Chhiartute Zawhna Siam . . .

Jehova Thuhretute chuan damdawia inenkawlna an pawm em?

▪ Isua’n “mi chakte chuan dâktawr an ngai lo va, mi bawrhsâwmte zâwkin an ngai a ni,” a ti a. (Matthaia 9:12) Chu chuan damdawi lama mithiamte ṭanpuina dawn chu Pathian Thu nên a inrem lohna a awm lo tih a sihhmuh a ni. Chuvângin, Jehova Thuhretute chuan damdawi leh damdawi lama inenkawlna chu lâwm takin an pawm a. Hrisêlna ṭha neih leh dam rei chu an duh a ni. Kum zabi khatnaa Kristian Luka ang bawk khân, an zînga ṭhenkhat phei chu doctor-te an ni hial a ni.—Kolossa 4:14.

Mahse, Jehova Thuhretute chuan Bible thu bulte nêna inkalh inenkawlna chu an pawm lo. Entîr nân, Bible-in thisen ei a khap avângin, taksa chhawm nun nâna thisen inthun chu an pawm lo a ni. (Genesis 9:4; Leviticus 17:1-14; Tirhkohte 15:28, 29) Pathian Thu chuan “khawlohna,” a nih loh leh dawithiamna lam nêna inkûngkaih inenkawlnate pawh a khap bawk.—Isaia 1:13; Galatia 5:19-21.

Damdawi lama mi thiam tam takte chuan Bible nêna inkalh lo nun chhanhim thei inenkawlna ṭha tak an pe a. Thuhretu tam takte thlan ṭhin chutiang inenkawlna chu Pathian dân kalh inenkawlnate aiin a ṭha zâwk fo.

Hrisêlna chungchângah chuan ngaih dân tam tak a awm ngei mai. Mi pakhat ṭhatpui chu mi dangin an ṭhatpui kher lo thei a ni. Chuvângin, dam lote chuan inenkawlna ṭha leh dik an dawn theih nân damdawi lama mi thiam pakhat aia tam râwn chu an duh ngei ang.—Thufingte 14:15.

Inenkawlna lama Thuhretute duh thlanna siam chu a inang vek lo vang. Pathian Thu chuan Bible dân a kalh loh phawt chuan Kristiante zînga chhia leh ṭha hriatna inang lo tak takte a awm chu a phal a. (Rom 14:2-4) Chuvângin, mi tinte chuan an inenkawl dân tûr eng pawh chu Bible zirtîr an chhia leh ṭha hriatna nêna a inkalh leh kalh loh an chian tûr a ni.—Galatia 6:5; Hebrai 5:14.

Thuhretu chuan thu tlûkna a siam dâwnin, kawng ṭhuam lûn lai tak thleng ṭêp tawh motor khalhtu angah a inchan ṭhîn ang. A hmaa motor a zui a, kawng ṭhuam chu a zawh tlang ve ngawt mai chuan, chhiatna nasa tak a tâwk thei a ni. Motor khalhtu fing chuan kawng ṭhuam a zawh tlang hmain a khalh muang deuh vang a, motor kal dân a en thlithlai hmasa phawt ang. Chutiang bawkin, Thuhretute chuan inenkawl dân tûr chungchângah hmanhmawh takin thu tlûkna an siam lo va, mi nâwlpuite ngaih dân lah an pâwngpaw zui mai hek lo. Chu ai mahin, thu tlûkna an siam hmain an duhthlan tûr neihte ṭha taka bûk tawnin, Bible thu bulte chu an bih chiang hmasa phawt ṭhîn a ni.

Jehova Thuhretute chuan damdawi lama mi thiamte thawhrimna leh inpêkna chu an ngai hlu hle a. Natna ata tihdamna duhawm tak an pêkte avângin an lâwm hle bawk. (w11-E 02/01)