va lâwm dâwn êm! Anni chuan, ‘Pathian dik nêna lêng dûn a, inring renga kan awm chu a va lâwmawm tak êm!’ an ti ngei ang le. (Gen. 6:9) An hlim leh lâwm dân anga Armageddon zawha awm tûr angah i inmitthla thei em?
11 Engkimtitheia’n he khawvêl suaksual tak titâwp tûra a thutiam a tihfamkimna tûr chu engmahin a dang thei lo. Heti hian inzâwt ang che, ‘Pathian thutiam zawng zawngte chu kim chang takin a hun ruatah tak a lo thleng famkim ngei dâwn tih ka ring nghet tlat em?’ tiin. I rin ngheh tlat chuan, “Pathian ni” lo thleng thuai tûr chu rilrua vawng rengin, inring rengin awm ang che.—2 Pet. 3:11, 12.
Mosia Chu Harhvâng Takin A Awm
12. Engin nge Mosia thlarau lam thlîrna chu tifiah lo thei?
12 Entîrna dang lo en leh ta ila. Tisa lam aṭanga thlîr chuan Mosia chu Aigupta khawvêla dinhmun ṭha tak chelh thei reng a ni a. Pharaoa fanua fa pawm a nih angin, ani chu nasa taka ngaihsân a nih bâkah, ei tûr leh silh tûr ṭha ber berte neiin, nuamsa takin a awm thei ngei ang a, zirna ṭha tak pawh a dawng ngei bawk ang. (Tirhkohte 7:20-22 chhiar rawh.) In hmun lo ram ropui tak dawng thei tûr dinhmunah pawh a ding ngei dâwn a ni.
13. Engtin nge Mosia chuan Pathian thutiamte a ngaihsak reng?
13 Mosia’n a naupan laia a nu leh pate zirtîrna a dawn chuan Aigupta mite milem biakna âtthlâkzia hre tûrin a ṭanpui ngei a rinawm a. (Ex. 32:8) Aigupta lehkha zirna leh lal in ropuina chuan Mosia chu biakna dik a kalsantîr lo. A pi leh pute hnêna Pathian thutiamte chu ngun takin a ngaihtuah ngei ang a, Pathian duhzâwng ti tûra inring renga awm pawh a duh hle ngei bawk ang. Mosia chuan Israela fate hnênah chuan: “LALPA . . . Abrahama Pathian, Isaaka Pathian leh Jakoba Pathian chuan in hnênah hian mi rawn tîr a ni,” tiin a sawi si a.—Exodus 3:15-17 chhiar rawh.
14. Engtin nge Mosia rinna leh huaisenna chu fiah a nih?
14 Nunna nei lo Aigupta pathiante entîrtu milim zawng zawngte ang lo takin, Pathian dik Jehova chu Mosia tân a tak a. “Hmuh theih lohva” chu hmu thei ang maiin a nung a ni. Mosia chuan Pathian mite chu chhuah zalên an ni ang tih a ring a; mahse, a hun tûr erawh a hre lo. (Heb. 11:24, 25, 27) Hebrai mite chhuah zalên a duhzia chu Israel sal tâng pakhat tihduhdaha awm a chhan dânah a lang a ni. (Ex. 2:11, 12) Amaherawhchu, chu chu Jehova hun ruat a ni lo va; chuvângin, Mosia chu ram hla taka râltlân anga a va khawsak a ngai ta a ni. Aigupta lal in nuam tak kalsan a, thlalêra awm chu a harsa ngei ang. Mahse, Jehova kaihhruaina pêk apiang zâwmin inring rengin a awm a ni. Chuvângin, Midian rama kum 40 a hman hnuah Pathian chuan Mosia chu a unaute chhuah zalên tûrin a hmang thei ta a ni. Pathian kaihhruaina zâwmin Mosia chu Aigupta ramah a kîr leh a. Mosia tân Pathian duh dân anga thawk tûra Pathian hna pêk a thawh hun chu a lo thleng ta. (Ex. 3:2, 7, 8, 10) Aigupta a thlen hnu chuan, “mi hring zawng zawnga zaidam lâwtlak” Mosia tân Pharaoa hmaa inlan tûrin rinna leh huaisenna neih a ngai a. (Num. 12:3) Chutiang chuan vawikhat mai ni lo, hri dang a lên leh hmaa a inlan zât tûr pawh hre lovin, hrite a lên ang zêlin vawi tam tak Pharaoa hmaah a inlan nawn fo a ni.
15. Hmasâwnna dâltu a tâwk reng chung pawhin, Mosia chu a Pa vâna mi chawimawi theihna hun remchâng zawng reng tûrin engin nge chêttîr?
15 A hnu kum 40, B.C.E. 1513 aṭanga B.C.E. 1473 chhûngin, Mosia chuan lunghnualna tam tak a tâwk a ni. Chuti chung pawhin, Jehova chawimawi theihna tûr hun remchâng zawng rengin, amah anga awm ve tûrin a unau Israel mite chu tih tak zetin a fuih bawk a ni. (Deut. 31:1-8) Engvângin nge? Ama hming aia Pathian Jehova hming leh a lalchungnunna a hmangaih zâwk avângin. (Ex. 32:10-13; Num. 14:11-16) Lunghnualna emaw, hmasâwnna dâltu emaw kan tâwk reng chung pawhin, Pathian thiltih dân chu a finthlâk zâwkin, a fel zâwk a; tin, a dang zawng aiin a ṭha zâwk tih ring nghet tlat chungin keini pawhin Pathian rorêlna kan thlâwp zêl tûr a ni. (Is. 55:8-11; Jer. 10:23) Chutiang chu i ngaih dân a ni ve em?
Inring Rengin Awm Rawh!
16, 17. Engvângin nge Marka 13:35-37 chuan i tân awmze pawimawh tak a neih?
16 “Fîmkhur ula, inring renga awmin ṭawngṭai rawh u; a hun chu in hre si lo va.” (Mk. 13:33) Isua chuan he vaukhânna thu hi khawvêl suaksual tâwpna tûr chhinchhiahna chungchâng a sawi lai khân a pe a. Marka târ lan anga Isua hrilh lâwkna ropui tak tâwp dân hi lo ngaihtuah teh: “Inring rengin awm rawh u; in neitupa lo haw hun tûr chu tlai lamah nge, zânah nge, âr khuanah nge, zîngah nge a nih dâwn in hre si lo; chutilochuan a lo haw phutin, muhîlin a rawn hmu hlauh dah ang che u. Tin, in hnêna ka sawi hi mi zawng zawng hnêna sawi ka ni. Inring rengin awm rawh u,” tih hi.—Mk. 13:35-37.
17 Isua fuihna thu chuan ngaihtuahna a chawk tho nasa hle. Ani chuan zân chu hmun li-ah a ṭhen a. A ṭhen li-na chu zîng dâr thum vêl aṭanga ni chhuah thleng awh a nih avângin inring renga awm a harsat lai ber a ni ngei ang. Râl veh thiam mite chuan chu mi hun chu hmêlmate “muthilh lai” nanchîn theihna hun a nih avângin, anmahni beih nâna hun ṭha ber niin an hria a ni. Chutiang bawkin thlarau lama khawvêl a muttui lai, kan tûnlai hun hi inring renga awm harsa kan tih lai ber a ni thei ang. Lo sawi lâwk tawh tâwpna leh kan chhandamna atâna kan “fîmkhur” leh ‘inring renga kan awm’ a ṭûl tih rinhlelhna chhe tê pawh kan nei em?
18. Jehova Thuhretute kan nih angin, eng chanvo hlu tak nge kan neih?
18 Atîra kan sawi tâk nungcha khawi ngamtu chu Bengal sakei beihna ata a dam chhuak leh a. Mahse, Bible hrilh lâwkna chuan sakhaw dik lo emaw, he khawvêl suaksual emaw chu lo thleng tûr tâwpnaah a dam khawchhuak dâwn lo rêng rêng tih a târ lang. (Thup. 18:4-8) Pathian chhiahhlawh zawng zawng, apui apangte chuan Nova leh a chhûngte ang bawka Jehova nî atâna inring renga awm tûra an tih theih apiang tih a pawimawhzia chu hre ṭheuh rawh se. Sakhaw dik lo hruaitute, Pathian awm ring lote, leh a awm leh awm loh hriat phâk a ni lo tih ringtute’n an ṭawngkama Siamtu an sawi chhiatna hmun Pathian chawimawi lo khawvêlah hian kan awm a. Mahse, chutiang thilin min nghawng chu kan remti thei lo. Kan ngaihtuah tâk entîrnate chu rilrua vawng rengin, Jehova chu “pathiante Pathian,” a ni, “Pathian ropui tak, chak tak, ṭihbaiawm tak” a nih angin amah thlâwp leh chawimawi theihna hun remchâng chu i zawng reng ang u.—Deut. 10:17. (w11-E 03/15)
[Footnote]
^ par. 3 Genesis 6:3-a târ lan “kum za leh kum sawmhnih” chungchâng hriat nân, Vênnainsang, December 15, 2010 (English) phêk 30-na en rawh.
Kan Hre Chhuak Thei Em?
• Engvângin nge Nova chuan a chhûngte thlarau lam mamawh a dah pawimawh hmasak a ngaih?
• Engtin nge kan hun hi Nova dam lai nîte nêna a inan?
• Lunghnualna a nei chung pawhin, engvângin nge Mosia chuan Jehova thutiamte a ngaihsak tlat?
• Eng Bible hrilh lâwknate’n nge thlarau lama harhvâng reng tûra chêttîr che?
[Zirlai Atâna Zawhnate]
[Phêk 25-naa milem]
Nova leh a chhûngte chuan Pathian Jehova hna an ngaihsak tlat
[Phêk 26-naa milem]
Pathian thutiam thlâwn ngai lo chuan Mosia chu inring renga awm tûrin a ṭanpui